ปกุธกจฺจายนวาท

อยมฺปิ โข อาวุโส วาโท ปุริมวาโทวิย นิสฺสิริโกเยว อนตฺถสํหิโต ชิคุจฺฉนีโย อติวิย ภยานโกฯ

นิคณฺฐนาฏปุตฺตวาท

ปุจฺฉา – อถาปรมฺปิ ปุจฺฉามิ, นิคณฺโฐ ปนาวุโส นาฏปุตฺโต รญฺญา มาคเธน อชาตสตฺตุนา เวเทหิปุตฺเตน สนฺทิฏฺฐิกํ สามญฺญผลํ ปุฏฺโฐ กถํ พฺยากาสิฯ

วิสฺสชฺชนา – เอกมิทํ ภนฺเต สมยํ ราชา มาคโธ อชาตสตฺตุ เวเทหิปุตฺโต เยน นิคณฺโฐ นาฏปุตฺโต เตนุปสํกมิ, อุปสํกมิตฺวา นิคณฺฐํ นาฏปุตฺตํ สนฺทิฏฺฐิกํ สามญฺญผลํ ปุจฺฉิ, อถ โข นิคณฺโฐ นาฏปุตฺโต ราชานํ มาคธํ อชาตสตฺตุํ เวเทหิปุตฺตํ เอตทโวจ, ‘‘อิธ มหาราช นิคณฺโฐ จาตุยามสํวรสํวุโต โหติ, กถญฺจ มหาราช

นิคณฺโฐ จาตุยามสํวรสํวุโต โหติ, อิธ มหาราช นิคณฺโฐ สพฺพวาริวาริโต จ โหติ, สพฺพวาริยุตฺโต จ, สพฺพวาริธุโต จ, สพฺพวาริผุโฏ จฯ เอวํ โข มหาราช นิคณฺโฐ จาตุยามสํวรสํวุโต โหติ, ยโต โข มหาราช นิคณฺโฐ เอวํ จาตุยามสํวรสํวุโต โหติฯ อยํ วุจฺจติ มหาราช นิคณฺโฐ คตตฺโต จ ยตตฺโต จ ฐิตตฺโต จา’’ติฯ อิตฺถํ โข ภนฺเต รญฺโญ มาคธสฺส อชาตสตฺตุสฺส เวเทหิปุตฺตสฺส นิคณฺโฐ นาฏปุตฺโต สนฺทิฏฺฐิกํ สามญฺญผลํ ปุฏฺโฐ สมาโน จาตุยามสํวรํ พฺยากาสิฯ

นิคณฺฐวาท

เอตสฺส ปนาวุโส วาเท โกจิ สาสนานุโลมวาโท อตฺถิ, อสุทฺธลทฺธิตาย ปน เอโสปิ วาโท ชิคุจฺฉนีโยเยว, เสยฺยถาปิ โภชนํ คูถมิสฺสํ คารยฺโหเยว อารกา ปริวชฺชิตพฺโพเยว, เสยฺยถาปิ วิสสํสฏฺโฐ อาปานียกํโสฯ