ปุญฺญานิ เอวมมลานิ สยญฺจสนฺโต,
กุพฺพนฺติ สพฺพวิภวุตฺตมปตฺติ เหตุ;
กาเรนฺติ จาปิหิ’ขิลา ปริสุทฺธจิตฺตา,
นานาวิเสสชานตา ปริวารเหตู’’ติฯ
สุชนปฺปสาท สํเวคตฺถาย กเต มหาวํเส
ธาตุนิธานํ นาม
เอกติํสติโม ปริจฺเฉโทฯ
ทฺวตฺติํสติม ปริจฺเฉท
ตุสิตปุรคมนํ
[1]
อนิฏฺฐิเต ฉตฺตกมฺเม, สุธากมฺเม จ เจติเย;
มารณนฺติกโรเคน, ราชา อาสิ คิลานโกฯ
[2]
ติสฺสํ ปกฺโกสยิตฺวา โส, กนิฏฺฐํ ทีฆวาปิโต;
‘‘ถูเป อนิฏฺฐิตํ กมฺมํ, นิฏฺฐาเปหีติ อพฺรวิฯ
[3]
ภาตุโน ทุพฺพลตฺตาโส, ตุนฺนวาเยหิ การิย;
กญฺจุกํ สุทฺธวตฺเถหิ, เตน ฉาทิย เจติยํฯ
[4]
จิตฺตกาเรหิ กาเรสิ, เวทิกํ ตตฺถ สาธุกํ;
ปนฺติปุณฺณฆฏานญฺจ, ปญฺจงฺคุลกปนฺติกํฯ
[5]
ฉตฺตากาเรหิ กาเรสิ, ฉตฺตํ เวฬุมยํ ตถา;
ขรปตฺตมเย จนฺท-สูริเย มุทฺธเวทิยํฯ
[6]
ลาขากุงฺกุมเกเห’ตํ, จิตฺตยิตฺวา สุจิตฺติตํ;
รญฺโญ นิเวทยิ’’ถูเป, กตฺตพฺพํ นิฏฺฐิตํ’’อิติฯ
[7]
สิวิกาย นิปชฺชิตฺวา, อิธาคนฺตฺวา มหีปติ;
ปทกฺขิณํ กริตฺวาน, สิวิกาเย’ว เจติยํฯ
[8]
วนฺทิตฺวา ทกฺขิณทฺวาเร, สยเน ภูมิสนฺถเต;
สยิตฺวา ทกฺขิณปสฺเสน, โส มหาถูป มุตฺตมํฯ
[9]
สยิตฺวา วามปสฺเสส, โลหปาสาท มุตฺตมํ;
ปสฺสนฺโต สุมโน อาสิ, ภิกฺขุสงฺฆปุเรกฺขโตฯ
[10]
คิลานปุจฺฉนตฺถาย, อาคตาหิ ตโต ตโต;
ฉนฺนวุติโกฏิโย ภิกฺขู, ตสฺมิํ อาสุํ สมาคเมฯ
[11]
คณสชฺฌายมกรุํ, วคฺคพนฺเธน ภิกฺขโว;
เถรปุตฺตาภยํ เถรํ, ตตฺถา’ทิสฺวา มหีปติฯ
[12]
อฏฺฐวีส มหายุทฺธํ, ยุชฺฌนฺโต อปราชยํ;
โย โส น ปจฺจุทาวตฺโต, มหาโยโธ วสี มมฯ
[13]
มจฺจุยุทฺธมฺหิ สมฺปตฺเต, ทิสฺวา มญฺเญ ปราชยํ;
อิทานิ โส มํ โน เปติ, เถโร เถรปุตฺตภโยฯ
[14]
อิติ จินฺตยิ โสเถโร, ชานิตฺวา ตสฺส จินฺติตํ;
กรินฺทนทิยา สิเส, วสํ ปญฺชลิปพฺพเตฯ
[15]
ปญฺจขีณาสวสต-ปริวาเรน อิทฺธิยา;
นภสาคมฺม ราชานํ, อฏฺฐาสิ ปริวาริยฯ
[16]
ราชา ทิสฺวา ปสนฺโน ตํ, ปุรโต จ นิสีทิย;
ตุมฺเห ทสมหาโยเธ, คณฺหิตฺวาน ปุเร อหํฯ
[17]
ยุชฺฌิํ อิทานิ เอโก’ว, มจฺจุนา ยุทฺธมารภิํ;
มจฺจุสตฺตุํ ปราเชตุํ, น สกฺโกมี’’ติ อาห จฯ
[18]
อาห เถโร ‘‘มหาราช-มา ภายิ มนุชาธิป;
กิเลสสตฺตุํ อชิตฺวา, อเชยฺโย มจฺจุสตฺตุโกฯ
[19]
สพฺพมฺปิ สงฺขารคตํ, อวสฺสํเยว ภิชฺชติ;
‘‘อนิจฺจา สพฺพสงฺขารา’’, อิติ วุตฺตํหิ สตฺถุนาฯ
[20]
ลชฺชา สารชฺชรหิตา, พุทฺเธเป’ติ อนิจฺจตา;
ตสฺมา อนิจฺจา สงฺขารา, ทุกฺขา’นตฺตาติ จินฺตยฯ
[21]
ทุติเย อตฺตาภาเวปิ, ธมฺมจฺฉนฺโท มหาหิเต;
อุปฏฺฐิเต เทวโลเก, หิตฺวา ทิพฺพํ สุขํ ตุวํฯ
[22]
อิธาคมฺม พหุํ ปุญฺญํ, อกาสิ จ อเนกธา;
กรณมฺเปกรชฺชสฺส, สาสนุชฺโชตนายเตฯ
[23]
มหาปุญฺญกตํ ปุญฺญํ, ยาวชฺชทิวสา ตยา;
สพฺพํนุสฺสรเมวํ เต, สุขํ สชฺชุ ภวิสฺสติฯ
[24]
เถรสฺสวจนํ สุตฺวา, ราชา อตฺตมโน อหุ;
‘‘อวสฺสโย มจฺจุยุทฺเธปิ, ตฺวํ เม สี’’ติ อภาสิตํฯ
[25]
ตทา จ อาหราเปตฺวา, ปหฏฺโฐ ปุญฺญ โปตฺถกํ;
วาเจตุํ เลขกํ อาห, โส ตํ วาเจสิ โปตฺถกํฯ
[26]
เอกูนสตวิหารา, มหาราเชน การิตา;
เอกูนวีสโกฏีหิ, วิหาโร มริจ วฏฺฏิ จฯ
[27]
อุตฺตโม โลหปาสาโท,
ติํสโกฏีหิ การิโต;
มหาถูเป อนคฺฆานิ,
การิตา จตุวีสติฯ
[28]
มหาถูปมฺหิ เสสานิ, การิตานิ สุพุทฺธินา;
โกฏิสหสฺสํ อคฺฆนฺติ, มหาราชา’’ติ วาจยิฯ
[29]
‘‘โกฏฺฐนามมฺหิ มลเย, อกฺขกฺขายิก ฉาตเก;
กุณฺฑลานิ มหคฺฆานิ, ทุเว ทตฺวาน คณฺหิยฯ
[30]
ขีณาสวานํ ปญฺจนฺนํ, มหาเถราน มุตฺตโม;
ทินฺโน ปสนฺนจิตฺเตน, กงฺคุอมฺพิลปิณฺฑโกฯ
[31]
จูฬงฺคนิย ยุทฺธมฺหิ, ปราชิตฺวา ปลายตา;
กาลํ โฆสาปยิตฺวาน, อาคตสฺส วิหายสาฯ
[32]
ขีณาสวสฺส ยติโน, อตฺตานมนเปกฺขิย;
ทินฺนํ สรกภตฺต’นฺติ, วุตฺเต อาห มหีปติฯ
[33]
วิหารมหสตฺตาเห, ปาสาทสฺส มเหตถา;
ถูปารมฺเภ ตุ สตฺตาเห, ตถา ธาตุนิธานเกฯ
[34]
จาตุทฺทิสสฺส อุภโต, สงฺฆสฺส อุภโต มยา;
มหารหํ มหาทานํ, อวิเสสํ ปวตฺติตํฯ
[35]
มหาเวสาขปูชา จ, จตุวีสติ การยิ;
ทีเป สงฺฆสฺส ติกฺขตฺตุํ, ติจีวรมทาปยิฯ
[36]
สตฺตสตฺต ทินาเนว, ทีเป รชฺชมหํ อิมํ;
ปญฺจกฺขตฺตุํ สาสนมฺหิ, อทาสิํ หฏฺฐมานโสฯ
[37]
สตตํ ทฺวาทสฐาเน, สปฺปินา สุทฺธวฏฺฏิยา;
ทีปสหสฺสํ ชาเลสิํ, ปูเชนฺโต สุคตํ อหํฯ
[38]
นิจฺจํ อฏฺฐารสฐาเน, วชฺเชหิ วิหิตํ อหํ;
คิลาน ภตฺตเภสชฺชํ, คิลานานมทาปยิํฯ
[39]
จตุตฺตาลีสฐานมฺหิ, สงฺขตํ มธุปายสํ;
ตตฺตเกสฺเวว ฐาเนสุ, เตลุลฺโลปกเมว จฯ
[40]
ฆเต ปกฺเก มหาชาล, ปูเว ฐานมฺหิ ตตฺตเก;
ตเถว สห ภตฺเตหิ, นิจฺจ เอมว อทาปยิํฯ
[41]
อุโปสเถสุ ทิวเสสุ, มาเส มาเส จ อฏฺฐสุ;
ลํกาทีเป วิหาเรสุ, ทีป เตลมทาปยิํฯ
[42]
ธมฺมทานํ มหนฺตนฺติ, สุตฺวา อมิสทานโต;
โลห ปาสาทโต เหฏฺฐา, สงฺฆมชฺฌมฺหิ อาสเนฯ
[43]
‘‘โอสาเรสฺสามิ สงฺฆสฺส, มงฺคลสุตฺต’’มิจฺจหํ;
นิสินฺโน โอสารยิตุํ, นาสกฺขิํ สงฺฆคารวาฯ
[44]
ตโตปฺปภุติ ลํกาย, วิหาเรสุ ตหิํ ตหิํ;
ธมฺมกถํ กถาเปสิํ, สกฺกริตฺวาน เทสเกฯ
[45]
ธมฺมกถิก สฺเสกสฺส, สปฺปิผาณิตสกฺขรํ;
นาฬิํ นาฬิมทาเปสิํ, ทาเปสิํ จตุรงฺคุลํฯ
[46]
มุฏฺฐิกํ ยฏฺฐิมธุกํ, ทาเปสิํ สาฏกทฺวยํ;
สพฺพํปิสฺสริเย ทานํ, นเม หาเสสิ มานสํฯ
[47]
ชีวิตํ อนเปกฺขิตฺวา, ทุคฺคเตน สตา มยา;
ทินฺน ทาน ทฺวยํเยว, ตํ เม หาเสสิ มานสํฯ
[48]
ตํ สุตฺวา อภโย เถโร, ตํ ทานทฺวยเมว โส;
รญฺโญ จิตฺตปฺปสาทตฺถํ, สํ วณฺเณสิ อเนกธาฯ
[49]
เตสุ ปญฺจสุ เถเรสุ, กงฺคุอมฺพิลคาหโก;
มลิย เทว มหาเถโร, สุมนกูฏมฺหิ ปพฺพเตฯ
[50]
นวนฺนํ ภิกฺขุสตานํ, ทตฺวา ตํ ปริภุญฺชิ โส;
ปถวีจาลโก ธมฺม, สุตฺตเถโร ตุ ตํ ปนฯ
[51]
กลฺยาณิกวิหารมฺหิ, ภิกฺขูนํ สํวิภาชิย;
ทสทฺธส ตสงฺขานํ, ปริโภค มกาสยํฯ
[52]
ตลงฺคร วาสิโก ธมฺม, ทินฺนตฺเถโร ปิยงฺคุเก;
ทีเป ทสสหสฺสานํ, ทตฺวาน ปริภุญฺชิตํฯ
[53]
มงฺคณวาสิโก ขุทฺท, ติสฺสตฺเถโร มหิทฺธิโก;
เกลาเส สฏฺฐิสหสฺสานํ, ทตฺวาน ปริภุญฺชิ ตํฯ
[54]
มหาพฺยคฺโฆ จ เถโร ตํ, อุกฺกนครวิหารเก;
ทตฺวา สตานํ สตฺตานํ, ปริโภคมกาสยํฯ
[55]
สรกภตฺตคาหี ตุ, เถโร ปิยงฺคุทีปเก;
ทฺวาทส ภิกฺขุสหสฺสานํ, ทตฺวาน ปริภุญฺชิตํฯ
[56]
อิติ วตฺวา’ภยตฺเถโร, รญฺโญ หาเสสิ มานสํ;
ราชา จิตฺตํ ปสาเทตฺวา, ตํ เถรํ อิธ มพฺรุวิฯ
[57]
‘‘จตุวีสติวสฺสานิ, สงฺฆสฺส อุปการโก;
อห เมวํ โหตุ กาโย’ปิ, สงฺฆสฺส อุปการโกฯ
[58]
มหาถูป ทสฺสนฐาเน, สงฺฆสฺส กมฺมมาฬเก;
สรีรํ สงฺฆทาสสฺส, ตุมฺเห ฌาเปถ เม’’อิติฯ
[59]
กนิฏฺฐํ อาห ‘‘โภ ติสฺส, มหาถูเป อนิฏฺฐิตํ;
นิฏฺฐาเปหิ ตุวํ สพฺพํ, กมฺมํ สกฺกจฺจ สาธุกํฯ
[60]
สายํ ปาโต จ ปุปฺผานิ, มหาถูปมฺหิ ปูชย;
ติกฺขตฺตุํ อุปหารญฺจ, มหาถูปสฺส การยฯ
[61]
ปฏิยาทิตญฺจ ยํ วตฺตํ, มยา สุคต สาสเน;
สพฺพํ อปริหาเปตฺวา, ตาต วตฺตย ตํ ตุวํฯ
[62]
สงฺฆสฺส ตาต กิจฺเจสุ, มา ปมชฺชิตฺถ สพฺพทา’’;
อิตํ ตํ อนุสาสิตฺวา, ตุณฺหี อาสิ มหีปติฯ
[63]
ตงฺขณํ คณสชฺฌายํ, ภิกฺขุสงฺโฆ อกาสิ จ;
เทวตา ฉ รเถ เจว, ฉหิ เทเวหิ อานยุํฯ
[64]
ยาจุํ วิสุํ วิสุํ เทวา, ราชานํ เต รเถ ฐิตา;
‘‘อมฺหากํ เทวโลกํ ตฺวํ, เอหิ ราชมโนรมํ’’ฯ
[65]
ราชา เตสํ วโจ สุตฺวา, ‘‘ยาว ธมฺมํ สุโณมหํ;
อธิวาเสถ ตาวา’’ติ, หตฺถากาเรน วารยิฯ
[66]
วาเรติ คณสชฺฌาย, มีภิ มนฺตฺวาน ภิกฺขโว;
สชฺฌายํ ฐปยุํ ราชา, ปุจฺฉิตํ ฐานการณํฯ
[67]
‘‘อาคเมถา’’ติ สญฺญาย, ทินฺนตฺตา’ติ วทิํสุ เต;
ราชา ‘‘เนตํ ตถา ภนฺเต’’, อิติ วตฺวาน ตํ วทิฯ
[68]
ตํ สุตฺวาน ชนา เกจิ, ‘‘ภีโต มจฺจุภยา อยํ;
ลาลปฺปตี’’ติ มญฺญิํสุ, เตสํ กงฺขาวิโนทนํฯ
[69]
กาเรตุํ อภยตฺเถโร, ราชานํ เอวมาห โส;
‘‘ชานาเปตุํ กถํ สกฺกา, อานีตา เต รถา’’อิติฯ
[70]
ปุปฺผทานํ ขิปาเปสิ, ราช นภสิ ปณฺฑิโต;
ตานิ ลคฺคานิ ลมฺพิํสุ, รถีสาสุ วิสุํ วิสุํฯ
[71]
อากาเส ลมฺพมานานิ, ตานิ ทิสฺวา มหาชโน;
กงฺขํ ปฏิวิโนเทสิ, ราชา เถรมภาสิตํฯ
[72]
‘‘กตโม เทวโลโก หิ,
รมฺโม ภนฺเต’’ติ โส พฺรุวิ;
‘‘ตุสินานํ ปุรํ ราช,
รมฺมํ’’อิติ สตํ มตํฯ
[73]
พุทฺธภาวาย สมยํ, โอโลเกนฺโต มหาทโย;
เมตฺเตยฺโย โพธิสตฺโต หิ, วสเต ตุสิเต ปุเรฯ
[74]
เถรสฺส วจนํ สุตฺวา, มหาราชา มหามตี;
โอโลเกนฺโต มหาถูปํ, นิปนฺโนว นิมีลยิฯ
[75]
จวิตฺวา ตํขณํเยว, ตุสิตา อหเฏ รเถ;
นิพฺพตฺติตฺวา ฐิโตเยว, ทิพฺพเทโห อทิสฺสถฯ
[76]
กตสฺส ปุญฺญกมฺมสฺส, ผลํ ทสฺเสตุมตฺตโน;
มหาชนสฺส ทสฺเสนฺโต, อตฺตานํ สมลงฺกตํฯ
[77]
รถฏฺโฐเยว ติกฺขตฺตุํ, มหาถูปํ ปทกฺขิณํ;
กตฺวาน ถูปํ สงฺฆญฺจ, วนฺทิตฺวา ตุสิตํ อคาฯ
[78]
นาฏกิโย อิธาคนฺตฺวา, มกุฏํ ยตฺถ โมจยุํ;
‘‘มกุฏมุตฺตสาลา’’ติ, เอตฺถ สาลา กตา อหุฯ
[79]
จิตเก ฐปิเต รญฺเญ, สรีรมฺหิ มหาชโน;
ยตฺถารวิ ‘‘ราววฏฺฏิ-สาลา’’นาม ตหิํ อหุฯ
[80]
รญฺโญ สรีรํ ฌาเปสุํ, ยสฺมิํ นิสฺสีมมาฬเก;
โส เอว มาฬโก เอตฺถ, วุจฺจเต ‘‘ราช มาฬโก’’ฯ
[81]
ทุฏฺฐคามณิราชา โส, ราชา นามารโห มหา;
เมตฺเตยฺยสฺส ภควโต, เหสฺสติ อคฺคสาวโกฯ
[82]
รญฺโญ ปิตา ปิตา ตสฺส,
มาตา มาตา ภวิสฺสติ;
สทฺธาติสฺโส กนิฏฺโฐ ตุ,
ทุติโย เหสฺสติ สาวโกฯ
[83]
สาลิราชกุมาโร โย,
ตสฺส รญฺโญ สุโต ตุโส;
เมตฺเตยฺยสฺส ภควโต,
ปุตฺโตเยว ภวิสฺสติฯ
[84]
เอวํ โย กุสลปโร กโรติ ปุญฺญํ,
ฉาเทนฺโต อนิยตปาปกํ พหุมฺปิ;
โส สคฺคํ สกเล รมิ โว ปยาติ ตสฺมา,
สปฺปญฺโญ ส ตตรโต ภเวยฺย ปุญฺเญติฯ
สุชนปฺปสาทสํเวคตฺถาย กเต มหาวํเส
ตุสิตปุรคมนํ นาม
ทฺวตฺติํสติโม ปริจฺเฉโท
เตตฺติํสติม ปริจฺเฉท