มริจวฏฺฏิกวิหารมโห

[1]

เอกจฺฉตฺตํ กริตฺวาน, ลํการชฺชํ มหายโส;

นานนฺตรํ สํวิทหิ, โยธานํ โส ยถารหํฯ

[2]

เถรปุตฺตาภโย โยโธ, ทิยฺยมานํ น อิจฺฉิตํ;

ปุจฺฉิโตว กิมตฺถนฺติ, ยุทฺธมตฺถีติ อพฺรวิฯ

[3]

เอกรชฺเช กเต ยุทฺธํ, กินามตฺตีติ ปุจฺฉิโต;

ยุทฺธํ กิเลส โจเรหิ, กริสฺสามิ สุทุชฺชยํฯ

[4]

อิจฺเจว มาห ตํ ราชา, ปุนปฺปุนํ นิเสธยิ;

ปุนปฺปุนํ โสยาจิตฺวา, รญฺโญนุญฺญาย ปพฺพชิฯ

[5]

ปพฺพชิตฺวา จ กาเลน, อรหตฺตมปาปุณิ;

ปญฺจขีณาสวสต-ปริวาเอรา อโหสิ จฯ

[6]

ฉตฺตมงฺคล สตฺตาเห, คเต คตภโย’ ภโย;

ราชา กตา ภิเสโกว, มหตา วิภเวน โสฯ

[7]

ติสฺสวาปิ’มคา กีฬ-วิธินา สมลงฺก ตํ;

กีฬิตุํ อภิสิตฺตานํ, จาริตฺตญฺจา นุรกฺขิตุํฯ

[8]

รญฺโญ ปริจฺฉทํ สพฺพํ, อุปายนสตานิ จ;

มริจวฏฺฏิวิหารสฺส, ฐานมฺหิ ฐปยิํสุ จฯ

[9]

ตตฺเถว ถูปฐานมฺหิ, สธาตุํ กุนฺตมุตฺตมํ;

ฐเปสุํ กุนฺตธรกา, อุชุกํ ราชมานุสาฯ

[10]

สโหโรโธ มหาราชา, กีฬิตฺวา สลิเล ทิวา;

สายมาหํ คมิสฺสาม, กุนฺตํ วฑฺเฒถ โภ’’อิติฯ

[11]

จาเลตุํ ตํ น สกฺขิํสุ, กุนฺตํ ราชาธิการิกา;

คนฺธามาลาหิ ปูเชสุํ, ราชเสนาสมาคตาฯ

[12]

ราชา มหนฺตํ อจฺเฉรํ, ทิสฺวา ตํ หฏฺฐมานโส;

วิธาย ตตฺถ อารกฺขํ, ปวิสิตฺวา ปุรํ ตโตฯ

[13]

กุนฺตํ ปริกฺขิปาเปตฺวา, เจติยํ ตตฺถ การยิ;

ถูปํ ปริกฺขิปาเปตฺวา, วิหารญฺจ อการยิฯ

[14]

ตีหิ วสฺเสหิ นิฐาสิ, วิหาโร โส นริสฺสโร;

สงฺฆํ สสนฺนิปาเตสิ, วิหรมหาการณาฯ

[15]

ภิกฺขุนํ สตสหสฺสานิ, ตทา ภิกฺขุนิโย ปน;

นวุติ จ สหสฺสานิ, อภวิํสุ สมาคตาฯ

[16]

ตสฺมิํ สมาคเม สงฺฆํ, อิทมาก มหีปติ;

‘‘สงฺฆํ ภนฺเต วิสริตฺวา, ภุญฺชิํ มริจวฏฺฏิกํฯ

[17]

หสฺเส’ตํ ทณฺฑกมฺมํ เม, ภวตูติ อการยิ;

สเจติยํ มริจวฏฺฏิ-วิหารํ สุมโนหรํฯ

[18]

ปติคฺคณฺหาตุ ตํ สงฺโฆ, อิติ โส ทกฺขิโณทกํ;

ปาติตฺวา ภิกฺขุสงฺฆสฺส, วิหารํ สุมโน อทาฯ

[19]

วิหาเร ตํ สมนฺตาปิ, มหนฺตํ มณฺฑปํ สุภํ;

กาเรตฺวา ตตฺถ สงฺฆสฺส, มหาทานํ ปวตฺตยิฯ

[20]

ปาเท ปติฏฺฐาเปตฺวาปิ,

ชเล อภยวาปิยา;

กโต โส มณฺฑโป อาสิ,

เสโส กาเส กถาวกาฯ

[21]

สตฺตาหํ อนฺนปานาทิํ, ทตฺวาน มนุชาธิโป;

อทา สามณกํ สพฺพํ, ปริกฺขารํ มหารหํฯ

[22]

อหุ สตสหสฺสคฺโฆ, ปริกฺขาโร ส อาทิโก;

อนฺเต สหสฺสคฺฆนโก, สพฺพ สงฺโฆ จ ตํลภิฯ

[23]

ยุทฺเธ ทาเน จ สูเรน, สูรินา รตนตฺตเย;

ปสนฺนามลจิตฺเตน, สาสนุโชต นตฺถินาฯ

[24]

รญฺญา กตญฺญุนา เตน, ถูปการาปนาทิโต;

วิหาร มหนนฺตานิ, ปูเชตุํ รตนตฺตยํฯ

[25]

ปริจฺจตฺตธนาเน’ตฺถ, อนคฺฆานิ วิมุญฺจิย;

เสสานิ โหนฺติ เอกาย, อูนวีสติโกฏิโยฯ

[26]

โตคา ทสทฺธวิธ โทสวิทูสิตาปิ,

ปญฺญาวิเสส สหิเตหิ ชเนหิ ปตฺตา;

โหนฺเตว ปญฺจคุณโยค คหิตสารํ,

อิจฺจสฺส สารคหเณ มติมายเตยฺยาติฯ

สุชนปฺปสาทสํเวคตฺถาย กเต มหาวํเส

มริจวฏฺฏิกวิหารมโหนาม

ฉพฺพีสติโม ปริจฺเฉโทฯ

สตฺตวีสติม ปริจฺเฉท

โลหปาสาทมโห

[1]

ตโต ราชา วิจินฺเตสิ, วิสฺสุตํ สุสฺสุตํ สุตํ;

มหาปญฺโญ สทา ปุญฺโญ, ปญฺญาย กตนิจฺฉโยฯ

[2]

‘‘ทีปปฺปสาทโก เถโร, ราชิโน อยฺยกสฺส เม;

เอวํ กิราหนตฺตา เต, ทุฏฺฐคามณิภูปติฯ

[3]

มหาปุญฺโญ มหาถูปํ, โสณฺณมาลิํ มโนรมํ;

วีสํหตฺถสตํ อุจฺจํ, กาเรสฺสติ อนาคเตฯ

[4]

ปุโน อุโปสถาคารํ, นานารตนมณฺฑิตํ;

นวภูมํ กริตฺวาน, โลหปาสาท เมว จฯ

[5]

อิติ จินฺติย ภูมินฺโท, ลิขิตฺเววํ ฐปาปิตํ;

เปกฺขาเปนฺโต ราชเคเห, ฐิตํ เอว กรณฺฑเกฯ

[6]

โสวณฺณปฏฺฏํ ลทฺธาน, เลขํ ตตฺถ อวาจยิ;

‘‘จตฺตาลีสสตํ วสฺสํ, อติกฺกมฺม อนาคเตฯ

[7]