‘‘เสยฺยถาปิ, ภิกฺขเว, ขีรํ ขีเรน สํสนฺทติ สเมติ; เตลํ เตเลน สํสนฺทติ สเมติ; สปฺปิ สปฺปินา สํสนฺทติ สเมติ; มธุ มธุนา สํสนฺทติ สเมติ; ผาณิตํ ผาณิเตน สํสนฺทติ สเมติ; เอวเมว โข, ภิกฺขเว, ธาตุโสว สตฺตา สํสนฺทนฺติ สเมนฺติฯ กลฺยาณาธิมุตฺติกา กลฺยาณาธิมุตฺติเกหิ สทฺธิํ สํสนฺทนฺติ สเมนฺติฯ อตีตมฺปิ โข อทฺธานํ… อนาคตมฺปิ โข อทฺธานํ… เอตรหิปิ โข ปจฺจุปฺปนฺนํ อทฺธานํ ธาตุโสว สตฺตา สํสนฺทนฺติ สเมนฺติฯ กลฺยาณาธิมุตฺติกา กลฺยาณาธิมุตฺติเกหิ สทฺธิํ สํสนฺทนฺติ สเมนฺตี’’ติฯ

อิทมโวจ ภควาฯ อิทํ วตฺวาน สุคโต อถาปรํ เอตทโวจ สตฺถา –

‘‘สํสคฺคา วนโถ ชาโต, อสํสคฺเคน ฉิชฺชติ;

ปริตฺตํ ทารุมารุยฺห, ยถา สีเท มหณฺณเวฯ

‘‘เอวํ กุสีตมาคมฺม, สาธุชีวิปิ สีทติ;

ตสฺมา ตํ ปริวชฺเชยฺย, กุสีตํ หีนวีริยํฯ

‘‘ปวิวิตฺเตหิ อริเยหิ, ปหิตตฺเตหิ ฌายีหิ [ฌายิหิ (สี.), ฌายิภิ (สฺยา. กํ.)];

นิจฺจํ อารทฺธวีริเยหิ, ปณฺฑิเตหิ สหาวเส’’ติฯ

7. อสฺสทฺธสํสนฺทนสุตฺตํ

[101] สาวตฺถิยํ วิหรติ…เป.… ‘‘ธาตุโสว, ภิกฺขเว, สตฺตา สํสนฺทนฺติ สเมนฺติฯ อสฺสทฺธา อสฺสทฺเธหิ สทฺธิํ สํสนฺทนฺติ สเมนฺติ; อหิริกา อหิริเกหิ สทฺธิํ สํสนฺทนฺติ สเมนฺติ; อโนตฺตปฺปิโน อโนตฺตปฺปีหิ สทฺธิํ สํสนฺทนฺติ สเมนฺติ; อปฺปสฺสุตา อปฺปสฺสุเตหิ สทฺธิํ สํสนฺทนฺติ สเมนฺติ; กุสีตา กุสีเตหิ สทฺธิํ สํสนฺทนฺติ สเมนฺติ; มุฏฺฐสฺสติโน มุฏฺฐสฺสตีหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปญฺเญหิ สทฺธิํ สํสนฺทนฺติ สเมนฺติ’’ฯ

‘‘อตีตมฺปิ โข, ภิกฺขเว, อทฺธานํ ธาตุโสว สตฺตา สํสนฺทิํสุ สมิํสุฯ อสฺสทฺธา อสฺสทฺเธหิ สทฺธิํ สํสนฺทิํสุ สมิํสุ; อหิริกา อหิริเกหิ สทฺธิํ สํสนฺทิํสุ สมิํสุ; อโนตฺตปฺปิโน อโนตฺตปฺปีหิ สทฺธิํ สํสนฺทิํสุ สมิํสุ; อปฺปสฺสุตา อปฺปสฺสุเตหิ สทฺธิํ สํสนฺทิํสุ สมิํสุ; กุสีตา กุสีเตหิ สทฺธิํ สํสนฺทิํสุ สมิํสุ; มุฏฺฐสฺสติโน มุฏฺฐสฺสตีหิ สทฺธิํ สํสนฺทิํสุ สมิํสุ; ทุปฺปญฺญา ทุปฺปญฺเญหิ สทฺธิํ สํสนฺทิํสุ สมิํสุฯ

‘‘อนาคตมฺปิ โข, ภิกฺขเว, อทฺธานํ ธาตุโสว สตฺตา สํสนฺทิสฺสนฺติ สเมสฺสนฺติฯ อสฺสทฺธา อสฺสทฺเธหิ สทฺธิํ สํสนฺทิสฺสนฺติ สเมสฺสนฺติ; อหิริกา อหิริเกหิ สทฺธิํ สํสนฺทิสฺสนฺติ สเมสฺสนฺติ; อโนตฺตปฺปิโน อโนตฺตปฺปีหิ สทฺธิํ…เป.… อปฺปสฺสุตา อปฺปสฺสุเตหิ สทฺธิํ…เป.… กุสีตา กุสีเตหิ สทฺธิํ…เป.… มุฏฺฐสฺสติโน มุฏฺฐสฺสตีหิ สทฺธิํ…เป.… ทุปฺปญฺญา ทุปฺปญฺเญหิ สทฺธิํ สํสนฺทิสฺสนฺติ สเมสฺสนฺติฯ

‘‘เอตรหิปิ โข, ภิกฺขเว, ปจฺจุปฺปนฺนํ อทฺธานํ ธาตุโสว สตฺตา สํสนฺทนฺติ สเมนฺติฯ อสฺสทฺธา อสฺสทฺเธหิ สทฺธิํ สํสนฺทนฺติ สเมนฺติ; อหิริกา อหิริเกหิ สทฺธิํ…เป.… อโนตฺตปฺปิโน อโนตฺตปฺปีหิ สทฺธิํ…เป.… อปฺปสฺสุตา อปฺปสฺสุเตหิ สทฺธิํ…เป.… กุสีตา กุสีเตหิ สทฺธิํ…เป.… มุฏฺฐสฺสติโน มุฏฺฐสฺสตีหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปญฺเญหิ สทฺธิํ สํสนฺทนฺติ สเมนฺติฯ

‘‘ธาตุโสว, ภิกฺขเว, สตฺตา สํสนฺทนฺติ สเมนฺติฯ สทฺธา สทฺเธหิ สทฺธิํ สํสนฺทนฺติ สเมนฺติ; หิริมนา หิริมเนหิ สทฺธิํ สํสนฺทนฺติ สเมนฺติ; โอตฺตปฺปิโน โอตฺตปฺปีหิ สทฺธิํ สํสนฺทนฺติ สเมนฺติ; พหุสฺสุตา พหุสฺสุเตหิ สทฺธิํ สํสนฺทนฺติ สเมนฺติ; อารทฺธวีริยา อารทฺธวีริเยหิ สทฺธิํ สํสนฺทนฺติ สเมนฺติ; อุปฏฺฐิตสฺสติโน อุปฏฺฐิตสฺสตีหิ สทฺธิํ สํสนฺทนฺติ สเมนฺติ; ปญฺญวนฺโต ปญฺญวนฺเตหิ สทฺธิํ สํสนฺทนฺติ สเมนฺติฯ อตีตมฺปิ โข, ภิกฺขเว, อทฺธานํ…เป.… อนาคตมฺปิ โข, ภิกฺขเว…เป.… เอตรหิปิ โข, ภิกฺขเว, ปจฺจุปฺปนฺนํ อทฺธานํ ธาตุโสว สตฺตา สํสนฺทนฺติ สเมนฺติฯ สทฺธา สทฺเธหิ สทฺธิํ สํสนฺทนฺติ สเมนฺติ; ปญฺญวนฺโต ปญฺญวนฺเตหิ สทฺธิํ สํสนฺทนฺติ สเมนฺตี’’ติฯ สตฺตมํฯ

8. อสฺสทฺธมูลกสุตฺตํ

[102] สาวตฺถิยํ วิหรติ…เป.… ‘‘ธาตุโสว, ภิกฺขเว, สตฺตา สํสนฺทนฺติ สเมนฺติฯ อสฺสทฺธา อสฺสทฺเธหิ สทฺธิํ สํสนฺทนฺติ สเมนฺติ; อหิริกา อหิริเกหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปญฺเญหิ สทฺธิํ สํสนฺทนฺติ สเมนฺติ; สทฺธา สทฺเธหิ สทฺธิํ สํสนฺทนฺติ สเมนฺติ; หิริมนา หิริมเนหิ สทฺธิํ สํสนฺทนฺติ สเมนฺติ; ปญฺญวนฺโต ปญฺญวนฺเตหิ สทฺธิํ สํสนฺทนฺติ สเมนฺติฯ อตีตมฺปิ โข, ภิกฺขเว, อทฺธานํ ธาตุโสว สตฺตา สํสนฺทิํสุ สมิํสุ…เป.… อนาคตมฺปิ โข, ภิกฺขเว, อทฺธานํ ธาตุโสว สตฺตา สํสนฺทิสฺสนฺติ สเมสฺสนฺติ…เป.…ฯ