กาลตฺตยวิภาเคสุ , กงฺขาสํกฺเลสโสธนํ;
กงฺขาวิตรณา นาม, วิสุทฺธีติ ปวุจฺจตีติฯ
อิติ นิพฺพานวิภาเค ปริคฺคหวิสุทฺธิกถา นิฏฺฐิตาฯ
จตุวีสติโม ปริจฺเฉโทฯ
ปญฺจวีสติโม ปริจฺเฉโท
25. วิปสฺสนาวุทฺธิกถา
[981]
สีลจิตฺตทิฏฺฐิกงฺขาวิตรณวิสุทฺธิโย ;
ปตฺวา กลาปโต ตาว, สมฺมเสยฺย ตโต ปรํฯ
[982]
กลาปโต สมฺมสนํ, อุทยพฺพยทสฺสนํ;
ภงฺคญาณํ ภยญาณํ, ตถาทีนวนิพฺพิทาฯ
[983]
มุจฺจิตุกมฺยตาญาณํ, ปฏิสงฺขานุปสฺสนา;
สงฺขารุเปกฺขานุโลมมิจฺจานุกฺกมโต ฐิตาฯ
[984]
วิปสฺสนาติ จกฺขาตา, ทสญาณปรมฺปรา;
ลกฺขณตฺตยมาหจฺจ, สงฺขาเรสุ ปวตฺตติฯ
[985]
ตสฺมา กลาปโต ตาว, สมฺมเสยฺย ติลกฺขณํ;
สมฺมสิตฺวา อตีตาทิขนฺธายตนธาตุโยฯ
[986]
อนิจฺจา เต ขยฏฺเฐน, ขนฺธา ทุกฺขา ภยฏฺฐโต;
อนตฺตา อสารกฏฺเฐน, อิจฺจาภิณฺหํ วิจินฺตยํฯ
[987]
ตสฺเสวํ สมฺมสนฺตสฺส, อุปฏฺฐาติ ติลกฺขณํ;
สงฺขาเรสุ ตโต โยคี, ขณสนฺตติอทฺธโตฯ
[988]
ปจฺจุปฺปนฺนาน ธมฺมานํ, อุทยญฺจ วยํ ตถา;
ปญฺญาสาการเภเทหิ, อนุปสฺสติ ตตฺถ หิฯ
[989]
อวิชฺชาตณฺหากมฺมานํ, อุทยา จ นิโรธโต;
สมุทยา นิโรธา จ, ปญฺจนฺนํ ทสฺสิตา ตถาฯ
[990]
รูปสฺสาหารโต ติณฺณํ, ผสฺสโต นามรูปโต;
วิญฺญาณสฺเสติ สพฺเพปิ, จตฺตาลีส สมิสฺสิตาฯ
[991]
นิพฺพตฺติลกฺขณํ ภงฺค-
ลกฺขณญฺเจตฺถ ปสฺสโต;
ขณโตทยโต เจติ,
สมปญฺญาส โหนฺติ เตฯ
[992]
อิติ ขนฺธมุเขเนเต, วิภตฺตา อุทยพฺพยา;
อายตนฺนาทิเภเทหิ, โยเชตพฺพา ยถารหํฯ
[993]
อุทยญฺจ วยญฺเจวํ, ปสฺสโต ตสฺส โยคิโน;
วิภูตา โหนฺติ สงฺขารา, สมุฏฺฐาติ ติลกฺขณํฯ
[994]
โพธิปกฺขิยธมฺมา จ,
เต ปสฺสนฺติ วิเสสโต;
ตโต ชายนฺตุปกฺเลสา,
ทโสปกฺเลสวตฺถุกาฯ
[995]
โอภาโส ปีติ ปสฺสทฺธิ, อธิโมกฺโข จ ปคฺคโห;
สุขํ ญาณมุปฏฺฐานํ, อุเปกฺขา จ นิกนฺติ จฯ
[996]
ตณฺหามานทิฏฺฐิคฺคาหวเสน ติวิเธปิ เต;
อสฺสาเทนฺโต อุนฺนมนฺโต, มมายนฺโต กิลิสฺสติฯ
[997]
มคฺคํ ผลญฺจ นิพฺพานํ, ปตฺโตสฺมีติ อโกวิโท;
เวกฺขพุชฺฌาติ มญฺญนฺโต, ปปฺโปติ อธิมานิโกฯ
[998]
มคฺคาทโย น โหนฺเตเต,
ตณฺหาคาหาทิวตฺถุโต;
ตณฺหามานทิฏฺฐิโย จุปกฺเลสา ปริปนฺถกาฯ
[999]
โปราณเมว ขนฺธานํ, อุทยพฺพยทสฺสนํ;
ติลกฺขณารมฺมณโต, มคฺโค นิพฺพานปจฺจโยฯ
[1000]
อิติ มคฺคํ อมคฺคญฺจ, วิโสเธนฺตสฺส สิชฺฌติ;
วิสุทฺธิ จ มคฺคามคฺคญาณทสฺสนนามิกาฯ
[1001]
ตถาปรา วิสุทฺธีนํ, อุทยพฺพยทสฺสนํ;
อาทิํ กตฺวา ปฏิปทาญาณทสฺสนนามิกาฯ
[1002]
ปจฺฉา สํกฺเลสวิกฺเขปวิสุทฺธนฺตํ ยถา ปุเร;
ปฏิปชฺชติ เมธาวี, อุทยพฺพยทสฺสนํฯ
[1003]
อิติ โขทยพฺพยานุปสฺสนาญาณวีถิยํ;
สิกฺขนฺตสฺสาจิเรเนว, ปริปกฺกา วิปสฺสนาฯ
[1004]
ปหาโยทยโวหารํ, วยเมวาธิมุจฺจโต;
อุปฺปาทาโภคโมหาย, ภงฺคเมวานุติฏฺฐติฯ
[1005]
ตโต นิชฺฌรธาราว, คงฺคาวาโรทกํ วิย;
ภิชฺชมานติณานิว, ปฏิปชฺชา สิขา วิยฯ
[1006]
ปตนฺเต จ วยนฺเต จ, ภิชฺชนฺติจฺเจว สงฺขเต;
ปสฺสโต ตสฺส ภงฺคานุปสฺสนาญาณมีริตํฯ
[1007]
ตโต ภยานุปสฺสนา, สภยาติ วิปสฺสโต;
อาทีนวานุปสฺสนา-ญาณํ อาทีนวาติ จฯ
[1008]
นิพฺพิทานุปสฺสนา จ, นิพฺพินฺทนฺตสฺส โยคิโน;
มุจฺจิตุกมฺยตาญาณํ, ตโต มุจฺจิตุมิจฺฉโตฯ
[1009]
นิจฺจา เจ น นิรุชฺเฌยฺย, น พาเธยฺย สุขา ยทิ;
วเส วตฺเตยฺย อตฺตา เจ, ตทภาวา น เต ตถาฯ
[1010]
สุฏฺฐุ มุจฺจิตุมิจฺเจวํ, ปฏิปจฺจกฺขโต ตโต;
ปฏิสงฺขานุปสฺสนา-ญาณํ ชาตนฺติ วุจฺจติฯ
[1011]
สาธุกํ ปฏิสงฺขาย, สงฺขาเรสุ ติลกฺขณํ;
สุปริญฺญาตสงฺขาเร, ตเถว ปฏิปสฺสติฯ
[1012]
อนิจฺจา ทุกฺขานตฺตา จ, สงฺขาราว น จาปโร;
อตฺตา วา อตฺตนียํ วา, นาหํ น ตุ มมาติ จฯ
[1013]
ตโตว ตตฺถ มชฺฌตฺโต, นนฺทิราควินิสฺสโฏ;
อตฺตตฺตนิยภาเวน, สงฺขาเรสฺวชฺฌุเปกฺขติฯ
[1014]
สงฺขารุเปกฺขาสงฺขาตํ, ญาณํ ตสฺส อิตีริตํ;
ตโต วุฏฺฐานฆฏิตํ, อนุโลมนฺติ วุจฺจติฯ
[1015]
สุปริญฺญาตสงฺขาเร, สุสมฺมฏฺฐติลกฺขเณ;
อุเปกฺขนฺตสฺส ตสฺเสว, สิขาปตฺตา วิปสฺสนาฯ
[1016]
สงฺขารธมฺเม อารพฺภ, ตาว กาลํ ปวตฺตติ;
ตีรทสฺสีว สกุโณ, ยาว ปารํ น ปสฺสติฯ
[1017]
ยทา ปสฺสติ นิพฺพานํ, วุฏฺฐานคหิตา ตทา;
วุฏฺฐานคามินี นาม, สานุโลมา ปวุจฺจติฯ
[1018]
อิติ ทฺวีหิ วิสุทฺธีหิ, วิสุทฺธาย วิปสฺสโต;
วิปสฺสนาปฏิปทํ, ปูเรตีติ ปวุจฺจตีติฯ
อิติ นิพฺพานวิภาเค วิปสฺสนาวุทฺธิกถา นิฏฺฐิตาฯ
ปญฺจวีสติโม ปริจฺเฉโทฯ
ฉพฺพิสติโม ปริจฺเฉโท
26. วุฏฺฐานวิสุทฺธิกถา
[1019]
ตสฺเสวํ ปฏิปนฺนสฺส, สิขาปตฺตา วิปสฺสนา;
วุฏฺฐานคามินี นาม, ยทา โหติ ตทา ปนฯ
[1020]
ปริกมฺโมปจารานุโลมโคตฺรภุโต ปรํ;
มคฺโค ตโต ผลํ โหติ, ภวงฺคา ปจฺจเวกฺขณาฯ
[1021]
ปริกมฺโมปจารานุโลมสงฺขาตโคจรา ;
มคฺคสฺสาวชฺชนํ หุตฺวา, นิพฺพาเน โหติ โคตฺรภุฯ
[1022]
จตุตฺถํ ปญฺจมํ วาถ, ฉฏฺฐํ วาปิ ยถารหํ;
อปฺเปติ มคฺคชวนํ, นิพฺพาเน สกิเมว ตํฯ
[1023]