หานิํ ทิสฺวาน สตฺตานํ, ตทา ภิกฺขู สมาคตา;
จิรฏฺฐิตตฺถํ ธมฺมสฺส, โปตฺถเกสุ ลิขาปยุํฯ
[104]
วฏฺฏคามณิ อภโย, ราชา รชฺชมการยิ;
อิติ ทฺวาทสวสฺสานิ, ปญฺจมาเสสุ อาทิโตฯ
[105]
อิตี ปรหิต มตฺตโน หิตญฺจ,
ปฏิลภิยิสฺสริยํ กโรติ ปญฺโญ;
วิปุลมปิ กุพุทฺธิลทฺธโภวํ,
อุภยหิตํ น กโรติ โภคลุทฺโธ’ติฯ
สุชนปฺปสาทสํเวคตฺถาย กเต มหาวํเส
ทสราชโก นาม
เตตฺติํสติโม ปริจฺเฉโทฯ
จตุตฺติํสติม ปริจฺเฉท
เอกาทสราชทีปโน
[1]
ตทจฺจเย มหาจูลี-มหาติสฺโส อการยิ;
รชฺชํ จุทฺทสวสฺสานิ, ธมฺเมน จ สเมน จฯ
[2]
สหตฺเถน กตํ ทานํ, โส สุตฺวาน มหปฺผลํ;
ปฐเมเยว วสฺสมฺหิ, คนฺตฺวา อญฺญาตเวสวาฯ
[3]
กตฺวาน สาลิลวนํ, ลทฺธาย ภติยา ตโต;
ปิณฺฑปาตํ มหาสุมฺม-เถรสฺสา’ทา มหีปติฯ
[4]
โสณฺณคิริมฺหิ ปุน โส, ตีณิวสฺสานิ ขตฺติโย;
คุฬยนฺตมฺหิ กตฺวาน, ภติํลทฺธา คุเฬ ตโตฯ
[5]
เต คุเฬ อาหราเปตฺวา, ปุรํ อาคมฺม ภูปติ;
ภิกฺขุสงฺฆสฺส ปาทาสิ, มหาทานํ มหีปติฯ
[6]
ติํสภิกฺขุสหสฺสสฺส, อทา อจฺฉาทนานิ จ;
ทฺวาทสนฺนํ สหสฺสานํ, ภิกฺขูนีนํ ตเถว จฯ
[7]