เมนู

222. สงฺฆิกจีวรุปฺปาทกถา

[363] อญฺญตฺถาติ ทินฺนฏฺฐานโต อญฺญตฺถฯ หฏานิปิ จีวรานิ ตุยฺเหว สนฺตกานีติ โยชนาฯ เตสนฺติ จีวรานํฯ อญฺโญติ เอกกวสฺสาวาสิกโต อญฺโญฯ ปญฺจมาเส ตํ สพฺพํ ตสฺเสว ภิกฺขุโน โหตีติ สมฺพนฺโธฯ นฺติ จีวรํ, ตํ สพฺพํ จีวรนฺติ สมฺพนฺโธฯ ยมฺปีติ จีวรมฺปิฯ โสติ ภิกฺขุ, คณฺหาตีติ สมฺพนฺโธฯ วสฺสาวาสตฺถายาติ วสฺสํ อาวาสสฺส ภิกฺขุโน อตฺถายฯ ฐปิตอุปนิกฺเขปโตติ เวยฺยาวจฺจกเรหิ วฑฺฒิํ ปโยเชตฺวา ฐปิตอุปนิกฺเขปโตฯ ตตฺรุปฺปาทโตติ ตสฺมิํ วิหาเร อุปฺปาทโต นาฬิเกรอารามาทิโตฯ อิทนฺติ วกฺขมานํฯ เอตฺถาติ ‘‘ตสฺเสว ตานิ จีวรานิ ยาว กถินสฺส อุพฺภารายา’’ติ วจเนฯ นฺติ จีวรํฯ ปน สทฺโท วิเสสตฺถโชตโกฯ อิทนฺติ ปทาลงฺการมตฺตํฯ อิธาติ อิมสฺมิํ วิหาเรฯ อภิลาปมตฺตนฺติปิ วทนฺติฯ อนตฺถตกถินสฺสาปีติ ปิสทฺโท ปเคว อตฺถตกถินสฺสาติ ทสฺเสติ ปญฺจมาเสติ อจฺจนฺตสํโยคตฺเถ อุปโยควจนํฯ ตโตติ ปญฺจมาสโตฯ อตีตวสฺเส วสฺสํวุตฺถสงฺฆสฺส อิทํ วสฺสาวาสิกํ เทติ กิํ? อุทาหุ อนาคตวสฺเสติ โยชนาฯ ปิฏฺฐิสมเยติ คิมฺหานํ ปฐมทิวสโต ปฏฺฐาย ยาว อสฺสยุชปุณฺณมี, ตาว ปิฏฺฐิสมเยฯ

วสฺสานโตติ วสฺสานมาสโตฯ เอตฺถาติ เอเตสุ จีวเรสุฯ เกจิ ภิกฺขูติ สมฺพนฺโธฯ ตมตฺถนฺติ ตสฺส สงฺฆิกจีวรสฺส การณํฯ ตตฺเถวาติ คตฏฺฐาเน เอวฯ เอสาติ สงฺฆิกจีวรหารโก ภิกฺขุฯ ตตฺราติ วิหาราทีสุฯ นฺติ จีวรหารกํ ภิกฺขุํฯ

วตฺตํ วิตฺถาเรตฺวา ทสฺเสนฺโต อาห ‘‘เตน หี’’ติอาทิฯ เตน ภิกฺขุนา ภาเชตพฺพานีติ สมฺพนฺโธฯ ตสฺเสวาติ อธิฏฺฐหนฺตสฺเสวฯ

เอเกกํ ภาคนฺติ สมฺพนฺโธฯ เอตฺถ ฐาเน อหเมว อสฺมีติ โยชนาฯ ทุคฺคหิตานิ โหนฺตีติ สงฺฆิกาเนว โหนฺตีติ อธิปฺปาโยฯ มยฺหเมวิมานิ จีวรานีติ อิสฺสรวเสน คหเณ ทุคฺคหิตานิฯ มยฺเหตานิ ปาปุณนฺตีติ อนิสฺสรวเสน คหเณ สุคฺคหิตานีติ วิเสโสฯ

ปาติเต กุเสติ เอตฺถ ตปจฺจยสฺส ปจฺจุปฺปนฺนกาลิกภาวํ ทสฺเสนฺโต อาห ‘‘เอกโกฏฺฐาเส’’ติอาทิฯ