ฆานชิวฺหากายภาวทสกาหารชํ ปน;
รูปํ รูปภเว นตฺถิ, ปฏิสนฺธิปวตฺติยํฯ
[612]
ตตฺถ คนฺธรโสชา จ, น ลพฺภนฺตีติ เกจน;
กลาปา จ คเณตพฺพา, ตตฺเถตํ รูปวชฺชิตาฯ
[613]
ฐิติกฺขณญฺจ จิตฺตสฺส, เต เอว ปฏิเสธยุํ;
จิตฺตภงฺคกฺขเณ รูป-สมุปฺปตฺติญฺจ วารยุํฯ
[614]
จกฺขุโสตวตฺถุสทฺทจิตฺตชมฺปิ อสญฺญิสุ;
อรูเป ปน รูปานิ, สพฺพถาปิ น ลพฺภเรฯ
[615]
อิตฺถํ ปเนตฺถ วิมเลน วิภาวนตฺถํ,
ธมฺมํ สุธมฺมมุปคมฺม สุราธิวาสํ;
รูปํ อรูปสวิภาคสลกฺขณํ ตํ,
วุตฺตํ ปวุตฺตมภิธมฺมนเย มยาปิฯ
[616]
รูปวิภาคมิมํ สุวิภตฺตํ, รูปยโต ปน เจตสิ นิจฺจํ;
รูปสมิทฺธชิเนริตธมฺเม, รูปวตี อภิวฑฺฒติ ปญฺญาฯ
อิติ นามรูปปริจฺเฉเท รูปวิภาโค นาม
ฉฏฺโฐ ปริจฺเฉโทฯ
7. สตฺตโม ปริจฺเฉโท
สพฺพสงฺคหวิภาโค
[617]
จตุปญฺญาส ธมฺมา หิ, นามนาเมน ภาสิตา;
อฏฺฐารสวิธา วุตฺตา, รูปธมฺมาติ สพฺพถาฯ
[618]
อภิญฺเญยฺยา สภาเวน, ทฺวาสตฺตติ สมีริตา;
สจฺจิกฏฺฐปรมตฺถา, วตฺถุธมฺมา สลกฺขณาฯ
[619]
เตสํ ทานิ ปวกฺขามิ, สพฺพสงฺคาหิกํ นยํ;
อาภิธมฺมิกภิกฺขูนํ, หตฺถสารมนุตฺตรํฯ
[620]
ทุกา ติกา จ ขนฺธายตนโต ธาตุสจฺจโต;
ปฏิจฺจสมุปฺปาทา จ, ปจฺจยา จ สมญฺญโตฯ
[621]
ปจฺจโย เอว นิพฺพานมปจฺจยมสงฺขตํ;
อสงฺขารมนุปฺปาทํ, สสฺสตํ นิจฺจลกฺขณํฯ
[622]
ปจฺจยา เจว สงฺขารา, สงฺขตา จ ตโตปเร;
อุปฺปาทวยธมฺมา จ, ปจฺจยฏฺฐิติกา ตถาฯ
[623]
นิพฺพานํ รูปธมฺมา จ, วิปฺปยุตฺตาว เกวลํ;
อารมฺมณา เอว นาม, นาลมฺพนฺติ หิ กิญฺจิปิฯ
[624]
เอกุปฺปาทนิโรธา จ, เอกาลมฺพณวตฺถุกา;
สํสฏฺฐา สมฺปยุตฺตา จ, สหชาตา ยถารหํฯ
[625]
อญฺญมญฺเญนุปตฺถทฺธา, สพฺพตฺถ สหวุตฺติโน;
สารมฺมณารมฺมณา จ, จิตฺตเจตสิกา มตาฯ
[626]
วิปสฺสนาย ภูมีติ, ตตฺถ เตภูมกา มตา;
โลกิยา ปริยาปนฺนา, วฏฺฏธมฺมา สอุตฺตราฯ
[627]
สกฺกายธมฺมา สภยา, ตีรโมริมนามกํ;
สํโยชนิยา สมลา, ตถา นีวรณียกาฯ
[628]
สํกฺเลสิกา ปรามฏฺฐา, อุปาทานียสาสวา;
โอฆนียา โยคนียา, คนฺถนียาติ ภาสิตาฯ
[629]
อญฺเญ อปริยาปนฺนา, วิวฏฺฏา จาวิปสฺสิยา;
โลกุตฺตรานุตฺตรา จ, โนสํโยชนิยาทโยฯ
[630]
กมฺมชาตา อุปาทินฺนา, นาม วุจฺจนฺติ สาสวา;
อนุปาทินฺนกา นาม, ตโต เสสา ปวุจฺจเรฯ
[631]
ธมฺมา สปฺปฏิภาคาติ, กุสลากุสลา มตา;
อปฺปฏิภาคธมฺมาติ, ตทญฺเญ ปริทีปเยฯ
[632]
สรณา จ ปหาตพฺพา, ทฺวาทสากุสลา ปน;
ตทญฺเญ อรณา นาม, ปหาตพฺพา น เกหิจิฯ
[633]
รูปิโน รูปธมฺมา จ, นามธมฺมา อรูปิโน;
เอวมาทิปฺปเภเทน, ทฺวิธา เภทํ วิภาวเยฯ
[634]
พาลา ธมฺมา ตปนียา, กณฺหา จ กฏุกปฺผลา;
อเสวิตพฺพา สาวชฺชา, ทฺวาทสากุสลา มตาฯ
[635]
ปณฺฑิตา จาตปนียา, สุกฺกา จ สุขทายกา;
เสวิตพฺพานวชฺชา จ, กุสลา เอกวีสติฯ
[636]
กฺริยา วิปากา รูปญฺจ, นิพฺพานนฺติ จตุพฺพิธา;
วุตฺตา อพฺยากตา นาม, ธมฺมา ตพฺพิปรีตโตฯ
[637]
หีนา ธมฺมา ปริตฺตา จ, กามาวจรภูมิกา;
รูปารูปา ปวุจฺจนฺติ, มชฺฌิมา จ มหคฺคตาฯ
[638]
อปฺปมาณา ปณีตา จ, ธมฺมา โลกุตฺตรา มตา;
สํกิลิฏฺฐสํกฺเลสิกา, ทฺวาทสากุสลา ตถาฯ
[639]
อสํกิลิฏฺฐสํกฺเลสิกา, ธมฺมา เตภูมกาปเร;
อสํกฺลิฏฺฐาสํกฺเลสิกา, นว โลกุตฺตรา สิยุํฯ
[640]
วิปากา เต ปวุจฺจนฺติ, วิปากา จตุภูมกา;
วิปากธมฺมา นามาติ, กุสลากุสลา มตาฯ
[641]
กฺริยา รูปญฺจ นิพฺพานํ, น ปากํ น ตุ ปจฺจติ;
อาจยคามิโน ธมฺมา, ปุญฺญาปุญฺญาว สาสวาฯ
[642]
วุตฺตาปจยคามิโน , กุสลานุตฺตรา ปน;
กฺริยา รูปญฺจ นิพฺพานํ, ปากา โจภยวชฺชิตาฯ
[643]
ปฐมานุตฺตโร มคฺโค, ทสฺสนํ ภาวนาปเร;
ตทญฺเญ ทฺวยนิมฺมุตฺตา, สพฺเพปิ ปรมตฺถโตฯ
[644]
สตฺต โลกุตฺตรา เหฏฺฐา, วุตฺตา เสกฺขาติ ตาทินา;
อรหตฺตผลเมว, อเสกฺขนฺติ ปกาสิตํฯ
[645]
โลกิยาปิ จ นิพฺพานํ, ภาสิโตภยวชฺชิตา;
เอวมาทิปฺปกาเรหิ, ติวิธาติ วิภาวเยฯ
[646]
อตีตานาคตํ รูปํ, ปจฺจุปฺปนฺนมถาปรํ;
อชฺฌตฺตํ วา พหิทฺธา วา, สุขุโมฬาริกํ ตถาฯ
[647]
หีนํ ปณีตํ ยํ ทูเร, สนฺติเก วา ตเทกโต;
สพฺพํ รูปํ สโมธาย, รูปกฺขนฺโธติ วุจฺจติฯ
[648]
ตเถว เวทนากฺขนฺโธ, นาม ยา กาจิ เวทนา;
สญฺญากฺขนฺโธติ สญฺญา จ, ราสิภาเวน ภาสิตาฯ
[649]
วฏฺฏธมฺเมสุ อสฺสาทํ, ตทสฺสาโทปเสวนํ;
วินิภุชฺช นิทสฺเสตุํ, ขนฺธทฺวยมุทาหฏํฯ
[650]
วิวาทมูลสํสาร-กมเหตุนิทสฺสนํ;
สนฺธาย เวทนา สญฺญา, กตา นานาติ เกจนฯ
[651]
จิตฺตสํสฏฺฐธมฺมานํ, เจตนามุขโต ปน;
สงฺขารกฺขนฺธนาเมน, ธมฺมา เจตสิกา มตาฯ
[652]
สพฺพเภทํ ตถา จิตฺตํ, วิญฺญาณกฺขนฺธ สมฺมตํ;
เภทาภาเวน นิพฺพานํ, ขนฺธสงฺคหนิสฺสฏํฯ
[653]
อาลมฺพนียภาเวน, อุปาทาโนปการโต;
ปญฺจุปาทานกฺขนฺธาติ, โลกุตฺตรวิวชฺชิตาฯ
[654]
ยถา ถูลํ หิตตฺถาย, ปริคฺคาหกโยคินํ;
ธมฺมา เตภูมกา เอก-ภูมิภาวาย เทสิตาฯ
[655]
ภาชนํ โภชนํ ตสฺส, พฺยญฺชนํ โภชโก ตถา;
ภุญฺชิตา จาติ ปญฺเจเต, อุปเมนฺติ ยถากฺกมํฯ
[656]
คิลานสาลา เคลญฺญํ, อสปฺปาโยปเสวนา;
สมุฏฺฐานํ คิลาโนติ, อุปเมนฺติ จ ปณฺฑิตาฯ
[657]
จารโก การณํ ตตฺถ, อปราโธ จ การโก;
อปราธกโต โจโร, อิติ โจปมิตา ปุนฯ
[658]
นิจฺจาธิปีฬนฏฺเฐน , ภาราติ ปริทีปิตา;
กฺเลสทุกฺขมุเขเนเต, ขาทกา จ นิรนฺตรํฯ
[659]
อนตฺถาวหิตา นิจฺจมุกฺขิตฺตาสิกเวริโน;
มจฺจุมาราภิเธยฺยตฺตา, วธกาติ จ ภาสิตาฯ
[660]
วิมทฺทาสหนํ รูปํ, เผณปิณฺฑํว ทุพฺพลํ;
มุหุตฺตรมณียตฺตา, เวทนา พุพฺพุฬูปมาฯ
[661]
มรีจิกูปมา สญฺญา, วิปลฺลาสกภาวโต;
สงฺขาราปิ จ นิสฺสารา, กทลิกฺขนฺธสาทิสาฯ
[662]
นานปฺปการํ จินฺเตนฺตํ, นานากฺเลสวิโมหิตํ;
ปลมฺภตีติ วิญฺญาณํ, มายาสมมุทีริตํฯ
[663]
อิจฺเจวํ ปญฺจุปาทานกฺขนฺธา ขนฺธา จ เกวลํ;
ปญฺจกฺขนฺธาติ นาเมน, เทสิตาติ วิภาวเยฯ
[664]
อชฺฌตฺตญฺจ พหิทฺธา จ, วิญฺญาณุปฺปตฺติการณํ;
ทฺวาราลมฺพณเภเทน, ทฺเวธายตนมีริตํฯ
[665]
จกฺขาทชฺฌตฺติกํ ตตฺถ, ฉทฺวารายตนํ ภเว;
พาหิรายตนํ นาม, ตถา รูปาทิโคจรํฯ
[666]
อิติ วีถิปฺปวตฺตานํ, ทฺวาราลมฺพณสงฺคโห;
อาคเม อภิธมฺเม ตุ, สพฺพถาปิ ยถารหํฯ
[667]
ตถาหนนฺตราตีโต, ชายมานสฺส ปจฺฉโต;
มโน สพฺโพปิ สพฺพสฺส, มนสฺสายตนํ ภเวฯ
[668]
ตถา ปุพฺพงฺคมฏฺเฐน, สหชานมรูปินํ;
ทฺวารภาเวน วิญฺญาณํ, สพฺพมายตนํ มตํฯ
[669]
มนายตนมิจฺเจวํ, ปสาทายตนํ ตถา;
ปญฺจวิญฺญาณธมฺมานํ, อิติ ฉทฺธา วิภาวเยฯ
[670]
ปญฺจปฺปสาทวิสยา, ปญฺจายตนสมฺมตา;
เสสํ รูปญฺจ นิพฺพานํ, สพฺเพ เจตสิกาติ จฯ
[671]
เอกูนสฏฺฐิธมฺมานํ , ธมฺมายตนสงฺคโห;
อิติ ฉทฺธา ปกาเสนฺติ, พาหิรายตนํ พุธาฯ
[672]
สุญฺญคาโมว ทฏฺฐพฺพ-มชฺฌตฺติกมสารโต;
คามฆาตกโจราว, ตํ หนนฺตํว พาหิรํฯ
[673]
นามปฺปวตฺติมุฬฺหานํ, ตทุปฺปตฺติกการณํ;
ทฺวาทสายตนานีติ, วุตฺตมิตฺถํ มเหสินาฯ
[674]
สมตฺตา ภาวมตฺเตน, ธาเรนฺตีติ สลกฺขณํ;
ทฺวาราลมฺพตทุปฺปนฺน-ปริยาเยน เภทิตาฯ
[675]
มนายตนเมตฺถาห, สตฺต วิญฺญาณธาตุโย;
เอกาทส ยถาวุตฺตา, อิจฺจฏฺฐารส ธาตุโยฯ
[676]
อนฺตาทิกา มโนธาตุ, มโนวิญฺญาณธาตุยา;
ปเวสาปคเม ทฺวาร-ปริยาเยน ติฏฺฐติฯ
[677]
เภรีตลทณฺฑโฆส-สมํ ฉกฺกํ ยถากฺกมํ;
กฏฺฐารณิปาวกาทิ-สมญฺจ ติวิธํ ภเวฯ
[678]
ทุกฺขํ สมุทโย เจว, นิโรโธ จ ตถาปโร;
มคฺโค จาติ จตุทฺธาห, สจฺจํ สจฺจปรกฺกโมฯ
[679]
ภาโร จ ภารทานญฺจ, ภารนิกฺเขปนํ ตถา;
ภารนิกฺเขปนูปาโย, อิจฺโจปมฺมํ ยถากฺกมํฯ
[680]
โรโค โรคนิทานญฺจ, โรควูปสโม ตถา;
โรคเภสชฺชมิจฺเจว-มุปมาหิ จ ทีปิตํฯ
[681]
วิสรุกฺโข รุกฺขมูลํ, รุกฺขจฺเฉโท ตถาปโร;
รุกฺขจฺเฉทกสตฺถนฺติ, จตุโธปมิตํ ตถาฯ
[682]
ตีรโมริมสงฺขาตํ, มโหโฆ ปาริมํ ตถา;
ตทติกฺกมุปาโยติ, อุปเมนฺติ จ ตํ พุธาฯ
[683]
สจฺฉิกตฺวาน ปจฺจกฺข-มิจฺโจปมฺมํ ยถากฺกมํ;
สมาจิกฺขิ วิโมกฺขาย, สจฺจํ ตจฺฉนิยามโตฯ
[684]
ตถา หิ ทุกฺขํ นาพาธํ, นาญฺญํ ทุกฺขา จ พาธกํ;
พาธกตฺตนิยาเมน, ทุกฺขสจฺจมิตีริตํฯ
[685]
ตํ วินา นาญฺญโต ทุกฺขํ, น โหติ น จ ตํ ตโต;
ทุกฺขเหตุนิยาเมน, สจฺจมาห วิสตฺติกํฯ
[686]
นาญฺญา นิพฺพานโต สนฺติ, น จ สนฺตํ น ตํ ยโต;
สนฺตภาวนิยาเมน, นิพฺพานํ สจฺจมุตฺตมํฯ
[687]
นาญฺญํ มคฺคาจ นิยฺยานํ, อนิยฺยาโน น จาปิ โส;
ตสฺมา นิยฺยานภาเวน, มคฺโค สจฺจนฺติ สมฺมโตฯ
[688]
อิติ ตจฺฉาวิปลฺลาส-ภูตภาโว จตูสุปิ;
สจฺจฏฺโฐติ วินิทฺทิฏฺโฐ, ทุกฺขาทีสฺววิเสสโตฯ
[689]
ปีฬนฏฺโฐ สงฺขตฏฺโฐ, สนฺตาปฏฺโฐ จ ภาสิโต;
วิปรีณามฏฺโฐ จาติ, ทุกฺขสฺเสวํ จตุพฺพิธาฯ
[690]
อายูหนา นิทานา จ, สํโยคา ปลิโพธโต;
ทุกฺขสฺสมุทยสฺสาปิ, จตุธตฺถา ปกาสิตาฯ
[691]
นิสฺสารณา วิเวกา จา-สงฺขตามตโต ตถา;
อตฺถา ทุกฺขนิโรธสฺส, จตุธาว สมีริตาฯ
[692]
นิยฺยานโต เหตุโต จ,
ทสฺสนาธิปเตยฺยโต;
มคฺคสฺสาปิ จตุทฺเธว-
มิติ โสฬสธา ฐิตาฯ
[693]
สจฺจิกฏฺฐปรมตฺถํ, ตจฺฉาภิสมยฏฺฐโต;
ตถตฺถมปิ สจฺจฏฺฐํ, ปฏฺฐเปนฺเตตฺถ ปณฺฑิตาฯ
[694]
ตเทตํ ปฏิวิชฺฌนฺติ, อริยาว จตุพฺพิธํ;
วุตฺตมริยสจฺจนฺติ, ตสฺมา นาเถน ตํ กถํ;
[695]
ชาติ ชรา จ มรณํ, โสโก จ ปริเทวนา;
ทุกฺขญฺจ โทมนสฺสญฺจ, อุปายาโส ตถาปโรฯ
[696]
อปฺปิเยหิ จ สํโยโค, วิปฺปโยโค ปิเยหิ จ;
ยมฺปิ น ลภติจฺฉนฺโต, ตมฺปิ ทุกฺขมิทํ มตํฯ
[697]
อปาเยสุปปชฺชนฺตา, จวนฺตา เทวโลกโต;
มนุสฺเสสุ จ ชีรนฺตา, นานาพฺยสนปีฬิตาฯ
[698]
โสจนฺตา ปริเทวนฺตา, เวเทนฺตา ทุกฺขเวทนํ;
โทมนสฺเสหิ สนฺตตฺตา, อุปายาสวิฆาติโนฯ
[699]
อนิฏฺเฐหิ อกนฺเตหิ, อปฺปิเยหิ สมายุตา;
สงฺขาเรหิ จ สตฺเตหิ, นานานตฺถวิธายิภิฯ
[700]
อิฏฺเฐหิ ปิยกนฺเตหิ, มนาเปหิ วิโยชิตา;
สงฺขาเรหิ จ สตฺเตหิ, นานาสมฺปตฺติทายิภิฯ
[701]
ทุกฺขาปคมมิจฺฉนฺตา , ปตฺถยนฺตา สุขาคมํ;
อลพฺภเนยฺยธมฺเมสุ, ปิปาสาตุรมานสาฯ
[702]
กิจฺฉาธิปนฺนา กปณา, วิปฺผนฺทนฺตา รุทมฺมุขา;
ตณฺหาทาสา ปราภูตา, ภวสํสารสํกเฏฯ
[703]
ยํ เตภูมกนิสฺสนฺทํ, กฏุกํ คาฬฺหเวทนํ;
เวเทนฺติ สํสารผลํ, ตํชาตาทิํ วินา กุโตฯ
[704]
ตสฺมา ชาตาทิเภเทหิ, พาธมานา ภยาวหา;
ทุกฺขา จ ทุกฺขวตฺถุ จ, พหุธาปิ ปปญฺจิตาฯ
[705]
เต สพฺเพ ปญฺจุปาทาน-กฺขนฺธา เอว สมาสโต;
ทุกฺขาธิฏฺฐานภาเวน, ทุกฺขตาย นิยามิตาฯ
[706]
ตสฺมา เตภูมกา ธมฺมา, สพฺเพ ตณฺหาวิวชฺชิตา;
ทุกฺขสจฺจนฺติ เทเสสิ, เทสนากุสโล มุนิฯ
[707]
วิราคเตชาลาเภน , ตณฺหาสฺเนหสิเนหิตํ;
วิสรุกฺโขว ชาตาทินานานตฺถผโลทยํฯ
[708]
นนฺทิราคานุพนฺเธน, สนฺตานมวกฑฺฒิตํ;
ปุนพฺภวาภินิพฺพตฺติภาเวน ปริวตฺตติฯ
[709]
ปติฏฺฐิตญฺจ ตตฺเถตมตฺตสฺเนหานุเสวนํ;
โคจรานุนยาพทฺธํ, ราคมุจฺฉาสโมหิตํฯ
[710]
กฺเลสราสิปริกฺลิฏฺฐํ, พฺยสโนปทฺทวาหตํ;
ทุกฺขสลฺลสมาวิทฺธํ, วิหญฺญติ นิรนฺตรํฯ
[711]
หเว วิราคเตเชน, วิจฺฉินฺเน สติ สพฺพถา;
เกน พนฺเธน สนฺตาน-มาเนสฺสติ ภวนฺตรํฯ
[712]
ภวนฺตรมสมฺปตฺเต, สนฺตานมฺหิ วิวฏฺฏิเต;
กิมธิฏฺฐาย ชาตาทิทุกฺขธมฺมา ปวตฺตเรฯ
[713]
ตสฺมา โมกฺขวิปกฺเขน, ตณฺหาทุกฺขวิธายินี;
ทุกฺขสมุทโย นาม, สจฺจมิจฺจาห นายโกฯ
[714]
สพฺพทุกฺขวินิมุตฺตํ, สพฺพกฺเลสวินิสฺสฏํ;
ทุกฺขนิโรธนาเมน, สจฺจํ วุจฺจติ อจฺจุตํฯ
[715]
ทุกฺขญฺจ ปริชานนฺโต, ปชหํ ทุกฺขสมฺภวํ;
นิพฺพานํ ปทมารพฺภ, ภาวนาวีถิโมสโฏฯ
[716]
นิยฺยานฏฺฐงฺคิโก มคฺโค, สพฺพทุกฺขวิมุตฺติยา;
ทุกฺขนิโรธคามีติ, สจฺจํ ตสฺมา ตมีริตํฯ
[717]
จตุสจฺจวินิมุตฺตา, เสสา โลกุตฺตรา มตา;
มคฺคงฺคสมฺปยุตฺตา จ, ผลธมฺมา จ สพฺพถาฯ
[718]
อิตฺถํ สเหตุกํ ทุกฺขํ, โสปายามตนิพฺพุติํ;
ปฏิปตฺติหิตตฺถาย, วิภาเวติ วินายโกฯ
[719]
สปฺปาฏิหาริยํ ธมฺมํ, เทเสตฺวาน อนุตฺตโร;
จตุธาริยสจฺจานิ, วิภชีติ วิภาวเยฯ
[720]
ตพฺภาวภาวิภาเวน , ปจฺจยาการลกฺขิตํ;
ติยทฺธํ ทฺวาทสงฺคญฺจ, วีสตาการสงฺคหํฯ
[721]
ติสนฺธิ จตุสงฺเขปํ, ติวฏฺฏญฺจ ติลกฺขณํ;
เตภูมกํ ทฺวิมูลญฺจ, จตุกฺกนยมณฺฑิตํฯ
[722]
ปจฺเจกํ จตุคมฺภีร-มนุปุพฺพววตฺถิตํ;
อวิชฺชากูฏสงฺขาตํ, พนฺธาวิจฺเฉทมณฺฑลํฯ
[723]
โสกาทีนตฺถนิสฺสนฺทํ, เกวลํ ทุกฺขปิณฺฑิตํ;
ปฏิจฺจสมุปฺปาโทติ, ภวจกฺกํ ปวุจฺจติฯ
[724]
ปฏิวิทฺธาย วิชฺชาย, ภงฺคาวิชฺชาย สพฺพถา;
วิวฏฺฏตานุปุพฺเพน, เหตุภงฺคา ยถากถํฯ
[725]
อสฺมิํ สติ อิทํ โหติ, อสฺสุปฺปาทา อิทํ ภเว;
อสตาสฺมิํ น ตํ โหติ, ตสฺส ภงฺคาว ภิชฺชติฯ
[726]
เอตมตฺถํ ปุรกฺขตฺวา, ปจฺจยฏฺฐิติ ทสฺสิตา;
ปฏิจฺจสมุปฺปาทสฺส, อิทปฺปจฺจยตา นเยฯ
[727]
ตถา หิ ชาติยาปาห, ปจฺจยตฺตํ มหามุนิ;
ชรามรณธมฺมานํ, มตฺตาเภเทปิ วตฺถุโตฯ
[728]
อาหจฺจปจฺจยฏฺฐมฺหิ, เนทิสี ปจฺจยฏฺฐิติ;
ตตฺถ ธมฺมนฺตรสฺเสว, ปจฺจยฏฺโฐ วิภาวิโตฯ
[729]
วุตฺตมาจริเยเนตํ, ปฏฺฐานนยสงฺคเห;
ลพฺภมานนยํ ตาว, ทสฺสนตฺถํ ปปญฺจิโตฯ
[730]
เอตฺถ ตสฺมานุเปกฺขิตฺวา, อาหจฺจ นิยมํ พุโธ;
ตพฺภาวภาวิมตฺเตน, ปจฺจยตฺถํ วิภาวเยฯ
[731]
ตตฺถาวิชฺชา จ สงฺขารา, อทฺธาตีโตติ ภาสิตา;
วิญฺญาณํ นามรูปญฺจ, สฬายตนสญฺญิตํฯ
[732]
ผสฺโส จ เวทนา ตณฺหา, อุปาทานํ ภโวติ จ;
ปจฺจุปฺปนฺโน ภเว อทฺธา, ภเว อทฺธา อนาคโตฯ
[733]
ชาติ ชรา มรณนฺติ, ทฺเวธา โหติ จ สพฺพถา;
กาลตฺตยววตฺถานํ, ติยทฺธมิติ ทีปเยฯ
[734]
ตตฺถาวิชฺชาติ อญฺญาณํ, จตุสจฺเจสุ ภาสิตํ;
ปุพฺพนฺเต จาปรนฺเต จ, ปจฺจยฏฺฐิติยํ ตถาฯ
[735]
อปุญฺญาติสงฺขาโรติ, วุตฺตา ทฺวาทส เจตนา;
ตถา ปุญฺญาภิสงฺขาโร, กามรูเปสุ ภาสิโตฯ
[736]
อาเนญฺชาติสงฺขาโรติ, วุตฺตารุปฺปา จตุพฺพิธา;
กายพฺพจีมโนทฺวารํ, ปตฺวา ตาเยว เจตนาฯ
[737]
วุตฺตา กายวจีจิตฺตสงฺขาราติ มเหสินา;
สงฺขาราติ วิภตฺเตวเมกูนติํส เจตนาฯ
[738]
เอกูนวีสติวิธํ, ปฏิสนฺธิกฺขเณ ตถา;
ปวตฺเต ทฺวตฺติํสวิธํ, วิญฺญาณํ ปากมานสํฯ
[739]
ติวิธํ เวทนา สญฺญา, สงฺขาราติ วิเภทิตํ;
นามรูปํ ตุ ทุวิธํ, ภูโตปาทายเภทโตฯ
[740]
สฬายตนสงฺขาตํ, จกฺขาทชฺฌตฺติกํ มตํ;
จกฺขุสมฺผสฺสาทิเภทา, ผสฺโส ฉธา ปกาสิโตฯ
[741]
สุขา ทุกฺขา อุเปกฺขาติ, เวทนา ติวิธา ภเว;
กาเม ภเว จ วิภเว, ตณฺหาติ ติวิธา มตาฯ
[742]
กามุปาทานาทิเภทา, อุปาทานา จตุพฺพิธา;
กมฺโมปปตฺติเภเทน, ภโว นาม ทฺวิธา มโตฯ
[743]
อตฺตภาวาภินิพฺพตฺติ, ชาติ นาม ชรา ปน;
ปุราณภาโว มรณํ, ปริโยสานมีริตํฯ
[744]
ทฺวาทสงฺคปฺปเภเทน, วิภตฺเตวํ มเหสินา;
ปฏิจฺจสมุปฺปาโทติ, ปจฺจยา เอว เกวลาฯ
[745]
ปฏิจฺจ ผลภาเวน, สาเปกฺขํ ฐิตมตฺตนิ;
อปจฺจกฺขาย สงฺคนฺตฺวา, อุปฺปาเทนฺตีติ ปจฺจยาฯ
[746]
อวิชฺชาสงฺขารานํ ตุ, คหเณ คหิตาว เต;
ตณฺหุปาทานภวาปิ, อิติ ปญฺเจตฺถ เหตุโยฯ
[747]
ตณฺหุปาทานภวานํ, คหเณ คหิตา ปุน;
อวิชฺชา สงฺขารา จาติ, ปญฺเจเวตฺถาปิ เหตุโยฯ
[748]
วิญฺญาณาทิสรูเปน, ทสฺสิตํ ผลปญฺจกํ;
ชาติชฺชรามรเณน, ตเทว คหิตํ ปุนฯ
[749]
อตีเต เหตโว ปญฺจ, อิทานิ ผลปญฺจกํ;
อิทานิ เหตโว ปญฺจ, อายติํ ผลปญฺจกํฯ
[750]
อิตฺถํ เภเทน สงฺคยฺห, ทฺวาทสงฺคํ วิจกฺขณา;
อตฺถาปตฺติวิเสเสน, วีสตาการมีรยุํฯ
[751]
เหตุผลํ ผลเหตุ, ปุน เหตุผลนฺติ จ;
ติสนฺธิ จตุสงฺเขปํ, ตเมวาหุ วิภาวิโนฯ
[752]
อวิชฺชาตณฺหุปาทานา, กฺเลสวฏฺฏนฺติ ภาสิตา;
ภเวกเทโส สงฺขารา, กมฺมวฏฺฏํ ตโตปรํฯ
[753]
วิปากวฏฺฏมิจฺเจวํ, วิวฏฺเฏนาวิวฏฺฏิตํ;
ติวฏฺฏวฏฺฏิตํ หุตฺวา, วฏฺฏเมตํ ปวตฺตติฯ
[754]
อนิจฺจญฺจ ขยฏฺเฐน, ทุกฺขเมตํ ภยฏฺฐโต;
อนตฺตาสารกฏฺเฐน, วฏฺฏเมวํ ติลกฺขณํฯ
[755]
สํสารสฺเสว วุตฺตายํ, ปจฺจยานํ ปรมฺปรา;
ปฏิจฺจสมุปฺปาโทติ, ตโต เตภูมโก มโตฯ
[756]
พนฺธาวิชฺชาณฺฑโกเสน, วิชฺชาทิเภทวชฺชิตา;
วิมุตฺติรสมปฺปตฺตา, ภวตณฺหาปิปาสิตาฯ
[757]
อภิสงฺขารภาเวน, ปฏิพนฺธติ สนฺตติ;
ตถาภิสงฺขตา ปาก-ภาวาย ปริวตฺตติฯ
[758]
วิปากา ปุน กมฺมานิ, ปากานิ ปุน กมฺมโต;
อิจฺเจวํ ปริยาเยน, สํสาโรยํ ปวตฺตติฯ
[759]
อิจฺจาวิชฺชาภวตณฺหา, วฏฺโฏปตฺถมฺภกา มตา;
สมฺปยุตฺตานุสยิตา, ตสฺมา วฏฺฏํ ทฺวิมูลกํฯ
[760]
ปจฺจยปจฺจยุปฺปนฺน-สนฺตานเภทโต ปน;
นานาภูตานเมกนฺตํ, พีชรุกฺขาทโย วิยฯ
[761]
ตถาปิ เตสํ ธมฺมานํ, วตฺถุลกฺขณเภทโต;
ทีปวฏฺฏิสิขานํว, นตฺถิ เอกนฺตเมกตาฯ
[762]
เหตุเหตุสมุปฺปนฺนา, อีหาโภควิวชฺชิตา;
ปจฺจยาย จ ปจฺเจตุ-มพฺยาปารา ตโต มตาฯ
[763]
อวิชฺชาทีนเมวาถ, สมฺภเว สมฺภวนฺติ จ;
สงฺขาราทิสภาวาติ, ฐิเตวํธมฺมตาย เตฯ
[764]
อิตฺถเมกตฺตนานตฺตา, อพฺยาปาโร ตถาปโร;
เอตฺเถวํธมฺมตา เจติ, นยา วุตฺตา จตุพฺพิธาฯ
[765]
ผลานํ ปจฺจยุปฺปตฺติ, ปจฺจยตฺโถ จ เหตุสุ;
สภาวปฏิเวโธ จ, เทสนา จิตฺตตาติ จฯ
[766]
อตฺถธมฺมปฏิเวธ-เทสนานํ ยถากฺกมํ;
อติคมฺภีรภาเวน, จตุคมฺภีรมีริตํฯ
[767]
ปธานการณตฺตา หิ, อวิชฺชาทิปรมฺปรา;
กเมน สงฺขาราทีนํ, ปจฺจยาติ ววตฺถิตาฯ
[768]
ตถา หิ ชาติยา เอว, ชรามรณสมฺภโว;
อชาตานํ ชรา วาถ, มรณํ วา กุโต ภเวฯ
[769]
สาโวปปตฺติสงฺขาตา, ชาติ กมฺมภโวทิตา;
องฺกุโร วิย พีชมฺหา, ตตฺถ ตตฺโถปลพฺภติฯ
[770]
สมฺปโยคานุสยโต, อุปาทานปฺปติฏฺฐิตา;
อายูหนฺติ จ กมฺมานิ, อากฑฺฒนฺโตปปตฺติกํฯ
[771]
อุปาทานิยธมฺเมสุ , ตณฺหาสฺเนหปิปาสิตา;
ทฬฺหี กุพฺพนฺตุปาทานํ, ปิยรูปาภินนฺทิโนฯ
[772]
เวทนีเยสุ ธมฺเมสุ, อสฺสาทมนุปสฺสโต;
เวทนาปจฺจยา ตณฺหา, สมุฏฺฐาย ปวฑฺฒติฯ
[773]
อิฏฺฐานิฏฺฐญฺจ มชฺฌตฺตํ, ผุสนฺตา ปน โคจรํ;
เวเทนฺติ เวทนํ นาม, นาผุสนฺตา กุทาจนํฯ
[774]
ผุสตาลมฺพณญฺเจโส, สฬายตนสมฺภเว;
ทฺวาราภาเว กุโต ตสฺส, สมุปฺปตฺติ ภวิสฺสติฯ
[775]
สฬายตนเมตญฺจ, นามรูปูปนิสฺสิตํ;
ฉผสฺสทฺวารภาเวน, ปวตฺตติ ยถารหํฯ
[776]
ปุพฺพงฺคมาธิฏฺฐาเนน, วิญฺญาเณน ปติฏฺฐเห;
นามรูปํ อุปตฺถทฺธํ, ปฏิสนฺธิปวตฺติยํฯ
[777]
สงฺขารชนิตํ หุตฺวา, ปติฏฺฐาติ ภวนฺตเร;
วิญฺญาณํ ชนกาภาเว, ตสฺสุปฺปตฺติ กถํ ภเวฯ
[778]
อวิชฺชายานุสยิเต, ปฏิเวธวิโรธิเต;
วฏฺฏานุคตสนฺตาเน, ปฏิสนฺธิผลาวเหฯ
[779]
ปากธมฺมา สภาเวน, ปวตฺตนฺติ หิ เจตนา;
อวิชฺชาปจฺจยา โหนฺติ, สงฺขาราติ ตโต มตาฯ
[780]
ปฏิวิทฺเธสุ สจฺเจสุ, ปจฺจยานํ ปรมฺปรา;
วิฆาตียติ สพฺพาปิ, ตโต วฏฺฏํ วิวฏฺฏติฯ
[781]
อิจฺจาวิชฺชาวิโรเธน, ตสฺสา วฏฺฏปฺปวตฺติยา;
สงฺฆาตนิกภาเวน, อวิชฺชา กูฏสมฺมตาฯ
[782]
ชรามรณสงฺฆาฏ-ปฏิปีฬิตเจตสํ;
กฺเลสมุจฺฉาปเรตานํ, สา จาวิชฺชา ปวฑฺฒติฯ
[783]
อิจฺจาพทฺธมวิจฺเฉทํ, อิทปฺปจฺจยมณฺฑลํ;
จกฺกเนมิสมาวฏฺฏํ, กเมน ปริวตฺตติฯ
[784]
วฏฺฏสฺส ทฺวาทสงฺคสฺส, ตสฺส เตภูมกสฺส ตุ;
ทุกฺขกฺขนฺธสฺส ทสฺเสสิ, นิสฺสนฺเทน นิทสฺสนํฯ
[785]
โสกญฺจ ปริเทวญฺจ, ตถา ทุกฺขญฺจ กายิกํ;
โทมนสฺสมุปายาสํ, นานาพฺยสนสมฺภวํฯ
[786]
อิจฺจาตุรมนิจฺจนฺตํ, มโหปทฺทวสงฺกุลํ;
พหุปกฺเลสุปสฺสฏฺฐํ, ทุกฺขเมตนฺติ ปิณฺฑิตํฯ
[787]
อิจฺเจวํ ปญฺจุปาทาน-กฺขนฺธเภทิตสงฺคโห;
อตฺตภาวภวรโถ, หตฺถมุตฺตํว ยนฺตกํฯ
[788]
คติฏฺฐิตินิวาเสสุ, สํสรนฺโต นิรนฺตรํ;
จกฺเกเนเตน ยาตีติ, ภวจกฺกมิทํ มตํฯ
[789]
อวิชฺชาณฺฑํ ปทาเลตฺวา, ปฏิเวธปฺปวตฺติยา;
ปจฺจยปฺปจฺจยุปฺปนฺนา, สุปฏฺฐนฺติ สภาวโตฯ
[790]
อนิจฺจา ทุกฺขนตฺตา จ, ภงฺควนฺโต ภยาวหา;
สาทีนวาติ สงฺขาย, วิวฏฺฏมภิติฏฺฐติฯ
[791]
ตโต สานุสยา ตณฺหา, นิรุชฺฌติ ปุนพฺภเว;
สนฺตานรติยาภาวา, น ปกฺขนฺทติ สนฺธิยํฯ
[792]
อวิรุฬฺหิกภาเวน, ตตฺถ วฏฺฏวิโรธิเต;
อภิสงฺขารภาเวน, น ปวตฺตนฺติ เจตนาฯ
[793]
ปฏิสนฺธิปวตฺตีปิ, น ชเนนฺติ ภวนฺตเร;
อิจฺจาวิชฺชานิโรเธน, นิรุทฺธา กมฺมเจตนาฯ
[794]
ปจฺจยตฺถนิโรเธน, สงฺขารานํ นิโรธโต;
วิญฺญาณํ ชนกาภาวา, นิรุทฺธมิติ วุจฺจติฯ
[795]
วิญฺญาณาทินิโรธา จ, นามรูปาทิกํ ตถา;
ทุกฺขกฺขนฺธสฺสิมสฺเสวํ, นิโรโธติ ปวุจฺจติฯ
[796]
อิติ วฏฺฏวิวฏฺฏานํ, วสา ทฺเวธา วิภาวิโต;
ปฏิจฺจสมุปฺปาโทติ, เทสิโตยํ มเหสินาฯ
[797]
สพฺพสงฺขตธมฺมานํ , สพฺเพ ธมฺมาปิ ปจฺจยา;
ชนกา เจวุปตฺถมฺภา, สํวิภตฺตา ยถารหํฯ
[798]
อาหจฺจ ปจฺจยฏฺเฐน, จตุวีสติธา ฐิตา;
เหตาลมฺพณาธิปตานนฺตรสมนนฺตราฯ
[799]
สหชาตอญฺญมญฺญ-นิสฺสยา โจปนิสฺสโย;
ปุเรชาตา ปจฺฉาชาตา-เสวนา กมฺมเมว จฯ
[800]
ปากาหารินฺทฺริยชฺฌาน-มคฺคงฺคสมฺปยุตฺตกา;
วิปฺปยุตฺตตฺถิ นตฺถิ จ, วิคตาวิคตนฺติ จฯ
[801]
ปญฺจาตีตาว กมฺมํ ตุ, วตฺตมานญฺจ อีริตํ;
สพฺพถาปิ ตโย วุตฺตา, วตฺตมานา ตโตปเรฯ
[802]
ฉธา นามํ ตุ นามสฺส, ปญฺจธา นามรูปินํ;
เอกธา ปุน รูปสฺส, รูปํ นามสฺส เจกธาฯ
[803]
ปญฺญตฺตินามรูปานิ, นามสฺส ทุวิธา ทฺวยํ;
ทฺวยสฺส นวธา เจติ, ฉพฺพิธา ปจฺจยา กถํฯ
[804]
นิรุทฺธานนฺตรา เอว, ชายนฺตานมนนฺตรํ;
นามธมฺมาว นามานํ, ชนกตฺโตปการกาฯ
[805]
นิรนฺตรปฺปวตฺติยา, อนุรูปมนนฺตรา;
อนนฺตรปจฺจเยน, ปจฺจโยติ ปกาสิตาฯ
[806]
สมนนฺตรภาเวน, เตสํ เต เอว ปจฺจยา;
สมนนฺตรนาเมน, ปจฺจโยติ ปกาสิตาฯ
[807]
อตฺถิภาวาย ธมฺมานํ, นตฺถิตาโยปการกา;
นตฺถิปจฺจยนาเมน, วุตฺตา เต เอว ตาทินาฯ
[808]
โอกาสทานภาเวน, วิคตาโวปการกา;
ธมฺมา เต เอว วุจฺจนฺติ, วิคตปฺปจฺจโยติ จฯ
[809]
ชวา ปคุณภาวาย, ชวานมุปการกา;
อาเสวนปจฺจโยติ, นิรุทฺธานนฺตรา มตาฯ
[810]
สํสฏฺฐสหชาตานํ, สมฺปโยเคน ปจฺจยา;
สมฺปยุตฺตปจฺจโยติ, นามา นามานมีริตาฯ
[811]
อิจฺเจโก วตฺตมาโน จ, ปญฺจาตีตา ยถารหํ;
อรูปานมรูปา จ, ปจฺจยา ฉพฺพิธา มตาฯ
[812]
ปวตฺเต จิตฺตชาตานํ, กมฺมชานญฺจ สนฺธิยํ;
รูปานํ สหชาตาน-มรูปานญฺจ ตาทินาฯ
[813]
เหตุภูตา ฉ ธมฺมาปิ, มูลฏฺเฐโนปการกา;
เหตุปจฺจยภาเวน, ปจฺจโยติ ปกาสิตาฯ
[814]
ตถา นิชฺฌายนฏฺเฐน, เตสเมโวปการกา;
ฌานปจฺจยนาเมน, ฌานธมฺมา วิภาวิตาฯ
[815]
ตเถว นิยฺยานฏฺเฐน, ปจฺจยาติ ปกาสิตา;
มคฺคปจฺจยนาเมน, มคฺคงฺคา จ มเหสินาฯ
[816]
เตสเมว จ ธมฺมานํ, สหชาตาติ เจตนา;
กมฺมพฺยาปาราภาเวน, วตฺตมานา จ ปจฺจยาฯ
[817]
กฏตฺตารูปปากานํ, นานกฺขณิกเจตนา;
อภิสงฺขารภาเวน, ชนกปฺปจฺจยา มตาฯ
[818]
อิจฺเจวํ ทุวิธา เภทา, วิปฺผารฏฺเฐน เจตนา;
กมฺมปจฺจยนาเมน, ปจฺจโยติ ปกาสิตาฯ
[819]
รูปานํ สหชาตานํ, อญฺญมญฺญมรูปินํ;
ปจฺจยา สนฺตภาเวน, วิปากา สมุทีริตาฯ
[820]
เอโกตีโตปิ จตฺตาโร, วตฺตมานาติ ปญฺจธา;
ปจฺจยา นามธมฺมาว, นามรูปานมีริตาฯ
[821]
อิมสฺส รูปกายสฺส, ปจฺฉาชาโตปการโก;
ปจฺฉาชาตปจฺจโยติ, นามํ รูปานเมกธาฯ
[822]
สตฺตวิญฺญาณธาตูนํ , ฉ วตฺถูนิ ปวตฺติยํ;
ปญฺจวิญฺญาณวีถิยา, ปญฺจาลมฺพา ยถากฺกมํฯ
[823]
ปุเรชาตวิเสเสน, นามานมุปการกา;
ปุเรชาตปจฺจโยติ, รูปํ นามสฺส เจกธาฯ
[824]
จิตฺตเจตสิกา ธมฺมา, ยํ ยมารพฺภ ชายเร;
อาลมฺพณปจฺจโยติ, สพฺพเมตํ ปวุจฺจติฯ
[825]
ยมาลมฺพํ ครุํ กตฺวา, นามธมฺมา ปวตฺตเร;
สฺวายเมวาลมฺพณูป-นิสฺสโยติ ปกาสิโตฯ
[826]
อนนฺตรปจฺจเยน, เย ธมฺมา ปจฺจยา มตา;
เต เอว วานนฺตรูป-นิสฺสโยติ ปกาสิโตฯ
[827]
ราคสทฺธาทโย ธมฺมา, อชฺฌตฺตมนุวาสิตา;
สตฺตสงฺขารธมฺมา จ, พหิทฺโธปนิเสวิตาฯ
[828]
ราคสทฺธาทิธมฺมานํ, กมฺมํ ปากานมิจฺจยํ;
ปกตูปนิสฺสโยติ, ปฏฺฐเปสิ ตถาคโตฯ
[829]
อิจฺเจวํ พลวฏฺเฐน, นิสฺสเยโนปการกา;
อุปนิสฺสยนาเมน, ปจฺจโยยํ ติธา มโตฯ
[830]
รูปารูปํ ปนิจฺเจวํ, เตกาลิกมกาลิกา;
ปญฺญตฺติ เจว นามานํ, ปจฺจโย ทุวิโธ มโตฯ
[831]
อาลมฺพาธิปฺปติภูตํ, นามานํ ครุโคจรํ;
สหชาธิปฺปตีธมฺมา, สหชานํ ยถารหํฯ
[832]
นามรูปานมิจฺเจว-มาธิปฺปจฺเจน ปจฺจโย;
อธิปฺปติปจฺจโยติ, ทุวิธา ปริทีปิโตฯ
[833]
สหชา นามรูปานํ, มหาภูตา จ รูปินํ;
ปฏิสนฺธิกฺขเณ วตฺถุ, นามานมิติ สพฺพถาฯ
[834]
สหชาตวิเสเสน, ธมฺมานมุปการกา;
สหชาตปจฺจโยติ, ติวิเธวํ วิภาวิตาฯ
[835]
อรูปิโน จตุกฺขนฺธา, มหาภูตา จตุพฺพิธา;
สนฺธิยํ วตฺถุนามานิ, สหชานีติ สพฺพถาฯ
[836]
อุปการปวตฺตา จ, อญฺญมญฺญสฺส ตาทินา;
อญฺญมญฺญปจฺจโยติ, วิภตฺตา ติวิธา มตาฯ
[837]
สตฺตวิญฺญาณธาตูนํ, ภูโตปาทายรูปินํ;
สหชาตนามรูป-ธมฺมานญฺจ ยถากฺกมํฯ
[838]
วตฺถุ ภูตา จตุกฺขนฺธา, นิสฺสเยโนปการกา;
นิสฺสยปฺปจฺจโย นาม, ปจฺจโยติ มโต ติธาฯ
[839]
กพฬีกาโร อาหาโร, รูปกายสฺส ปจฺจโย;
อรูปิโน ปนาหารา, สหชานํ ยถารหํฯ
[840]
นามรูปานมิจฺเจวํ, ยาปนฏฺเฐน ปจฺจยา;
อาหารปจฺจโยเตว, ทุวิเธวํ ปกาสิโตฯ
[841]
ปสาทชีวิตารูปิ-นฺทฺริยธมฺมา ยถากฺกมํ;
ปญฺจวิญฺญาณุปาทินฺน-รูปานํ นามรูปินํฯ
[842]
สหชาตานมิจฺเจว-มิสฺสรฏฺเฐน ปจฺจยา;
อินฺทฺริยปฺปจฺจโยเตว, ติวิธา สมุทาหโฏฯ
[843]
สตฺตวิญฺญาณธาตูนํ, ฉ วตฺถูนิ ยถารหํ;
ปจฺฉาชาตา จ กายสฺส, จิตฺตเจตสิกา ตถาฯ
[844]
อรูปา สหชาตานํ, รูปานนฺติ มตา ติธา;
วิปฺปยุตฺตปจฺจโยติ, วิปฺปโยโคปการกาฯ
[845]
สหชาตํ ปุเรชาตํ, ปจฺฉาชาตญฺจ สพฺพถา;
กพฬีกาโร อาหาโร, รูปชีวิตมิจฺจยํฯ
[846]
อตฺถิปจฺจยสงฺขาโต, ปจฺจโย ปญฺจธา มโต;
วิชฺชมานสภาเวน, ปจฺจยฏฺฐา ยถารหํฯ
[847]
เต เอวาวิคตา หุตฺวา, วตฺตมาโนปการกา;
อวิคตปจฺจโยติ, สุคเตน ววตฺถิตาฯ
[848]
อฏฺเฐวํ วตฺตมานานิ, นามรูปานิ ปจฺจยา;
สพฺพตฺถาธิปฺปตี จาติ, นวธา นามรูปินํฯ
[849]
อิตฺถมุทฺทิฏฺฐนิทฺทิฏฺฐา, ปฏฺฐานนยสงฺคหา;
กุสลากุสลาทีหิ, สุวิภตฺตา มเหสินาฯ
[850]
ปญฺญตฺตินามรูปานํ, วเสน ติวิธา ฐิตา;
ปจฺจยาติ ปกาเสนฺติ, จตุวีสติ ปณฺฑิตาฯ
[851]
ปญฺญตฺติ ปญฺญปียตฺตา, ปญฺญาเปตีติ จ ทฺวิธา;
นามรูปวินิมุตฺตา, ปญฺญตฺตา ตาทินา กถํฯ
[852]
ภูตปริณามาการมุปาทาย ตถา ตถา;
ภูมิปพฺพตปาสาณติณรุกฺขลตาทโยฯ
[853]
สมฺภาราการมารพฺภ, สนฺนิเวสวิเสสิตา;
ยานคามวนุยฺยานกฏสารปฏาทโยฯ
[854]
การกเวทกาการํ, วิญฺญตฺตินฺทฺริยลกฺขิตํ;
ขนฺธปญฺจกมาหจฺจ, มจฺจาสุรสุราทโยฯ
[855]
จนฺทาทาวฏฺฏนาทีหิ, ทิสากาลาทิสมฺมุติ;
ปารมฺปริยกาทีหิ, ชาติโคตฺตกุลาทโยฯ
[856]
ตํตํกฺริยาทิเภเทหิ, ปญฺญตฺตา กถินาทโย;
ตํตํกลาปาสมฺผุฏฺฐา, กูปากาสคุหาทโยฯ
[857]
ตํ ตํ นิมิตฺตมารพฺภ, จินฺตยนฺตสฺสุปฏฺฐิตา;
กสิณาทิกโวหารา, ภาวนามยโคจราฯ
[858]
ปุพฺโพปลพฺภาภาเวน, กสิณุคฺฆาฏิมาทโย;
นิโรธา จ สมาปตฺติ, วิเสสาภาวลกฺขิตาฯ
[859]
อิติ ตํ ตมุปาทาย, สมญฺญาตา ตถา ตถา;
สงฺขา สมญฺญา ปญฺญตฺติ, โวหาโรติ ปกาสิตาฯ
[860]
อาลมฺพณฏฺฐากาเรน, สนฺตาภาเวปิ วตฺถุโต;
จินฺตาโวหารนิปฺผนฺนา, อตฺถจฺฉายาว ภาสินีฯ
[861]
ปญฺญาปียตฺตา ปญฺญตฺติ, นามายมิติ ภาสิตา;
อุปาทาย จ ปญฺญตฺติ, สา เอโวปนิธาย จฯ
[862]
ปญฺญตฺติ ปญฺญาปนโต, ปณฺฑิเตหิ ปกาสิตา;
อวิชฺชมานา ปญฺญตฺติ, วิชฺชมานาติปิ ทฺวิธาฯ
[863]
โลกโวหาริกฏฺเฐน, ปญฺญตฺตํ ปรมตฺถโต;
อวิชฺชมานเมตาย, ปญฺญาเปนฺติ ยทา ตทาฯ
[864]
อวิชฺชมานปญฺญตฺติ, วิชฺชมานํ ยทา ปุน;
ปญฺญาเปนฺติ ตทา เอสา, วิชฺชมานนฺติ วุจฺจติฯ
[865]
อิตฺถํ ปญฺญตฺติธมฺมญฺจ, สมฺมตตฺถวิเสสโต;
ภาวธมฺมญฺจ รูปาทิ-สลกฺขณวิเสสโตฯ
[866]
ปญฺญาเปตีติ ปญฺญตฺติ, นามายมิติ ภาสิตา;
ยา นามํ นามกมฺมาทินาเมน สมุทีริตาฯ
[867]
สา เอวาวิชฺชมาเนน-วิชฺชมานาทิเภทิตา;
อิตฺถิสทฺโท ฉฬาภิญฺโญ, ราชปุตฺโต ตุ ภาสิตาฯ
[868]
กฺริยานิมิตฺตตฺถโยค-รุฬฺหิชาโตปจาริกา;
สมฺพนฺโธปจยาวตฺถา, สณฺฐานาเปกฺขิตา ตถาฯ
[869]
เทวทตฺโตถ เมธาวี, เวทนา จนฺทิมา ตถา;
ขตฺติโย นรสีโห จ, ภาตา โลหิตกํ ยุวาฯ
[870]
กุณฺฑลํ ทุสฺสมิจฺเจวมาทิเภทิตสงฺคหา;
สมฺมตตฺถสภาเวสุ, โวหาราการลกฺขิตาฯ
[871]
สายํ ยาทิจฺฉกานฺวตฺถสงฺเกตกฺขณสมฺภวา;
โวหารตฺถวิเสเสน, เญยฺยาการานุสารินีฯ
[872]
วจีโฆสานุสาเรน, โสตวิญฺญาณวีถิยา;
ปวตฺตานนฺตรุปฺปนฺน-มโนทฺวารสฺส โคจราฯ
[873]
อตฺถา ยสฺสานุสาเรน, วิญฺญายนฺติ ตโต ปรํ;
สมฺมตา จ สภาวา จ, ปุพฺพสงฺเกตภาคิโนฯ
[874]
ยายํ วาลมฺพณาการวิเสเส ปฏิทิสฺสติ;
เวทนาทิวจีโฆสํ, สภาวานุคเจตโสฯ
[875]
สายํ ปญฺญตฺติ วิญฺเญยฺยา, โลกสงฺเกตนิมฺมิตา;
วจีวิญฺญตฺติสหิโต, สทฺโท เอวาติ เกจนฯ
[876]
อิตฺถํ ปญฺญตฺติธมฺมาติ, วุตฺตํ ปญฺญตฺติกทฺวยํ;
ตถาธิวจนา ธมฺมา, นิรุตฺตีติ จ ตาทินาฯ
[877]
อวิสํวาทกฏฺเฐน, โลกโวหารสาธกํ;
สมญฺญาสจฺจมิจฺเจวํ, อาจิกฺขนฺติ วิจกฺขณาฯ
[878]
สตฺถา ยํ ปรมตฺถมุตฺตมคุโณ นามญฺจ รูปนฺติ จ,
ทฺเวธากาสิ สภาวธมฺมกุสโล นิพฺพิชฺฌ ธมฺมนฺตรํ;
โวหารตฺถวิเสสเญยฺยมปรํ พฺยากาสิ ปญฺญตฺติโต,
อารทฺธํ กมโต มเยวมขิลํ ตํ สุฏฺฐุ นิฏฺฐาปิตํฯ
[879]
ยํ ธมฺมํ ธมฺมราชา นิรติกมภิสมฺโพธิ มคฺเคน พุทฺธา,
กตฺวา กณฺฑมฺพมูเล ปรมมนุปมํ ปาฏิหีรํ ขเณน;
ปาตฺวากา ตตฺถ ปตฺวา ปุรวรคณมุลฺลาปลาวณฺณรํสิ,
ตตฺถาทายตฺถสารํ กถิตมติจิรํ ฐาตุ ปาฐานุกูลํฯ
อิติ นามรูปปริจฺเฉเท สพฺพสงฺคหวิภาโค นาม
สตฺตโม ปริจฺเฉโทฯ
นิฏฺฐิโต จ นามรูปปริจฺเฉเท สพฺพถาปิ
อภิธมฺมปรมตฺถวิภาโคฯ
8. อฏฺฐโม ปริจฺเฉโท