กสฺมา พาลสฺส อพฺยตฺตสฺส อาปตฺติพหุลสฺส ตชฺชนียกมฺมํ กาตพฺพนฺติ โยชนาฯ อิทมฺปีติ ตชฺชนียกมฺมมฺปิฯ สพฺพตฺถาติ สพฺเพสุ กมฺเมสุฯ

นปฺปฏิปฺปสฺสมฺเภตพฺพอฏฺฐารสกาทิกถา

[8] ปนฺนโลมาติ ปติตมานโลมาฯ เอตนฺติ วตฺตํฯ เนตฺถารนฺติ เอตฺถ อผุฏฺฐกฺขรสํโยเค ปรสฺส ตการสฺส ถกาโร โหติ, ตสฺมา ทุติยกฺขเรน ปาโฐ ยุตฺโตฯ เยนาติ วตฺเตนฯ นิสฺสารณาติ นิสฺสารณโตฯ ทส วา ทิวสานิ, ปญฺจ วา ทิวสานิ ปูเรตพฺพนฺติ โยชนาฯ หีติ สจฺจํฯ เอตฺตเกนาติ เอตปฺปมาเณน ทสปญฺจทิวเสนฯ

2. นิยสฺสกมฺมกถา

[11] อปิสฺสุ ภิกฺขู ปกตาติ เอตฺถ นิปาตานมเนกตฺถตฺตา อิธ อปิสฺสุสทฺโท นิจฺจตฺโถ โหติฯ ปกตสทฺโท ‘‘กุกฺกุจฺจปกตา’’ติอาทีสุ (ปารา. อฏฺฐ. 1.ตติยสงฺคีติกถา; ปาจิ. อฏฺฐ. 438) อภิภวนตฺโถ, อิธ ปน พฺยาวฏตฺโถติ ทสฺเสนฺโต อาห ‘‘นิจฺจํ พฺยาวฏา โหนฺตี’’ติฯ