จาลาสุตฺต
ปุจฺฉา – ตตฺถาวุโส จาลาสุตฺตํ กตฺถ กํ อารพฺภ กิสฺมิํ วตฺถุสฺมิํ เกน กถญฺจ ภาสิตํฯ
วิสฺสชฺชนา – สาวตฺถิยํ ภนฺเต อนฺธวเน มารํเยว ปาปิมนฺตํ อารพฺภ จาลาย ภิกฺขุนิยา อริยสาวิกาย ภาสิตํฯ มาโร ภนฺเต ปาปิมา จาลํ ภิกฺขุนิํ อุปสงฺกมิตฺวา เอตทโวจ ‘‘กิํ นุ ตฺวํ ภิกฺขุนิ น โรเจสี’’ติฯ ชาติํ ขฺวาหํ อาวุโส น โรเจมี’’ติฯ
กิํ นุ ชาติํ น โรเจสิ, ชาโต กามานิ ภุญฺชติ;
โก นุ ตํ อิทมาทปยิ, ชาติํ มา โรจ ภิกฺขุนีติฯ
ตสฺมิํ ภนฺเต วตฺถุสฺมิํ–
ชาตสฺส มรณํ โหติ, ชาโต ทุกฺขานิ ผุสฺสติ;
พนฺธํ วธํ ปริกฺเลสํ, ตสฺมา ชาติํ น โรจเยฯ
พุทฺโธ ธมฺมมเทเสสิ, ชาติยา สมติกฺกมํ;
สพฺพทุกฺขปฺปหานาย, โส มํ สจฺเจ นิเวสยิฯ
เย จ รูปูปคา สตฺตา, เย จ อรูปฏฺฐายิโน;
นิโรธํ อปฺปชานนฺตา, อาคนฺตาโร ปุนพฺภวนฺติฯ
เอวํ โข ภนฺเต จาลาย ภิกฺขุนิยา ภาสิตํฯ
กิํ นุ ชาติํ น โรเจสิ, ชาโต กามานิ ภุญฺชติ;
โก นุ ตํ อิทมาทปยิ, ชาติํ มา โรจ ภิกฺขุนีฯ
ชาตสฺส มรณํ โหติ, ชาโต ทุกฺขานิ ผุสฺสติ;
พนฺธํ วธํ ปริกฺเลสํ, ตสฺมา ชาติํ น โรจเยฯ
พุทฺโธ ธมฺมมเทเสสิ, ชาติยา สมติกฺกมํ,
สพฺพทุกฺขปฺปหานาย, โส มํ สจฺเจ นิเวสยิฯ
เสลาสุตฺต
ปุจฺฉา – ตตฺถาวุโส เสลาสุตฺตํ กตฺถ กํ อารพฺภ กิสฺมิํ วตฺถุสฺมิํ เกน กถญฺจ ภาสิตํฯ
วิสฺสชฺชนา – สาวตฺถิยํ ภนฺเต มารํเยว ปาปิมนฺตํ อารพฺพฺภ เสลาย ภิกฺขุนิยา อริยสาวิกาย ภาสิตํฯ มาโร ภนฺเต ปาปิมา เสลาย ภิกฺขุนิยา ภยํ ฉมฺภิตตฺตํ โลมหํสํ อุปฺปาเทตุกาโม สมาธิมฺหา จาเวตุกาโม เสลํ ภิกฺขุนิํ คาถาย อชฺฌภาสิ–
เกนิทํ ปกตํ พิมฺพํ, กฺวนุ พิมฺพสฺส การโก;
กฺวนุ พิมฺพํ สมุปฺปนฺนํ, กฺวนุ พิมฺพํ นิรุชฺฌตีติฯ
ตสฺมิํ ภนฺเต วตฺถุสฺมิํ–
นยิทํ อตฺตกตํ พิมฺพํ, นยิทํ ปรกตํ อฆํ;
เหตุํ ปฏิจฺจ สมฺภูตํ, เหตุภงฺคา นิรุชฺฌตีติฯ
เอวมาทินา ภนฺเต เสลาย ภิกฺขุนิยา ภาสิตํฯ