เมนู

10. ภิกฺขุนิกฺขนฺธก

ปุจฺฉา – อฏฺฐหิ อาวุโส ครุธมฺเมหิ อุปสมฺปทา ภควตา กตฺถ อนุญฺญาตา, กสฺส อนุญฺญาตา, กิสฺมิญฺจ วตฺถุสฺมิํ อนุญฺญาตาฯ

วิสฺสชฺชนา – เวสาลิยํ ภนฺเต มหาปชาปติยา โคตมิยา อนุญฺญาตา, มหาปชาปติ ภนฺเต โคตมี สูเนหิ ปาเทหิ รโชกิณฺเณน คตฺเตน ทุกฺขี ทุมฺมนา อสฺสุมุขี รุทมานา พหิทฺวารโกฏฺฐเก อฏฺฐาสิ, อถ โข ภนฺเต อายสฺมา อานนฺโท มหาปชาปติํ โคตมิํ ตํ การณํ ปุจฺฉิตฺวา ภควนฺตํ จตุกฺขตฺตุํ ยาจิ มาตุคามสฺส ตถาคตปฺปเวทิเต ธมฺมวินเย อาคารสฺมา อนาคาริยํ ปพฺพชฺชํ, ตสฺมิํ ภนฺเต วตฺถุสฺมิํ อนุญฺญาตาฯ

ปุจฺฉา – ภิกฺขูหิ อาวุโส ภิกฺขุนิโย อุปสมฺปาเทตุํ ภควตา กตฺถ อนุญฺญาตํ, กํ อารพฺภ กิสฺมิํ วตฺถุสฺมิํ อนุญฺญาตํฯ

วิสฺสชฺชนา – เวสาลิยํ ภนฺเต มหาปชาปติํ โคตมิํ อารพฺภ อนุญฺญาตํ, มหาปชาปติ ภนฺเต โคตมี ภควนฺตํ เอตทโวจ ‘‘กถาหํ ภนฺเต อิมาสุ สากิยานีสุ ปฏิปชฺชามี’’ติ, ตสฺมิํ ภนฺเต วตฺถุสฺมิํ อนุญฺญาตํฯ

ปุจฺฉา – เอกโต อุปสมฺปนฺนาย อาวุโส ภิกฺขุนิสงฺเฆ วิสุทฺธาย ภิกฺขุสงฺเฆ อุปสมฺปาเทตุํ ภควตา กตฺถ อนุญฺญาตํ, กํ อารพฺภ กิสฺมิํ วตฺถุสฺมิํ อนุญฺญาตํฯ

วิสฺสชฺชนา – สาวตฺถิยํ ภนฺเต สมฺพหุเล ภิกฺขู อารพฺภ อนุญฺญาตํ, สมฺพหุลา ภนฺเต ภิกฺขู ภิกฺขุนีนํ อนฺตรายิเก ธมฺเม ปุจฺฉิํสุ, อุปสมฺปทาเปกฺขาโย วิตฺถายิํสุ, มงฺกู อเหสุํ, น สกฺขิํสุ วิสฺสชฺเชตุํ, ตสฺมิํ ภนฺเต วตฺถุสฺมิํ อนุญฺญาตํฯ

ปุจฺฉา – ภิกฺขุนิกฺขนฺธกํ ปุจฺฉิสฺสํ, สนิทานํ สนิทฺเทสํฯ สมุกฺกฏฺฐปทานํ อาวุโส กติ อาปตฺติโยฯ

วิสฺสชฺชนา – ภิกฺขุนิกฺขนฺธกํ วิสฺสชฺชิสฺสํ, สนิทานํ สนิทฺเทสํฯ สมุกฺกฏฺฐปทานํ ภนฺเต ทฺเว อาปตฺติโยฯ

11. ปญฺจสติกกฺขนฺธก