ชาติยํ โพธิสตฺตสฺส, เมทนีกมฺปนาทิกํ;
วิเสสตฺตมเนกมฺปิ, อยํ ธมฺมนิยามตาฯ
[473]
โคจเรน ปสาทสฺมิํ, ฆฏฺฏิเต ปน เตนิธ;
อุปฺปตฺตาวชฺชนาทีนํ, อยํ จิตฺตนิยามตาฯ
[474]
อนฺธชฺชนานํ หทยนฺธการํ,
วิทฺธํสนํ ทีปมิมํ ชลนฺตํ;
สิกฺเขถ ธีโร สตตํ ปยุตฺโต,
โมหนฺธการาปคมํ ยทิจฺเฉติฯ
อิติ อภิธมฺมาวตาเร วิปากจิตฺตปฺปวตฺตินิทฺเทโส นาม
สตฺตโม ปริจฺเฉโทฯ
8. อฏฺฐโม ปริจฺเฉโท
ปกิณฺณกนิทฺเทโส
[475]
อิทานิ ปน สพฺเพสํ, เอเตสํ มานสํ มยา;
ปาฏวตฺถาย ภิกฺขูนํ, กถียติ ปกิณฺณกํฯ
[476]
ปนฺถมกฺกฏโก นาม, ทิสาสุ ปน ปญฺจสุ;
ตตฺถ สุตฺตํ ปสาเรตฺวา, ชาลมชฺเฌ นิปชฺชติฯ
[477]
ปฐมาย ทิสาเยตฺถ, สุตฺเต ปน ปสาริเต;
ปาณเกน ปฏงฺเคน, ฆฏฺฏิเต มกฺขิกาย วาฯ
[478]
นิปนฺนฏฺฐานโต กิญฺจิ, จลิตฺวา อุณฺณนาภิ ตุ;
คนฺตฺวา สุตฺตานุสาเรน, ยูสํ ปิวติ ตสฺส สาฯ
[479]
ปุนาคนฺตฺวาน ตตฺเถว, นิปชฺชติ ยถาสุขํ;
เอวเมว กโรเตว, ทิสาสุ ทุติยาทิสุฯ
[480]
ปสาทา ปญฺจ ทฏฺฐพฺพา, สุตฺตํ ปญฺจทิสาสฺวิว;
จิตฺตํ ปน จ ทฏฺฐพฺพํ, มชฺเฌ มกฺกฏโก วิยฯ
[481]
ปาณกาทีหิ สุตฺตสฺส, ตสฺส สงฺฆฏฺฏนา วิย;
ปสาทานํ ตุ ทฏฺฐพฺพา, ฆฏฺฏนารมฺมเณน หิฯ
[482]
จลนํ วิย ตํมชฺเฌ, นิปนฺนายุณฺณนาภิยา;
ปสาทฆฏฺฏนํ ตตฺถ, คเหตฺวารมฺมณํ ปนฯ
[483]
มโนธาตุกฺริยาจิตฺตํ, ภวงฺคาวฏฺฏนํ มตํ;
ตสฺสา สุตฺตานุสารํว, วีถิจิตฺตปวตฺตนํฯ
[484]
สีเส ปนสฺส วิชฺฌิตฺวา, ยูสปานํว เจตโส;
อารมฺมเณสุ ทฏฺฐพฺพํ, ชวนสฺส ปวตฺตนํฯ
[485]
ปุนาคนฺตฺวา ยถา สุตฺต-ชาลมชฺเฌ นิปชฺชนํ;
วตฺถุํเยว จ นิสฺสาย, จิตฺตสฺส ปริวตฺตนํฯ
[486]
อิทํ ตุ ปน โอปมฺมํ, อตฺถํ ทีเปติ กิํ ตุ หิ;
อารมฺมเณน ปฐมํ, ปสาเท ฆฏฺฏิเต ปนฯ
[487]
ปสาทวตฺถุโต จิตฺตา, วตฺถุสนฺนิสฺสิตํ มโน;
ตโต หิ ปฐมํเยว, ชายตีติ หิ ทีปิตํฯ
[488]
เอเกการมฺมณํ ทฺวีสุ, ทฺวีสุ ทฺวาเรสุ สพฺพโส;
อาคจฺฉติ เตนาปาถํ, อยมตฺโถปิ ทีปิโตฯ
[489]
รูปํ จกฺขุปสาทมฺหิ, ฆฏฺฏิตฺวา ตงฺขเณ ปน;
มโนทฺวาเร ตถาปาถ-มาคจฺฉติ นิสํสโยฯ
[490]
ขโค ยถา หิ รุกฺขคฺเค, นิลียนฺโตว สาขิโน;
สาขํ ฆฏฺเฏติ ตสฺสีธ, ฉายา ผรติ ภูมิยํฯ
[491]
สาขาย ฆฏฺฏนจฺฉายา, ผรณานิ จ สพฺพโส;
อปุพฺพาจริมํ เอก-กฺขณสฺมิํเยว ชายเรฯ
[492]
เอวเมว จ รูปสฺส, ปสาทสฺส จ ฆฏฺฏนํ;
ภวงฺคจลนสฺสาปิ, ปจฺจยตฺเตน อตฺถโตฯ
[493]
ตเถว จ มโนทฺวาเร, อาปาถคมนมฺปิ จ;
อปุพฺพาจริมํ เอก-กฺขณสฺมิํเยว โหติติฯ
[494]
ตโต ภวงฺคํ ฉินฺทิตฺวา, จกฺขุทฺวาเร ยถากฺกมํ;
อาวชฺชเน สมุปฺปนฺเน, ทสฺสเน สมฺปฏิจฺฉเนฯ
[495]
สนฺตีรเณ สมุปฺปนฺเน, ตโต โวฏฺฐพฺพเนปิ จ;
กุสลํ ชวนํ จิตฺตํ, ตถากุสลเมว วาฯ
[496]
เอโส เอว นโย โสต-ทฺวาราทีสุปิ วิญฺญุนา;
อวิเสเสน วิญฺเญยฺโย, สทฺทาทีนํ ตุ ฆฏฺฏเนฯ
[497]
โทวาริโกปมาทีนิ , เอตสฺสตฺถสฺส ทีปเน;
อุทฺธริตฺวาน ตาเนตฺถ, ทสฺเสตพฺพานิ วิญฺญุนาฯ
[498]
อสมฺเภเทน จกฺขุสฺส, รูปาปาถคเมน จ;
อาโลกนิสฺสเยนาปิ, สมนกฺการเหตุนาฯ
[499]
ปจฺจเยหิ ปเนเตหิ, สเมเตหิ จตูหิปิ;
ชายเต จกฺขุวิญฺญาณํ, สมฺปยุตฺเตหิ ตํ สหฯ
[500]
อสมฺเภเทน โสตสฺส, สทฺทาปาถคเมน จ;
อากาสนิสฺสเยนาปิ, สมนกฺการเหตุนาฯ
[501]
ปจฺจเยหิ ปเนเตหิ, สเมเตหิ จตูหิปิ;
ชายเต โสตวิญฺญาณํ, สมฺปยุตฺเตหิ ตํ สหฯ
[502]
อสมฺเภเทน ฆานสฺส, คนฺธาปาถคเมน จ;
วาโยสนฺนิสฺสเยนาปิ, สมนกฺการเหตุนาฯ
[503]
ปจฺจเยหิ ปเนเตหิ, สเมเตหิ จตูหิปิ;
ชายเต ฆานวิญฺญาณํ, สมฺปยุตฺเตหิ ตํ สหฯ
[504]
อสมฺเภเทน ชิวฺหาย, รสาปาถคเมน จ;
อาโปสนฺนิสฺสเยนาปิ, สมนกฺการเหตุนาฯ
[505]
ปจฺจเยหิ ปเนเตหิ, สเมเตหิ จตูหิปิ;
ชายเต ชิวฺหาวิญฺญาณํ, สมฺปยุตฺเตหิ ตํ สหฯ
[506]
อสมฺเภเทน กายสฺส, โผฏฺฐพฺพาปาถสงฺคมา;
ปถวีนิสฺสเยนาปิ, สมนกฺการเหตุนาฯ
[507]
ปจฺจเยหิ ปเนเตหิ, สเมเตหิ จตูหิปิ;
ชายเต กายวิญฺญาณํ, สมฺปยุตฺเตหิ ตํ สหฯ
[508]
อสมฺเภทา มนสฺสาปิ, ธมฺมาปาถคเมน จ;
วตฺถุสนฺนิสฺสเยนาปิ, สมนกฺการเหตุนาฯ
[509]
ปจฺจเยหิ ปเนเตหิ, สเมเตหิ จตูหิปิ;
มโนวิญฺญาณเมวํ ตุ, สมฺปยุตฺเตหิ ชายเตฯ
[510]
มโน ภวงฺคจิตฺตนฺติ, เวทิตพฺพํ วิภาวินา;
อาวชฺชนกฺริยาจิตฺตํ, สมนกฺกาโรติ สญฺญิตํฯ
[511]
วตฺถุสนฺนิสฺสเยนาติ, นายํ สพฺพตฺถ คจฺฉติ;
ภวํ ตุ ปญฺจโวการํ, สนฺธาย กถิโต ปนฯ
[512]
ปฏิสนฺธาทิจิตฺตานิ, สพฺพาเนกูนวีสติ;
กาเม ทส จ รูเปสุ, ปญฺจ จตฺตาริรูปิสุฯ
[513]
กมฺมํ กมฺมนิมิตฺตญฺจ, ตถา คตินิมิตฺตกํ;
อิทํ หิ ติวิธํ เตสํ, อารมฺมณมุทีริตํฯ
[514]
กามาวจรสนฺธีนํ, ปริตฺตารมฺมณํ มตํ;
ปจฺจุปฺปนฺนมตีตํ วา, โหติ นตฺถิ อนาคตํฯ
[515]
อฏฺเฐว จ มหาปากา, ตีณิ สนฺตีรณานิ จ;
เอกาทสวิธํ จิตฺตํ, ตทารมฺมณสญฺญิตํฯ
[516]
เอกาทสวิเธ จิตฺเต, ตทารมฺมณสญฺญิเต;
ทส ปุญฺญวิปากานิ, เอกํ โหติ อปุญฺญชํฯ
[517]
มหาปากา น ชายนฺเต, รูปารูปภวทฺวเย;
กาเม รูเป ภเว เจว, โหติ สนฺตีรณตฺตยํฯ
[518]
ตทารมฺมณจิตฺตานิ, ยานิ วุตฺตานิ สตฺถุนา;
เตสุ จิตฺตํ ปเนกมฺปิ, รูปารูปภวทฺวเยฯ
[519]
น ตทารมฺมณํ หุตฺวา, ปวตฺตติ กทาจิปิ;
กสฺมา น โหติ เจ ตตฺถ, พีชสฺสาภาวโต ปนฯ
[520]
ปฏิสนฺธิพีชํ นตฺเถตฺถ, กามาวจรสญฺญิตํ;
รูปาทิโคจเร ตสฺส, ภเวยฺย ชนกํ ตุ ยํฯ
[521]
จกฺขุวิญฺญาณกาทีนํ , นตฺถิตาปชฺชตีติ เจ;
นินฺทฺริยานํ ปวตฺตานุ-ภาวโต จิตฺตสมฺภโวฯ
[522]
เอกนฺเตน ยถา เจตํ, ตทารมฺมณมานสํ;
นปฺปวตฺตติ สพฺพมฺปิ, รูปารูปภวทฺวเยฯ
[523]
อกามาวจรธมฺเมปิ, ตเทตํ นานุพนฺธติ;
กสฺมา อชนกตฺตา หิ, ชนกสฺสาสมานโตฯ
[524]
ชนกํ เตน ตุลฺยํ วา, กามาวจรสญฺญิตํ;
กุสลากุสลาทิํ ตุ, ชวนํ อนุพนฺธติฯ
[525]
กามาวจรธมฺมาปิ , เย มหคฺคตโคจรา;
หุตฺวา วตฺตนฺติ เต จาปิ, อิทํ เนวานุพนฺธติฯ
[526]
ปริตฺตารมฺมณตฺตา จ, เอกนฺเตน ปนสฺส หิ;
ตถาปริจิตตฺตา จ, นานุพนฺธติ สพฺพทาฯ
[527]
กิํ เตน ยุตฺติวาเทน, วุตฺตํ อฏฺฐกถาสุ หิ;
ตทารมฺมณจิตฺตานิ, เอกาทสปิ สพฺพโสฯ
[528]
นามโคตฺตํ ปนารพฺภ, ชวเน ชวิเตปิ จ;
ตทารมฺมณํ น คณฺหนฺติ, รูปารูปภเวสุ วาฯ
[529]
ยทา ปญฺญตฺติมารพฺภ, ชวเน ชวิเตปิ วา;
ตถา วิปสฺสนายาปิ, ลกฺขณารมฺมณาย จฯ
[530]
ตทารมฺมณา น ลพฺภนฺติ, มิจฺฉตฺตนิยเตสุปิ;
น โลกุตฺตรธมฺเมปิ, อารพฺภ ชวเน คเตฯ
[531]
ตถา มหคฺคเต ธมฺเม, อารพฺภ ชวเน ปน;
ปฏิสมฺภิทาญาณานิ, อารพฺภ ชวิเตปิ จฯ
[532]
มโนทฺวาเรปิ สพฺเพสํ, ชวนานมนนฺตรํ;
ตทารมฺมณจิตฺตานิ, ภวนฺติ อนุปุพฺพโตฯ
[533]
น วิชฺชติ มโนทฺวาเร, ฆฏฺฏนารมฺมณสฺส หิ;
กถํ ภวงฺคโต โหติ, วุฏฺฐานํ ปน เจตโสฯ
[534]
มโนทฺวาเรปิ อาปาถ-มาคจฺฉนฺเตว โคจรา;
ฆฏฺฏนาย วินา ตสฺมา, จิตฺตานํ โหติ สมฺภโวฯ
[535]
ทฺวาทสาปุญฺญจิตฺตานํ , วิปากา สตฺตสตฺตติ;
ภวนฺติ จตุราสีติ, ปาปปากา ปวตฺติยํฯ
[536]
เอกาทสวิธานํ ตุ, หิตฺวา อุทฺธจฺจมานสํ;
เอกาทสวิธา เจว, ภวนฺติ ปฏิสนฺธิโยฯ
[537]
กฺริยจิตฺเตสุ สพฺเพสุ, ชวนํ น จ โหติ ยํ;
ตํ เว กรณมตฺตตฺตา, วาตปุปฺผสมํ มตํฯ
[538]
ชวนตฺตํ ตุ สมฺปตฺตํ, กิจฺจสาธนโต ปน;
ฉินฺนมูลสฺส รุกฺขสฺส, ปุปฺผํว อผลํ สิยาฯ
[539]
ปฏิจฺจ ปน เอตสฺมา, ผลเมตีติ ปจฺจโย;
โย ธมฺโม ยสฺส ธมฺมสฺส, ฐิติยุปฺปตฺติยาปิ วาฯ
[540]
อุปกาโร หิ โส ตสฺส, ปจฺจโยติ ปวุจฺจติ;
สมฺภโวปภโว เหตุ, การณํ ปจฺจโย มโตฯ
[541]
โลภาทิ ปน โย ธมฺโม, มูลฏฺเฐนุปการโก;
เหตูติ ปน โส ธมฺโม, วิญฺญาตพฺโพ วิภาวินาฯ
[542]
โลโภ โทโส จ โมโห จ,
ตถาโลภาทโย ตโย;
ฉเฬว เหตุโย โหนฺติ,
ชาติโต นวธา สิยุํฯ
[543]
ธมฺมานํ กุสลาทีนํ, กุสลาทิตฺตสาธโก;
มูลฏฺโฐติ วทนฺเตวํ, เอเก อาจริยา ปนฯ
[544]
เอวํ สนฺเต ตุ เหตูนํ, ตํสมุฏฺฐานรูปิสุ;
เหตุปจฺจยตา เนว, สมฺปชฺชติ กทาจิปิฯ
[545]
น หิ เต ปน รูปานํ, สาเธนฺติ กุสลาทิกํ;
น เตสํ ปน รูปานํ, ปจฺจยา น จ โหนฺติ เตฯ
[546]
ตสฺมา หิ กุสลาทีนํ, กุสลาทิตฺตสาธโก;
มูลฏฺโฐติ น คนฺตพฺโพ, วิญฺญุนา สมยญฺญุนาฯ
[547]
สุปฺปติฏฺฐิตภาวสฺส, สาธเนนุปการโก;
มูลฏฺโฐติ จ เหตูนํ, วิญฺญาตพฺโพ วิภาวินาฯ
[548]
กุสลากุสลา เหตู, กฺริยาเหตู จ สพฺพโส;
ธมฺมานํ สมฺปยุตฺตานํ, ตํสมุฏฺฐานรูปินํฯ
[549]
เหตุปจฺจยตํ ยาตา, ปญฺจโวการภูมิยํ;
สมฺปยุตฺตานเมเวเต, จตุโวการภูมิยํฯ
[550]
กาเม วิปากเหตูปิ, กามาวจรภูมิยํ;
อตฺตนา สมฺปยุตฺตานํ, ปฏิสนฺธิกฺขเณ ปนฯ
[551]
กฏตฺตารูปชาตานํ, ตเถว จ ปวตฺติยํ;
จิตฺตชานญฺจ รูปานํ, เหตุปจฺจยตํ คตาฯ
[552]
รูเป วิปากเหตุ จ, รูปาวจรภูมิยํ;
ตถา วุตฺตปฺปการานํ, โหนฺติ เต เหตุปจฺจยาฯ
[553]
เหตุโย ปญฺจโวกาเร, โลกุตฺตรวิปากชา;
จิตฺตชานญฺจ รูปานํ, สมฺปยุตฺตานเมว จฯ
[554]
เต เหตุปจฺจยา โหนฺติ, จตุโวการภูมิยํ;
ภวนฺติ สมฺปยุตฺตานํ, อิตเร จ สภูมิยํฯ
[555]
เหตุตฺโถ เหตุโย เจว, เหตุปจฺจยสมฺภโว;
เอวเมว จ วิญฺเญยฺโย, สญฺชาตสุขเหตุนาฯ
[556]
ฉนฺโท จิตฺตญฺจ วีริยํ, วีมํสา จาติ สตฺถุนา;
โลกาธิปตินา วุตฺตา, จตุธาธิปตี สิยุํฯ
[557]
ฉนฺทํ ตุ เชฏฺฐกํ กตฺวา, ฉนฺทํ กตฺวา ธุรํ ปน;
จิตฺตสฺสุปฺปตฺติกาลสฺมิํ, ฉนฺทาธิปติ นามโสฯ
[558]
เอเสว จ นโย เญยฺโย, เสเสสุปิ จ ตีสุปิ;
อธิปฺปตีติ นิทฺทิฏฺโฐ, เชฏฺฐฏฺเฐนุปการโกฯ
[559]
สุมติมติวิโพธนํ วิจิตฺตํ,
กุมติมตินฺธนปาวกํ ปธานํ;
อิมมติมธุรํ อเวทิ โย โย,
ชินวจนํ สกลํ อเวทิ โส โสฯ
อิติ อภิธมฺมาวตาเร ปกิณฺณกนิทฺเทโส นาม
อฏฺฐโม ปริจฺเฉโทฯ
9. นวโม ปริจฺเฉโท
ปุญฺญวิปากปจฺจยนิทฺเทโส
[560]
พาตฺติํส ปากจิตฺตานิ, โลกิกาเนว ยานิ หิ;
เอเตสํ ปากจิตฺตานํ, ปฏิสนฺธิปวตฺติสุฯ
[561]
ปุญฺญาปุญฺญาทิสงฺขารา, ยถา เยสญฺจ ปจฺจยา;
ภวาทีสุ ตถา เตปิ, วิญฺญาตพฺพา วิภาวินาฯ
[562]
ตโย ภวา จตสฺโส จ, โยนิโย คติปญฺจกํ;
วิญฺญาณฏฺฐิติโย สตฺต, สตฺตาวาสา นเวริตาฯ
[563]
กาเม ปุญฺญาภิสงฺขาร-สญฺญิตา อฏฺฐ เจตนา;
นวนฺนํ ปากจิตฺตานํ, กาเม สุคติยํ ปนฯ
[564]
นานากฺขณิกกมฺมูป-นิสฺสยปจฺจเยหิ จ;
ทฺเวธา หิ ปจฺจยา เตสํ, ภวนฺติ ปฏิสนฺธิยํฯ
[565]