เมนู

11. ตสินาสุตฺตํ

[171] ‘‘ติสฺโส อิมา, ภิกฺขเว, ตสินาฯ กตมา ติสฺโส? กามตสินา, ภวตสินา, วิภวตสินาฯ อิมาสํ โข, ภิกฺขเว, ติสฺสนฺนํ ตสินานํ อภิญฺญาย ปริญฺญาย ปริกฺขยาย ปหานาย…เป.… ราควินยปริโยสานํ โทสวินยปริโยสานํ โมหวินยปริโยสานํ…เป.… อมโตคธํ อมตปรายนํ อมตปริโยสานํ…เป.… นิพฺพานนินฺนํ นิพฺพานโปณํ นิพฺพานปพฺภารํฯ อิมาสํ โข, ภิกฺขเว, ติสฺสนฺนํ ตสินานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ เอกาทสมํฯ

เอสนาวคฺโค สตฺตโมฯ

ตสฺสุทฺทานํ –

เอสนา วิธา อาสโว, ภโว จ ทุกฺขตา ขิลา;

มลํ นีโฆ จ เวทนา, ทฺเว ตณฺหา ตสินาย จาติฯ

8. โอฆวคฺโค

1. โอฆสุตฺตํ

[172] สาวตฺถินิทานํ ฯ ‘‘จตฺตาโรเม , ภิกฺขเว, โอฆาฯ กตเม จตฺตาโร? กาโมโฆ, ภโวโฆ, ทิฏฺโฐโฆ, อวิชฺโชโฆ – อิเม โข, ภิกฺขเว, จตฺตาโร โอฆาฯ อิเมสํ โข, ภิกฺขเว, จตุนฺนํ โอฆานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ (ยถา เอสนา, เอวํ สพฺพํ วิตฺถาเรตพฺพํฯ) ปฐมํฯ

2. โยคสุตฺตํ

[173] ‘‘จตฺตาโรเม, ภิกฺขเว, โยคาฯ กตเม จตฺตาโร? กามโยโค, ภวโยโค, ทิฏฺฐิโยโค อวิชฺชาโยโค – อิเม โข, ภิกฺขเว, จตฺตาโร โยคาฯ อิเมสํ โข, ภิกฺขเว, จตุนฺนํ โยคานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ ทุติยํฯ

3. อุปาทานสุตฺตํ

[174] ‘‘จตฺตาริมานิ , ภิกฺขเว, อุปาทานานิฯ กตมานิ จตฺตาริ? กามุปาทานํ, ทิฏฺฐุปาทานํ, สีลพฺพตุปาทานํ, อตฺตวาทุปาทานํ – อิมานิ โข, ภิกฺขเว, จตฺตาริ อุปาทานานิฯ อิเมสํ โข, ภิกฺขเว, จตุนฺนํ อุปาทานานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ ตติยํฯ

4. คนฺถสุตฺตํ

[175] ‘‘จตฺตาโรเม , ภิกฺขเว, คนฺถาฯ กตเม จตฺตาโร? อภิชฺฌา กายคนฺโถ, พฺยาปาโท กายคนฺโถ, สีลพฺพตปรามาโส กายคนฺโถ, อิทํสจฺจาภินิเวโส กายคนฺโถ – อิเม โข, ภิกฺขเว, จตฺตาโร คนฺถาฯ อิเมสํ โข, ภิกฺขเว, จตุนฺนํ คนฺถานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ จตุตฺถํฯ

5. อนุสยสุตฺตํ

[176] ‘‘สตฺติเม, ภิกฺขเว, อนุสยาฯ กตเม สตฺต? กามราคานุสโย, ปฏิฆานุสโย, ทิฏฺฐานุสโย , วิจิกิจฺฉานุสโย, มานานุสโย, ภวราคานุสโย, อวิชฺชานุสโย – อิเม โข, ภิกฺขเว, สตฺตานุสยาฯ อิเมสํ โข, ภิกฺขเว, สตฺตนฺนํ อนุสยานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ ปญฺจมํฯ

6. กามคุณสุตฺตํ

[177] ‘‘ปญฺจิเม, ภิกฺขเว, กามคุณาฯ กตเม ปญฺจ? จกฺขุวิญฺเญยฺยา รูปา อิฏฺฐา กนฺตา มนาปา ปิยรูปา กามูปสํหิตา รชนียา, โสตวิญฺเญยฺยา สทฺทา…เป.… ฆานวิญฺเญยฺยา คนฺธา…เป.… ชิวฺหาวิญฺเญยฺยา รสา…เป.… กายวิญฺเญยฺยา โผฏฺฐพฺพา อิฏฺฐา กนฺตา มนาปา ปิยรูปา กามูปสํหิตา รชนียา – อิเม โข, ภิกฺขเว, ปญฺจ กามคุณาฯ อิเมสํ โข, ภิกฺขเว, ปญฺจนฺนํ กามคุณานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ ฉฏฺฐํฯ