7. ทุติยโอวาทสุตฺตวณฺณนา

[150] โอกปฺปนสทฺธาติ สทฺเธยฺยวตฺถุํ โอคาหิตฺวา ‘‘เอวเมต’’นฺติ กปฺปนสทฺธาฯ กุสลธมฺมชานนปญฺญาติ อนวชฺชธมฺมานํ สพฺพโส ชานนปญฺญาฯ ปริหานนฺติ สพฺพาหิ สมฺปตฺตีหิ ปริหานํฯ น หิ กลฺยาณมิตฺตรหิตสฺส กาจิ สมฺปตฺติ นาม อตฺถีติฯ

ทุติยโอวาทสุตฺตวณฺณนา นิฏฺฐิตาฯ

8. ตติยโอวาทสุตฺตวณฺณนา

[151] ปุพฺเพติ ปฐมโพธิยํฯ เอตรหีติ ตโต ปจฺฉิเม กาเลฯ การณปฏฺฐปเนติ การณารมฺเภฯ เตสุ วุตฺตคุณยุตฺเตสุ เถเรสุฯ ตสฺมินฺติ ตสฺมิํ ยถาวุตฺตคุณยุตฺเต ปุคฺคเลฯ เอวํ สกฺกาเร กยิรมาเนติ ‘‘ภทฺทโก วตายํ ภิกฺขู’’ติ อาทรชาเตหิ ภิกฺขูหิ สกฺกาเร กยิรมาเนฯ อิเม สพฺรหฺมจารีฯ ‘‘เอหิ ภิกฺขู’’ติ ตํ ภิกฺขุํ อตฺตโน มุขาภิมุขํ กโรนฺตา วทนฺติฯ ยญฺหิ ตนฺติ เอตฺถ ตนฺติ นิปาตมตฺตํ อุปทฺทโวติ วุจฺจติ อนตฺถชนนโตฯ ปตฺถยติ ภชติ พชฺฌตีติ ปตฺถนา, อภิสงฺโคติ อาห ‘‘อภิปตฺถนาติ อธิมตฺตปตฺถนา’’ติฯ

ตติยโอวาทสุตฺตวณฺณนา นิฏฺฐิตาฯ

9. ฌานาภิญฺญสุตฺตวณฺณนา

[152] ยาวเทวาติ อิมินา สมานตฺถํ ‘‘ยาวเท’’ติ อิทํ ปทนฺติ อาห ‘‘ยาวเท อากงฺขามีติ ยาวเทว อิจฺฉามี’’ติฯ ยทิจฺฉกํ ฌานสมาปตฺตีสุ วสีภาวทสฺสนตฺถํ ตเทตํ อารทฺธํฯ วิตฺถาริตเมว, ตสฺมา ตตฺถ วิตฺถาริตเมว คเหตพฺพนฺติ อธิปฺปาโยฯ อาสวานํ ขยาติ อาสวานํ ขยเหตุ อริยมคฺเคน สพฺพโส อาสวานํ เขปิตตฺตาฯ อปจฺจยภูตนฺติ อารมฺมณปจฺจยภาเวน อปจฺจยภูตํฯ

ฌานาภิญฺญสุตฺตวณฺณนา นิฏฺฐิตาฯ

10. อุปสฺสยสุตฺตวณฺณนา

[153] ลาภสกฺการเหตุปิ เอกจฺเจ ภิกฺขู ภิกฺขุนุปสฺสยํ คนฺตฺวา ภิกฺขุนิโย โอวทนฺติ, เอวเมวํ อยํ ปน เถโร น ลาภสกฺการเหตุ ภิกฺขุนุปสฺสยคมนํ ยาจติ, อถ กสฺมาติ อาห ‘‘กมฺมฏฺฐานตฺถิกา’’ติอาทิฯ เอโส หิ อานนฺทตฺเถโร อุสฺสุกฺกาเปตฺวา ปฏิปตฺติคุณํ ทสฺเสนฺโต ยสฺมา ตา ภิกฺขุนิโย จตุสจฺจกมฺมฏฺฐานิกา, ตสฺมา ปญฺจนฺนํ อุปาทานกฺขนฺธานํ อุทยพฺพยาทิปกาสนิยา ธมฺมกถาย วิปสฺสนาปฏิปตฺติสมฺปทํ ทสฺเสสิฯ อนิจฺจาทิลกฺขณานิ เจว อุทยพฺพยาทิเก จ สมฺมา ทสฺเสสิฯ หตฺเถน คเหตฺวา วิย ปจฺจกฺขโต ทสฺเสสิฯ สมาทเปสีติ ตตฺถ ลกฺขณารมฺมณิกวิปสฺสนํ สมาทเปสิฯ ยถา วีถิปฏิปนฺโน หุตฺวา ปวตฺตติ, เอวํ คณฺหาเปสิฯ สมุตฺเตเชสีติ วิปสฺสนาย อารทฺธาย สงฺขารานํ อุทยพฺพยาทีสุ อุปฏฺฐหนฺเตสุ ยถากาลํ ปคฺคหสมุเปกฺขเณหิ โพชฺฌงฺคานํ อนุปวตฺตเนน ภาวนามชฺฌิมวีถิํ ปาเปตฺวา ยถา วิปสฺสนาญาณํ สุปฺปสนฺนํ หุตฺวา วหติ, เอวํ อินฺทฺริยานํ วิสทภาวกรเณน วิปสฺสนาจิตฺตํ สมฺมา อุตฺเตเชสิ, นิพฺพานวเสน วา สมาทเปสิฯ สมฺปหํเสสีติ ตถา ปวตฺติยมานาย วิปสฺสนาย สมปฺปวตฺตภาวนาวเสน อุปริ ลทฺธพฺพภาวนาวเสน จิตฺตํ สมฺปหํเสสิ, ลทฺธสฺสาทวเสน สุฏฺฐุ โตเสสิฯ เอวเมตฺถ อตฺโถ เวทิตพฺโพฯ

มนุเต ปริญฺญาทิวเสน สจฺจานิ พุชฺฌตีติ มุนิฯ เตติ ตํฯ อุปโยคตฺเถ หิ อิทํ สามิวจนํฯ อุตฺตรีติ อุปริ, ตว ยถาภูตสภาวโต ปรโตติ อตฺโถฯ ปกฺขปติโต อคติคมนํ อติเรกโอกาโสฯ อุปปริกฺขีติ อนุวิจฺจ นิวารโก น พหุมโตฯ พุทฺธปฏิภาโค เถโรฯ ‘‘พาลา ภิกฺขุนี ทุพฺภาสิตํ อาหา’’ติ อวตฺวา ‘‘ขมถ, ภนฺเต’’ติ วทนฺเตน ปกฺขปาเตน วิย วุตฺตํ โหตีติ อาห ‘‘เอกา ภิกฺขุนี น วาริตา’’ติอาทิฯ

จุตา สลิงฺคโต นฏฺฐา, เทสนฺตรปกฺกเมน อทสฺสนํ น คตาฯ กณฺฏกสาขา วิยาติ กุรณฺฏกอปามคฺคกณฺฏกลสิกาหิ สาขา วิยฯ

อุปสฺสยสุตฺตวณฺณนา นิฏฺฐิตาฯ