ทฺวิราชโกนาม
[1]
ตโต รชฺเช ปติฏฺฐาย, กสฺสโป ทกฺขิณํ ทิสํ;
อทา กสฺสปนามสฺส, ยุวราชสฺส ธีมโตฯ
[2]
อคฺคาภิเสกํ ทาเปสิ, ยุวราชสฺส ธีตุยา;
ราชกญฺญาย ติสฺสาย, ภริยาเย’ว อตฺตโนฯ
[3]
ยาจกานญฺจ สิปฺปีนํ, อาคตานํ ตโต ตโต;
ทานํ ทณฺฑิสฺสรํ นาม, สทา ทาเปสิ ภูปติฯ
[4]
อาทิปาโท มหินฺโท โส,
วสนฺโต โรหเณ ตทา;
คเหตุํ ราชิโนรฏฺฐ-
มาทาย พลมาคโตฯ
[5]
ตํ สุตฺวา กุปิโต ราชา, พลํ เปเสสิ อตฺตโน;
ยุชฺฌิตฺวา ตํ ปราเชสิ, มหินฺโท โส มหาภโฏฯ
[6]
ตโต ราชา นิวตฺเตตุํ, ปิตรํ ตสฺส เปสยิ;
กสฺสปํ ยุวราชํ ตํ, โส คนฺตฺวา ปุตฺตสนฺติกํฯ
[7]
นานาธมฺมกโถเปตํ, วตฺวา ยุตฺติมเนกธา;
สงฺฆามโต นิวตฺเตตฺวา, ปุตฺตํ โส ปุนราคมิฯ
[8]
อาทิปาโท ตุ โส ปจฺฉา, ฆาเตตฺวา มณฺฑลาธิเป;
กุทฺเธชนปเท ทิสฺวา, อคมาสิ ปุรนฺติกํฯ
[9]
ภิกฺขุสงฺโฆ ตมาเนตฺวา, ทสฺเสสิ วสุธาธิปํ;
ทตฺวา โส ธีตรํ ตสฺสา, เปเสสิ ปุน โรหณํฯ
[10]
นีหริตฺวาน ทุสฺสีเล, นิกายตฺตยวาสีสุ;
คาหาเปสิ นเว ภิกฺขู, อาวาเส ตตฺถ ตตฺถ โสฯ
[11]
ทฺวยาภิเสกชาเตน, อาทิปาเทน สุนุนา;
มหาวิหาเร โพธิมฺหิ, ปํสุํ วฑฺเฒสิ ปูชยํฯ
[12]
อกาสิ จ นิกาเยสุ, ตีสุ พิมฺเพ สิลามเย;
โสวณฺณเย รํสิชาเล, ฉตฺตํ จูฬามณิํ ตถาฯ
[13]
อภยคิริวิหารมฺหิ, ปาสาทํ สกนามกํ;
กตฺวา ตตฺถ นิวาเสตฺวา, ภิกฺขุ คามมทาปยิฯ
[14]
มหิยงฺคณวิหารสฺมิํ, คามํ โส เจติยสฺส’ทา;
สวตฺถํ ปฏิมาภตฺตํ, สพฺพภิกฺขูน ทาปยิฯ
[15]
ถเล ชเล จ สตฺตานํ, อทาสิ อภยํ ตทา;
จาริตฺตปุพฺพราชูนํ, ปริปาเลสิ สพฺพทาฯ
[16]
ตสฺส เสนาปติ เสโน, อิลงฺโคราชวํสโช;
เถริยานํ อกา’วาสํ; ถูปารามสฺส ปจฺฉโตฯ
[17]
ธมฺมารุจิกภิกฺขูนํ, ธมฺมารามมการยิ;
ตถา สาคลิกานญฺจ, กสฺสปเสนนามกํฯ
[18]
หทยุณฺหาภิธานํ โส, กตฺวา เจติยปพฺพเต;
ปริเวณํ อทาธมฺม-รุจิกานญฺจ ภิกฺขูนํฯ
[19]
อารามิกานํ ภิกฺขูนํ, อาราเมสุ ตหิํ ตหิํ;
เอกเมกํ กุฏิํ กตฺวา, ทาเปสิ จ จมูปติฯ
[20]
รตฺตมาลคิริสฺมิํ โส, กตฺวา รมฺมํ ตรํ สุภํ;
กุจิํ อทา สาสนสฺส, สามิกานํ ตปสฺสินํฯ
[21]
มหาวิหาเร กาเรตฺวา, ปวิเวณํ วรํ อทา;
ปํสุกูลิกภิกฺขูนํ, สมุทฺทคิรินามกํฯ
[22]
วาสํ อรญฺเญ กาเรตฺวา, อตฺตโน วํสนามกํ;
มหาวิหาเร ภิกฺขูนํ, วเน นิวาสตํ อทาฯ
[23]
วิหาเรสู จ ชิณฺเณสุ, นวกมฺมมการยิ;
ทาเปสิ อคฺคลํ สพฺพ-ภิกฺขูนํ ชิณฺณจีวเรฯ
[24]
ติสฺสารามํ กริตฺวาน, ภิกฺขูนีนมุปสฺสยํ;
มริจวฏฺฏิมหาโพธิ, ปริหาเร นิเวสยิฯ
[25]
อนุราธปุเร เจว, ปุลตฺถินคเรปิ จ;
อุปสคฺคโรคนาสาย, เวชฺชสาลาปิ การยิฯ
[26]
อตฺตนา กตวาสนํ, โภคคาเม จ ทาปยิ;
ตถารามิกคาเม จ, ปฏิมาภรณญฺจ โสฯ
[27]
เภสชฺชเคหํ กาเรสิ, นคเร ตตฺถ ตตฺถ โส;
ปํสุกูลิกภิกฺขูนํ, ภตฺตํ วตฺถญฺจ ทาปยิฯ
[28]
ขนฺธีกเต อโมเจสิ, ติรจฺฉานคเต พหู;
กปณานญฺจ ทาเปสิ, มหาทานํ จมูปติฯ
[29]
วิจิตฺตํ พฺยญฺชนํ ภตฺตํ, ยาคุํ วิวิธขชฺชกํ;
กตฺวา สูกรรูปญฺจ, คุฬํ ภิกฺขูนํ ทาปยิฯ
[30]
เอวามาทีนิ ปุญฺญานิ, กตฺวา เสนาย นายโก;
เสโน กิตฺตินฺทุปาเทหิ, สพฺพา โอภาสยี ทิสาฯ
[31]
ตสฺเสว ญาตโก กตฺวา, นายโก รกฺขสวฺหโย;
สวารกมฺหิ คามมฺหิ, วิหารํ สุมโนหรํฯ
[32]
มหาวิหารวาสีนํ, สารานํ ปฏิปตฺติยา;
ภิกฺขูนํ โส อทา สาธุ, ฐเปตฺวา วตฺตมุตฺตมํฯ
[33]
เสโน นาม มหาเลโข, มหาเลขกปพฺพตํ;
มหาวิหาเร กาเรสิ, ภิกฺขูนํ วาสมุตฺตมํฯ
[34]
โจฬราชาภิธาโน, จ, อมจฺโจ ตสฺส ราชิโน;
ปริเวณํ อการมฺมํ, นฏฺฐํ ตํ สุปฺปติฏฺฐิตํฯ
[35]
ราชา ตีสุ นิกาเยสุ, รูปกมฺมมโนรมํ;
มณฺฑปานิ วิจิตฺตานิ, เวชยนฺโต ปมานิ จฯ
[36]
กาเรตฺวา ธาตุปูชาโย, กตฺวา ชนมโนหรา;
ยถา กมฺมํ คโต ฐตฺวา, วสฺสานิ ทสสตฺต จฯ
[37]
ทฺวยาภิเสกสญฺชาโต, ยุวราชาถ กสฺสโป;
อาสิ ลทฺธาภิเสโก โส, ลํการชฺเชกมาคเตฯ
[38]
สทฺโธ อาคตมคฺโคว, สาภิญฺโญ วิย ปญฺญวา;
วตฺตา โส มรมนฺติว, จาควา ธนโท วิยฯ
[39]
พหุสฺสุโต ธมฺมกถี, สพฺพสิปฺปวิสารโท;
ยุตฺตายุตฺตวิจาราย, นิปุโณ นยโกวิโทฯ
[40]
อจโล อินฺทลีโล’ว, ฐิโต สุคตสาสเน;
ปรปฺปวาทิวาเตหิ, สพฺเพหิ’ปิ อกมฺปิโยฯ
[41]
มายาสาเฐยฺยมานาทิ, ปาปานญฺจ อโคจโร;
คุณานํ อากโร สพฺพ-รตนานํ วสาคโรฯ
[42]
ภูมิจนฺโท นรินฺโท โส, วํเส ชาตสฺส อตฺตโน;
ทปฺปุฬสฺสาทีปาทสฺส, ยุวราชปทํ อทาฯ
[43]
รชฺชํ ทสหิ ธมฺเมหิ, จตุสงฺคหวตฺถูหิ;
กโรนฺโต ปริปาเลสิ, โลกํ เนตฺตํว อตฺตโนฯ
[44]
โส เธตฺวา สาสนํ สพฺพํ, ธมฺมกมฺเมน สตฺถุโน;
คเหตฺวา นวเก ภิกฺขู, อกาสา’วาสปูรณํฯ
[45]
ทุฏฺฐคามณิราเชน, กตํ มริจวฏฺฏิกํ;
นฏฺฐํ วิหารํ กาเรตฺวา, นานาอาวาส ภูสิตํฯ
[46]
เถรวํสชภิกฺขูนํ, อทา กตฺวา มหามหํ;
เตสํ ปญฺจสตานญฺจ, โภคคาเม จ ทาปยิฯ
[47]
ตตฺถ โส ตุสิเต รมฺเม, เทวสงฺฆปุรกฺขตํ;
เมตฺเตยฺยํ โลกนาถํ ตํ, เทเสนฺตํ ธมฺมมุตฺตมํฯ
[48]
ทสฺเสนฺโต วิย โลกสฺส, วิหาเร สพฺพสชฺชิเต;
นิสินฺโน มณฺฑเป รมฺเม, นานารตนภูสิเตฯ
[49]
นคเรหิ จ สพฺเพหิ, ภิกฺขูหิ ปริวาริโต;
พุทฺธลิลาย ลํกินฺโท, อภิธมฺม มภาสยิฯ
[50]
โสณฺณปฏฺเฏ ลิขาเปตฺวา-ภิธมฺมปิฏกํ ตทา;
ธมฺมสงฺคณิกํ โปตฺถํ, นานารตน ภูสิตํฯ
[51]
กตฺวา นครมชฺฌมฺหิ, กาเรตฺวา เหมมุตฺตมํ;
ตํ ตตฺถ ฐปยิตฺวาน, ปริหารมทาปยิฯ
[52]
สกฺกเสนาปติฏฺฐานํ, ทตฺวา ปุตฺตสฺส อตฺตโน;
ปริหาเร นิโยเชสิ, ตตฺถ ตํ ธมฺมโปตฺถเกฯ
[53]
อนุสํวจฺฉรํ ราชา, ปุรํ เทวปุรี วิย;
วิภูสิตาย เสนาย, สชฺเชตฺวา ปริวาริโตฯ
[54]
เทวราชาว โสภนฺโต, สพฺพาภรณภูสิโต;
หตฺถิขณฺเฑ นิสีทิตฺวา, จรนฺโต ปุรวีถิยํฯ
[55]
มหตา ปริหาเรน, เนตฺวา ตํ ธมฺมสงฺคหํ;
อตฺตนา การิตํ รมฺมํ, วิหารํ สพฺพสชฺชิตํฯ
[56]
ตตฺถ ธาตุคเต รมฺเม, นานารตนภูสิเต;
มณฺฑเป ธาตุปิฐสฺมิํ, ปติฏฺฐาปิย ปูชยิฯ
[57]
คนฺถากรปริเวณํ , มหาเมฆวเน อกา;
นคเร วชฺชสาลา จ, เตสํ คาเม จ ทาปยิฯ
[58]
ภณฺฑิกปริเวณญฺจ, สิลาเมฆญฺจ ปพฺพตํ;
กตฺวา’ภยคิริสฺมิํ โส, เตสํ คามมทาปยิฯ
[59]
โชติวนวิหารสฺมิํ, ราชา ลงฺกาย นายโก;
ภตฺตคฺคสฺส อทา คามํ, ตถา’ภยคิริมฺหิ จฯ
[60]
ทกฺขิณคิรินามสฺส, วิหารสฺส จ ทาปยิ;
คามํ กตญฺญุภาเวน, ราชา ปรมธมฺมิโกฯ
[61]
สกฺกเสนาปติ รมฺมํ, ปริเวณํ สุมาปิย;
อทาสิ สหคาเมหิ, เถริยานํ สนามิกํฯ
[62]
ภริยา วชิรา ตสฺส, เตสํเยว อทาปยิ;
ปริเวณํ กริตฺวาน, สคามํ สกนามกํฯ
[63]
อุปสฺสยํ กริตฺวาน, สา เอว ปทลญฺฉเน;
ภิกฺขูนีนํ อทา เถร-วํเส สพฺพตฺถ ปูชิเตฯ
[64]
สกฺกเสนาปติ มาตา, เทวา’รญฺญก ภิกฺขูนํ;
เถรวํสปฺปทีปานํ, อกา’วาสํ สนามกํฯ
[65]
สา เอว ปฏิพิมฺพสฺส, สตฺถุ มริจวฏฺฏิยํ;
จูฬามณิํ ปาทชลํ, อกา ฉตฺตญฺจ จีวรํฯ
[66]
ราชา ราชาลเยเยว, ราชวํสํ สนามกํ;
อกาสิ ปาฬิกํ นาม, ปาสาทํ สุมโน หรํฯ
[67]
ปูเชสิ ราชินี นาม, ราชิโน ภริยา’ปรา;
ปฏฺฏกญฺจุกปูชาย, เหมมาลิก เจติยํฯ
[68]
ตสฺสา ปุตฺโตสิ สิทฺธตฺโถ, นาม อิสฺสริเย ฐิโต;
สุโต มลยราชาติ, รูเปน มกรทฺธโชฯ
[69]
ราชา ตสฺมิํ มเต กตฺวา, สาลํ ภิกฺขุนมุตฺตมํ;
ทานวฏฺฏํ ปฏฺฐเปตฺวา, ตสฺส ปตฺติมทา ตทาฯ
[70]
เอวํ ธมฺเมน กาเรนฺเต, รชฺชํ ลงฺกาทีเป ตทา;
โจฬราเชน ยุชฺฌิตฺวา, ปณฺฑุราชา ปราชิโตฯ
[71]
ปณฺณาการานิ เนกานิ, พลํ สนฺธาย เปสยิ;
ราชาลํกิสฺสโร สทฺธิํ, มนฺเตตฺวา สจิเวหิ โสฯ
[72]
สนฺนยฺห พลกายํ โส, สกฺกเสนาปติํ สกํ;
พลสฺส นายกํ กตฺวา, มหายิตฺถมุปาคมิฯ
[73]
วิชยํ ปุพฺพราชูนํ, วตฺวา เวลาตเฏ ฐิโต;
อุสฺสาหํ ชนยิตฺวาน, นาวํ อาโรปยี พลํฯ
[74]
พลกายํ สมาทาย, สกฺกเสนาปติํ ตทา;
สุเขน สาครํ ติณฺโณ, ปณฺฑุเทสมุปาคมิฯ
[75]
ทิสฺวา พลญฺจ ตญฺเจว, ปณฺฑุราชา สุมานโส;
เอกจฺฉตฺตํ กริสฺสามิ, ชมฺพุทีปนฺติ อพฺรวิฯ
[76]
พลทฺวยํ คเหตฺวาน, ราชา โส โจฬวํสชํ;
เชตุํ อสกฺกุณิตฺวาน ยุทฺธมุชฺฌิย นิกฺขมิฯ
[77]
ยุชฺฌิสฺสามีติ คนฺตาน, สกฺกเสนาปตี ปุน;
นิสินฺโน อุปสคฺเคน, มโต ปาเปน ปณฺฑุโตฯ
[78]
ลํกิสฺสโร พลสฺสาปิ, เตน โรเคน นานสํ;
สุตฺวา ทยาลุภาเวน, เสนํ อาณาปยี ตโตฯ
[79]
สกฺก เสนาปติฏฺฐานํ, ตสฺส ปุตฺตสฺส’ทา ตทา;
วฑฺเฒสิ เตน ตํ ปุตฺตํ, กตฺวา เสนาย นายกํฯ
[80]
นิกายตฺตยวาสีหิ, ปริตฺตํ นคเร ตทา;
กาเรตฺวา โรคทุพฺพุฏฺฐิ-ภยํ นาเสสิ ชนฺตุนํฯ
[81]
สาสนสฺส จ โลกสฺส, สนฺติํ กตฺวา อเนกธา;
ราชา โส ทสเม วสฺเส, สุเขน ติทิวํ คโตฯ
[82]
ลํการชฺเชปิ ฐตฺวา กถิตติปิฏโก สพฺพวิชฺชาปทีโป,
วตฺตาวาที กวี โส สติธีติวิสโท เทสโก ภาวโก จ;
ปญฺญาสทฺธาทยา วา ปรหิตนิรโต โลกเวทีวทญฺญู;
ราชินฺโท กสฺสโป’ยํ วิย วิมลคุโณ โหตุโลโกปิ สพฺโพฯ
สุชนปฺปสาทสํเวคตฺถาย กเต มหาวํเส
ทฺวิราชโก นาม
ปญฺญาสติโม ปริจฺเฉโทฯ
เอกปญฺญาสติม ปริจฺเฉท