นวา วิภตฺติกา เสสา, ฉนฺโท จิตฺตมถาปรํ;
ปีติ ปสฺสทฺธิเปกฺขา จ, สงฺกปฺโป วิรติตฺตยํฯ
[648]
อิติ วุตฺตนยา สพฺเพ, โพธิปกฺขิยสงฺคหา;
โลกุตฺตเรสุ สมฺโภนฺติ, สพฺพถาปิ ยถารหํฯ
[649]
ปุพฺพภาเค ยถาโยคํ, โลกิเยสุ จ ลพฺภเร;
นิพฺเพทภาวนากาเล, ฉพฺพิสุทฺธิปวตฺติยํฯ
[650]
อิติ มิสฺสกสาวชฺชา, โพธิปกฺขิยสงฺคหา;
เยวาปนกราสิมฺหิ, ยถาสมฺภวโต ฐิตาฯ
[651]
กมฺมปถา ตุ สมฺโภนฺติ, ปุญฺญาปุญฺเญสุ สพฺพถา;
อปถา จ สุจริตา, ตถา ทุจฺจริตาปิ จฯ
[652]
ตตฺถ กมฺมปถฏฺฐาเน, อนภิชฺฌาทโย ปน;
อุปจาเรน วุจฺจนฺติ, วิปาเกสุ กฺริเยสุ วาติฯ
อิติ เจตสิกวิภาเค ทิฏฺฐิสงฺคหกถา นิฏฺฐิตาฯ
สตฺตรสโม ปริจฺเฉโทฯ
นิฏฺฐิโต จ สพฺพถาปิ เจตสิกวิภาโคฯ
อฏฺฐารสโม ปริจฺเฉโท
3. รูปวิภาโค
18. สรูปกถา
[653]
เตปญฺญาส ปนิจฺเจวํ, นามธมฺมา ปกาสิตา;
อฏฺฐวีสวิธํ ทานิ, รูปํ นาม กถียติฯ
[654]
ปถวาโป จ เตโช จ, วาโย เจติ จตุพฺพิโธ;
จกฺขุโสตฆานชิวฺหา, กาโยติ ปน ปญฺจ จฯ
[655]
รูปสทฺทคนฺธรสา, จตฺตาโร จ อถาปรํ;
อิตฺถิปุมฺภาวยุคฬํ, ชีวิตํ หทยมฺปิ จฯ
[656]
กายวิญฺญตฺติ เจวาถ, วจีวิญฺญตฺติ จ ทฺวยํ;
อากาสธาตุ รูปสฺส, ลหุตา มุทุตา ตสฺสฯ
[657]
กมฺมญฺญตา อุปจโย, สนฺตติ ชรตา ปน;
อนิจฺจตา จ กพฬีการาหาโรติ สพฺพถาฯ
[658]
อฏฺฐวีสวิธํ โหติ, รูปเมตํ สรูปโต;
ตสฺส ลกฺขณเภเทน, สภาวญฺจ วิภาวเยฯ
[659]
สนฺธารณํ ตุ ปถวีธาตุ กกฺขฬลกฺขณา;
อาพนฺธนมาโปธาตุ, อาปคฺฆรณลกฺขณาฯ
[660]
ปริปาจนตา เตโชธาตุ อุณฺหตฺตลกฺขณา;
สมุทีรณตา วาโยธาตุ วิตฺถมฺภลกฺขณาฯ
[661]
สพฺพตฺถาวินิภุตฺตาปิ, อสมฺมิสฺสกลกฺขณา;
ตํตํภาวสมุสฺสนฺนสมฺภาเรสุปลกฺขิตาฯ
[662]
อญฺญมญฺเญนุปตฺถทฺธา, เสสรูปสฺส นิสฺสยา;
จตุเธวํ กลาเปสุ, มหาภูตา ปวตฺตเรฯ
[663]
จกฺขุ สมฺภารจกฺขุมฺหิ, สตฺตกฺขิปฏโลจิเต;
กณฺหมณฺฑลมชฺฌมฺหิ, ปสาโทติ ปวุจฺจติฯ
[664]
เยน จกฺขุปสาเทน, รูปานิ อนุปสฺสติ;
ปริตฺตํ สุขุมญฺเจตํ, อูกาสิรสมูปมํฯ
[665]
โสตํ โสตพิลสฺสนฺโต,
ตมฺพโลมาจิเต ตถา;
องฺคุลิเวธนากาเร,
ปสาโทติ ปกาสิโตฯ
[666]
อนฺโต อชปทฏฺฐาเน, ฆานํ ฆานพิเล ฐิตํ;
ชิวฺหา ชิวฺหาย มชฺฌมฺหิ, อุปฺปลาการสนฺนิเภฯ
[667]
อิจฺเจวํ ปน จตฺตาโร, ตํตํเทสววตฺถิตา;
กายปฺปสาโทปาทินฺเน, สพฺพเกติ ยถากฺกมํฯ
[668]
รูปาทฺยาภิฆาตารหภูตานํ วา ยถารหํ;
ทฏฺฐุกามนิทานาทิกมฺมภูตานเมว วาฯ
[669]
ปสาทลกฺขณา ภูตรูปานํ ภูตนิสฺสิตา;
กปฺปาสปฏลสฺเนหสนฺนิภาติ จ วณฺณิตาฯ
[670]
ปญฺจาปิ ชีวิตารกฺขา, รูปาทิปริวาริตา;
ธีตราว กุมาราว, กลาปนฺตรวุตฺติโนฯ
[671]
รูปํ นิภาโส ภูตานํ, สทฺโท นิคฺโฆสนํ ตถา;
คนฺโธ จ คนฺธนํ ตตฺถ, รโส จ รสนียตาฯ
[672]
ภูตตฺตยญฺจ โผฏฺฐพฺพํ, อาโปธาตุวิวชฺชิตํ;
สทฺโท อนิยโต ตตฺถ, ตทญฺเญ สหวุตฺติโนฯ
[673]
จกฺขาทิปฏิหนนลกฺขณา ตุ ยถากฺกมํ;
ปญฺเจว ปญฺจวิญฺญาณวีถิยา วิสยา มตาฯ
[674]
อิตฺถินฺทฺริยํ ปนิตฺถิตฺตํ, อิตฺถิภาโวติ เทสิโต;
ปุริสตฺตํ ตถาภาโว, ปุริสินฺทฺริย นามโกฯ
[675]
ตํ ทฺวยํ ปนุปาทินฺเน, กาเย สพฺพตฺถ ลพฺภติ;
กลาปนฺตรภินฺนญฺจ, ภินฺนสนฺตานวตฺติ จฯ
[676]
รูปานํ กมฺมชาตานํ, อนุปาลนลกฺขณํ;
ชีวิตินฺทฺริยรูปนฺติ, อายุ นาม ปวุจฺจติฯ
[677]
มโนธาตุยา จ ตถา, มโนวิญฺญาณธาตุยา;
นิสฺสยลกฺขณํ วตฺถุรูปํ หทยนิสฺสิตํฯ
[678]
มชฺเฌ หทยโกสมฺหิ, อฑฺฒปฺปสตโลหิเต;
ภูตรูปมุปาทาย, จกฺขาทิ วิย วตฺตติฯ
[679]
อากาสธาตุ รูปานํ, ปริจฺเฉทกลกฺขณา;
ตํตํรูปกลาปานํ, ปริยนฺโตติ วุจฺจติฯ
[680]
จิตฺตํ สหชรูปานํ, กายสฺส คมนาทิสุ;
สนฺถมฺภนสนฺธารณจลนสฺส ตุ ปจฺจโยฯ
[681]
วาโยธาตุวิกาโรยํ , กายวิญฺญตฺตินามโก;
วาโยธาตาธิกานํ ตุ, ภูตานมิติ เกจนาฯ
[682]
ตถา จิตฺตสมุฏฺฐิโน, วจีโฆสปฺปวตฺติยํ;
อุปาทินฺนรูปกายฆฏฺฏนสฺส ตุ ปจฺจโยฯ
[683]
ปถวีธาตุวิกาโรยํ, วจีวิญฺญตฺตินามโก;
ปถวีธาตาธิกานํ ตุ, ภูตานมิติ เกจนาฯ
[684]
ทฺเวปิ กายวจีกมฺมทฺวารภูตา ยถากฺกมํ;
เต ปน ฆฏฺฏนาเหตุ-วิการาการลกฺขณาฯ
[685]
วิญฺญาเปตีติ กาเยน, วาจาย จ วิจินฺติตํ;
สยญฺจ วิญฺญายตีติ, วิญฺญตฺตีติ ปกิตฺติตาฯ
[686]
ลหุตา ปน รูปานํ, อทนฺธาการลกฺขณา;
มุทุตาปิ จ รูปานํ, มทฺทวาการลกฺขณาฯ
[687]
กมฺมญฺญตา จ รูปานํ, โยคฺคตาการลกฺขณา;
คารวถทฺธตา โยคฺคปฏิปกฺขา ยถากฺกมํฯ
[688]
สปฺปายมุตุมาหารํ, ลภิตฺวา จิตฺตสมฺปทํ;
ลหู มุทุ จ กมฺมญฺญํ, ยทา รูปํ ปวตฺตติฯ
[689]
ตถาปวตฺตรูปสฺส, ปวตฺตาการเภทิตํ;
ลหุตาทิตฺตยมฺเปตํ, สหวุตฺติ ตทา ภเวฯ
[690]
สปฺปายํ ปฏิเวธาย, ปฏิปตฺตุปการิตา;
สาการา รูปสมฺปตฺติ, ปญฺญตฺตาว มเหสินาฯ
[691]
รูปสฺโสปจโย นาม, รูปสฺสาจยลกฺขโณ;
ปวตฺติลกฺขณา รูปสนฺตตีติ ปกาสิตาฯ
[692]
รูปมาจยรูเปน, ชายติจฺจุปรูปริ;
เปกฺขโตปจยาการา, ชาติ คยฺหติ โยคิโนฯ
[693]
อนุปฺปพนฺธากาเรน, ชายตีติ สเปกฺขโต;
ตทายํ สนฺตตาการา, ชาติ คยฺหติ ตสฺส ตุฯ
[694]
เอวมาโภคเภเทน , ชาติรูปํ ทฺวิธา กตํ;
อตฺตูปลทฺธิภาเวน, ชายนฺตํ วาถ เกวลํฯ
[695]
รูปํ วิวิตฺโตกาสสฺส, ปูรกฏฺเฐน จียติ;
อภาวา ปุนภาวาย, ปวตฺตํ สนฺตตีติ จฯ
[696]
เอวมาการเภทาว, สพฺพาการวรากโร;
ชาติรูปํ ทฺวิธากาสิ, ชาติรูปวิโรจโนฯ
[697]
ชรตา นวตาหายา, รูปานํ ปากลกฺขณา;
อนิจฺจตนฺติ มปฺปตฺติ, ปริภิชฺชนลกฺขณาฯ
[698]
อิติ ลกฺขณรูปํ ตุ, ติวิธํ ภินฺนกาลิกํ;
สภาวรูปธมฺเมสุ, ตํตํกาโลปลกฺขิตํฯ
[699]
เยน ลกฺขียติ รูปํ, ภินฺนาการํ ขเณ ขเณ;
วิปสฺสนานยตฺถาย, ตมิจฺจาห ตถาคโตฯ
[700]
กพฬีกาโร อาหาโร,
ยาเปตพฺโพชลกฺขโณ;
อาหาโร เสนฺทฺริยชาโต,
รูปกายานุปาลโกฯ
[701]
อิจฺเจวํ สปริจฺเฉทา, สวิการา สลกฺขณา;
อกิจฺจปฏิเวธาย, ทยาปนฺเนน ตาทินาฯ
[702]
ตตฺถ ตตฺถ ยถาโยคํ, เทสิตาติ ปกาสิตา;
รูปธมฺมา สรูเปน, อฏฺฐวีสติ สพฺพถาฯ
[703]
กตฺวาน ชาติเมกํ ตุ, ตตฺโถปจยสนฺตติํ;
สตฺตวีสติ รูปานิ, ภวนฺตีติ วินิทฺทิเสฯ
[704]
ภูตตฺตยํ ตุ โผฏฺฐพฺพํ, กตฺวา ฉพฺพีสธาปิ จ;
อุภยํ ชาติโผฏฺฐพฺพํ, คเหตฺวา ปญฺจวีสติฯ
[705]
รูปธมฺมานมิจฺเจวํ , วิภาเวยฺย วิสารโท;
สรูปํ นามสงฺเขปํ, สภาวญฺจ สลกฺขณนฺติฯ
อิติ รูปวิภาเค สรูปกถา นิฏฺฐิตาฯ
อฏฺฐารสโม ปริจฺเฉโทฯ
เอกูนวีสติโม ปริจฺเฉโท
19. ปเภทกถา
[706]
อฏฺฐวีสวิธมฺเปตํ, รูปํ ทานิ ยถารหํ;
ภูตรูปาทิเภเทหิ, วิภเชยฺย วิจกฺขโณฯ
[707]
ปถวาทิกมิทนฺติ, ภูตรูปํ จตุพฺพิธํ;
อุปาทารูปมญฺญํ ตุ, จตุวีสติวิธํ ภเวฯ
[708]
ปญฺจวิธมฺปิ จกฺขาทิรูปมชฺฌตฺติกํ มตํ;
เตวีสติวิธํ เสสํ, พาหิรนฺติ ปวุจฺจติฯ
[709]
รูปสทฺทคนฺธรสโผฏฺฐพฺพา สตฺต ปญฺจธา;
ปญฺจปฺปสาทวิสยา, ปญฺจารมฺมณนามกาฯ
[710]
เอกวีสติวิธํ เสสํ, ธมฺมารมฺมณสงฺคหํ;
มโนวิญฺญาณวิญฺเญยฺยํ, มโนทฺวารสฺส โคจรํฯ
[711]
ปสาทา วิสยา เจว, ปญฺจกา ทฺเวปิ สมฺภวา;
ทฺวาทสาปิ สรูเปน, ทสายตนธาตุโยฯ
[712]
ยเททํ ปน สพฺพมฺปิ, รูปํ สปฺปฏิฆํ มตํ;
ตเทโวฬาริกํ นาม, สนฺติเกติ ปวุจฺจติฯ
[713]
เสสมปฺปฏิฆํ นาม, ธมฺมายตนธาตุ จ;
สุขุมญฺเจว รูปญฺจ, รูปํ โสฬสธา ฐิตํฯ
[714]
ฉพฺพิธา วตฺถุรูปํ ตุ, ปสาทหทยมฺปิ จ;
อวตฺถุรูปํ เสสํ ตุ, ทฺวาวีสติวิธํ ภเวฯ
[715]