อินฺทกสุตฺต
ปุจฺฉา – ยกฺขสํยุตฺเต ปนาวุโส ปฐมํ สํคีตํ อินฺทกสุตฺตํ ภควตา กตฺถ กํ อารพฺภ กิสฺมิํ วตฺถุสฺมิํ กถญฺจ ภาสิตํฯ
วิสฺสชฺชนา – ราชคเห ภนฺเต อินฺทกูเฏ ปพฺพเต อินฺทกสฺส ยกฺขสฺส ภวเน อินฺทกํ ยกฺขํ อารพฺภ ภาสิตํฯ อินฺทโก ภนฺเต ยกฺโข อตฺตวาโท ภควนฺตํ อุปสงฺกมิตฺวา คาถาย อชฺฌภาสิ–
‘‘รูปํ น ชีวนฺติ วทนฺติ พุทฺธา,
กถํ นฺวยํ วินฺทติมํ สรีรํ;
กุตสฺส อฏฺฐียกปิณฺฑเมภิ,
กถํ นฺวยํ สชฺชติ คพฺภรสฺมิ’’นฺติฯ
ตสฺมิํ ภนฺเต วตฺถุสฺมิํ–
‘‘ปฐมํ กลลํ โหติ, กลลา โหติ อพฺพุทํ,
อพฺพุทา ชายเต เปสิ, เปสิ นิพฺพตฺตตี ฆโน;
ฆนา ปสาขา ชายนฺติ, เกสา โลมา นขาปิจ;
ยญฺจสฺส ภุญฺชตี มาตา, อนฺนํ ปานญฺจ โภชนํ;
เตน โส ตตฺถ ยาเปติ, มาตุกุจฺฉิคโตนโร’’ติฯ
เอวํ โข ภนฺเต ภควตา ภาสิตํฯ
อาฬวกสุตฺต
ปุจฺฉา – เตนาวุโส ภควตา…เป.… สมฺมาสมฺพุทฺเธน ยกฺขสํยุตฺเต อาฬวกสุตฺตํ กตฺถ กํ อารพฺภ กิสฺมิํ วตฺถุสฺมิํ กถญฺจ ภาสิตํฯ
วิสฺสชฺชนา – อาฬวิยํ ภนฺเต อาฬวกสฺส ยกฺขสฺส ภวเน อาฬวกํ ยกฺขํ อารพฺภ ภาสิตํฯ อาฬวโก ภนฺเต ยกฺโข ภควนฺตํ คาถาย อชฺฌภาสิ–
กิํ สูธวิตฺตํ ปุริสสฺส เสฏฺฐํ,
กิํ สุ สุจิณฺณํ สุขมาวหาติ;
กิํ สุ หเว สาทุตรํ รสานํ,
กถํ ชีวิํ ชีวิตามาหุ เสฏฺฐนฺติฯ
ตสฺมิํ ภนฺเต วตฺถุสฺมิํ–
สทฺธีจ วิตฺตํ ปุริสสฺส เสฏฺฐํ,
ธมฺโม สุจิณฺโณ สุขมาวหาติ;
สจฺจํ หเว สาทุตรํ รสานํ,
ปญฺญาชีวิํ ชีวิตมาหุ เสฏฺฐนฺติฯ
เอวมาทินา ภนฺเต ภควตา ภาสิตํฯ