เมนู

สทฺธมฺมจกฺกวตฺติสฺส , สมฺพุทฺธสฺส มเหสิโน;

รูปํ อนนฺตญาณสฺส, ทสฺเสหิ มม โภ อิติฯ

[93]

ทฺวตฺติํสลกฺขณูเปตํ, อสีติพฺยญฺชนุชฺชลํ;

พฺยามปฺปภาปริกฺขิตฺตํ, เกตุมาลาหิ โสภิตํฯ

[94]

นิมฺมาสิ นาคราชา โส, พุทฺธรูปํ มโนหรํ;

ตํ ทิสฺวา’ติ ปสาทสฺส, วิมฺหยสฺส จ ปูริโตฯ

[95]

เอเตน นิมฺมิตํ รูปํ, อีทิสํ กีทิสํ นุโข;

ตถาคตสฺส รูปนฺติ, อาสิ ปิตุนฺนตุนฺนโตฯ

[96]

อกฺขิปูชนฺติ สญฺญาตํ, ตํ สตฺตาหํ นิรนฺตรํ;

มหามหํ มหาราช, การาเปสิ มหิทฺธิโกฯ

[97]

เอวํ มหานุภาโว จ, สทฺโธ จาปิ มหีปติ;

เถโร จ โมคฺคลิปุตฺโต, ทิฏฺฐา ปุพฺเพ วสีหิ เตฯ

สาสนปฺปเวโส นิฏฺฐิโตฯ

โมคฺคลิปุตฺตติสฺสเถราทโย

[98]

ทุติเย สงฺคเห เถรา, เปกฺขนฺตา’นาคเตหิ เต;

สาสโนปทฺทวํ ตสฺส, รญฺโญ กาลมฺหิ อทฺทสุํฯ

[99]

เปกฺขานฺตา สกเล โลเก, ตทุปทฺทวฆาตกํ;

ติสฺสพฺรหฺมานมทฺทกฺขุํ, อจิรฏฺฐายิ ชีวิตํฯ

[100]

เตสํ สมุปสงฺกมฺม, อายาจิํสุ มหาปติํ;

มนุสฺเสสุ’ปปชฺชิตฺวา, ตทุปทฺทวฆาตนํฯ

[101]

อทา ปฏิญฺญํ เตสํ โส, สาสนุชฺโชตนตฺถิโก;

สิคฺควํ จณฺฑวชฺชิญฺจ อโวจุํ ทหเร ยติฯ

[102]

อฏฺฐารสาทิกา วสฺส-สตา อุปริ เหสฺสติ;

อุปทฺทโว สาสนสฺส, น สมฺโภสฺสาม ตํ มยํฯ

[103]

อิมํ ตุมฺหา’ธิกรณํ, โนปคญฺฉิตฺถ ภิกฺขโว;

ทณฺฑกมฺมารหา ตสฺมา, ทณฺฑกมฺมปทญฺหิ โวฯ

[104]

สาสนุชฺโชตนตฺถาย, ติสฺสพฺรหฺมา มหาปติ;

โมคฺคลิพฺราหฺมณฆเร, ปฏิสนฺธิํ คเหสฺสติฯ

[105]

กาเล ตุมฺเหสุ เอโก ตํ, ปพฺพาเชตุ กุมารกํ;

เอโก ตํ พุทฺธวจนํ, อุคฺคณฺหาเปตุ สาธุกํฯ

[106]

อหุ อุปาลิเถรสฺส,

เถโร สทฺธิวิหาริโก;

ทาสโก โสณโก ตสฺส,

ทฺเว เถรา โสณกสฺสิเมฯ

[107]

อหุ เวสาลิยํ ปุพฺเพ-ทาสโก นาม โสตฺถิโย;

ติสิสฺสสตเชฏฺโฐ โส, วสํ อาจริยนฺติเกฯ

[108]

ทฺวาทสวสฺสิโกเยว, เวทปารคโต จรํ;

สสิสฺโส วาลิการาเม, วสนฺตํ กตสงฺคหํฯ

[109]

อุปาลิเถรํ ปสฺสิตฺวา, นิสีทิตฺวา ตทนฺติเก;

เวเทสุ คณฺฐิฐานานิ, ปุจฺฉิ โส ตานิ พฺยากริฯ

[110]

สพฺพธมฺมานุปติโต, เอกธมฺโม หิ มาณว;

สพฺเพ ธมฺมา โอสรนฺติ, เอกธมฺโม หิ โก นุ โสฯ

[111]

อิจฺจาห นามํ สนฺธาย, เถโร มาณวโก ตุ โส;

นา’ญฺญาสิ ปุจฺฉิโต มนฺโต, พุทฺธมนฺโตติ ภาสิโตฯ

[112]

เทหีติ อาห โส อาห, เทม โน เวสธาริโน;

คุรุํ อาปุจฺฉิ มนฺตตฺถํ, มาตรํ ปิตรํ ตถาฯ

[113]

มาณวานํ สเตเห’ส, ตีหิ เถรสฺส สนฺติเก;

ปพฺพชิตฺวาน กาเลน, อุปสมฺปชฺชิ มาณโวฯ

[114]

ขีณาสวสหสฺสํ โส, ทาสกตฺเถรเชฏฺฐกํ;

อุปาลิเถโร วาเจสิ, สกลํ ปิฏกตฺตยํฯ

[115]

คณนา วีติวตฺตา เต, เสสา’ริย ปุถุชฺชนา;

ปิฏกานุคฺคหิตานิ, เยหิ เถรสฺส สนฺติเกฯ

[116]

กาสีสุ โกสโล นาม, สตฺถวาหสุโต อหุ;

คิริพฺพชํ วณิชฺชาย, คโต มาตาปิตูหิ โสฯ

[117]

อคา เวฬุวนํ ปญฺจ-ทสวโส กุมารโก;

มาณวํ ปญฺจปญฺญาส, ปริวาริย ตํ คตาฯ

[118]

สคณํ ทาสกํ เถรํ, ตตฺถ ทิสฺวา ปสีทิย;

ปพฺพชฺชํ ยาจิ โส อาห, ตวา’ปุจฺฉ คุรุํ อิติฯ

[119]

ภตฺตตฺตยมภุญฺชิตฺวา , โสณโก โส กุมารโก;

มาตาปิตูหิ กาเรตฺวา, ปพฺพชฺชานุญฺญมาคโตฯ

[120]

สทฺธิํ เตหิ กุมาเรหิ, ทาสกตฺเถรสนฺติเก;

ปพฺพชฺชํ อุปสมฺปชฺช, อุคฺคณฺหิ ปิฏกตฺตยํฯ

[121]

ขีณาสวสหสฺสสฺส, เถรสิสฺส คณสฺส โส;

อโหสิ ปิฏกญฺญุสฺส, เชฏฺฐโก โสณโก ยติฯ

[122]

อโหสิ สิคฺคโว นาม, ปุเร ปาฏลินามโก;

ปญฺญวา’มจฺจตนโย, อฏฺฐารสสโม ตุ โสฯ

[123]

ปาสาเทสุ วสํ ตีสุ, ฉฬฑฺฒอุตุสาธุสุ;

อมจฺจปุตฺตํ อาทาย, จณฺฑวชฺชิํ สหายกํฯ

[124]

ปุริสานํ ทสทฺเธหิ, สเตหิ ปริวาริโต;

คนฺตฺวาน กุกฺกุฏารามํ, โสณกตฺเถรมทฺทสฯ

[125]

สมาปตฺติสมาปนฺนํ, นิสินฺนํ สํวุตินฺทฺริยํ;

วนฺทิ เตนาลปนฺตํ ตํ, ญตฺวา สงฺฆมปุจฺฉิตํฯ

[126]

สมาปตฺติสมาปนฺนา, นาลปนฺตี’ติ อาหุ เต;

กถนฺนุ วุฏฺฐหนฺตีติ, วุตฺตา อาหํสุ ภิกฺขโวฯ

[127]

ปกฺโกสนาย สตฺถุสฺส, สงฺฆปกฺโกสนาย จ;

ยถา กาลปริจฺเฉทา, อายุกฺขยวเสน จฯ

[128]

วุฏฺฐหนฺตีติ วตฺวาน, เตสํ ทิสฺโว’ปนิสฺสยํ;

ปาเหสุํ สงฺฆวจนํ, วุฏฺฐาย ส ตหิํ อคาฯ

[129]

กุมาโร ปุจฺฉิ กิํ ภนฺเต, นาลปิตฺถาติ อาห โส;

ภุญฺชิมฺห ภุญฺชิตพฺพนฺติ, อาห โภเชถ โน อปิฯ

[130]

อาห อมฺหาทิเส ชาเห, สกฺกา โภชยิตุํ อิติ;

มาตาปิตุ อนุญฺญาย, โส กุมาโรถ สิคฺคโวฯ

[131]

จณฺฑวชฺชี จ เตปญฺจ-สตานิ ปุริสาปิ จ;

ปพฺพชฺชิตฺโว’ปสมฺปชฺชุํ, โสณตฺเถรสฺส สนฺติเกฯ

[132]

อุปชฺฌายนฺติเกเยว, เต ทุเว ปิฏกตฺตยํ;

อุคฺคเหสุญฺจ กาเลน, ฉฬภิญฺญํ ลภิํสุ จฯ

[133]

ญตฺวา ติสฺส ปฏิสนฺธิํ, ตโต ปภุติ สิคฺคโว;

เถโร โส สตฺตวสฺสานิ, ตํ ฆรํ อุปสงฺกมิฯ

[134]

คจฺฉาติ วาจามตฺตมฺปิ, สตฺตวสฺสานิ นาลภิ;

อลตฺถ อฏฺฐเม วสฺเส, คจฺฉาติ วจนํ ตหิํฯ

[135]

ตํ นิกฺขมนฺตํ ปวิสนฺโต, ทิสฺวา โมคฺคลิพฺราหฺมโณ;

กิญฺจิ ลทฺธํ ฆเร โนติ, ปุจฺฉิ อามาติ โส’พฺรวิฯ

[136]

ฆรํ คนฺตฺวาน ปุจฺฉิตฺวา, ทุติเย ทิวเส ตโต;

มุสาวาเทน นิคฺคณฺหิ, เถรํ ฆรมุปาคตํฯ

[137]

เถรสฺส วจนํ สุตฺวา, โส ปสนฺนมโน ทฺวิโช;

อตฺตโน ปกเตน’สฺส, นิจฺจํ ภิกฺขํ ปวตฺตยิฯ

[138]

กเมน’สฺส ปสีทิํสุ, สพฺเพ’ปิ ฆรมานุสา;

โภชาเปสิ ทิโช นิจฺจํ, นิสีทาปิย ตํ ฆเรฯ

[139]

เอวํ กเมน คจฺฉนฺโต, กาเล โสฬสวสฺสิโก;

อหุ ติสฺสกุมาโร โส, ติเวโททธิปารโคฯ

[140]

เถโร กถาสมุฏฺฐานํ, เหสฺสเต’ว ฆเร อิติ;

อาสนานิ น ทสฺเสสิ, ฐเปตฺวา มาณวาสนํฯ

[141]

พฺรหฺมโลกคตตฺตาว, สุจิกาโม อโหสิ โส;

ตสฺมา โส ตสฺส ปลฺลงฺโก, วาสยิตฺวา ลคียติฯ

[142]

อญฺญาสนํ อปสฺสนฺโต, ฐิเต เถเร สสมฺภโม;

ตสฺส ตํ อาสนํ ตสฺส, ปญฺญเปสิ ฆเร ชโนฯ

[143]

ทิสฺวา ตตฺถ นิสินฺนํ ตํ, อาคมฺมา’จริยนฺติกา;

กุชฺฌิตฺวา มาณโว วาจํ, อมนาปํ อุทีรยิฯ

[144]

เถโร มาณว กิํ มนฺตํ, ชานาสีติ ตมพฺรวิ;

ตเมว ปุจฺฉํ เถรสฺส, ปจฺฉา โรเจสิ มาณโวฯ

[145]

ชานามีติ ปฏิญฺญาย, เถเร เถรํ อปุจฺฉิโส;

คณฺฐิฐานานิ เวเทสุ, ตสฺส เถโร’ถ พฺยากริฯ

[146]

คหฏฺโฐเยว เถโร โส,

เวทปารคโต อหุ;

น พฺยากเรยฺย กิํ ตสฺส,

ปภินฺนปฏิสมฺภิโทฯ

ยสฺส จิตฺตํ อุปฺปชฺชติ น นิรุชฺฌติ,

ตสฺส จิตฺตํ นิรุชฺฌิสฺสติ; น อุปฺปชฺชิสฺสติ,

ยสฺส วา ปน จิตฺตํ นิรุชฺฌิสติ น อุปฺปชฺชิสฺสติ;

ตสฺส จิตฺตํ อุปฺปชฺชติ, น นิรุชฺฌตีติฯ

[147]

ตํ จิตฺตยมเก ปญฺหํ, ปุจฺฉิ เถโร วิสารโท;

อนฺธกาโร วิย อหุ, ตสฺส โส ตมโวจ โสฯ

[148]

ภิกฺขุโก นาม มนฺโตติ, พุทฺธ มนฺโตติ โส พฺรวิ;

เทหีติ วุตฺเต โนเวส-ธาริโน ทมฺมิ ตํ อิติฯ

[149]

มาตาปิตูหิ’นุญฺญาโต, มนฺตตฺถาย ส ปพฺพชฺชิ;

กมฺมฏฺฐานมทา เถโร, ปพฺพาเชตฺวา ยถารหํฯ

[150]

ภาวนํ อนุยุญฺชนฺโต, อจิเรน มหามตี;

โสตาผตฺติผลํ ปตฺโต, เถโร ญตฺวาน ตํ ตถาฯ

[151]

เปเสสิ จณฺฑวชฺชิสฺส, เถรสฺสนฺติกมุคฺคหํ;

กาตุํ สุตฺตาภิธมฺมานํ, โสตตฺถา’กาตทุคฺคหํฯ

[152]

ตโต โส ติสฺสทหโร, อารภิตฺวา วิปสฺสนํ;

ฉฬภิญฺโญ อหุ กาเล, เถรภาวญฺจ ปาปุณิฯ

[153]

อตีว ปากโฏ อาสิ, จนฺโท’ว สูริโย’วโส;

โลโก ตสฺส วโจ’มญฺญี, สมฺพุทฺธสฺส วโจปิยฯ

โมคฺคลิปุตฺตติสฺสเถโรทโย นิฏฺฐีโตฯ

[154]

เอกาหํ อุปราชา โส, อทกฺขิ มิควํ คโต;

กีฬมาเน มิเค’รญฺเญ, ทิสฺวา เอตํ วิจินฺตยิฯ

[155]

มิคาปิ เอวํ กิฬนฺติ, อรญฺเญ ติณโคจรา;

น กิฬิสฺสนฺติ กิํ ภิกฺขู, สุขาหารวิหาริโนฯ

[156]

อตฺตโน จินฺติตํ รญฺโญ, อาโรเจสิ ฆรํ คโต;

สญฺญาเปตุํ ตุ สตฺตาหํ, รชฺชํ ตสฺส อทาสิ โสฯ

[157]

อนุโภหิ อิเม รชฺชํ, สตฺตาหํ ตฺวํ กุมารก;

ตโต ตํ ฆาตยิสฺสามิ, อิจฺจ’โวจ มหีปติฯ

[158]

อาหา’ติ ตมฺหิ สตฺตาเห,

ตฺวํ เกนา’สิ กิโส อิติ;

มรณสฺส ภเยนาติ,

วุตฺเต ราชา’ห ตํ ปุนฯ

[159]

สตฺตาหา’หํ มริสฺสํติ, ตฺวํ น กีฬิ อิเม กถํ;

กีฬิสฺสนฺติ ยติ ตาต, สทา มรณสญฺญิโนฯ

[160]

อิจฺเจวํ ภากรา วุตฺโต, สาสนสฺมิํ ปสีทิ โส;

กาเลน มิควํ คนฺตฺวา, เถรมทกฺขิ สญฺญตํฯ

[161]

นิสินฺนํ รุกฺขมูลสฺมิํ, โส มหาธมฺมรกฺขิตํ;

สาลสาขาย นาเคน, พีชยนฺต มนาสวํฯ

[162]

อยํ เถโร วิยา’หมฺปิ, ปพฺพชฺช ชิน สาสเน;

วิหริสฺสํ กทา รญฺเญ, อิติ จินฺตยิ ปญฺญวาฯ

[163]

เถโร ตสฺส ปสาทตฺถํ,

อุปติตฺวา วิหายสา;

คนฺตฺวา อโสการามสฺส,

โปกฺขรญฺโญ ชเล ฐิโตฯ

[164]

อากาเส ฐปยิตฺวาน, จีวรานิ วรานิ โส;

โอคาหิตฺวา โปกฺขรณี, คตฺตานิ ปริสิญฺจถฯ

[165]

ตํ อิทฺธิํ อุปราชา โส, ทิสฺวา’ตีว ปสีทิย;

อชฺเชว ปพฺพชิสฺสํติ, พุทฺธิํจา’กาสิ พุทฺธิมาฯ

[166]

อุปสงฺกมฺม ราชานํ, ปพฺพชฺชํ ยาจิ สาทโร;

นิวาเรตุมสกฺโกนฺโต, ตมาทาย มหีปติฯ

[167]

มหตา ปริวาเรน, วิหารมคมา สยํ;

ปพฺพชิ โส มหาธมฺม-รกฺขิตตฺเถรสนฺติเกฯ

[168]

สทฺธิํ เตน จตุสต-สหสฺสานิ นราปิ จ;

อนุปพฺพชิตานนฺตุ, คณนา จ น วชฺชติฯ

[169]

ภาคิเนยฺโย นรินฺทสฺส, อคฺคิ พฺรหฺมาติ วิสฺสุโต;

อโหสิ รญฺโญ ธีตาย, สงฺฆมิตฺตาย สามิโกฯ

[170]

ตสฺสา ตสฺส สุโต จาปิ,

สุมโน นาม นามโส;

ยาจิตฺวา โส’ปิ ราชานํ,

อุปราเชน ปพฺพชิฯ

[171]

อุปราชสฺส ปพฺพชฺชา, ตสฺสา’โสกสฺส ราชิโน;

จตุตฺเถ อาสิวสฺเสสา, มหาชนหิโตทยาฯ

[172]

ตตฺเถว อุปสมฺปนฺโน, สมฺปนฺนอุปนิสฺสโย;

ฆเฏนฺโต อุปราชา โส, ฉฬ’ภิญฺโญ’รหา อหุฯ

[173]

วิหาเร เตสมารทฺเธ, สพฺเพ สพฺพปุเรสุปิ;

สาธุกํ ตีหิ วสฺเสหิ, นิฏฺฐาเปสุํ มโนรเมฯ

[174]

เถรสฺส อินฺทคุตฺตสฺส, กมฺมาทิฏฺฐายกสฺส ตุ;

อิทฺธิยา จา’สุ นิฏฺฐาสิ, อโสการามสวฺหโยฯ

[175]

ชเนน ปริภุตฺเตสุ, ฐาเนสุ จ ตหิํ ตหิํ;

เจติยานิ อกาเรสิ, รมณียานิ ภูปติฯ

[176]

ปุเรหิ จตุราสีติ-สหสฺเสหิ สมนฺตโต;

เลเข เอกาหมาเนสุํ, วิหารา นิฏฺฐิตา อิติฯ

[177]

เลเข สุตฺวา มหาราชา, มหาเตชิทฺธิ วิกฺกโม;

กาตุกาโม สกิํเยว, สพฺพาราม มหามหํฯ

[178]

ปุเร เภริํ จราเปสิ, สตฺตเม ทิวเส อิโต;

สพฺพารามมโห โหตุ, สพฺพเทเสสุ เอกทาฯ

[179]

โยชเน โยชเน เทนฺตุ, มหาทานํ มหีตเล;

กโรนฺตุ คามารามานํ, มคฺคานญฺจ วิภูสนํฯ

[180]

วิหาเรสุ จ สพฺเพสุ, ภิกฺขุสงฺฆสฺส สพฺพถา;

มหาทานานิ วตฺเตนฺตุ, ยถากาลํ ยถาพลํฯ

[181]

ทีปมาลา ปุมฺผมาลา-ลงฺกาเรหิ ตหิํ ตหิํ;

ตูริเยหิ จ สพฺเพหิ, อุปหารํ อเนกธาฯ

[182]

อุโปสถงฺคานา’ทาย, สพฺเพ ธมฺมํ สุณนฺตุ จ;

ปูชาวิเสเสน’เนเก จ, กโรนฺตุ ตทเหปิ จฯ

[183]

สพฺเพ สพฺพตฺถ สพฺพถา, ยถาณตฺตาธิกาปิ จ;

ปูชา สมฺปฏิยาเทสุํ, เทวโลกมโนรมาฯ

[184]

ตสฺมิํ ทิเน มหาราชา, สพฺพาลงฺการ ภูสิโต;

สโหโรโธ สหามจฺโจ, พโลฆ ปริวาริโตฯ

[185]

อคมาสิ สการามํ, ภินฺทนฺโต วิย เมทินิํ;

สงฺฆมชฺฌมฺหิ อฏฺฐาสิ, วนฺทิตฺวา สงฺฆมุตฺตมํฯ

[186]

ตสฺมิํ สมาคเม อาสุํ, อสีติ ภิกฺขุโกฏิ โย;

อเหสุํ สตสหสฺสํ, เตสุ ขีณาสวา ยติฯ

[187]

นวุติ ภิกฺขุสหสฺสานิ, อหู ภิกฺขุนิโย ตหิํ;

ขิณาสวา ภิกฺขุนิโย, สหสฺสํ อาสุ ตาสุ ตุฯ

[188]

โลกวิวรณํ นาม, ปาฏิหีรํ อกํสุ เต;

ขีณาสวา ปสาทตฺถํ, ธมฺมาโสกสฺส ราชิโนฯ

[189]

จณฺฑาโสโกติ ญายิตฺถ, ปุพฺเพ ปาเปน กมฺมุนา;

ธมฺมาโสโกติ ญายิตฺถ, ปจฺฉา ปุญฺเญน กมฺมุนาฯ

[190]

สมุทฺทปริยนฺตํ โส, ชมฺพุทีปํ สมนฺตโต;

ปสฺสิ สพฺเพ วิหาเร จ, นานาปูชา วิภูสิเตฯ

[191]

อตีว ตุฏฺโฐ เต ทิสฺวา, สงฺฆํ ปุจฺฉิ นิสีทิย;

กสฺส ภนฺเต ปริจฺจาโค, มหาสุคต สาสเนฯ

[192]

เถโร โส โมคฺคลิปุตฺโต, รญฺโญ ปญฺหํ วิยากริ;

ธรมาเน’ปิ สุคเต, นตฺถิ จาคี ตยาสโมฯ

[193]

ตํ สุตฺวา วจนํ ภิยฺโย, ตุฏฺโฐ ราชา อปุจฺฉิ ตํ;

พุทฺธสาสน ทายาโท, โหติ โข มาทิโส อิติฯ

[194]

เถโร ตุ ราชปุตฺตสฺส, มหินฺทสฺสู’ปนิสฺสยํ;

ตเถว ราชธีตาย, สงฺฆมิตฺตาย เปกฺขิยฯ

[195]

สาสนสฺสา’ภิ วุทฺธิญฺจ, ตํ เหตุกม เวกฺขิย;

ปจฺจาภาสถ ราชานํ, โส สาสนธุรนฺธโรฯ

[196]

ตาทิโส’ปิ มหาจาคี, ทายาโท สาสนสฺส น;

ปจฺจยทายโก’จฺเจว, วุจฺจเต มนุชาธีปฯ

[197]

โย ตุ ปุตฺตํ ธีตรํ วา,

ปพฺพชฺชาเปติ สาสเน;

โส สาสนสฺส ทายาโท,

โหติ โน ทายโก อปิฯ

[198]

อถ สาสน ทายาท-ภาวมิจฺฉํ มหีปติ;

มหินฺทํ สงฺฆมิตฺตญฺจ, ฐิเต ตตฺร อปุจฺฉถฯ

[199]

ปพฺพชิสฺสถ กิํ ตาตา, ปพฺพชฺชา มหตี มตา;

ปิตุโน วจนํ สุตฺวา, ปิตรํ เต อภาสิสุํฯ

[200]

อชฺเชว ปพฺพชิสฺสาม, สเจ ตฺวํ เทว อิจฺฉสิ;

อมฺหญฺจ ลาโภ ตุมฺหญฺจ, ปพฺพชฺชาย ภวิสฺสติฯ

[201]

อุปราชสฺส ปพฺพชฺช-กาลโภ ปภุตีหิ โส;

สา จาปิ อคฺคิพฺรหฺมสฺส, ปพฺพชฺชา กตนิจฺฉยาฯ

[202]

อุปรชฺชํ มหีนฺทสฺส, ทาตุกาโม’ปิ ภูปติ;

ตโต’ปิ อธิกาสา’ติ, ปพฺพชฺชํเยว โรจยิฯ

[203]

ปิยํ ปุตฺตํ มหินฺทญฺจ, พุทฺธิรูปพโลทิตํ;

ปพฺพชฺชา เปสิ สมหํ, สงฺฆ มิตฺตญฺจ ธีตรํฯ

[204]

ตทา วีสติวสฺโส โส, มหินฺโท ราชนนฺทโน;

สงฺฆมิตฺตา ราชธีตา, อฏฺฐารสสมา ตทาฯ

[205]

ตทเหว อหุ ตสฺส, ปพฺพชฺชา อุปสมฺปทา;

ปพฺพชฺชา สิกฺขาทานญฺจ, ตสฺสา จ ตทหุ อหุฯ

[206]

อุปชฺฌาโย กุมารสฺส, อหุ โมคฺคลิสวฺหโย;

ปพฺพาเชสิ มหาเทว-ตฺเถโร มชฺฌนฺติโก ปนฯ

[207]

กมฺมวาจํ อกา ตสฺมิํ, โส’ปสมฺปทมณฺฑเล;

อรหตฺตํ มหินฺโท โส, ปตฺโต สปฏิสมฺภิทํฯ

[208]

สงฺฆมิตฺตา’หุ’ปชฺฌายา , ธมฺมปาลาติ วิสฺสุตา;

อาจริยา อายุปาลิ, กาเล สา’สิ อนาสวาฯ

[209]

อุโภ สาสนปชฺโชตา, ลํกาทีโปปการิโน;

ฉฏฺเฐ วสฺเส ปพฺพชิํสุ, ธมฺมาโสกสฺส ราชิโนฯ

[210]

มหามหินฺโท วสฺเสหิ, ตีหิ ทีปปฺปสาทโก;

ปิฏกตฺตยํ มุคฺคณฺหิ, อุปชฺฌายสฺส สนฺติเกฯ

[211]

สา ภิกฺขุนี จนฺทเลขา, มหินฺโท ภิกฺขู สูริโย;

สมฺพุทฺธ สาสนากาสํ, เต สทา โสภยุํ ตทาฯ

[212]

วเน ปาฏลิปุตฺตมฺหา, วเน วนจโร จรํ;

กุนฺตกินฺนริยา สทฺธิํ, สํวาสํ กปฺปยี กิรฯ

[213]

เตน สํวาสมนฺวาย,

สา ปุตฺเต ชนยี ทุเว;

ติสฺโส เชฏฺโฐ กณิฏฺโฐ ตุ,

สุมิตฺโต นาม นามโตฯ

[214]

มหาวรุณตฺเถรสฺส, กาเล ปพฺพชฺช สนฺติเก;

อรหตฺตํ ปาปุณิํสุ, ฉฬภิญฺญํ คุณํ อุโภฯ

[215]

ปาเท กีฏวิเสนา’สิ, ผุฏฺโฐ เชฏฺโฐ สเวทโน;

อาห ปุฏฺโฐ กณิฏฺเฐน, เภสชฺชํ ปสตํ ฆฏํฯ

[216]

รญฺโญ นิเวทนํ เถโร, คิลานวตฺตโต’ปิ โส;

สปฺปิสตฺถญฺจ จรณํ, ปจฺฉาภตฺตํ ปฏิกฺขิปิฯ

[217]

ปิณฺฑาย เจ จรํ สปฺปิํ, ลภเส ตฺวํ ตมาหร;

อิจฺฉาห ติสฺสเถโร โส, สุมิตฺตํ เถรมุตฺตมํฯ

[218]

ปิณฺฑาย จรตา เตน, น ลทฺธํ ปสตํ ฆตํ;

สปฺปิกุมฺภสเตนาปิ, พฺยาธิชาโต อสาธิโยฯ

[219]

เตเนว พฺยาธินา เถโร, ปตฺโต อายุกฺขยนฺติกํ;

โอวทิตฺวาปฺปมาเทน, นิพฺพาตุํ มานสํ อกาฯ

[220]

อากาสมฺหิ นิสีทิตฺวา, เตโชธาตุวเสน โส;

ยถารุจิ อธิฏฺฐาย, สรีรํ ปรินิพฺพุโตฯ

[221]

ชาลาสรีรา นิกฺขมฺม, นิมฺมํสฉาริกํ ฑหิ;

เถรสฺส สกลํ กายํ, อฏฺฐิกานิตุโน ฑหิฯ

[222]

สุตฺวา นิพฺพูติเมตสฺส, ติสฺสเถรสฺส ภูปติ;

อคมาสิ สการามํ, ชโนฆ ปริวาริโตฯ

[223]

หตฺติกฺขนฺธคโต ราชา, ตานฏฺฐิน’วโรปิย;

กาเรตฺวา ธาตุสกฺการํ, สงฺฆํ พฺยาธิมปุจฺฉิตํฯ

[224]

ตํ สุตฺวา ชาตสํเวโค, ปุรทฺวาเรสุ การิย;

สุธาจิตา โปกฺขรณี, เภสชฺชานญฺจ ปูริยฯ

[225]

ปาเปสิ ภิกฺขุสงฺฆสฺส, เภสชฺชานิ ทิเน ทิเน;

มา โหตุ ภิกฺขุสงฺฆสฺส, เภสชฺชํ ทุลฺลภํ อิติฯ

[226]

สุมิตฺตเถโร นิพฺพายิ, จงฺกมนฺโต’ว จงฺกเม;

ปสีทิ สาสเน’ตีว, เตนาปิ จ มหาชโนฯ

[227]

กุนฺติปุตฺตา ทุเว เถรา,

เต โลกหิตการิโน;

นิพฺพายิํสุ อโสกสฺส,

รญฺโญ วสฺสมฺหิ อฏฺฐเมฯ

[228]

ตโต ปภุติ สงฺฆสฺส, ลาโภ’ตีว มหา อหุ;

ปจฺฉา ปสนฺนา จ ชนา, ยสฺมา ลาภํ ปวตฺตยุํฯ

[229]

ปหีนลาภสกฺการา, ติตฺถิยา ลาภการณา;

สยํ กาสายมาทาย, วสิํสุ สห ภิกฺขูหิฯ

[230]

ยถาสกญฺจ เต วาทํ, พุทฺธวาโท’ติ ทีปยุํ;

ยถาสกญฺจ กิริยา, อกริํสุ ยถารุจิฯ

[231]

ตโต โมคฺคลิปุตฺโต โส,

เถโร ถิร คุโณทโย;

สาสนพฺพุทมุปฺปนฺนํ,

ทิสฺวา ตมติกกฺขลํฯ

[232]

ตสฺโส’ปสมเน กาลํ, ทีฆทสฺสี อเวกฺขิย;

ทตฺวา มหินฺทเถรสฺส, มหาภิกฺขุคณํ สกํฯ

[233]

อุทฺธํ คงฺคาย เอโก’ว, อโหคงฺคมฺหิ ปพฺพเต;

วิหาสิ สตฺตวสฺสานิ, วิเวก มนุพฺรูหยํฯ

[234]

ติตฺถิยานํ พหุจตฺตา จ, ทุพฺพจฺจตฺตา จ ภิกฺขโว;

เตสํ กาตุํ น สกฺขิํสุ, ธมฺเมน ปฏิเสธนํฯ

[235]

เตเนว ชมฺพุทีปมฺหิ, สพฺพาราเมสุ ภิกฺขโว;

สตฺตวสฺสานิ นากํสุ, อุโปสถ ปวารณํฯ

[236]

ตํ สุตฺวา มหาราชา, ธมฺมาโสโก มหายโส;

เอกํ อมจฺจํ เปเสสิ, อโสการาม มุตฺตมํฯ

[237]

คนฺตฺวา’ธิกรณํ เอตํ, วุปสมฺม อุโปสถํ;

กาเรหิ ภิกฺขุสงฺเฆน, ปมา’ราเม ตุวํ อิติฯ

[238]

คนฺตฺวาน สนฺนิปาเตตฺวา, ภิกฺขุสงฺฆํ สทุมฺมติ;

อุโปสถํ กโรถาติ, สาเวสิ ราชสาสนํฯ

[239]

อุโปสถํ ติตฺติเยหิ, น กโรม มยํ อิติ;

อโว จ ภิกฺขุสงฺโฆ ตํ, อมจฺจํ มูฬฺหมานสํฯ

[240]

โส’มจฺโจ กติปยานํ, เถรานํ ปฏิปาฏิยา;

อจฺฉินฺทิ อสินา สีสํ, กาเรมีติ อุโปสถํฯ

[241]

ราชภาตา ติสฺสตฺเถโร, ตํ ทิสฺวา กิริยํ ลหุํ;

คนฺตฺวาน ตสฺส อาสนฺเน, สาสนมฺหิ นิสิทิ โสฯ

[242]

เถรํ ทิสฺวา อมจฺโจ โส, คนฺตฺวา รญฺโญ นิเวทยิ;

สพฺพํ ปวตฺติํ ตํ สุตฺวา, ชาตทาโห มหีปติฯ

[243]

สีฆํ คนฺตฺวา ภิกฺขุสงฺฆํ, ปุจฺฉิ อุพฺพิคฺคมานโส;

เอวํ กเตน กมฺเมน, กสฺส ปาปํ สิยา อิติฯ

[244]

เตสํ อปณฺฑิตา เกจิ, ปาปํ ตุยฺหนฺติ เกจิ ตุ;

อุภินฺนํจา’ติ อาหํสุ, นตฺถิ ตุยฺหนฺติ ปณฺฑิตาฯ

[245]

ตํ สุตฺวา’ห มหาราชา, สมตฺโถ อตฺถิ ภิกฺขุน;

วิมติํ เม วิโนเทตฺวา, กาตุํ สาสนปคฺคหํฯ

[246]

อตฺถิ โมคฺคลิปุตฺโต โส,

ติสฺสตฺเถโร รเถสภ;

อิจฺฉาห สงฺโฆ ราชานํ,

ราช ตตฺถา’สิ สาทโรฯ

[247]

วิสุํ ภิกฺขุสหสฺเสน, จตุโร ปริวาริเต;

เถโร นรสหสฺเสน, อมจฺเจ จตุโร ตถาฯ

[248]

ตทเหเยว เปเสสิ, อตฺตโน วจเนน โส;

เถรํ อาเนตุ เม เตหิ, ตถา วุตฺเต สนาคมิฯ

[249]

ตํ สุตฺวา ปุน อฏฺฐ’ตฺถ, เถเร’มจฺเจ จ เปสยิ;

วิสุํ สหสฺสปุริเส, ปุพฺเพ วิย สนาคมิฯ

[250]

ราชา ปุจฺฉิ กถํ เถโร, อาคจฺเฉยฺย นุ โข อิติ;

ภิกฺขู อาหํสุ เถรสฺส, ตสฺส’คมนการณํฯ

[251]

โหติ ภนฺเต อุปตฺถมฺโภ, กาตุํ สาสนปคฺคหํ;

อิติ วุตฺเต มหาราช, เถโร เอสฺสติ โส อิติฯ

[252]

ปุนาปิ เถโร’มจฺเจ จ, ราชา โสฬส โสฬส;

วิสุํ สหสฺส ปุริเส, ตถา วตฺวาน เปสยิฯ

[253]

เถโร มหลฺลตฺเต’ปิ, นาโรหิสฺสติ ยานกํ;

เถรํ คงฺคาย นาวาย, อาเนถา’ติ จ อพฺรวิฯ

[254]

คนฺตฺวา เต ตํ ตถา’โวจุํ,

โส ตํ สุตฺวา’ว อุฏฺฐหิ;

นาวาย เถรํ อาเนสุํ,

ราชา ปจฺจุคฺคมี ตหิํฯ

[255]

ชาณุมตฺตํ ชลํ ราโช’คเหตฺวา ทกฺขิณํ กรํ;

นาวาย โอตรนฺตสฺส, เถรสฺสา’ทาสิ คารโวฯ

[256]

ทกฺขิณํ ทกฺขิเณยฺโย โส, กรํ รญฺโญ’นุกมฺปโก;

อาลมฺพิตฺวา’นุกมฺปาย, เถโร นาวาย โอตริฯ

[257]

ราชา เถรํ นยิตฺวาน, อุยฺยานํ รติวฑฺฒนํ;

เถรสฺส ปาเท โธวิตฺวา, มกฺเขตฺวา จ นิสีทิยฯ

[258]

สมตฺถภาวํ เถรสฺส, วีมํสนฺโต มหีปติ;

ทฏฺฐุกาโม อหํ ภนฺเต, ปาฏิหีรนฺติ อพฺรวิฯ

[259]

กนฺติ วุตฺเต มหีกมฺปํ, อาห ตํ ปุน ราหโส;

สกลาเย’ก เทสาย, กตรํ ทฏฺฐุมิจฺฉสิฯ

[260]

โก ทุกฺกโรติ ปุจฺฉิตฺวา, เอก เทสาย กมฺปนํ;

ทุกฺกรนฺติ สุณิตฺวาน, ตํ ทุฏฺฐุกามตํ พฺรวีฯ

[261]

รถํ อสฺสํ มนุสฺสญฺจ, ปาติญฺโจทก ปูริตํ;

เถโร โยชน สีมาย, อนฺตรมฺหิ จตุทฺทิเสฯ

[262]

ฐปาเปตฺวา ตทฑฺเฒหิ, สห ตํ โยชนํ มหิํ;

จาเลสิ อิทฺธิยา ตตฺร, นิสินฺนสฺส จ ทสฺสยิฯ

[263]

เตนา’มจฺเจน ภิกฺขูนํ, มรเณน’ตฺตโนปิ จ;

ปาปสฺส’ตฺถิตฺต นตฺถิตฺตํ, เถรํ ปุจฺฉิ มหีปติฯ

[264]

ปฏิจฺจ กมฺมํ นตฺถีติ, กิลิฏฺฐํ เจตนํ วินา;

เถโร โพเธสิ ราชานํ, วตฺวา ติตฺติรชาตกํฯ

[265]

วสนฺโต ตตฺถ สตฺตาหํ, ราชุยฺยาเน มโนรเม;

สิกฺขาเปสิ มหีปาลํ, สมฺพุทฺธสมยํ สุภํฯ

[266]

ตสฺมิํเยว จ สตฺตา เห, ทุเว ยกฺเข มหีปติ;

เปเสตฺวา มหิยํ ภิกฺขู, อเสเส สนฺนิปาตยิฯ

[267]

สตฺตเม ทิวเส คนฺตฺวา, สการามํ มโนรมํ;

กาเรสิ ภิกฺขุสงฺฆสฺส, สนฺนิปาตมเสสโตฯ

[268]

เถเรน สห เอกนฺเต, นิสินฺโน สาณิอนฺตเร;

เอเกกลทฺธิเก ภิกฺขุ, ปกฺโกสิตฺวาน สนฺติกํฯ

[269]

กิํวาที สุคโต ภนฺเต, อิติ ปุจฺฉิ มหีปติ;

เต สสฺสตาทิกํ ทิฏฺฐิํ, พฺยากริํสุ ยถาสกํฯ

[270]

เต มิจฺฉาทิฏฺฐิเก สพฺเพ, ราชา อุปฺปพฺพาชาปยี;

สพฺเพ สฏฺฐิสหสฺสานิ, อาสุํ อุปฺปพฺพชาปิตาฯ

[271]

อปุจฺฉิ ธมฺมิเก ภิกฺขู, กิํวาที สุคโต อิติ;

วิภชฺชวาที ตาหํสุ, ตํ เถรํ ปุจฺฉิ ภูปติฯ

[272]

วิภชฺชวาที สมฺพุทฺโธ,

โหติ ภนฺเต’ติ อาห โส;

เถโร’ อามา’ติ ตํ สุตฺวา,

ราชา ตุฏฺฐมโน ตทาฯ

[273]

สงฺโฆ ปิโสธิโต ยสฺมา,

ตสฺมา สงฺโฆ อุโปสถํ;

กโรตุ ภนฺเต อิจฺเจวํ,

วตฺวา เถรสฺส ภูปติฯ

[274]

สงฺฆสฺส รกฺขํ ทตฺวาน, นครํ ปาวิสี สุภํ;

สงฺโฆ สมคฺโค หุตฺวาน, ตทา’กาสิ อุโปสถํฯ

[275]

เถโร อเนก สงฺขมฺหา, ภิกฺขุสงฺฆา วิสารเท;

ฉฬภิญฺเญ เตปิฏเก, ปภินฺนปฏิสมฺภิเทฯ

[276]

ภิกฺขุสหสฺสํ อุจฺจินิ, กาตุํ สทฺธมฺมํ สงฺคหํ;

เตหิ อโสการามมฺหิ, อกา สทฺธมฺม สงฺคหํฯ

[277]

มหากสฺสปตฺเถโร จ, ยสตฺเถโร จ การยุํ;

ยถา เต ธมฺม สํคีติํ, ติสฺสตฺเถโรปิ ตํ ตถาฯ

[278]

ตถาวตฺถุปฺปกรณํ, ปรวาทปฺปมทฺทนํ;

อภาสิ ติสฺสตฺเถโร จ, ตสฺมิํ สํคีติ มณฺฑเลฯ

[279]

เอวํ ภิกฺขุสหสฺเสน, รกฺขาย’โสก ราชิโน;

อยํ นวหิ มาเสหิ, ธมฺม สํคีติ นิฏฺฐิตาฯ

[280]

รญฺโญ สตฺตรเส วสฺเส, ทฺวาสตฺตติสโม อิสิ;

มหาปวารณาย’โส, สํคีติ ตํ สมาปยิฯ

[281]

สาธุการํ ททนฺตีว, สาสนฏฺฐิติ การณํ;

สํคีติ ปริโยสาเน, อกมฺมิตฺถ มหามหีฯ

[282]

หิตฺวา เสฏฺฐํ พฺรหฺมวิมานมฺปิ มนุญฺญํ;

เชคุจฺฉํ โส สาสนเหตุนรโลกํ;

อาคมฺมา’กา สาสนกิจฺจํ กตกิจฺโจ;

โกนาม’ญฺโญ สาสนกิจฺจมฺหิ ปมชฺเชติฯ

สุชนปฺปสาทสํเวคตฺถาย กเต มหาวํเส

ตติยธมฺมสํคีติ นาม

ปญฺจโม ปริจฺเฉโทฯ

ฉฏฺฐปริจฺเฉท