เมนู

7. ปริยาปนฺนกถาวณฺณนา

[703-705] กิเลสวตฺถุโอกาสวเสนาติ กิเลสกามวตฺถุกามภูมิวเสนฯ รูปธาตุสหคตวเสน อนุเสตีติ กามราโค ยถา กามวิตกฺกสงฺขาตาย กามธาตุยา สห ปจฺจยสมวาเย อุปฺปชฺชนารโห, ตเมว รูปธาตุยาปีติ อตฺโถฯ ราคาทิการณลาเภ อุปฺปตฺติอรหตา หิ อนุสยนํฯ

ปริยาปนฺนกถาวณฺณนา นิฏฺฐิตาฯ

8. อพฺยากตกถาวณฺณนา

[706-608] สพฺพถาปีติ อวิปากภาเวนปิ สสฺสตาทิภาเวนปิฯ

อพฺยากตกถาวณฺณนา นิฏฺฐิตาฯ

9. อปริยาปนฺนกถาวณฺณนา

[709-710] ตสฺมา ทิฏฺฐิ โลกิยปริยาปนฺนา น โหตีติ อตฺถํ วทนฺติ, เอวํ สติ อติปฺปสงฺโค โหติ วีตโทสาทิโวหารภาวโตติฯ ตโต อญฺญถา อตฺถํ วทนฺโต ‘‘รูปทิฏฺฐิยา’’ติอาทิมาหฯ ตตฺถ อาทิ-สทฺเทน อรูปทิฏฺฐิอาทิํ สงฺคณฺหาติฯ ปรวาทิอธิปฺปายวเสน อยมตฺถวิภาวนาติ อาห ‘‘ยทิ จ ปริยาปนฺนา สิยา’’ติฯ ตถา จ สตีติ ทิฏฺฐิยา กามธาตุปริยาปนฺนตฺเต สตีติ อตฺโถฯ ตสฺมาติ ‘‘วีตทิฏฺฐิโก’’ติ เอวํ โวหาราภาวโตฯ น หิ สา ตสฺส อวิคตา ทิฏฺฐิ, ยโต โส วีตทิฏฺฐิโกติ น วุจฺจติฯ เยนาติ กามทิฏฺฐิภาเวนฯ

อปริยาปนฺนกถาวณฺณนา นิฏฺฐิตาฯ

จุทฺทสมวคฺควณฺณนา นิฏฺฐิตาฯ

15. ปนฺนรสมวคฺโค

1. ปจฺจยตากถาวณฺณนา

[711-717] ววตฺถิโตติ อสํกิณฺโณฯ โย หิ ธมฺโม เยน ปจฺจยภาเวน ปจฺจโย โหติ, ตสฺส ตโต อญฺเญนปิ ปจฺจยภาเว สติ ปจฺจยตา สํกิณฺณา นาม ภเวยฺยฯ วิรุทฺธาสมฺภวีนํ วิย ตพฺพิธุรานํ ปจฺจยภาวานํ สหภาวํ ปฏิกฺขิปติฯ

ปจฺจยตากถาวณฺณนา นิฏฺฐิตาฯ

2. อญฺญมญฺญปจฺจยกถาวณฺณนา

[718-719] สหชาตาติ วุตฺตตฺตา น สงฺขารปจฺจยา จ อวิชฺชาติ วุตฺตตฺตาติ อธิปฺปาโยฯ อนนฺตราทินาปิ หิ สงฺขารา อวิชฺชาย ปจฺจยา โหนฺติเยวฯ อญฺญมญฺญานนฺตรํ อวตฺวา อวิคตานนฺตรํ สมฺปยุตฺตสฺส วจนํ กมเภโท, อตฺถิคฺคหเณเนว คหิโต อตฺถิปจฺจยภูโตเยว ธมฺโม นิสฺสยปจฺจโย โหตีติฯ อสาธารณตายาติ ปทนฺตราสาธารณตายฯ เตนาห ‘‘วกฺขติ หี’’ติอาทิฯ

อญฺญมญฺญปจฺจยกถาวณฺณนา นิฏฺฐิตาฯ

9. ตติยสญฺญาเวทยิตกถาวณฺณนา

[732] ยทิปิ เสสํ นาม คหิตโต อญฺญํ, ตถาปิ ปกรณปริจฺฉินฺนเมเวตฺถ ตํ คยฺหตีติ ทสฺเสนฺโต ‘‘เยสํ…เป.… อธิปฺปาโย’’ติ วตฺวา ปุน อนวเสสเมว สงฺคณฺหนฺโต ‘‘อสญฺญสตฺตานมฺปิ จา’’ติอาทิมาหฯ ตตฺถ สพฺพสตฺเต สนฺธายาติ อธิปฺปาโยติ โยชนาฯ ปาณิสมฺผสฺสาปิ กมนฺตีติอาทิกํ สรีรปกตีติ สมฺพนฺโธฯ

[733-734] ปญฺจหิ วิญฺญาเณหิ น จวติ, น อุปปชฺชตีติ วาทํ ปรวาที นานุชานาตีติ อาห ‘‘สุตฺต…เป.… วตฺตพฺพ’’นฺติฯ

ตติยสญฺญาเวทยิตกถาวณฺณนา นิฏฺฐิตาฯ