อิติ รูปวิภาคญฺจ, ชาติเภทญฺจ สมฺภวา;
ชนกาทิปฺปเภทญฺจ, รูปานํ ตตฺถ ทีปเยติฯ
อิติ รูปวิภาเค ปเภทกถา นิฏฺฐิตาฯ
เอกูนวีสติโม ปริจฺเฉโทฯ
วีสติโม ปริจฺเฉโท
20. กลาปกถา
[754]
อิติ วุตฺตปฺปกาเรน, สพฺพํ รูปมฺปิ ปิณฺฑิตํ;
สหวุตฺตินิยาเมน, เอกวีสวิธํ กถํฯ
[755]
กมฺมํ จิตฺโตตุกาหารสมุฏฺฐานา ยถากฺกมํ;
นว ฉ จตุโร ทฺเว จ, กลาปา เอกวีสติฯ
[756]
ชีวิตญฺจาวินิพฺโภค-รูปานิ จ ยถากฺกมํ;
จกฺขาทิเกหิ โยเชตฺวา, ทสกา อฏฺฐ ทีปิตาฯ
[757]
จกฺขุโสตฆานชิวฺหาทสกา จ จตุพฺพิธา;
กายิตฺถิปุมฺภาววตฺถุทสกา จ ตถาปเรฯ
[758]
ชีวิเตนาวินิพฺโภครูปานิ นวกนฺติ จ;
นเวเต กมฺมชา นาม, กลาปา สมุทีริตาฯ
[759]
อวินิพฺโภครูปานิ, สุทฺธฏฺฐกมถาปรํ;
กายวิญฺญตฺตินวกํ, กายวิญฺญตฺติยา สหฯ
[760]
วจีวิญฺญตฺติทสกํ, สทฺเทน สหวุตฺติโต;
ลหุตาเทกาทสกํ, ติณฺณนฺนํ สห สมฺภวาฯ
[761]
กายวิญฺญตฺติลหุตาทีหิ ทฺวาทสกํ ภเว;
วจีวิญฺญตฺติลหุตาทีหิ เตรสกํ ตถาฯ
[762]
อิติ จิตฺตสมุฏฺฐานา, กลาปา ฉ ปกาสิตา;
รูปาการวิการมฺปิ, สงฺคเหตฺวา ยถารหํฯ
[763]
สุทฺธฏฺฐกํ ตุ ปฐมํ, สทฺเทน นวกํ ภเว;
ลหุตาเทกาทสกํ, ลหุตาทีหิ ตีหิปิฯ
[764]
สทฺเทน ลหุตาทีหิ, ตถา ทฺวาทสกนฺติ จ;
กลาปา อุตุสมฺภูตา, จตุธาว ปกิตฺติตาฯ
[765]
สุทฺธฏฺฐกญฺจ ปฐมํ, อาหารชมถาปรํ;
ลหุตาเทกาทสกํ, อิติ ทฺเว โอชชา มตาฯ
[766]
กลาปานํ ปริจฺเฉทลกฺขณตฺตา วิจกฺขณา;
น กลาปงฺคมิจฺจาหุ, อากาสํ ลกฺขณานิ จฯ
[767]
ตตฺถ เจกูนนวุติ, เตสฏฺฐิ จ ยถากฺกมํ;
ตาลีเสกูนวีสา จ, กลาปงฺคานิ ตานิ จฯ
[768]
ลกฺขณากาสรูปานิ, กลาเปสุ ตหิํ ตหิํ;
ปญฺจ ปญฺเจติ รูปานิ, ติสตํ โสฬสาธิกํฯ
[769]
อคหีตคฺคหเณน, อฏฺฐวีสวิธานิปิ;
รูปโกฏฺฐาสนาเมน, ปญฺจวีสติ ภาวเยฯ
[770]
ภูตตฺตยํ ตุ โผฏฺฐพฺพํ, กตฺวาปจยสนฺตติํ;
ชาติเมกญฺจ กตฺวา วา, วินาถ หทยํ ตหิํฯ
[771]
ธมฺมสงฺคณิยํ เหตํ, รูปกณฺเฑ สรูปโต;
วตฺถุรูปํ น นิทฺทิฏฺฐํ, ปฏฺฐาเน เทสิตํ ตุ ตํฯ
[772]
ทฺเว สทฺทนวกา เจว,
ตโย สุทฺธฏฺฐกาปิ จ;
ทฺเว ทฺเว จิตฺโตตุสมฺภูตา,
เอโก อาหารโชติ จฯ
[773]
เตสมุฏฺฐานิกา ปญฺจ, กมฺมชานิ นเวติ จ;
รูปรูปวเสเนเต, กลาปา จุทฺทเสริตาฯ
[774]
ทสเกสฺเวว สงฺคยฺห, ชีวิตนวกํ ตหิํ;
ภาวทฺทสกเมกํ วา, กตฺวา วตฺถุํ วินา ตถาฯ
[775]
สทฺทา จิตฺโตตุชา ทฺเวว, เตสมุฏฺฐานิกา ตโย;
สุทฺธฏฺฐกา จ สตฺเตว, กมฺมชา ทสกานิ จฯ
[776]
ฉนฺนวูติวิธํ ตตฺถ, รูปํ ภาสนฺติ ปณฺฑิตา;
อคหีตคฺคหเณน, อฏฺฐารสวิธํ ภเวฯ
[777]
เตสเมว กลาปานํ, สตฺตกจฺฉกฺกปญฺจกา;
จตุกฺกา จ ติกทฺวิกา, เอกกา จ ยถารหํฯ
[778]
ทฺเว สตฺต นว ฉ ตโย, ตโยปิ จ ยถากฺกมํ;
จตฺตาโรติ จตุตฺติํส, สหวุตฺติกราสโยฯ
[779]
จกฺขุโสตฆานชิวฺหา-กายวตฺถุวสา สิยุํ;
อิตฺถิปุมฺภาวทสกสหิตา สตฺตกา ทฺวิธาฯ
[780]
จกฺขุโสตฆานหีนา, ปจฺเจกํ ทฺเว สภาวกา;
อภาวโต ภาวหีโน, อิตฺถํ ฉกฺกาปิ สตฺตธาฯ
[781]
จกฺขุโสตวิหีนา จ,
จกฺขุฆานวิหีนกา;
โสตฆานวิหีนา จ,
สภาวา ทฺเว ตโย ตโยฯ
[782]
จกฺขาเทเกกโต หีนา,
ติวิธาปิ อภาวโต;
อิจฺเจวํ ปญฺจกา นาม,
นวกา ราสโย สิยุํฯ
[783]
จกฺขาทิตฺตยหีนาว, เอกโต ทฺเว สภาวกา;
จกฺขาทิตฺตยโต ทฺวีหิ, ตโย หีนา อภาวกาฯ
[784]
รูปโลเก จกฺขุโสต-วตฺถุชีวิตนวกา;
จตฺตาโรว กลาปาติ, จตุกฺกา ฉ ยถารหํฯ
[785]
ชิวฺหากายวตฺถุวสา ,
อภาโว ทฺเว สภาวกา;
กายภาววตฺถุวสา,
อิติ โหนฺติ ตโย ติกาฯ
[786]
กายวตฺถุวเสเนโก, ทฺเว จ จิตฺโตตุสมฺภวา;
สทฺทนวกฏฺฐกาติ, ทุกา จ ติวิธา สิยุํฯ
[787]
ชีวิตนวกญฺเจกํ, เตสมุฏฺฐานิกานิ จ;
สุทฺธฏฺฐกานิ ตีณีติ, จตฺตาโร เอกกา สิยุํฯ
[788]
จตุตฺติํส ปนิจฺเจเต, สนฺธิยญฺจ ปวตฺติยํ;
รูปรูปกลาปานํ, ราสโย โหนฺติ สมฺภวาฯ
[789]
สตฺตติ สฏฺฐิมิจฺเจวมาทินา จ ยถารหํ;
กลาปราสิรูปานิ, ตตฺถ ตตฺถ วิภาวเยฯ
[790]
โสฬส ปญฺจทเสติอาทิเภทวสาปิ จ;
อคหีตคฺคหเณน, ตตฺถ ตตฺถ วินิทฺทิเสฯ
[791]
จตุจตฺตาลีสสตํ, กลาปา โหนฺติ ปิณฺฑิตา;
ฉพฺพีส ตตฺถ รูปานิ, สหสฺสญฺจ จตุสฺสตํฯ
[792]
อิจฺจาปายจตุกฺเก จ, กาเม สุคติสตฺตเก;
รูเป จ ปญฺจทสเก, อสญฺญาปายภูมิยํฯ
[793]
จตุโกฏฺฐาสิเกสฺเวว, สตฺตวีสวิเธสุปิ;
ชาติฏฺฐาเนสุ สตฺตานํ, สนฺธิยญฺจ ปวตฺติยํฯ
[794]
อินฺทฺริยพทฺธสนฺตาเน, ตถานินฺทฺริยกมฺหิ จ;
พหิสงฺขารสนฺตาเน, มตกาเย จ สมฺภวาฯ
[795]
ลพฺภมานกลาปา จ, กลาปานญฺจ ราสโย;
ตตฺถ วิตฺถารสงฺเขปา, รูปานํ คณนาปิ จฯ
[796]
เอตฺถ รูปา อวุตฺตา หิ, ยถาวุตฺตานุสารโต;
วิตฺถาเรตฺวาน วิญฺเญยฺยา, สพฺพถาปิ จ วิญฺญุนาติฯ
อิติ รูปวิภาเค กลาปกถา นิฏฺฐิตาฯ
วีสติโม ปริจฺเฉโทฯ
เอกวีสติโม ปริจฺเฉโท
21. อุปฺปตฺติกถา
[797]
อฏฺฐวีสติ รูปานิ, กลาปา เจกวีสติ;
วุตฺตา เจตฺตาวตา เตสํ, อุปฺปาโท ทานิ นิยฺยเตฯ
[798]
อณฺฑชา ชลาพุชา จ, สํเสทโชปปาติกา;
อิจฺจุปฺปตฺติปเภเทน, จตสฺโส โยนิโย มตาฯ
[799]
ภุมฺมวชฺเชสุ เทเวสุ,
เปเต นิชฺฌามตณฺหิเก;
นิรเยสุ จ สมฺโภติ,
โยเนกาโวปปาติกาฯ
[800]
ภุมฺมเทเว มนุสฺเสสุ,
ติรจฺฉานาสุเร ตถา;
เปเตสุ จาวเสเสสุ,
จตสฺโสปิ จ โยนิโยฯ
[801]
ตตฺถณฺฑชา ชลาพุชา, คพฺภเสยฺยสมุคฺคโม;
สํเสทโชปปาติกา, โอปปาติกนามกาฯ
[802]
ตตฺถ สมฺปุณฺณายตโน, คพฺภเสยฺยสมุคฺคโม;
อภาโว ทฺเว สภาวา จ, อิตฺถิปุมฺภาวมิสฺสิตาฯ
[803]
ปริปุณฺณาปริปุณฺโณ, โอปปาติกนามโก;
อภาโว ทฺเว สภาวา จ, จตุราปายภูมิยํฯ
[804]