สุปณีตตรา โหนฺติ,

ปจฺฉิมา ปจฺฉิมา อิธ;

อุปมา ตตฺถ วิญฺเญยฺยา,

ปาสาทตลสาฏิกา’’ติฯ

[1041]

สงฺเขเปน มยารุปฺป-สมาปตฺตินโย อยํ;

ทสฺสิโต ทสฺสิโต สุทฺธ-ทสฺสินา ปิยทสฺสินาฯ

[1042]

รูปารูปชฺฌานสมาปตฺติวิธานํ ,

ชานาติมํ สารตรํ โย ปน ภิกฺขุ;

รูปารูปชฺฌานสมาปตฺตีสุ ทกฺโข,

รูปารูปํ ยาติ ภวํ โส อภิภุยฺยฯ

อิติ อภิธมฺมาวตาเร อรูปาวจรสมาธิภาวนานิทฺเทโส นาม

ปนฺนรสโม ปริจฺเฉโทฯ

16. โสฬสโม ปริจฺเฉโท

อภิญฺญานิทฺเทโส

[1043]

อิโต ปรํ กริสฺสามิ, ปญฺญาสุทฺธิกรํ ปรํ;

ปญฺจนฺนมฺปิ อภิญฺญานํ, มุขมตฺตนิทสฺสนํฯ

[1044]

รูปารูปสมาปตฺตี,

นิพฺพตฺเตตฺวา ปนฏฺฐปิ;

โลกิกาปิ อภิญฺญาโย,

ภาเวตพฺพา วิภาวินาฯ

[1045]

จตุตฺถชฺฌานมตฺเตปิ, สุจิณฺณวสินา สตา;

อนุโยคมภิญฺญาสุ, กาตุํ วตฺตติ โยคิโนฯ

[1046]