มคฺโค อฏฺฐสุ จิตฺเตสุ, มโต อฏฺฐงฺคิโกติ หิ;
เอวํ ตุ สพฺพจิตฺเตสุ, มคฺคงฺคานิ สมุทฺธเรฯ
[124]
พลานิ ทฺเว ทฺวิจิตฺเตสุ, เอกสฺมิํ ตีณิ ทีปเย;
เอกาทสสุ จตฺตาริ, ฉ ทฺวาทสสุ นิทฺทิเสฯ
[125]
เอกูนาสีติยา สตฺต, โสฬเสวาพลานิ ตุ;
จิตฺตเมวํ ตุ วิญฺเญยฺยํ, สพลํ อพลมฺปิ จฯ
[126]
ฌานงฺคมคฺคงฺคพลินฺทฺริยานิ,
จิตฺเตสุ ชายนฺติ หิ เยสุ ยานิ;
มยา สมาเสน สมุทฺธริตฺวา,
วุตฺตานิ สพฺพานิปิ ตานิ เตสุฯ
อิติ อภิธมฺมาวตาเร เจตสิกวิภาคนิทฺเทโส นาม
ตติโย ปริจฺเฉโทฯ
4. จตุตฺโถ ปริจฺเฉโท
เอกวิธาทินิทฺเทโส
[127]
อิโต ปรํ ปวกฺขามิ, นยเมกวิธาทิกํ;
อาภิธมฺมิกภิกฺขูนํ, พุทฺธิยา ปน วุทฺธิยาฯ
[128]
สพฺพเมกวิธํ จิตฺตํ, วิชานนสภาวโต;
ทุวิธญฺจ ภเว จิตฺตํ, อเหตุกสเหตุโตฯ
[129]
ปุญฺญาปุญฺญวิปากา หิ, กาเม ทส จ ปญฺจ จ;
กฺริยา ติสฺโสติ สพฺเพปิ, อฏฺฐารส อเหตุกาฯ
[130]
เอกสตฺตติ เสสานิ, จิตฺตุปฺปาทา มเหสินา;
สเหตุกาติ นิทฺทิฏฺฐา, ตาทินา เหตุวาทินาฯ
[131]