เมนู

อุเปกฺขาสหคตํ ตสฺมา, จตุตฺถํ สมุทีริตํ;

อยเมตฺถ วิเสโส หิ, เสสํ วุตฺตนยํ ปนฯ

[976]

ยํ จตุกฺกนเย ฌานํ, ทุติยํ ตํ ทฺวิธา ปน;

กตฺวาน ปญฺจกนเย, ทุติยํ ตติยํ กตํฯ

[977]

ตติยํ ตํ จตุตฺถญฺจ, จตุตฺถํ ปญฺจมํ อิธ;

ปฐมํ ปฐมํเยว, อยเมตฺถ วิเสสตาฯ

[978]

เอวเมตฺตาวตา วุตฺตา, นาติสงฺเขปโต มยา;

นาติวิตฺถารโต จายํ, รูปาวจรภาวนาฯ

[979]

สุมธุรวรตรวจโน, กํ นุ ชนํ เนว รญฺชยติ;

อตินิสิตวิสทพุทฺธิ-ปสาทชน เวทนีโยยํฯ

อิติ อภิธมฺมาวตาเร รูปาวจรสมาธิภาวนานิทฺเทโส

นาม จุทฺทสโม ปริจฺเฉโทฯ

15. ปนฺนรสโม ปริจฺเฉโท

อรูปาวจรสมาธิภาวนานิทฺเทโส

[980]

รูปารูปมตีเตน , รูปารูปาทิเวทินา;

ยานิ จารูปปุญฺญานิ, สรูเปนีริตานิ ตุฯ

[981]

เตสํ ทานิ ปวกฺขามิ, ภาวนานยมุตฺตมํ;

โยคาวจรภิกฺขูนํ, หิตตฺถาย สมาสโตฯ

[982]

‘‘รูเป โข วิชฺชมานสฺมิํ, ทณฺฑาทานาทโย สิยุํ;

อเนกาปิ ปนาพาธา, จกฺขุโรคาทโย’’อิติฯ

[983]

รูเป อาทีนวํ ทิสฺวา, รูเป นิพฺพินฺทมานโส;

ตสฺสาติกฺกมนตฺถาย, อรูปํ ปฏิปชฺชติฯ

[984]