เสลาสุตฺต
ปุจฺฉา – ตตฺถาวุโส เสลาสุตฺตํ กตฺถ กํ อารพฺภ กิสฺมิํ วตฺถุสฺมิํ เกน กถญฺจ ภาสิตํฯ
วิสฺสชฺชนา – สาวตฺถิยํ ภนฺเต มารํเยว ปาปิมนฺตํ อารพฺพฺภ เสลาย ภิกฺขุนิยา อริยสาวิกาย ภาสิตํฯ มาโร ภนฺเต ปาปิมา เสลาย ภิกฺขุนิยา ภยํ ฉมฺภิตตฺตํ โลมหํสํ อุปฺปาเทตุกาโม สมาธิมฺหา จาเวตุกาโม เสลํ ภิกฺขุนิํ คาถาย อชฺฌภาสิ–
เกนิทํ ปกตํ พิมฺพํ, กฺวนุ พิมฺพสฺส การโก;
กฺวนุ พิมฺพํ สมุปฺปนฺนํ, กฺวนุ พิมฺพํ นิรุชฺฌตีติฯ
ตสฺมิํ ภนฺเต วตฺถุสฺมิํ–
นยิทํ อตฺตกตํ พิมฺพํ, นยิทํ ปรกตํ อฆํ;
เหตุํ ปฏิจฺจ สมฺภูตํ, เหตุภงฺคา นิรุชฺฌตีติฯ
เอวมาทินา ภนฺเต เสลาย ภิกฺขุนิยา ภาสิตํฯ
เกนิทํ ปกตํ พิมฺพํ, กฺวนุ พิมฺพสฺส การโก;
กฺวนุ พิมฺพํ สมุปฺปนฺนํ, กฺวนุ พิมฺพํ นิรุชฺฌติ-หุ–
นยิทํ อตฺตกตํ พิมฺพํ, นยิทํ ปรกตํ อฆํ;
เหตุํ ปฏิจฺจ สมฺภูตํ, เหตุภงฺคา นิรุชฺฌติฯ
วชิราสุตฺต
ปุจฺฉา – ตตฺถาวุโส โปราณเกหิ มหากสฺสปาทีหิ ธมฺมสํคาหกเถรวเรหิ สํคีตํ วชิราสุตฺตํ กตฺถ กํ อารพฺภ เกน กถญฺจ ภาสิตํฯ
วิสฺสชฺชนา – สาวตฺถิยํ ภนฺเต มารํ ปาปิมนฺตํ อารพฺภ วชิราย เถริยา ภิกฺขุนิยา ภาสิตํฯ มาโร ภนฺเต ปาปิมา ปุริมนเยเนว วชิรํ ภิกฺขุนิํ คาถาย อชฺฌภาสิ–