ทฺวิราชโก
[1]
มหานาคนรินฺทสฺส , ภาคิเนยฺโย สุภาคิโย;
โส อคฺคโพธิราชาสิ, อคฺคโพธิคตาสโยฯ
[2]
เตเชน พาหุํ โสมฺเมน, จนฺทํ สมฺปุณฺณมณฺฑลํ;
สุเมรุมจลนฺเตน, คมฺภิเรน มโหทธิํฯ
[3]
วสุนฺธรา ปกมฺเปน, มารุตํ สมฺปวุตฺติยา;
พุทฺธิยามรมนฺตารํ, สุทฺธิยา สรทมฺพรํฯ
[4]
กามโภเคน เทวินฺท, มตฺเถน จ นริสฺสรํ;
ธมฺเมน สุทฺธวาเสฏฺฐํ, วิกฺกเมน มิคาธิปํฯ
[5]
ราชธมฺเมหิ รชฺเชหิ, จกฺกวตฺตินริสฺสรํ;
เวสฺสนฺตรญฺจ ทาเนน, อนุคนฺตฺวา ชเน สุโตฯ
[6]
มาตุลํ อุปราชวฺเห, ภาตรํ ยุวราชเก;
ภาคิเนยฺยญฺจ มลย-ราชฐาเน ฐเปสิ โสฯ
[7]
ฐานนฺตเร ยถาโยคํ-เสฏฺฐามจฺเจ ฐเปสิ จ;
ชนํ สงฺคหวตฺถูหี, ราชธมฺเมหิ จคฺคหิฯ
[8]
เทสํ สโยคฺคํ ปาทาสิ, ยุวราชสฺส ทกฺขิณํ;
วสํ ตตฺถ สิรีวฑฺฒ-มานวาปิํ สคาหยิฯ
[9]
กตฺวา คิริวิหารญฺจ, สงฺฆิกํ ตสฺส ทาปยิ;
เขตฺตานํ ทฺวิสตํ สงฺฆ-โภคตฺถาย มหามติฯ
[10]
อทา มลยราชสฺส, ทาฐานามํ สธีตรํ;
ปริเวณํ สีริสงฺฆ-โพธินามญฺจ การยิฯ
[11]
มหาสิวสฺส กาเรสิ, ปริเวณํ สนามกํ;
ปริวาโร’ปิ ตสฺสาสิ, เอวํ ปุญฺญปรายโนฯ
[12]
กตฺวา สาธุปจาเรน, โปราณํ สงฺคหํ วิธิํ;
อนฺตรายํ วิโสเธตุํ, ชิณฺณญฺจ ปฏิสงฺขริฯ
[13]
กวโย ตสฺส รชฺชมฺหิ, สีหฬาย นิรุตฺติยา;
กาเวยฺเย พหุเก’กาสุํ, วิจิตฺรนยาสาลิโนฯ
[14]
วิหาเร ทกฺขิเณ กาสิ, ปาสาทํ สุมโนหรํ;
อกา นวหิ วสฺเสหิ, ทิเป กณฺฏกโสธนํฯ
[15]
กุรุนฺทนามํ กาเรตฺวา, วิหารํ สพฺพสงฺฆิกํ;
วาปิํ ตนฺนามกํ นาฬิ-เกรารามํ ติโยชนํฯ
[16]
มหาสิววฺหเย เจว, สสฺสํ การยิตุํ อทา;
ลาภสกฺการสมฺมาน-มารามิกสตํ ตทาฯ
[17]
วิหารํ ตํ สมีปมฺหิ, กตฺวา อมฺพิลปสฺสวํ;
คามํ ตนฺนามกํ จาทา, เถริยานํ ตปสฺสีนํฯ
[18]
อุตฺตรวลฺลิวิหารสฺส, รตนํ ทีฆวณฺณิตํ;
ทตฺวา คามํ ปติฏฺเฐสิ, สตฺถุพิมฺพํ สิลามยํฯ
[19]
เกฬิวาเต จ กาเรสิ, สุมนํ นาม ปพฺพตํ;
มหาเตลวฏํโพธิ-ฆเร ปาสาณเวทิกํฯ
[20]
กาเรตฺวา โลหปาสาทํ, ปาสาทมหเน อทา;
ฉตฺติํสานํ สหสฺสานํ, ภิกฺขูนํ โส ติจีวรํฯ
[21]
คามํ ทตฺวา นิโยเชสิ, อารกฺขํ ธีตุ นามกํ;
หตฺถิกุจฺฉิวิหาเรปิ, ปาสาทํ กาสิ พุทฺธิมาฯ
[22]
ทาฐา สิวสฺส ฐตฺวาน, โอวาเท สาธุ ภิกฺขุโน;
สมาจรนฺโต ธมฺเมน, สกฺกจฺจํ ตมุปฏฺฐหิฯ
[23]
มูคเสนาปติํ จากา, วิหารํ โส วิสาลกํ;
คามํ ลชฺชิกเมตสฺส, ทาส โภคาย’ทาสิ จฯ
[24]
มหานาคสฺส ปุญฺญตฺถํ, รญฺโญ ตํนามกํ อกา;
มหาเถรสฺส ตญฺจา’ทา, ราชา เตปิฏกสฺส โสฯ
[25]
อตฺตโน สทิสานญฺจ, โยคีนํ วิคตาลโย;
ภิกฺขูนํ จตุสฏฺฐีนํ, วิหารํ ตํ ตทา อทาฯ
[26]
กตฺวา ตสฺเสว มหา-ปริเวณนิวาสิโน;
ภินฺโนรุทีปํ ทตฺวาน, วฏฺฏกาการปิฏฺฐิโตฯ
[27]
ทกฺขิณคีริทฬฺหวฺเห, มหานาเค จ ปพฺพเต;
กาฬวาปาทิเก จา’กา, วิหาเร โปสถาลเยฯ
[28]
วิหาเร อภเย’กาสิ, มหาโปกฺขรณิํ ตถา;
เจติยปพฺพเต จากา, นาคโสณฺฑิํ ถิโรทิกํฯ
[29]
มหินฺทตฏวาวิญฺจ, การาเปตฺวาน สาธุกํ;
เอติสฺสา มริยาทาย, เถรํ เนตุํ นิโยชยิฯ
[30]
มหามหินฺท เถรมฺหิ, ตํฐานสมุปาคโต;
ตรจฺฉา เอว เนตุนฺติ, กติกญฺเจว การยิฯ
[31]
ฉตฺตํ โสณฺณญฺจ กาเรสิ, นิกาเยสุปิ ตีสุ โส;
สตฺตาฏฺฐนว วาเรสุ, มหคฺฆรตเนหิ จฯ
[32]
มหาตูเป จตุพฺพีส-ภารํ ฉตฺตํ สุวณฺณยํ;
ตตฺถ ตตฺถ จ ปูเชสิ, มหคฺฆํ รตนุตฺตมํฯ
[33]
ทาฐาธาตุฆรํ กตฺวา, วิจิตฺรรตนุชฺชลํ;
กาสิ เหมกรณฺฑญฺจ, โลหนาวญฺจ ปาฬิยํฯ
[34]
มณิเมขลนามญฺจ, พนฺธาเปสิ สพนฺธนํ;
มหามาติญฺจ คณฺเหสิ, มณิหีรกวาปิยํฯ
[35]
ตทา เอโก มหาเถโร, โชติปาลกนามโก;
ปราเชสิ วิวาเทน, ทีเป เวตุลฺลวาทิโนฯ
[36]
ทาฐาปภุตินาโม’ถ, อาทิปาโท’ติลชฺชิโต;
หตฺถมุกฺขิปฺปิ ตํ หนฺตุํ, คณฺโฑ สญฺชายิ ตํขเณฯ
[37]
ราชา ตสฺมิํ ปสีทิตฺวา, วิหาเรเยว วาสยิ;
มาเนน ตํ อนาคมฺม, ทาฐาปภูมโต กิรฯ
[38]
ทตฺวา มหาทิปาทตฺตํ, ภาคิเนยฺยคฺคโพธิโน;
รกฺขิตุํ ตํ นิโยเชสิ, เถรํ โสปิ ตมาจริฯ
[39]
นีลเคหปริจฺเฉทํ, กตฺวา ตสฺเสว โส อทา;
กตฺเววํ พหุธา ปุญฺญํ, จตุตฺติํเส สเม มโตฯ
[40]
อคฺคโพธิ ตโต อาสิ, ราชา ปุพฺพสฺส ราชิโน;
มหลฺลกตฺตานํ ขุทฺท-นาเมน ปริทีปยุํฯ
[41]
โส ทีปํ ปริปาเลสิ, ปุพฺพจาริตฺตโกวิโท;
อกาสิ จ มเหสิํ โส, มาตุลธีตุมตฺตโนฯ
[42]
สงฺฆภทฺทํ อสิคฺคาหํ, กาสิ พนฺธุํ มเหสิยา;
ยถารหมทา เจว, ฐานนฺตรมนาลโยฯ
[43]
กตฺวา เวฬุวนํ ราชา, สาคลีนํ นิโยชยี;
ชมฺพุรนฺตรคลฺลญฺจ, กาสิ มาติกปิฏฺฐิกํฯ
[44]
รญฺโญ ตสฺเส’ว รชฺชมฺหิ, กาลิงฺเคสุ มหีปติ;
สตฺตานํ มรณํ ยุทฺเธ, ทิสฺวา สํวิคฺคมานโสฯ
[45]
อิมํ ทีปมุปาคมฺม, ปพฺพชฺชา กตนิจฺฉโย;
โชติปาลมฺหิ ปพฺพชิ, ราชา สกฺกาสิ ตํ จิรํฯ
[46]
ปธานฐานํ ตสฺส’กา, วิหาเร มตฺตปพฺพเต;
ตสฺสามจฺโจ มเหสี จ, ตเถวา’คมฺม ปพฺพชุํฯ
[47]
รญฺโญ มเหสี สุตฺวาน, ตสฺส ปพฺพชฺชมุตฺตมํ;
สกฺกจฺจํ ตมุปฏฺฐาสิ, รตนวฺหญฺจ การยิฯ
[48]
อทา ราชา อมจฺจสฺส, ปาจีนกณฺฑราชิยํ;
เวตฺตวาสวิหารญฺจ, โส’ทา สงฺฆสฺส ตํ ยติฯ
[49]
ราชตฺเถเรมเต ราชา, โสจิตฺวา ปริเทวิย;
ปธานฐานํ กาเรสิ, จูฬคลฺลวิหารเกฯ
[50]
ปลํนครคญฺเจว, ตสฺส ฐานญฺหิ การยิ;
เอวํ ตทตฺถํ ปุญฺญานิ, พหูนิ’ปิ มหีปติฯ
[51]
โชติปาลิต เถรมฺหิ, ตูปารามมฺหิ เจติยํ;
วนฺทมาเน ปภิชฺชิตฺวา, ภาโค ตํ ปุรโต ปติฯ
[52]
ปกฺโกสิตฺวาน ราชานํ, เถโร ทสฺเสสิ ทุกฺขิโต;
ราชา ทิสฺวาว สํวิคฺโค, กมฺมํ ปฏฺฐปิ ตํขเณฯ
[53]
ทกฺขิณกฺขกธาตุํ โส, โลหปาสาทกุจฺฉิยํ;
สารกฺขํ ฐปยิตฺวาน, รตฺตินฺทิวมปูชยิฯ
[54]
นวกมฺเม จิรายนฺเต, ถูปารามมฺหิ เทวตา;
สุปินํ ตสฺส ทสฺเสสุํ, รตฺติมารามิกา วิยฯ
[55]
สเจ ราชา ปปญฺเจติ, กาตุํ ธาตุฆรํ มยํ;
ธาตุํ คเหตฺวา คจฺฉาม, ยตฺถตตฺถา’ติ ตํขเณฯ
[56]
ราชา ปพุทฺโธ สํวิคฺโค, น จิเรเนว การยิ;
กมฺมํ ธาตุฆเรสพฺพํ, จิตฺตกมฺมาทิสญฺญุตฺตํฯ
[57]
จตสฺโส ปฏิมาโย จ, ปลฺลงฺเก จ สิลามเย;
เหมจฺฉตฺตํ สิลาทนฺต-กมฺมํ เคหมฺหิ สพฺพโสฯ
[58]
มหามจฺจาทโย’กํสุ , กรณฺฑานํ สตํ นว;
เทวานํปิยติสฺสสฺส, กมฺมญฺจ นิขิลํ นวํฯ
[59]
สพฺพุสฺสาเหน กาเรตฺวา, มหาปูชํ ยถารหํ;
อาเนตฺวา โลหปาสาทา, ธาตุํ สพฺพาทเรน โสฯ
[60]
โชติปาลํ มหาเถรํ, สสงฺฆํ ปริวาริย;
ปริหาเรน วฑฺเฒสิ, ธาตุํ ธาตุกรณฺฑเกฯ
[61]
ธาตุเคหสฺส ปาทาสิ, ลงฺกาทีปํ สหตฺตนา;
ลาภคฺคาม-มทา ตสฺสา, รกฺขกานํ มเหสิยาฯ
[62]
นาคทีปมฺหิ เคหญฺจ, ราชายตนธาตุยา;
อุณฺณโลมฆรญฺเจว, ฉตฺตมามลเจติเยฯ
[63]
ตตฺถ คามํ วิหารสฺส, ยาคุทานาย’ทาสิ จ;
วิหารสฺส’ภยสฺสา’ทา, คามมงฺคณสาลกํฯ
[64]
นามํ กตฺวาน โส’กาสิ, อตฺตโน จ มเหสิยา;
ทาฐคฺคโพธิมาวาสํ, วิหาเร อตยุตฺตเรฯ
[65]
เทวี กปาลนาคํ สา, วิหารํ สาธุการิย;
ตสฺเส’วาทา วิหารสฺส, สมฺปนฺนจตุปจฺจยํฯ
[66]
เคหํ เชตวเน กาสิ, ราชา ราชตจุมฺพฏํ;
อุทปานํ มณาเปสิ, โสว โพธิฆรนฺติเกฯ
[67]
คงฺคาตฏํ วลาหสฺสํ, วาปิํ คิริตฏญฺจกา;
มหาปาฬิํปิ วฑฺเฒสิ, ภตนาวญฺจ การยิฯ
[68]
ภิกฺขูนีนํ มเหสี จ, ภตฺตวํสํ สมาทิสิ;
เอวํ ปุญฺญานิ กตฺวา โส, ทิวํ’คา ทสเม สเมฯ
[69]
เอวํ ปุญฺญรตา นราธิปตโย สมฺปนฺนโภคา คมุํ;
มจฺจุสฺเสว วสํ ตโตหิ มติมา สมฺมา ภวสฺสีทิสํ;
ปสฺสนฺโต นิยมํ วิหาย วิธินา สพฺพํ ภเว สงฺคติํ;
นิพฺพานาภิมุโข จเรยฺย ธิติมา ปพฺพชฺชมชฺฌูปโคฯ
สุชนปฺปสาทสํเวคตฺถาย กเต มหาวํเส
ทฺวิราชโก นาม
เอกจตฺตาลีสติโม ปริจฺเฉโทฯ
ทฺวิจตฺตาลีสติม ปริจฺเฉท