ฯ นโม ตสฺส ภควโต อรหโต สมฺมาสมฺพุทฺธสฺสฯ

สุตฺตนฺตปิฏเก

ทีฆนิกาเย

สีลกฺขนฺธวคฺคสุตฺต

สํคายนสฺส ปุจฺฉา วิสฺสชฺชนา

ปุจฺฉา – ปฐมมหาธมฺมสํคีติกาเล อาวุโส ธมฺมสํคาหกา มหากสฺสปาทโย มหาเถรวรา ปฐมํ วินยํ สํคายิตฺวา ตทนนฺตรํ กํ นาม ปาวจนํ สํคายิํสุฯ

วิสฺสชฺชนา – ปฐมมหาธมฺมสํคีติยํ ภนฺเต ธมฺมสํคาหกา มหากสฺสปาทโย มหาเถรวรา ปฐมํ วินยํ สํคายิตฺวา ตทนนฺตรํ ธมฺมํ สํคายิํสุฯ

ปุจฺฉา – ธมฺโม นาม อาวุโส สุตฺตนฺตาภิธมฺมวเสน ทุวิโธ, ตตฺถ กตรํ ธมฺมํ ปฐมํ สํคายิํสุฯ

วิสฺสชฺชนา – ทฺวีสุ ภนฺเต ธมฺเมสุ สุตฺตนฺตาภิธมฺมปิฏเกสุ ปฐมํ สุตฺตนฺตํ ปิฏกํ ธมฺมํ สํคายิํสุฯ

ปุจฺฉา – สุตฺตนฺตปิฏเก ปิ อาวุโส ทีฆมชฺฌิมสํยุตฺตองฺคุตฺตรขุทฺทกนิกายวเสน ปญฺจ นิกายา, เตสุ ปฐมํ กตรํ นิกายํ สํคายิํสุฯ

วิสฺสชฺชนา – ปญฺจสุ ภนฺเต นิกาเยสุ ปฐมํ ทีฆนิกายํ สํคายิํสุฯ

ปุจฺฉา – ทีฆนิกาเยปิ อาวุโส ตโย วคฺคา จตุตฺติํสา จ สุตฺตานิ, เตสุ กตรํ วคฺคํ กตรญฺจ สุตฺตํ ปฐมํ สํคายิํสุฯ

วิสฺสชฺชนา – ทีฆนิกาเยปิ ภนฺเต ตีสุ วคฺเคสุ ปฐมํ สีลกฺขนฺธวคฺคํ, จตุตฺติํสติยา จ สุตฺเตสุ ปฐมํ พฺรหฺมชาลสุตฺตํ สํคายิํสุฯ

พฺรหฺมชาลสุตฺต

ปุจฺฉา – สาธุ สาธุ อาวุโส มยมฺปิ ทานิ ตโตเยว ปฏฺฐาย สํคายิตุํ ปุพฺพกิจฺจานิ สมารภาม…, เตนาวุโส ภควตา ชานตา ปสฺสตา อรหตา สมฺมาสมฺพุทฺเธน พฺรหฺมชาลสุตฺตํ กตฺถ ภาสิตํฯ

วิสฺสชฺชนา – อนฺตรา จ ภนฺเต ราชคหํ อนฺตรา จ นาฬนฺทํ อมฺพลฏฺฐิกายํ ราชาคารเก ภาสิตํฯ

ปุจฺฉา – กํ อาวุโส อารพฺภ ภาสิตํฯ

วิสฺสชฺชนา – สุปฺปิยญฺจ ภนฺเต ปริพฺพาชกํ พฺรหฺมทตฺตญฺจ มาณวํ อารพฺภ ภาสิตํฯ

ปุจฺฉา – กิสฺมิํ อาวุโส วตฺถุสฺมิํ ภาสิตํฯ

วิสฺสชฺชนา – วณฺณาวณฺเณ ภนฺเต, สุปฺปิโย หิ ภนฺเต อเนกปริยาเยน พุทฺธสฺส อวณฺณํ ภาสติ ธมฺมสฺส อวณฺณํ ภาสติ สงฺฆสฺส อวณฺณํ ภาสติ, สุปฺปิยสฺส ปน ปริพฺพาชกสฺส อนฺเตวาสี พฺรหฺมทตฺโต มาณโว อเนกปริยาเยน พุทฺธสฺส วณฺณํ ภาสติ ธมฺมสฺส วณฺณํ ภาสติ สงฺฆสฺส วณฺณํ ภาสติ, ตสฺมิํ ภนฺเต วตฺถุสฺมิํ ภาสิตํฯ

อนุสนฺเธ

ปุจฺฉา – กติ อาวุโส ตตฺถ อนุสนฺธโยฯ

วิสฺสชฺชนา – ตโย ภนฺเต ตตฺถ อนุสนฺธโย, เอโก อวณฺณานุสนฺธิ, ทฺเว วณฺณานุสนฺธิโยฯ

ปฐม อนุสนฺเธ

ปุจฺฉา – ตตฺถาวุโส ปฐเม อนุสนฺธิมฺหิ กถํ ภควตา ภาสิตํ, ตํ สํเขปโต กเถหิฯ

วิสฺสชฺชนา – ปฐเม ภนฺเต อนุสนฺธิมฺหิ อวณฺเณ มโนปโทสํ นิวาเรตฺวา, ตตฺถ จ อาทีนวํ ทสฺเสตฺวา, ตตฺถ ปฏิปชฺชิตพฺพากาโร ภควตา ภาสิโตฯ