เอเตน อปราปเรหิ ปทพฺยญฺชเนหิ สุจิรมฺปิ กาลํ กเถนฺตสฺส ตถาคตสฺส น กทาจิ เตสํ ปริยาทานํ อตฺถีติ ทสฺเสติฯ คุณธํสีติ คุณธํสนสีโลฯ ปคพฺโพติ วาจาปาคพฺพิเยน สมนฺนาคโตฯ

อุปกสุตฺตวณฺณนา นิฏฺฐิตาฯ

9. สจฺฉิกรณียสุตฺตวณฺณนา

[189] นวเม นามกาเยนาติ สหชาตนามกาเยนฯ เสสเมตฺถ อุตฺตานเมวฯ

สจฺฉิกรณียสุตฺตวณฺณนา นิฏฺฐิตาฯ

10. อุโปสถสุตฺตวณฺณนา

[190] ทสเม ตุณฺหีภูตํ ตุณฺหีภูตนฺติ อาเมฑิตวจนํ พฺยาปนิจฺฉาวเสน วุตฺตนฺติ อาห ‘‘ยโต ยโต อนุวิโลเกตี’’ติฯ อนุวิโลเกตฺวาติ เอตฺถ อนุ-สทฺโทปิ พฺยาปนิจฺฉาวจนเมวาติ อนุ อนุ วิโลเกตฺวาติ อตฺโถ, ปญฺจปสาทปฺปฏิมณฺฑิตานิ อกฺขีนิ อุมฺมีเลตฺวา ตโต ตโต วิโลเกตฺวาติ วุตฺตํ โหติฯ อลนฺติ ยุตฺตํ, โอปายิกนฺติ อตฺโถ ‘‘อลเมว นิพฺพินฺทิตุ’’นฺติอาทีสุ (ที. นิ. 2.272; สํ. นิ. 2.124-126) วิยฯ ปุฏพนฺธเนน ปริหริตฺวา อสิตพฺพํ ปุโฏสํ สมฺพลํ อ-การสฺส โอ-การํ กตฺวาฯ เตนาห ‘‘ปาเถยฺย’’นฺติฯ เสสเมตฺถ สุวิญฺเญยฺยเมวฯ

อุโปสถสุตฺตวณฺณนา นิฏฺฐิตาฯ

พฺราหฺมณวคฺควณฺณนา นิฏฺฐิตาฯ