1. กปฺปฏฺฐกถาวณฺณนา

[654-657] ‘‘เหฏฺฐา วุตฺตาธิปฺปายเมวา’’ติ อิทํ อิทฺธิพลกถายํ ยํ วุตฺตํ ‘‘อตีตํ อนาคตนฺติ อิทํ อวิเสเสน กปฺปํ ติฏฺเฐยฺยาติ ปฏิญฺญาตตฺตา โจเทตี’’ติอาทิ, ตํ สนฺธาย วุตฺตนฺติ อาห ‘‘เหฏฺฐาติ อิทฺธิพลกถาย’’นฺติฯ ตตฺถ ‘‘ทฺเว กปฺเป’’ติอาทิอายุปริจฺเฉทาติกฺกมสมตฺถตาโจทนาวเสน อาคตา, อิธ ปน สงฺฆเภทโก อายุกปฺปเมว อฏฺฐตฺวา ยทิ เอกํ มหากปฺปํ ติฏฺเฐยฺย, ยถา เอกํ, เอวํ อเนเกปิ กปฺเป ติฏฺเฐยฺยาติ โจทนา กาตพฺพาฯ

กปฺปฏฺฐกถาวณฺณนา นิฏฺฐิตาฯ

4. นิยตสฺสนิยามกถาวณฺณนา

[663-664] อปฺปตฺตนิยามานนฺติ เย อนุปฺปนฺนมิจฺฉตฺตสมฺมตฺตนิยตธมฺมา ปุคฺคลา, เตสํ ธมฺเมฯ เก ปน เต? ยถาวุตฺตปุคฺคลสนฺตานปริยาปนฺนา ธมฺมาฯ เต หิ ภูมิตฺตยปริยาปนฺนตาย ‘‘เตภูมกา’’ติ วุตฺตาฯ เย ปน ปตฺตนิยามานํ สนฺตาเน ปวตฺตา อนิยตธมฺมา, น เตสเมตฺถ สงฺคโห กโตฯ น หิ เตหิ สมนฺนาคเมน อนิยตตา อตฺถิฯ เตเนวาห ‘‘เตหิ สมนฺนาคโตปิ อนิยโตเยวา’’ติฯ อิมํ โวหารมตฺตนฺติ อิมินา นิยาโม นาม โกจิ ธมฺโม นตฺถิ, อุปจิตสมฺภารตาย อภิสมฺพุชฺฌิตุํ ภพฺพตาว ตถา วุจฺจตีติ ทสฺเสติฯ นิยโตติ วจนสฺส การณภาเวน วุตฺโตติ โยชนาฯ อุภยสฺสปีติ นิยโต นิยามํ โอกฺกมตีติ วจนทฺวยสฺสฯ

นิยตสฺสนิยามกถาวณฺณนา นิฏฺฐิตาฯ

8. อสาตราคกถาวณฺณนา

[674] เอวํ ปวตฺตมาโนติ ‘‘อโห วต เม ภเวยฺยา’’ติ เอวํ ปตฺถนากาเรน ปวตฺตมาโนฯ อญฺญถาติ นนฺทนาทิอากาเรนฯ

อสาตราคกถาวณฺณนา นิฏฺฐิตาฯ

9. ธมฺมตณฺหาอพฺยากตาติกถาวณฺณนา

[676-680] คเหตฺวาติ เอเตน คหณมตฺตเมว ตํ, น ปน สา ตาทิสี อตฺถีติ ทสฺเสติฯ น หิ โลกุตฺตรารมฺมณา อพฺยากตา วา ตณฺหา อตฺถีติฯ ตีหิ โกฏฺฐาเสหีติ กามภววิภวตณฺหาโกฏฺฐาเสหิฯ รูปตณฺหาทิเภทา ฉปิ ตณฺหาฯ

ธมฺมตณฺหาอพฺยากตาติกถาวณฺณนา นิฏฺฐิตาฯ

เตรสมวคฺควณฺณนา นิฏฺฐิตาฯ

14. จุทฺทสมวคฺโค

1. กุสลากุสลปฏิสนฺทหนกถาวณฺณนา

[686-690] อนนฺตรปจฺจยภาโวเยเวตฺถ ปฏิสนฺธานํ ฆฏนญฺจาติ อาห ‘‘อนนฺตรํ อุปฺปาเทตี’’ติฯ

กุสลากุสลปฏิสนฺทหนกถาวณฺณนา นิฏฺฐิตาฯ

2. สฬายตนุปฺปตฺติกถาวณฺณนา

[691-692] เกจิ วาทิโนติ กาปิเล สนฺธายาหฯ เต หิ อภิพฺยตฺตวาทิโน วิชฺชมานเมว การเณ ผลํ อนภิพฺยตฺตํ หุตฺวา ฐิตํ ปจฺฉา อภิพฺยตฺติํ คจฺฉตีติ วทนฺตา พีชาวตฺถาย วิชฺชมานาปิ รุกฺขาทีนํ น องฺกุราทโย อาวิภวนฺติ, พีชมตฺตํ อาวิภาวํ คจฺฉตีติ กเถนฺติฯ

สฬายตนุปฺปตฺติกถาวณฺณนา นิฏฺฐิตาฯ