เมนู

กลาปา สตฺต รูปานิ, ปญฺจ รูเปสฺวสญฺญิสุ;

นตฺเถกาทส รูปานิ, กลาเปกูนวีสติฯ

[841]

ตสฺมา เตวีส รูปานิ, กลาปา ปน จุทฺทส;

เตสมุฏฺฐานิกา สนฺติ, รูปาวจรภูมิยํฯ

[842]

สตฺตรเสว รูปานิ, กลาปา ทฺเว ทฺวิสมฺภวา;

อสญฺญีนํ ตุ สมฺโภนฺติ, นตฺถารูเปสุ กิญฺจิปิฯ

[843]

อุปฺปตฺติกฺกมมิจฺเจวํ, สมฺภวาสมฺภวมฺปิ จ;

กลาปานญฺจ รูปานํ, ยถาโยคํ วิภาวเยติฯ

อิติ รูปวิภาเค อุปฺปตฺติกถา นิฏฺฐิตาฯ

เอกวีสติโม ปริจฺเฉโทฯ

ทฺวาวีสติโม ปริจฺเฉโท

22. ปกิณฺณกกถา

[844]

อิตฺถํ รูปานมุปฺปตฺติํ, ทีเปตฺวา ทานิ วุจฺจติ;

ปวตฺติโกสลฺลตฺถาย, ตตฺเถเวตํ ปกิณฺณกํฯ

[845]

ทุวิธา สนฺธิโย ตตฺถ, มิสฺสามิสฺสวิภาคโต;

ติวิธาปิ เจกจตุ-ปญฺจโวการเภทโตฯ

[846]

รูปมตฺตา อสญฺญีนํ, นามาภาวา อมิสฺสิตา;

นามมตฺตา อรูปีนํ, รูปาภาวาติ จ ทฺวิธาฯ

[847]

กามาวจริกา เจว, รูปาวจริกาติ จ;

ทุวิธา มิสฺสิตา เจติ, ภวนฺติ จ จตุพฺพิธาฯ

[848]

เอกจฺจตุโวการา จ, อมิสฺสา ปญฺจ สนฺธิโย;

ฉพฺพีสติวิธา มิสฺสา, ปญฺจโวการสนฺธิโยฯ

[849]

อิตฺถํ ภูมิปฺปเภเทน, เอกติํสวิธาปิ จ;

สนฺตติราสิเภเทน, สิยุํ ติํสวิธา กถํฯ

[850]