จงฺกมสุตฺต

ปุจฺฉา – ธาตุสํยุตฺเต ปนาวุโส จงฺกมสุตฺตํ ภควตา กตฺถ กํ อารพฺภ กถญฺจ ภาสิตํฯ

วิสฺสชฺชนา – ราชคเห ภนฺเต สมฺพหุเล ภิกฺขู อารพฺภ ‘‘ธาตุโสว ภิกฺขเว สตฺตา สํสนฺทนฺติ สเมนฺติ, หีนาธิมุตฺติกา หีนาธิมุตฺติเกหิ สทฺธิํ สํสนฺทนฺติ สเมนฺติ, กลฺยาณาธิมุตฺติกา กลฺยาณาธิมุตฺติเกหิ สทฺธิํ สํสนฺทนฺติ สเมนฺตี’’ติ เอวมาทินา ภควตา ภาสิตํฯ

อสฺสทฺธสํสนฺทนสุตฺต

ปุจฺฉา – อสฺสทฺธสํสนฺทนสุตฺตํ ปนาวุโส ภควตา กตฺถ กํ อารพฺภ กถญฺจ ภาสิตํฯ

วิสฺสชฺชนา – สาวตฺถิยํ ภนฺเต สมฺพหุเล ภิกฺขู อารพฺภ ‘‘ธาตุโสว ภิกฺขเว สตฺตา สํสนฺทนฺติ สเมนฺติ, อสฺสทฺธา อสฺสทฺเธหิ สทฺธิํ สํสนฺทนฺติ สเมนฺติ, อหิริกา อหิริเกหิ สทฺธิํ สํสนฺทนฺติ สเมนฺติ, อโนตฺตปฺปิโนฯ อปฺปสฺสุตาฯ กุสีตาฯ มุฏฺฐสฺสติโนฯ ทุปฺปญฺญา ทุปฺปญฺเญหิ สทฺธิํ สํสนฺทนฺติ สเมนฺตี’’ติ เอวมาทินา ภควตา ภาสิตํฯ

อนมตคฺคสํยุตฺต