ยตฺถ นามญฺจ รูปญฺจ, อเสสํ อุปรุชฺฌติ;

ปฏิฆํ รูปสญฺญา จ, เอตฺเถสา ฉิชฺชเต ชฏาฯ

อจฺฉราสุตฺต

ปุจฺฉา – อจฺฉราสุตฺตํ ปนาวุโส ภควตา กตฺถ กํ อารพฺภ กิสฺมิํ วตฺถุสฺมิํ กถญฺจ ภาสิตํฯ

วิสฺสชฺชนา – สาวตฺถิยํ ภนฺเต อญฺญตรํ เทวปุตฺตํ อารพฺภ ภาสิตํฯ อญฺญตโร ภนฺเต เทวปุตฺโต ภควนฺตํ เอตทโวจ–

‘‘อจฺฉราคณสงฺฆฏฺฐํ, ปิสาจ คณเสวิตํ;

วนนฺตํ โมหนํ นาม, กถํ ยาตฺรา ภวิสฺสตี’’ติฯ

ตสฺมิํ ภนฺเต วตฺถุสฺมิํ–

‘‘อุชุโก นาม โส มคฺโค, อภยา นาม สา ทิสา,

รโถ อกูชโน นาม, ธมฺมจกฺเกหิ สํยุโตฯ

หิรี ตสฺส อปาลมฺโพ, สตฺยสฺส ปริวารณํ;

ธมฺมาหํ สารถิํ พฺรูมิ, สมฺมาทิฏฺฐิ ปุเรชวํฯ

ยสฺส เอตาทิสํ ยานํ, อิตฺถิยา ปุริสสฺส วา;

ส เว เอเตน ยาเนน, นิพฺพานสฺเสว สนฺติเก’’ติฯ

เอวํ โข ภนฺเต ภควตา ภาสิตํฯ

อจฺฉราคณสงฺฆุฏฺฐํ , ปิสาจคณเสวิตํ;

วนนฺตํ โมหนํ นาม, กถํ ยาตฺรา ภวิสฺสติ–

ชราสุตฺต

ปุจฺฉา – ชราสุตฺตํ ปนาวุโส ภควตา กตฺถ กํ อารพฺภ กิสฺมิํ วตฺถุสฺมิํ กถญฺจ ภาสิตํฯ

วิสฺสชฺชนา – สาวตฺถิยํ ภนฺเต อญฺญตรํ เทวตํ อารพฺภ ภาสิตํฯ อญฺญตรา ภนฺเต เทวตา ภควนฺตํ เอตทโวจ–

‘‘กิํ สุ ยาว ชรา สาธุ, กิํ สุ สาธุ ปติฏฺฐิตํ;

กิํ สุ นรานํ รตนํ, กิํ สุ โจเรหิ ทูหร’’นฺติฯ

ตสฺมิํ ภนฺเต วตฺถุสฺมิํ–

‘‘สีลํ ยาว ชรา สาธุ, สทฺธา สาธุ ปติฏฺฐิตา;

ปญฺญา นรานํ รตนํ, ปุญฺญํ โจเรหิ ทูหร’’นฺติฯ

เอวํ โข ภนฺเต ภควตา ภาสิตํฯ

กิํ สุ ยาว ชรา สาธุฯ

กิํ สุ สาธุ ปติฏฺฐิตํฯ