ตสฺมิมฺปิ ปรมตฺถา จ, สจฺจิกฏฺฐสลกฺขณา;
อตฺถา ปญฺญตฺติมตฺตา จ, อตฺถปญฺญตฺตินามกาฯ
[1080]
เตสํ ปญฺญาปิกา เจว, นามปญฺญตฺตินามิกา;
อิจฺเจวํ วณฺณนามคฺเค, เญยฺยตฺตา ติวิธา กตาฯ
[1081]
ปรมตฺถสจฺจํ นาม, ปรมตฺถาว ตตฺถ จ;
สจฺจิกฏฺฐสภาวตฺตา, อวิสํวาทกา หิ เตฯ
[1082]
สมฺมุติสจฺจํ ปญฺญตฺติทฺวยํ โวหารวุตฺติยา;
โลกสมญฺญาธิปฺปายาวิสํวาทกภาวโตฯ
[1083]
อิติ สจฺจทฺวยมฺเปตํ, อกฺขาสิ ปุริสุตฺตโม;
เตนาปิ นามสํวิญฺญู, โวหเรยฺยุภยมฺปิ วาฯ
อิติ ปญฺญตฺติวิภาเค ปเภทกถา นิฏฺฐิตาฯ
สตฺตวีสติโม ปริจฺเฉโทฯ
อฏฺฐวีสติโม ปริจฺเฉโท
28. อตฺถปญฺญตฺติกถา
[1084]
ตตฺถ จ ปุพฺพาปริย-ปวตฺตกฺขนฺธสมฺมตา;
วิญฺญตฺตินฺทฺริยวิปฺผาร-วิเสโสปนิพนฺธนาฯ
[1085]
เทวยกฺขมนุสฺสาทิ-นานาเภทา สลกฺขิกา;
สตฺตปญฺญตฺติ นามายํ, สฺวายํ สตฺโตติ สมฺมโตฯ
[1086]
วฏฺฏตฺตยมุปาทาย,
ขนฺธายตนวุตฺติยา;
การโก เวทโก วายํ,
สนฺธาวติ ภเว ภเวฯ
[1087]
ตสฺมา สํสารมาปนฺโน, สตฺโต นาม ส ปุคฺคโล;
อหมตฺตาปรา อิตฺถี, ปุริโสติ จ กปฺปิโตฯ
[1088]
สฺวายํ ขนฺธาทิโต สตฺโต, อญฺโญติ จ น วุจฺจติ;
ขนฺธาทิวินิมุตฺตสฺส, สตฺตสฺเสว อภาวโตฯ
[1089]
ขนฺธา ขนฺธานเมวายํ, สตฺโตติ จ น วุจฺจติ;
ขนฺธโวหารโต ตสฺส, อญฺญโวหารสมฺภวาฯ
[1090]
อิจฺเจวํ ขนฺธนานตฺเต-กตฺตมุตฺโตปิ อตฺถโต;
ตพฺพิเสสาวจริต-โวหาโร จ ตุ ทิสฺสติฯ
[1091]
เตนายํ ปุคฺคโล สตฺโต, ชายติชฺชิยฺยตีติ จ;
มียตีติ จ ตสฺสายํ, สํสาโรติ ปวุจฺจติฯ
[1092]
มโต ชาโต จ น สฺเวว, ขนฺธเภโทปจารโต;
นาปโร สฺเวว สนฺตานเภทาภาโวปจารโตฯ
[1093]
นานตฺเตกตฺตมิจฺเจวํ, ปุคฺคลสฺโสปจารโต;
อุจฺเฉทสสฺสตตฺตํ วา, ตสฺมา โนเปติ ปุคฺคโลฯ
[1094]
อิจฺจายํ ปุคฺคโล นาม, สตฺโต สํสารการโก;
ขนฺธาทิกมุปาทาย, ปญฺญตฺโตติ ปวุจฺจติฯ
[1095]
ตสฺมา ปุคฺคลสงฺขาตา, สํสาโรปนิพนฺธนา;
สตฺตปญฺญตฺติ นามาติ, วิญฺญาตพฺพา วิภาวินาฯ
[1096]
อชฺฌตฺติกา จ เกสาทิโกฏฺฐาสา พาหิเรสุ จ;
ภูมิปพฺพตปาสาณติณรุกฺขลตาทิกาฯ
[1097]
ภูตสมฺภารนิพฺพตฺติวิภาคปริกปฺปิตา;
ตมุปาทาย สมฺภารปญฺญตฺตีติ ปวุจฺจติฯ
[1098]
ภูตสมฺภารสณฺฐานวิภาคปริกปฺปิตา;
สณฺฐานปญฺญตฺติ นาม, ถมฺภกุมฺภาทิกา มตาฯ
[1099]
ภูตสมฺภารสงฺฆาตวิเสสปริกปฺปิตา;
สงฺฆาตปญฺญตฺติ นาม, รถเคหาทิกา มตาฯ
[1100]
ภูตสมฺภารวิเสสปริณามปกปฺปิตา;
ปริณามปญฺญตฺตีติ, ทธิภตฺตาทิกา มตาฯ
[1101]
อิตฺถมชฺฌตฺตพหิทฺธา , ธมฺมา สมฺภารสมฺภูตา;
สนฺตานวุตฺติ สงฺเกตสิทฺธา ปญฺญตฺติ ปญฺจธาฯ
[1102]
ตถา ตถา สมุปฺปนฺนวิกปฺปาโภคสมฺมตา;
วิกปฺปปญฺญตฺติ นาม, กาลากาสทิสาทิกาฯ
[1103]
ตํ ตํ นิมิตฺตมาคมฺม, ตโตปฏฺฐานกปฺปิตา;
อุปฏฺฐานปญฺญตฺตีติ, ปฏิภาคาทิกา มตาฯ
[1104]
วิเสสาการมตฺตาปิ, อตฺถนฺตรปกปฺปิตา;
อาการปญฺญตฺติ นาม, วิญฺญตฺติลหุตาทิกาฯ
[1105]
ตํ ตํ การณมาคมฺม, ตถา โวหารกปฺปิตา;
โวหารปญฺญตฺติ นาม, กถินาปตฺติอาทิกาฯ
[1106]
พาโล โย โส จ เม อตฺตา,
โส ภวิสฺสามิ มํ จ ตุ;
นิจฺโจ ธุโว สสฺสโตติ-
อาทิกา ปน สพฺพถาฯ
[1107]
ตพฺโพหารนิมิตฺตานํ, อภาเวปิ ปวตฺติโต;
อภินิเวสปญฺญตฺติ, นาม ติตฺถิยกปฺปิตาฯ
[1108]
อิจฺเจวํ โลกสาสนติตฺถายตนกปฺปิตา;
สนฺตานมุตฺตสงฺเกตสิทฺธา อตฺถาปิ ปญฺจธาฯ
[1109]
สงฺกานวุตฺติสนฺตานมุตฺตเภทวสา ทฺวิธา;
อตฺถปญฺญตฺติ นามายํ, ทสธา ปริทีปิตาฯ
[1110]
อิติ วุตฺตปฺปกาเรสุ, ปญฺญตฺตตฺเถสุ ปณฺฑิตา;
ปญฺญตฺติมตฺตํ สนฺธาย, โวหรนฺติ ยถากถํฯ
[1111]
ตทญฺเญ ปน พาลา จ, ติตฺถิยาปิ อโกวิทา;
ปญฺญตฺติมติธาวิตฺวา, คณฺหนฺติ ปรมตฺถโตฯ
[1112]
เต ตถา คหิตาการา, อญฺญาณคหิตา ชนา;
มิจฺฉตฺตาภินิวิฏฺฐา จ, วฑฺฒนฺติ ภวพนฺธนํฯ
[1113]
ทุวิเธสุปิ อตฺเถสุ, ตสฺมา ปณฺฑิตชาติโก;
ปรมตฺถปญฺญตฺตีสุ, วิภาคมิติ ลกฺขเยติฯ
อิติ ปญฺญตฺติวิภาเค อตฺถปญฺญตฺติกถา นิฏฺฐิตาฯ
อฏฺฐวีสติโม ปริจฺเฉโทฯ
เอกูนติํสติโม ปริจฺเฉโท
29. นามปญฺญตฺติกถา
[1114]
นามโวหารสงฺเกตการโณปนิพนฺธนา;
ยถาวุตฺตตฺถสทฺทานํ, อนฺตรา จินฺตนา คตาฯ
[1115]
นามปญฺญตฺติ นามายํ, อตฺถสทฺทวินิสฺสฏา;
ตํทฺวยาพทฺธสงฺเกตเญยฺยากาโรปลกฺขิตาฯ
[1116]
ยา คยฺหติ นามโฆสโคจรุปฺปนฺนวีถิยา;
ปวตฺตานนฺตรุปฺปนฺน-มโนทฺวาริกวีถิยาฯ
[1117]
มญฺจปีฐาทิสทฺทํ หิ, โสตวิญฺญาณวีถิยา;
สุตฺวา ตเมว จินฺเตตฺวา, มโนทฺวาริกวีถิยาฯ
[1118]
ตโต สงฺเกตนิปฺผนฺนํ, นามํ จินฺตาย คยฺหติ;
นามปญฺญตฺติอตฺถา ตุ, ตโต คยฺหนฺติ สมฺภวาฯ
[1119]
สทฺทนามตฺถปญฺญตฺติปรมตฺถวเสน หิ;
จตุธา ติวิธา วาถ, จินฺตนา ตตฺถ อิจฺฉิตาฯ
[1120]
อิตฺถมฏฺฐกถามคฺคํ, วณฺเณนฺเตน หิ ทสฺสิโต;
นโย อาจริเยเนติ, วิภาโคยํ ปกาสิโตฯ
[1121]
นตฺถญฺญา กาจิ วิญฺญตฺติ, วิการสหิโต ปน;
สทฺโทว นามปญฺญตฺติ, อิจฺเจกจฺเจหิ วณฺณิตํฯ
[1122]
ตเทตํ นามปญฺญตฺติภาเวเนกวิธมฺปิ จ;
เนรุตฺติกยาทิจฺฉกวสา นามํ ทฺวิธา ภเวฯ
[1123]
สญฺญาสุ ธาตุรูปานิ, ปจฺจยญฺจ ตโต ปรํ;
กตฺวา วณฺณาคมาทิญฺจ, สทฺทลกฺขณสาธิตํฯ
[1124]