[130] ตสฺสาติ อุกฺเขปนียกมฺมารหสฺส ภิกฺขุโนฯ สามคฺคีติ สงฺฆสามคฺคีฯ เตนาติ อุกฺเขปนียกมฺมารเหน ภิกฺขุนาฯ สมฺโภเคติ อามิเสน จ ธมฺเมน จ สมฺโภคเหตุฯ เอตฺถ สหเสยฺยาปิ สงฺคหิตา อาปตฺติภาวโตฯ อนาปตฺตีติ อนุกฺขิตฺตกภาวโต ปาจิตฺติยาปตฺติยา อนาปตฺติ, อลชฺชิลกฺขณาภาวโต ทุกฺกเฏน อนาปตฺตีติ ทฏฺฐพฺพํฯ

อิติ สมนฺตปาสาทิกาย วินยสํวณฺณนาย

ทฺวาสตฺตติอธิกวตฺถุสตปฏิมณฺฑิตสฺส มหาขนฺธกสฺส

อตฺถวณฺณนาย โยชนา สมตฺตาฯ

2. อุโปสถกฺขนฺธกํ

68. สนฺนิปาตานุชานนาทิกถา

[132] อุโปสถกฺขนฺธเก ตรนฺติ โอตรนฺติ เอตฺถาติ ติตฺถํ, อุทกติตฺถํ, ติตฺถํ วิยาติ ติตฺถํ, ลทฺธีติ อาห ‘‘ติตฺถํ วุจฺจติ ลทฺธี’’ติฯ ลทฺธิ หิ พหูนํ ลทฺธิกานํ โอตรณฏฺฐานตฺตา ติตฺถํ นามฯ อญฺญนฺติ สาสนิกลทฺธิโต อญฺญํฯ เอเตสนฺติ ปริพฺพาชกานํฯ อิโตติ อิมสฺมา สาสนิกลทฺธิโตฯ ยนฺติ ยํ ธมฺมชาตํฯ เตสนฺติ อญฺญติตฺถิยานํ ปริพฺพาชกานํฯ เต ลภนฺตีติ เอตฺถ ตสทฺโท มนุสฺสวิสโยติ อาห ‘‘เต มนุสฺสา’’ติฯ มูคสูกราติ เอตฺถ ถูลสรีรสฺส สูกรสฺส สทฺทมตฺตสฺสาปิ อภาวโต มูคสูกโร นามาติ อาห ‘‘ถูลสรีรสูกรา’’ติฯ

[135] อสฺสาติ ภิกฺขุโนฯ โสติ สมฺปชานมุสาวาโทฯ กินฺติ กิํ อาปตฺติฯ ทุกฺกฏนฺติ ปทสฺส ทุกฺกฏํ กมฺมนฺติ อาสงฺกา ภเวยฺยาติ อาห ‘‘ทุกฺกฏาปตฺตี’’ติฯ สา จ โข ทุกฺกฏาปตฺติ มุสาวาทลกฺขเณน น โหตีติ โยชนาฯ เกน โหตีติ อาห ‘‘ภควโต ปน วจเนนา’’ติฯ