ตสฺมิํ ตสฺมิํ ฐาเนติ ตํตํสิกฺขาโกฏฺฐาสปทฏฺฐาเนฯ อนุคฺคณฺหาติ นามาติ อภินฺนํ อสํกิลิฏฺฐํ กตฺวา อนุคฺคณฺหาติ นามฯ ขารปริสฺสาวเนติ รชกานํ อูสขาราทิขารปริสฺสาวนปเฏฯ หายตีติ สีลาทินา ปริหายติฯ เสฏฺฐํ ปุคฺคลนฺติ สีลาทิคุเณหิ เสฏฺฐํ อุตฺตริตรํ อุตฺตมํ ปุคฺคลํฯ

เสวิตพฺพสุตฺตวณฺณนา นิฏฺฐิตาฯ

7. ชิคุจฺฉิตพฺพสุตฺตวณฺณนา

[27] สตฺตเม อพฺภุคฺคจฺฉตีติ เอตฺถ อภิ-สทฺทาเปกฺขาย ‘‘น’’นฺติ สามิอตฺเถ อุปโยควจนนฺติ อาห ‘‘อสฺสา’’ติ ‘‘ตํ โข ปน ภวนฺต’’นฺติอาทีสุ วิยฯ ปาปโก กิตฺติสทฺโทติ ลามกภาเวน กเถตพฺพสทฺโทฯ คูถกูโป วิย ทุสฺสีลฺยนฺติ เอเตน ทุสฺสีลสฺส คูถสทิสตฺตเมว ทสฺเสติฯ วจนนฺติ อนิฏฺฐวจนํฯ ปุริมนเยเนวาติ ‘‘คูถกูโป วิย ทุสฺสีลฺย’’นฺติอาทินา ปุพฺเพ วุตฺตนเยนฯ สุจิมิตฺโตติ สีลาจารสุทฺธิยา สุจิมิตฺโตฯ สห อยนฺติ ปวตฺตนฺตีติ สหายาติ อาห ‘‘สหคามิโน’’ติฯ

ชิคุจฺฉิตพฺพสุตฺตวณฺณนา นิฏฺฐิตาฯ