เมนู

รญฺญา กตญฺญุนา เตน, ถูปการาปนาทิโต;

วิหาร มหนนฺตานิ, ปูเชตุํ รตนตฺตยํฯ

[25]

ปริจฺจตฺตธนาเน’ตฺถ, อนคฺฆานิ วิมุญฺจิย;

เสสานิ โหนฺติ เอกาย, อูนวีสติโกฏิโยฯ

[26]

โตคา ทสทฺธวิธ โทสวิทูสิตาปิ,

ปญฺญาวิเสส สหิเตหิ ชเนหิ ปตฺตา;

โหนฺเตว ปญฺจคุณโยค คหิตสารํ,

อิจฺจสฺส สารคหเณ มติมายเตยฺยาติฯ

สุชนปฺปสาทสํเวคตฺถาย กเต มหาวํเส

มริจวฏฺฏิกวิหารมโหนาม

ฉพฺพีสติโม ปริจฺเฉโทฯ

สตฺตวีสติม ปริจฺเฉท

โลหปาสาทมโห

[1]

ตโต ราชา วิจินฺเตสิ, วิสฺสุตํ สุสฺสุตํ สุตํ;

มหาปญฺโญ สทา ปุญฺโญ, ปญฺญาย กตนิจฺฉโยฯ

[2]

‘‘ทีปปฺปสาทโก เถโร, ราชิโน อยฺยกสฺส เม;

เอวํ กิราหนตฺตา เต, ทุฏฺฐคามณิภูปติฯ

[3]

มหาปุญฺโญ มหาถูปํ, โสณฺณมาลิํ มโนรมํ;

วีสํหตฺถสตํ อุจฺจํ, กาเรสฺสติ อนาคเตฯ

[4]

ปุโน อุโปสถาคารํ, นานารตนมณฺฑิตํ;

นวภูมํ กริตฺวาน, โลหปาสาท เมว จฯ

[5]

อิติ จินฺติย ภูมินฺโท, ลิขิตฺเววํ ฐปาปิตํ;

เปกฺขาเปนฺโต ราชเคเห, ฐิตํ เอว กรณฺฑเกฯ

[6]

โสวณฺณปฏฺฏํ ลทฺธาน, เลขํ ตตฺถ อวาจยิ;

‘‘จตฺตาลีสสตํ วสฺสํ, อติกฺกมฺม อนาคเตฯ

[7]

กากวณฺณสุโต ทุฏฺฐ-คามณิมนุชาธิโป;

อิทญฺจิทญฺจ เอวญฺจ, กาเรสฺสตี’’ติ วาจิตํฯ

[8]

สุตฺวา หฏฺโฐ อุทาเนตฺวา, อปฺโปฏฺเฐสิ มหีปติ;

ตโต ปาโต’ว คนฺตฺวาน, มหาเมฆวนํ สุภํฯ

[9]

สนฺนิปาตํ การยิตฺวา, ภิกฺขุสงฺฆสฺส อพฺรวิ;

‘‘วิมานตุลฺยํ ปาสาทํ, การยิสฺสามิ โว อหํฯ

[10]

ทิพฺพํ วิมานํ เปเสตฺวา, ตทา เลขํ อทาถ เม’’;

ภิกฺขุสงฺโฆ วิสชฺเชสิ, อฏฺฐ ขีณาสเว ตหิํฯ

[11]

กสฺสปมุนิโน กาเล, อโสโก นาม พฺราหฺมโณ;

อฏฺฐ สลากภตฺตานิ, สงฺฆสฺส ปริณามิยฯ

[12]

ภรณิํ นาม ทาสิํ โส, ‘‘นิจฺจํ เทหี’’ติ อพฺรวิ;

ทตฺวา สา ตานิ สกฺกจฺจํ, ยาวชีวํ ตโต จุตาฯ

[13]

อากาสฏฺฐวิมานมฺหิ, นิพฺพตฺติรุจิเร สุเภ;

อจฺฉรานํ สหสฺเสน, สทา’สิ ปริวาริตาฯ

[14]

ตสฺสา รตนปาสาโท, ทฺวาทสโยชนุคฺคโต;

โยชนานํ ปริกฺเขโป, จตฺตาลีสญฺจ อฏฺฐ จฯ

[15]

กูฏาคารสหสฺเสน, มณฺฑิโต นวภูมิโก;

สหสฺสคพฺภสมฺปนฺโน, ราชมาโน จตุมฺมุโขฯ

[16]

สหสฺสสงฺขสํวุตฺติ, สีหปญฺชร เนตฺตวา;

สกิงฺกณิกชาลาย, สชฺชิโต เวทิกาย จฯ

[17]

อมฺพลฏฺฐิกปาสาโท, ตสฺส มชฺเฌ ฐิโต อหุ;

สนฺตมโต ทิสฺสมาโน, ปคฺคหิตธชากุโลฯ

[18]

ตาวติํสญฺจ คจฺฉนฺตา, ทิสฺวา เถรํ ตเมว เต;

หิงฺคุเลน ตทา เลขํ, เลขยิตฺวา ปเฏ ตโตฯ

[19]

นิวตฺติตฺวาน อาคนฺตฺวา, ปฏํ สงฺฆสฺส ทสฺสยุํ;

สงฺโฆ ปฏํ คเหตฺวา ตํ, ปาเหสิ ราชสนฺติกํฯ

[20]

ตํ ทิสฺวา สุมโน ราชา, อาคมฺมาราม มุตฺตมํ;

อาเลขตุลฺยํ กาเรสิ, โลหปาสาท มุตฺตมํฯ

[21]

กมฺมารมฺภนกาเลว, จตุทฺวารมฺหิ โภควา;

อฏฺฐสตสหสฺสานิ, หิรญฺญานิ ฐปาปยิฯ

[22]

ปุฏสหสฺส วตฺถานิ, ทฺวาเร ทฺวาเร ฐปาปยิ;

คุฬ เตลสกฺขรมธุ-ปุรา จาเนก จาฏิโยฯ

[23]

‘‘อมูลกกมฺม เมตฺถ, น กาตพฺพ’’นฺติ ภาสิย;

อคฺฆาเปตฺวา กตํ กมฺมํ, เตสํ มูลมทาปยิฯ

[24]

หตฺถสตํ หตฺถสตํ, อาสิ เอเกก ปสฺสโต;

อุจฺจโต ตตฺตโกเยว, ปาสาโท หิ จตุมฺมุโขฯ

[25]

ตสฺมิํ ปาสาท เสฏฺฐสฺมิํ, อเหสุํ นวภูมิโย;

เอเกกิสฺสา ภูมิยา จ, กูฏาคารสตานิ จฯ

[26]

กูฏาคารานิ สพฺพานิ, สชฺฌุนา ขจิตา น’ยุํ;

ปวาลเวทิกา เตสํ, นานารตน ภูสิตาฯ

[27]

นานารตน จิตฺตานิ, ตาสํ ปทุมกานิ จ;

สชฺฌกิํกิณิกาปนฺติ-ปริกฺขิตฺตาว ตา อหุฯ

[28]

สหสฺสํ ตตฺถ ปาสาโท, คพฺภา อาสุํ สุสงฺขตา;

นานารตน ขจิตา, สีหปญฺชรเนตฺตวาฯ

[29]

นาริวาหนยานนฺตุ, สุตฺวา เวสฺสวณสฺส โส;

ตทา การมกาเรสิ, มชฺเฌ รตนมณฺฑปํฯ

[30]

สีหพฺยคฺฆาทิรูเปหิ, เทวตา รูปเกหิ จ;

อหุ รตนมโยเห’ส, ถมฺเภหิ จ วิภูสิโตฯ

[31]

มุตฺตาชาลปริกฺเขโป, มณฺฑปนฺเต สมนฺตโต;

ปวาลเวทิกา เจตฺถ, ปุพฺเพ วุตฺตวิธา อหุฯ

[32]

สตฺตรตน จิตฺตสฺส, เวมชฺเฌ มณฺฑปสฺส ตุ;

รุจิโร ทนฺตปลฺลงฺโก, รมฺโม ผลิกสนฺถโรฯ

[33]

ทนฺตมยาปสฺสเย’ตฺถ, สุวณฺณมย สูริโย;

สชฺฌุมเย จนฺทิมา จ, ตารา จ มุตฺตกา มยาฯ

[34]

นานารตน ปทุมานิ, ตตฺถ ตตฺถ ยถารหํ;

ชาตกานิ จ ตตฺเถว, อาสุํ โสณฺณลตนฺตเรฯ

[35]

มหคฺฆปจฺจตฺถรเณ, ปลฺลงฺเก’ติ มโนรเม;

มโนหรา’สิฏฺฐปิตา, รุจิรํ ทนฺตพีชนีฯ

[36]

ปวาลปาทุกา ตตฺถ, ผลิกมฺหิ ปติฏฺฐิตา;

เสตจฺฉตฺตํ สชฺฌุทณฺฑํ, ปลฺลงฺโก’ปริโสภถฯ

[37]

สตฺตรตน มยาเนตฺถ, อฏฺฐมงฺคลิกานิ จ;

จตุปฺปทานํ ปนฺตี จ, มณิมุตฺตนฺตรา อหุํฯ

[38]

รชตานญฺจ ฆณฺฏานํ, ปนฺตี ภตฺตนฺตลมฺพิตา;

ปาสาทฉตฺตปลฺลงฺก-มณฺฑปา’สุํ อนคฺฆิกาฯ

[39]

มหคฺฆ ปญฺญปาเปสิ, มญฺจปีฐํ ยถารหํ;

ตเถว ภูมตฺถรณํ, กมฺพลญฺจ มหารหํฯ

[40]

อาจาม กุมฺภิโสวณฺณา, อุลุงฺโก จ อหุ ตหิํ;

ปาสาท ปริโภเคสุ, เสเสสุ จ กถา’ วกาฯ

[41]

จารุปาการ ปริวาโร,

โส จตุทฺวารโกฏฺฐโก;

ปาสาโท’ลงฺกโต โสภิ,

ตาวติํส สภา วิยฯ

[42]

ตมฺพ โลหิฏฺฐกาเห’โส,

ปาสาโท ฉาทิโต อหุ;

โลห ปาสาท โวหาโร,

เตน ตสฺส อชายถฯ

[43]

นฏฺฐิเต โลหปาสาเท, โส สงฺฆํ สนฺนิปาตยิ;

ราชา สงฺโฆ สนฺนิปติ, มริจวฏฺฏิมเห วิยฯ

[44]

ปุถุชฺชนา’ว อฏฺฐํสุ, ภิกฺขู ปฐมภูมิยํ;

เตปิฏกา ทุติยาย, โสตาปนฺนาทโย ปนฯ

[45]

เอเก เกเยว อฏฺฐํสุ, ตติยาทีสุ ภูมิสุ;

อรหนฺโต จ อฏฺฐํสุ, อุทฺธํ จตูสุ ภูมิสุฯ

[46]

สงฺฆสฺส ทตฺวา ปาสาทํ, ทกฺขิณมฺพุปุรสฺสรํ;

ราชา’ทตฺถ มหาทานํ, สตฺตาหํ ปุพฺพกํ ปิยฯ

[47]

ปาสาท มหจตฺตานิ, มหาจาเคน ราชินา;

อนคฺฆานิ ฐเปตฺวาน, อเหสุํ ติํสโกฏิโยฯ

[48]

นิสฺสาเร ธนนิจเย วิเสสสารํ,

เย ทานํ ปริคณยนฺติ สาธุปญฺญา;

เต ทานํ วิปุลมเปต จิตฺตสงฺคา,

สตฺตานํ หิตปรมา ททนฺติ เอวํติฯ

สุชนปฺปสาทสํเวคตฺถาย กเต มหาวํเส

โลกหปาสาทมโห นาม

สตฺตวีสติโม ปริจฺเฉโทฯ

อฏฺฐวีสติม ปริจฺเฉท

มหา ถูปสาธน ลาโภ

[1]

ตโต สตสหสฺสํ โส, วิสฺสชฺเชตฺวา มหีปติ;

การาเปสิ มหาโพธิ-ปูชํ สุฬารมุตฺตมํฯ

[2]

ตโต ปุรํ ปวิสินฺโต, ถูปฐาเน นิเวสิตํ;

ปสฺสิตฺวาน สีลายูปํ, สริตฺวา ปุพฺพกํ สุติํฯ

[3]

‘‘กาเรสฺสามิ มหาถูปํ’’, อิติ หฏฺโฐ มหาตลํ;

อารุยฺห รตฺติํ ภุญฺชิตฺวา, สยิโต อิติ จินฺตยิฯ

[4]