1. สตฺถุสุตฺตาทิวณฺณนา

[73] อยํ สตฺถา นามาติ อยํ อริยมคฺคสฺส อตฺถาย สาสติ วิมุตฺติธมฺมํ อนุสาสตีติ สตฺถา นามฯ อธิสีลาทิวเสน ติวิธาปิ สิกฺขาฯ โยโคติ ภาวนานุโยโคฯ ฉนฺโทติ นิยฺยาเนตา กตฺตุกมฺยตากุสลจฺฉนฺโทฯ สพฺพํ ภาวนาย ปริสฺสยํ สหติ, สพฺพํ วาสฺส อุปการาวหํ สหติ วาเหตีติ สพฺพสหํฯ อปฺปฏิวานีติ น ปฏินิวตฺตตีติ อปฺปฏิวานีฯ อนฺตราย สหนํ โมหนาสนวีริยํ อาตปฺปติ กิเลเสติ อาตปฺปํฯ วิธินา อีเรตพฺพตฺตา ปวตฺเตตพฺพตฺตา วีริยํฯ สตตํ ปวตฺติยมานภาวนานุโยคกมฺมํ สาตจฺจนฺติ อาห ‘‘สตตกิริย’’นฺติฯ ตาทิสเมวาติ ยาทิสี สติ วุตฺตา, ตาทิสเมว ญาณํ, ชรามรณาทิวเสน จตุสจฺจปริคฺคาหกํ ญาณนฺติ อตฺโถฯ

อนฺตรเปยฺยาลวคฺควณฺณนา นิฏฺฐิตาฯ

สารตฺถปฺปกาสินิยา สํยุตฺตนิกาย-อฏฺฐกถาย

นิทานสํยุตฺตวณฺณนาย ลีนตฺถปฺปกาสนา สมตฺตาฯ