6. ฉฏฺฐวคฺโค
[248] ‘‘เอตทคฺคํ , ภิกฺขเว, มม สาวกานํ อุปาสกานํ ปฐมํ สรณํ คจฺฉนฺตานํ ยทิทํ ตปุสฺสภลฺลิกา [ตปสฺสุภลฺลิกา (สี. ปี.)] วาณิชา’’ฯ
[249] … ทายกานํ ยทิทํ สุทตฺโต คหปติ อนาถปิณฺฑิโกฯ
[250] … ธมฺมกถิกานํ ยทิทํ จิตฺโต คหปติ มจฺฉิกาสณฺฑิโกฯ
[251] … จตูหิ สงฺคหวตฺถูหิ ปริสํ สงฺคณฺหนฺตานํ ยทิทํ หตฺถโก อาฬวโกฯ
[252] … ปณีตทายกานํ ยทิทํ มหานาโม สกฺโกฯ
[253] … มนาปทายกานํ ยทิทํ อุคฺโค คหปติ เวสาลิโกฯ
[254] … สงฺฆุปฏฺฐากานํ ยทิทํ หตฺถิคามโก อุคฺคโต คหปติฯ
[255] … อเวจฺจปฺปสนฺนานํ ยทิทํ สูรมฺพฏฺโฐ [สูโร อมฺพฏฺโฐ (สี. สฺยา. กํ. ปี.) สุเรพนฺโธ (ก.)]ฯ
[256] … ปุคฺคลปฺปสนฺนานํ ยทิทํ ชีวโก โกมารภจฺโจฯ
[257] … วิสฺสาสกานํ ยทิทํ นกุลปิตา คหปตีติฯ
วคฺโค ฉฏฺโฐฯ
7. สตฺตมวคฺโค
[258] ‘‘เอตทคฺคํ , ภิกฺขเว, มม สาวิกานํ อุปาสิกานํ ปฐมํ สรณํ คจฺฉนฺตีนํ ยทิทํ สุชาตา เสนิยธีตา’’ [เสนานี ธีตา (สี. สฺยา. กํ. ปี.)]ฯ
[259] … ทายิกานํ ยทิทํ วิสาขา มิคารมาตาฯ
[260] … พหุสฺสุตานํ ยทิทํ ขุชฺชุตฺตราฯ
[261] … เมตฺตาวิหารีนํ ยทิทํ สามาวตีฯ
[262] … ฌายีนํ ยทิทํ อุตฺตรานนฺทมาตาฯ
[263] … ปณีตทายิกานํ ยทิทํ สุปฺปวาสา โกลิยธีตาฯ
[264] … คิลานุปฏฺฐากีนํ ยทิทํ สุปฺปิยา อุปาสิกาฯ
[265] … อเวจฺจปฺปสนฺนานํ ยทิทํ กาติยานีฯ
[266] … วิสฺสาสิกานํ ยทิทํ นกุลมาตา คหปตานีฯ
[267] … อนุสฺสวปฺปสนฺนานํ ยทิทํ กาฬี อุปาสิกา กุลฆริกา [กุลฆริกา (ก.)] ติฯ
วคฺโค สตฺตโมฯ
เอตทคฺควคฺโค จุทฺทสโมฯ
15. อฏฺฐานปาฬิ
1. ปฐมวคฺโค
[268] ‘‘อฏฺฐานเมตํ , ภิกฺขเว, อนวกาโส ยํ ทิฏฺฐิสมฺปนฺโน ปุคฺคโล กญฺจิ [กิญฺจิ (ก.)] สงฺขารํ นิจฺจโต อุปคจฺเฉยฺยฯ เนตํ ฐานํ วิชฺชติฯ ฐานญฺจ โข เอตํ, ภิกฺขเว, วิชฺชติ ยํ ปุถุชฺชโน กญฺจิ สงฺขารํ นิจฺจโต อุปคจฺเฉยฺยฯ ฐานเมตํ วิชฺชตี’’ติฯ
[269] ‘‘อฏฺฐานเมตํ, ภิกฺขเว, อนวกาโส ยํ ทิฏฺฐิสมฺปนฺโน ปุคฺคโล กญฺจิ สงฺขารํ สุขโต อุปคจฺเฉยฺยฯ เนตํ ฐานํ วิชฺชติฯ ฐานญฺจ โข เอตํ, ภิกฺขเว, วิชฺชติ ยํ ปุถุชฺชโน กญฺจิ สงฺขารํ สุขโต อุปคจฺเฉยฺยฯ ฐานเมตํ วิชฺชตี’’ติฯ
[270] ‘‘อฏฺฐานเมตํ, ภิกฺขเว, อนวกาโส ยํ ทิฏฺฐิสมฺปนฺโน ปุคฺคโล กญฺจิ ธมฺมํ อตฺตโต อุปคจฺเฉยฺยฯ เนตํ ฐานํ วิชฺชติฯ ฐานญฺจ โข เอตํ, ภิกฺขเว, วิชฺชติ ยํ ปุถุชฺชโน กญฺจิ ธมฺมํ อตฺตโต อุปคจฺเฉยฺยฯ ฐานเมตํ วิชฺชตี’’ติฯ
[271] ‘‘อฏฺฐานเมตํ, ภิกฺขเว, อนวกาโส ยํ ทิฏฺฐิสมฺปนฺโน ปุคฺคโล มาตรํ ชีวิตา โวโรเปยฺยฯ เนตํ ฐานํ วิชฺชติฯ ฐานญฺจ โข, ภิกฺขเว, วิชฺชติ ยํ ปุถุชฺชโน มาตรํ ชีวิตา โวโรเปยฺยฯ ฐานเมตํ วิชฺชตี’’ติฯ