ฯ นโม ตสฺส ภควโต อรหโต สมฺมาสมฺพุทฺธสฺสฯ

อภิธมฺมมาติกาปาฬิ

เอกํ สมยํ ภควา เทเวสุ วิหรติ ตาวติํสภวเน ปาริจฺฉตฺตกมูเล ปณฺฑุกมฺพลสิลายํฯ ตตฺร โข ภควา เทวานํ ตาวติํสานํ อภิธมฺมกถํ กเถสิฯ

1. ธมฺมสงฺคณีมาติกา

ติกมาติกา

กุสลา ธมฺมา (ธ. ส. ติกมาติกา 1-22), อกุสลา ธมฺมา, อพฺยากตา ธมฺมาฯ สุขาย เวทนาย สมฺปยุตฺตา ธมฺมา, ทุกฺขาย เวทนาย สมฺปยุตฺตา ธมฺมา, อทุกฺขมสุขาย เวทนาย สมฺปยุตฺตา ธมฺมาฯ วิปากา ธมฺมา, วิปากธมฺมธมฺมา, เนววิปากนวิปากธมฺมธมฺมาฯ อุปาทิณฺณุปาทานิยา ธมฺมา, อนุปาทิณฺณุปาทานิยา ธมฺมา, อนุปาทิณฺณอนุปาทานิยา ธมฺมาฯ สํกิลิฏฺฐสํกิเลสิกา ธมฺมา, อสํกิลิฏฺฐสํกิเลสิกา ธมฺมา, อสํกิลิฏฺฐอสํกิเลสิกา ธมฺมาฯ สวิตกฺกสวิจารา ธมฺมา, อวิตกฺกวิจารมตฺตา ธมฺมา, อวิตกฺกอวิจารา ธมฺมาฯ ปีติสหคตา ธมฺมา, สุขสหคตา ธมฺมา, อุเปกฺขาสหคตา ธมฺมาฯ ทสฺสเนน ปหาตพฺพา ธมฺมา, ภาวนาย ปหาตพฺพา ธมฺมา, เนว ทสฺสเนน น ภาวนาย ปหาตพฺพา ธมฺมาฯ

ทสฺสเนน ปหาตพฺพเหตุกา ธมฺมา, ภาวนาย ปหาตพฺพเหตุกา ธมฺมา, เนว ทสฺสเนน น ภาวนาย ปหาตพฺพเหตุกา ธมฺมา ฯ อาจยคามิโน ธมฺมา, อปจยคามิโน ธมฺมา, เนวาจยคามินาปจยคามิโน ธมฺมาฯ เสกฺขา ธมฺมา, อเสกฺขา ธมฺมา, เนวเสกฺขนาเสกฺขา ธมฺมาฯ ปริตฺตา ธมฺมา, มหคฺคตา ธมฺมา, อปฺปมาณา ธมฺมาฯ ปริตฺตารมฺมณา ธมฺมา, มหคฺคตารมฺมณา ธมฺมา, อปฺปมาณารมฺมณา ธมฺมาฯ หีนา ธมฺมา, มชฺฌิมา ธมฺมา, ปณีตา ธมฺมาฯ มิจฺฉตฺตนิยตา ธมฺมา, สมฺมตฺตนิยตา ธมฺมา, อนิยตา ธมฺมาฯ มคฺคารมฺมณา ธมฺมา, มคฺคเหตุกา ธมฺมา, มคฺคาธิปติโน ธมฺมาฯ อุปฺปนฺนา ธมฺมา, อนุปฺปนฺนา ธมฺมา, อุปฺปาทิโน ธมฺมาฯ อตีตา ธมฺมา, อนาคตา ธมฺมา, ปจฺจุปฺปนฺนา ธมฺมาฯ อตีตารมฺมณา ธมฺมา, อนาคตารมฺมณา ธมฺมา, ปจฺจุปฺปนฺนารมฺมณา ธมฺมาฯ อชฺฌตฺตา ธมฺมา, พหิทฺธา ธมฺมา, อชฺฌตฺตพหิทฺธา ธมฺมาฯ อชฺฌตฺตารมฺมณา ธมฺมา, พหิทฺธารมฺมณา ธมฺมา, อชฺฌตฺตพหิทฺธารมฺมณา ธมฺมาฯ สนิทสฺสนสปฺปฏิฆา ธมฺมา, อนิทสฺสนสปฺปฏิฆา ธมฺมา, อนิทสฺสนอปฺปฏิฆา ธมฺมา (ธ. ส. ติกมาติกา 1-22)ฯ

ทฺวาวีสติติกํฯ

ทุกมาติกา

เหตุโคจฺฉกํ

เหตู ธมฺมา, น เหตู ธมฺมาฯ สเหตุกา ธมฺมา, อเหตุกา ธมฺมาฯ เหตุสมฺปยุตฺตา ธมฺมา, เหตุวิปฺปยุตฺตา ธมฺมาฯ เหตู เจว ธมฺมา สเหตุกา จ, สเหตุกา เจว ธมฺมา น จ เหตูฯ เหตู เจว ธมฺมา เหตุสมฺปยุตฺตา จ, เหตุสมฺปยุตฺตา เจว ธมฺมา น จ เหตูฯ น เหตู โข ปน ธมฺมา สเหตุกาปิ, อเหตุกาปิฯ เหตุโคจฺฉกํฯ

จูฬนฺตรทุกํ

สปฺปจฺจยา ธมฺมา, อปฺปจฺจยา ธมฺมาฯ สงฺขตา ธมฺมา, อสงฺขตา ธมฺมาฯ สนิทสฺสนา ธมฺมา, อนิทสฺสนา ธมฺมาฯ สปฺปฏิฆา ธมฺมา, อปฺปฏิฆา ธมฺมาฯ รูปิโน ธมฺมา, อรูปิโน ธมฺมาฯ โลกิยา ธมฺมา, โลกุตฺตรา ธมฺมาฯ เกนจิ วิญฺเญยฺยา ธมฺมา, เกนจิ น วิญฺเญยฺยา ธมฺมาฯ จูฬนฺตรทุกํฯ

อาสวโคจฺฉกํ

อาสวา ธมฺมา, โน อาสวา ธมฺมาฯ สาสวา ธมฺมา, อนาสวา ธมฺมาฯ อาสวสมฺปยุตฺตา ธมฺมา, อาสววิปฺปยุตฺตา ธมฺมาฯ อาสวา เจว ธมฺมา สาสวา จ, สาสวา เจว ธมฺมา โน จ อาสวาฯ อาสวา เจว ธมฺมา อาสวสมฺปยุตฺตา จ, อาสวสมฺปยุตฺตา เจว ธมฺมา โน จ อาสวาฯ อาสววิปฺปยุตฺตา โข ปน ธมฺมา สาสวาปิ, อนาสวาปิฯ อาสวโคจฺฉกํฯ

สญฺโญชนโคจฺฉกํ

สญฺโญชนา ธมฺมา, โน สญฺโญชนา ธมฺมาฯ สญฺโญชนิยา ธมฺมา, อสญฺโญชนิยา ธมฺมาฯ สญฺโญชนสมฺปยุตฺตา ธมฺมา, สญฺโญชนวิปฺปยุตฺตา ธมฺมาฯ สญฺโญชนา เจว ธมฺมา สญฺโญชนิยา จ, สญฺโญชนิยา เจว ธมฺมา โน จ สญฺโญชนาฯ สญฺโญชนา เจว ธมฺมา สญฺโญชนสมฺปยุตฺตา จ, สญฺโญชนสมฺปยุตฺตา เจว ธมฺมา โน จ สญฺโญชนาฯ สญฺโญชนวิปฺปยุตฺตา โข ปน ธมฺมา สญฺโญชนิยาปิ, อสญฺโญชนิยาปิฯ สญฺโญชนโคจฺฉกํฯ

คนฺถโคจฺฉกํ

คนฺถา ธมฺมา, โน คนฺถา ธมฺมาฯ คนฺถนิยา ธมฺมา, อคนฺถนิยา ธมฺมาฯ คนฺถสมฺปยุตฺตา ธมฺมา, คนฺถวิปฺปยุตฺตา ธมฺมาฯ คนฺถา เจว ธมฺมา คนฺถนิยา จ, คนฺถนิยา เจว ธมฺมา โน จ คนฺถา ฯ คนฺถา เจว ธมฺมา คนฺถสมฺปยุตฺตา จ, คนฺถสมฺปยุตฺตา เจว ธมฺมา โน จ คนฺถาฯ คนฺถวิปฺปยุตฺตา โข ปน ธมฺมา คนฺถนิยาปิ, อคนฺถนิยาปิฯ คนฺถโคจฺฉกํฯ

โอฆโคจฺฉกํ

โอฆา ธมฺมา, โน โอฆา ธมฺมาฯ โอฆนิยา ธมฺมา, อโนฆนิยา ธมฺมาฯ โอฆสมฺปยุตฺตา ธมฺมา, โอฆวิปฺปยุตฺตา ธมฺมาฯ โอฆา เจว ธมฺมา โอฆนิยา จ, โอฆนิยา เจว ธมฺมา โน จ โอฆาฯ โอฆา เจว ธมฺมา โอฆสมฺปยุตฺตา จ, โอฆสมฺปยุตฺตา เจว ธมฺมา โน จ โอฆาฯ โอฆวิปฺปยุตฺตา โข ปน ธมฺมา โอฆนิยาปิ, อโนฆนิยาปิฯ โอฆโคจฺฉกํฯ

โยคโคจฺฉกํ

โยคา ธมฺมา, โน โยคา ธมฺมาฯ โยคนิยา ธมฺมา, อโยคนิยา ธมฺมาฯ โยคสมฺปยุตฺตา ธมฺมา, โยควิปฺปยุตฺตา ธมฺมาฯ โยคา เจว ธมฺมา โยคนิยา จ, โยคนิยา เจว ธมฺมา โน จ โยคาฯ โยคา เจว ธมฺมา โยคสมฺปยุตฺตา จ, โยคสมฺปยุตฺตา เจว ธมฺมา โน จ โยคาฯ โยควิปฺปยุตฺตา โข ปน ธมฺมา โยคนิยาปิ, อโยคนิยาปิฯ โยคโคจฺฉกํฯ

นีวรณโคจฺฉกํ

นีวรณา ธมฺมา, โน นีวรณา ธมฺมาฯ นีวรณิยา ธมฺมา, อนีวรณิยา ธมฺมาฯ นีวรณสมฺปยุตฺตา ธมฺมา, นีวรณวิปฺปยุตฺตา ธมฺมาฯ นีวรณา เจว ธมฺมา นีวรณิยา จ, นีวรณิยา เจว ธมฺมา โน จ นีวรณาฯ นีวรณา เจว ธมฺมา นีวรณสมฺปยุตฺตา จ, นีวรณสมฺปยุตฺตา เจว ธมฺมา โน จ นีวรณาฯ นีวรณวิปฺปยุตฺตา โข ปน ธมฺมา นีวรณิยาปิ, อนีวรณิยาปิฯ นีวรณโคจฺฉกํฯ

ปรามาสโคจฺฉกํ

ปรามาสา ธมฺมา, โน ปรามาสา ธมฺมาฯ ปรามฏฺฐา ธมฺมา, อปรามฏฺฐา ธมฺมาฯ ปรามาสสมฺปยุตฺตา ธมฺมา, ปรามาสวิปฺปยุตฺตา ธมฺมาฯ ปรามาสา เจว ธมฺมา ปรามฏฺฐา จ, ปรามฏฺฐาเจว ธมฺมา โน จ ปรามาสาฯ ปรามาสวิปฺปยุตฺตา โข ปน ธมฺมา ปรามฏฺฐาปิ, อปรามฏฺฐาปิฯ ปรามาสโคจฺฉกํฯ

มหนฺตรทุกํ

สารมฺมณา ธมฺมา, อนารมฺมณา ธมฺมาฯ จิตฺตา ธมฺมา, โน จิตฺตา ธมฺมาฯ เจตสิกา ธมฺมา, อเจตสิกา ธมฺมาฯ จิตฺตสมฺปยุตฺตา ธมฺมา, จิตฺตวิปฺปยุตฺตา ธมฺมาฯ จิตฺตสํสฏฺฐา ธมฺมา, จิตฺตวิสํสฏฺฐา ธมฺมาฯ จิตฺตสมุฏฺฐานา ธมฺมา, โน จิตฺตสมุฏฺฐานา ธมฺมาฯ จิตฺตสหภุโน ธมฺมา, โน จิตฺตสหภุโน ธมฺมาฯ จิตฺตานุปริวตฺติโน ธมฺมา, โน จิตฺตานุปริวตฺติโน ธมฺมาฯ จิตฺตสํสฏฺฐสมุฏฺฐานา ธมฺมา, โน จิตฺตสํสฏฺฐสมุฏฺฐานา ธมฺมาฯ จิตฺตสํสฏฺฐสมุฏฺฐานสหภุโน ธมฺมา, โน จิตฺตสํสฏฺฐสมุฏฺฐานสหภุโน ธมฺมาฯ จิตฺตสํสฏฺฐสมุฏฺฐานานุปริวตฺติโน ธมฺมา, โน จิตฺตสํสฏฺฐสมุฏฺฐานานุปริวตฺติโน ธมฺมาฯ อชฺฌตฺติกา ธมฺมา, พาหิรา ธมฺมาฯ อุปาทา ธมฺมา, โน อุปาทา ธมฺมาฯ อุปาทิณฺณา ธมฺมา, อนุปาทิณฺณา ธมฺมาฯ มหนฺตรทุกํฯ

อุปาทานโคจฺฉกํ

อุปาทานา ธมฺมา, โน อุปาทานา ธมฺมาฯ อุปาทานิยา ธมฺมา, อนุปาทานิยา ธมฺมาฯ อุปาทานสมฺปยุตฺตา ธมฺมา, อุปาทานวิปฺปยุตฺตา ธมฺมาฯ อุปาทานา เจว ธมฺมา อุปาทานิยา จ, อุปาทานิยา เจว ธมฺมา โน จ อุปาทานาฯ อุปาทานา เจว ธมฺมา อุปาทานสมฺปยุตฺตา จ, อุปาทานสมฺปยุตฺตา เจว ธมฺมา โน จ อุปาทานาฯ อุปาทานวิปฺปยุตฺตา โข ปน ธมฺมา อุปาทานิยาปิ, อนุปาทานิยาปิฯ อุปาทานโคจฺฉกํฯ

กิเลสโคจฺฉกํ

กิเลสา ธมฺมา, โน กิเลสา ธมฺมาฯ สํกิเลสิกา ธมฺมา, อสํกิเลสิกา ธมฺมาฯ สํกิลิฏฺฐา ธมฺมา, อสํกิลิฏฺฐา ธมฺมาฯ กิเลสสมฺปยุตฺตา ธมฺมา, กิเลสวิปฺปยุตฺตา ธมฺมาฯ กิเลสา เจว ธมฺมา สํกิเลสิกา จ, สํกิเลสิกา เจว ธมฺมา โน จ กิเลสาฯ กิเลสา เจว ธมฺมา สํกิลิฏฺฐา จ, สํกิลิฏฺฐา เจว ธมฺมา โน จ กิเลสาฯ กิเลสา เจว ธมฺมา กิเลสสมฺปยุตฺตา จ, กิเลสสมฺปยุตฺตา เจว ธมฺมา โน จ กิเลสาฯ กิเลสวิปฺปยุตฺตา โข ปน ธมฺมา สํกิเลสิกาปิ, อสํกิเลสิกาปิฯ กิเลสโคจฺฉกํฯ

ปิฏฺฐิทุกํ

ทสฺสเนน ปหาตพฺพา ธมฺมา, น ทสฺสเนน ปหาตพฺพา ธมฺมาฯ ภาวนาย ปหาตพฺพา ธมฺมา, น ภาวนาย ปหาตพฺพา ธมฺมาฯ ทสฺสเนน ปหาตพฺพเหตุกา ธมฺมา, น ทสฺสเนน ปหาตพฺพเหตุกา ธมฺมาฯ ภาวนาย ปหาตพฺพเหตุกา ธมฺมา, น ภาวนาย ปหาตพฺพเหตุกา ธมฺมาฯ สวิตกฺกา ธมฺมา, อวิตกฺกา ธมฺมาฯ สวิจารา ธมฺมา, อวิจารา ธมฺมาฯ สปฺปีติกา ธมฺมา, อปฺปีติกา ธมฺมาฯ ปีติสหคตา ธมฺมา, น ปีติสหคตา ธมฺมาฯ สุขสหคตา ธมฺมา, น สุขสหคตา ธมฺมาฯ อุเปกฺขาสหคตา ธมฺมา, น อุเปกฺขาสหคตา ธมฺมาฯ กามาวจรา ธมฺมา, น กามาวจรา ธมฺมาฯ รูปาวจรา ธมฺมา, น รูปาวจรา ธมฺมาฯ อรูปาวจรา ธมฺมา, น อรูปาวจรา ธมฺมาฯ ปริยาปนฺนา ธมฺมา, อปริยาปนฺนา ธมฺมาฯ นิยฺยานิกา ธมฺมา, อนิยฺยานิกา ธมฺมาฯ นิยตา ธมฺมา, อนิยตา ธมฺมาฯ สอุตฺตรา ธมฺมา, อนุตฺตรา ธมฺมาฯ สรณา ธมฺมา, อรณา ธมฺมาฯ ปิฏฺฐิทุกํฯ

อภิธมฺมทุกมาติกาฯ