221. ปจฺฉิมวิกปฺปนุปคจีวราทิกถา

[359] กตปํสุกูโลติ กโต ปํสุกูโลฯ อิมินา ‘‘ปํสุกูลโต’’ติ ปทสฺส วิเสสนปรปทตฺตํ ทสฺเสติฯ อคฺคฬาโรปเนนาติ อคฺคฬสฺส อาโรปเนนฯ ‘‘สุตฺเตเนวา’’ติ เอตฺถ เอวสทฺเทน ปิโลติกํ นิวตฺเตติฯ อญฺฉิตฺวา อญฺฉิตฺวาติ อากฑฺฒิตฺวา อากฑฺฒิตฺวาฯ อภิธาตุ หิ อากฑฺฒนตฺโถฯ ‘‘สงฺฆาฏิโกโณ ทีโฆ’’ติ อิมินา วิกณฺโณติ เอตฺถ วิสโม กณฺโณ วิกณฺโณติ กตฺวา กณฺณสทฺทสฺส โกณตฺถํ ทสฺเสติฯ ตโตติ คฬนโตฯ ลุชฺชนฺตีติ วลิํ คณฺหนฺติฯ อฏฺฐปทกนฺติ ปทสฺส อฏฺฐปเทน สิพฺพิตํ อฏฺฐปทกนฺติ วจนตฺถํ ทสฺเสนฺโต อาห ‘‘อฏฺฐปทกจฺฉินฺเนน ปตฺตมุขํ สิพฺพิตุ’’นฺติฯ ตตฺถ อฏฺฐปทกจฺฉินฺเนน ปตฺตมุขํ สิพฺพิตุนฺติ อฏฺฐปทลิขเนน ตตฺถ ตตฺถ คพฺภํ ทสฺเสตฺวา ปตฺตมุขํ สิพฺพิตุํฯ ‘‘อฏฺฐปทกจฺฉนฺเนนา’’ติปิ ปาโฐ, อฏฺฐผลกากาเรนาติ อตฺโถฯ

[360] ‘‘อาคนฺตุกปตฺตมฺปิ ทาตุ’’นฺติ อิมินา อนฺวาทิกนฺติ ปทสฺส อนุปจฺฉา อาคนฺตุกภาเวน ทียตีติ อนฺวาทิกนฺติ วจนตฺถํ ทสฺเสติฯ จตุตฺถกฺขเรนปิ ปาโฐ, อนุปจฺฉา อาคนฺตุกภาเวน ธียติ ฐปียตีติ อนฺวาธิกนฺติ กาตพฺโพฯ อิทํ ปนาติ อนฺวาธิกํ ปนฯ

[361] เสสญาตีนนฺติ มาตาปิตูหิ เสสญาตีนํฯ วินิปาเตติเยวาติ วินสฺสนฺโต นิปาเตติเยวฯ

[362] ‘‘วสฺสิโก’’ติ สงฺเกตียติ คณฺหียตีติ วสฺสิกสงฺเกตนฺติ วุตฺเต จตฺตาโร มาสาติ อาห ‘‘จตฺตาโร มาเส’’ติฯ หีติ สจฺจํ, ยสฺมา วาฯ อารญฺญกสฺส ภิกฺขุโนติ สมฺพนฺโธฯ เตนาติ อารญฺญเกน ภิกฺขุนาฯ

222. สงฺฆิกจีวรุปฺปาทกถา

[363] อญฺญตฺถาติ ทินฺนฏฺฐานโต อญฺญตฺถฯ หฏานิปิ จีวรานิ ตุยฺเหว สนฺตกานีติ โยชนาฯ เตสนฺติ จีวรานํฯ อญฺโญติ เอกกวสฺสาวาสิกโต อญฺโญฯ ปญฺจมาเส ตํ สพฺพํ ตสฺเสว ภิกฺขุโน โหตีติ สมฺพนฺโธฯ ยนฺติ จีวรํ, ตํ สพฺพํ จีวรนฺติ สมฺพนฺโธฯ ยมฺปีติ จีวรมฺปิฯ โสติ ภิกฺขุ, คณฺหาตีติ สมฺพนฺโธฯ วสฺสาวาสตฺถายาติ วสฺสํ อาวาสสฺส ภิกฺขุโน อตฺถายฯ ฐปิตอุปนิกฺเขปโตติ เวยฺยาวจฺจกเรหิ วฑฺฒิํ ปโยเชตฺวา ฐปิตอุปนิกฺเขปโตฯ ตตฺรุปฺปาทโตติ ตสฺมิํ วิหาเร อุปฺปาทโต นาฬิเกรอารามาทิโตฯ อิทนฺติ วกฺขมานํฯ เอตฺถาติ ‘‘ตสฺเสว ตานิ จีวรานิ ยาว กถินสฺส อุพฺภารายา’’ติ วจเนฯ ยนฺติ จีวรํฯ ปน สทฺโท วิเสสตฺถโชตโกฯ อิทนฺติ ปทาลงฺการมตฺตํฯ อิธาติ อิมสฺมิํ วิหาเรฯ อภิลาปมตฺตนฺติปิ วทนฺติฯ อนตฺถตกถินสฺสาปีติ ปิสทฺโท ปเคว อตฺถตกถินสฺสาติ ทสฺเสติ ฯ ปญฺจมาเสติ อจฺจนฺตสํโยคตฺเถ อุปโยควจนํฯ ตโตติ ปญฺจมาสโตฯ อตีตวสฺเส วสฺสํวุตฺถสงฺฆสฺส อิทํ วสฺสาวาสิกํ เทติ กิํ? อุทาหุ อนาคตวสฺเสติ โยชนาฯ ปิฏฺฐิสมเยติ คิมฺหานํ ปฐมทิวสโต ปฏฺฐาย ยาว อสฺสยุชปุณฺณมี, ตาว ปิฏฺฐิสมเยฯ

วสฺสานโตติ วสฺสานมาสโตฯ เอตฺถาติ เอเตสุ จีวเรสุฯ เกจิ ภิกฺขูติ สมฺพนฺโธฯ ตมตฺถนฺติ ตสฺส สงฺฆิกจีวรสฺส การณํฯ ตตฺเถวาติ คตฏฺฐาเน เอวฯ เอสาติ สงฺฆิกจีวรหารโก ภิกฺขุฯ ตตฺราติ วิหาราทีสุฯ นนฺติ จีวรหารกํ ภิกฺขุํฯ

วตฺตํ วิตฺถาเรตฺวา ทสฺเสนฺโต อาห ‘‘เตน หี’’ติอาทิฯ เตน ภิกฺขุนา ภาเชตพฺพานีติ สมฺพนฺโธฯ ตสฺเสวาติ อธิฏฺฐหนฺตสฺเสวฯ

เอเกกํ ภาคนฺติ สมฺพนฺโธฯ เอตฺถ ฐาเน อหเมว อสฺมีติ โยชนาฯ ทุคฺคหิตานิ โหนฺตีติ สงฺฆิกาเนว โหนฺตีติ อธิปฺปาโยฯ มยฺหเมวิมานิ จีวรานีติ อิสฺสรวเสน คหเณ ทุคฺคหิตานิฯ มยฺเหตานิ ปาปุณนฺตีติ อนิสฺสรวเสน คหเณ สุคฺคหิตานีติ วิเสโสฯ

ปาติเต กุเสติ เอตฺถ ตปจฺจยสฺส ปจฺจุปฺปนฺนกาลิกภาวํ ทสฺเสนฺโต อาห ‘‘เอกโกฏฺฐาเส’’ติอาทิฯ