เหมตา ราชคิริยา, ตถา สิทฺธตฺถิกาปิ จ;

ปุพฺพเสลิยภิกฺขู จ, ตถา อปรเสลิยาฯ

[13]

วาชิริยา ฉ เอเตหิ, ชมฺพุทีปมฺหิ ภินฺนกา;

ธมฺมรุจิ จ สาคลิยา, ลํกาทีปมฺหิ ภินฺนกาฯ

อาจริยกุลวาทกถา นิฏฺฐิตาฯ

ธมฺมาโสกาภิเสก

[14]

กาฬาโสกสฺส ปุตฺตา ตุ, อเหสุํ ทสภาติกา;

พาวีสติํ เต วสฺสานิ, รชฺชํ สมนุสาสิสุํฯ

[15]

นว นนฺทา ตโต อาสุํ, กเมเนว นราธิปา;

เต’ปิ พาวีสวสฺสานิ, รชฺชํ สมนุสาสิสุํฯ

[16]

โมริยานํ ขตฺติยานํ, วํเส ชาตํ สิริธรํ;

จนฺทคุตฺโตติ ปญฺญาตํ, จาณกฺโก พฺราหฺมโณ ตโตฯ

[17]

นวมํ ธนนนฺทํ ตํ, ฆาเตตฺวา จณฺฑโกธสา;

สกเล ชมฺพุทีปสฺมิํ, รชฺเช สมภิสิญฺจี โสฯ

[18]

โส จตุวีสวสฺสานิํ, ราชา รชฺชมการยิ;

ตสฺส ปุตฺโต พินฺทุสาโร, อฏฺฐวีสติ การยิฯ

[19]

พินฺทุสารสุตา อาสุํ, สตํ เอโก จ วิสฺสุตา;

อโสโก อาสิ เตสํ ตุ, ปุญฺญเตโชพลิทฺธิโกฯ

[20]

เวมาติเก ภาตโร โส, หนฺตฺวา เอกูนกํ สตํ;

สกเล ชมฺพุทีปสฺมิํ, เอกรชฺชมปาปุณิฯ

[21]

ชินนิพฺพานโต ปจฺฉา, ปุเร ตสฺสาภิเสกโต;

สาฏฺฐารสํ วสฺสสต-ทฺวยเมวํ วิชานิยฯ

[22]

ปตฺวา จตูหิ วสฺเสหิ, เอกรชฺชํ มหายโส;

ปุเร ปาฏลิปุตฺตสฺมิํ, อตฺตานมภิเสจยิฯ

[23]

ตสฺสา’ภิเสเกน สมํ, อากาเส ภูมิยํ ตถา;

โยชเน โยชเน อาณา, นิจฺจํ ปวตฺติตา อหุฯ

[24]

อโนตตฺโต ทกากาเช, อฏฺฐเนสุํ ทิเน ทิเน;

เทวา เทโว อกา เตหิ, สํวิภาคํ ชนสฺสจฯ

[25]

นาคลตาทนฺตกฏฺฐํ, อาเนสุํ หิมวนฺตโต;

อเนเกสํ สหสฺสานํ, เทวา เอว ปโหนกํฯ

[26]

อคทา’มลกญฺเจว, ตถาคท หริตกํ;

ตโต’ว อมปกฺกญฺจ, วณฺณคนฺธรสุตฺตมํฯ

[27]

ปญฺจวณฺณานิ วตฺถานิ, ตตฺถปุญฺชนปฏฺฏกํ;

ปีตญฺจ ทิพฺพปานญฺจ, ฉทฺทนฺตทหโต มรุฯ

[28]

มรนฺตา นคเร ตสฺมิํ, มิคสูกรปกฺขิโน;

อาคนฺตฺวาน มหานสํ, สยเมว มรนฺติ จฯ

[29]

คาโว ตตฺถ จราเปตฺวา, วชมาเนนฺติ ทีปิโน;

เขตฺต วตฺถุตฬากาทิํ, ปาเลนฺติ มิคสูกราฯ

[30]

สุมนํ ปุปฺผปฏกํ, อภุตฺตํ ทิพฺพมุปฺปลํ;

วิเลปนํ อญฺชนญฺจ, นาคานาคาวิมานโตฯ

[31]

สาลิวาหสหสฺสานิ, นวุติํ ตุ สุวา ปน;

ฉทฺทนฺตทหโตเยว, อาหริํสุ ทิเน ทิเนฯ

[32]

เต สาลินิตฺถุสกเณ, อขณฺเฑตฺวาน ตณฺฑุเล;

อกํสุ มูสิกา เตหิ, ภตฺตํ ราชกุเล อหุฯ

[33]

อกํสุ สสฺสตํ ตสฺส, มธูนิ มธุมกฺขิกา;

ตถา กมฺมารสาลาสุ, อจฺฉากูฏานิ ปาตยุํฯ

[34]

กรวิกา สกุณิกา, มนุญฺญมธุรสฺสรา;

อกํสุ ตสฺสา’คนฺตฺวาน, รญฺโญ มธุรวสฺสิตํฯ

[35]

ราชา’ภิสิตฺโต โส’โสโก,

กุมารํ ติสฺสสวฺหยํ;

กณิฏฺฐํ สํโสทริยํ, อุปรชฺเช’ภิเสจยิฯ

ธมฺมาโสกาภิเสโก นิฏฺฐิโต

นิคฺโรธสามเณร ทสฺสน

[36]

ปิตา สฏฺฐิสหสฺสานิ, พฺราหฺมเณ พฺรหฺมปกฺขิเก;

โภเชสิ โสปิ เตเยว, ตีณิ วสฺสานิ โภชยิฯ

[37]

ทิสฺวา’นุปสมํ เตสํ, อโสโก ปริเวสเน;

วิเจยฺย ทานํ ทสฺสนฺติ, อมจฺเจ สนฺนิโยชิยฯ

[38]

อาณาปยิตฺวา มติมา, นานาปาสณฺฑิเก วิสุํ;

วีมํสิตฺวา นิสชฺชาย, โภชาเปตฺวา วิสชฺชยิฯ

[39]

กาเล วาตายนคโต, สนฺตํ รจฺฉาคตํ ยติํ;

นิคฺโรธสามเณรํ โส, ทิสฺวา จิตฺตํ ปสาทยิฯ

[40]

พินฺทุสารสฺส ปุตฺตานํ, สพฺเพสํ เชฏฺฐภาตุโน;

สุมนสฺส กุมารสฺส, ปุตฺโต โส หิ กุมารโกฯ

[41]

อโสโก ปิตรา ทินฺนํ, รชฺชมุชฺเชนิยญฺหิ โส;

หิตฺวา’คโต ปุปฺผปุรํ, พินฺทุสาเร คิลานเกฯ

[42]

กตฺวา ปุรํ สกายตฺตํ, มเต ปิตริ ภาตรํ;

ฆาเตตฺวา เชฏฺฐกํ รชฺชํ, อคฺคเหสิ ปุเร วเรฯ

[43]

สุมนสฺส กุมารสฺส, เทวี ตนฺนามิกา ตโต;

คพฺภินี นิกฺขมิตฺวาน, ปาจินทฺวารโต พหิฯ

[44]

จณฺฑาลคาม มคมา, ตตฺถ นิคฺโรธเทวตา;

ตมาลปิยนาเมน, มา ปตฺวา ฆรกํ อทาฯ

[45]

ตทเห’ว วรํ ปุตฺตํ, วิชายิตฺวา สุตสฺส สา;

นิคฺโรโธติ อกา นามํ, เทวตา นุคฺคหานุคาฯ

[46]

ทิสฺวา ตํ เชฏฺฐจณฺฑาโล, อตฺตโน สามินิํ วิย;

มญฺญนฺโต ตํ อุปฏฺฐาสิ, สตฺตวสฺสานิ สาธุกํฯ

[47]

ตํ มหาวรุโณ เถโร, ตทา ทิสฺวา กุมารกํ;

อุปนิสฺสย สมฺปนฺนํ, อรหา ปุจฺฉิ มาตรํฯ

[48]

ปพฺพาเชสิ ขุรคฺเค โส, อรหตฺตมปาปุณิ;

ทสฺสนาโย’ป คจฺฉนฺโต, โส ตโต มาตุเทวิยาฯ

[49]

ทกฺขิเณน จ ทฺวาเรน, ปวิสิตฺวา ปุรุตฺตมํ;

ตํ คามคามิมคฺเคน, ยาติ ราชงฺคเณ ตทาฯ

[50]