5. ปญฺจมสิกฺขาปทํ
[1199] ปญฺจเม คนฺเธน จาติ คนฺเธติ อตฺตโน วตฺถุํ สูเจติ ปกาเสตีติ คนฺโธฯ วณฺณเกน จาติ วิเลปเนน จฯ ตญฺหิ วณฺณยติ ฉวิโสภํ ปกาเสตีติ วณฺณกนฺติ วุจฺจติฯ จสทฺเทน สมาหารทฺวนฺทวากฺยํ ทีเปตีติฯ ปญฺจมํฯ
6. ฉฏฺฐสิกฺขาปทํ
[1202] ฉฏฺเฐ อนุตฺตานวจนํ นตฺถีติฯ ฉฏฺฐํฯ
7. สตฺตมสิกฺขาปทํ
[1208] สตฺตเม อุมฺมทฺทเนติ อุปฺปีฬิตฺวา มทฺทเนฯ สํพาหเนปีติ ปุนปฺปุนํ พาหเนปีติฯ สตฺตมํฯ
8-10. อฏฺฐมาทิสิกฺขาปทํ
[1210] อฏฺฐมาทีสุ ตีสุ อนุตฺตานวจนํ นตฺถีติฯ อฏฺฐมนวมทสมานิฯ
11. เอกาทสมสิกฺขาปทํ
[1214] เอกาทสเม อภิมุขเมวาติ อภิมุเข เอวฯ มุขสฺส หิ อภิ อภิมุขนฺติ วจนตฺโถ กาตพฺโพ, สตฺตมิยา อํกาโรฯ อิมินา ปุรโตติ เอตฺถ โตปจฺจโย ภุมฺมตฺเถ โหตีติ ทสฺเสติฯ อุปจารนฺติ ทฺวาทสหตฺถูปจารนฺติฯ เอกาทสมํฯ
12. ทฺวาทสมสิกฺขาปทํ
[1219] ทฺวาทสเม ‘‘อโนกาสกต’’นฺติปทสฺส อยุตฺตสมาสภาวญฺจ วิเสสนปรปทพาหิรสมาสภาวญฺจ ทสฺเสตุํ วุตฺตํ ‘‘อกตโอกาส’’นฺติฯ โอกาโส น กโต เยนาติ อโนกาสกโต, ภิกฺขุ, ตํฯ ‘‘อนิยเมตฺวา’’ติ อิมินา ‘‘อโนทิสฺสา’’ติ ปทสฺส ตฺวาปจฺจยนฺตภาวํ ทสฺเสตีติฯ ทฺวาทสมํฯ
13. เตรสมสิกฺขาปทํ
[1226] เตรสเม อุปจาเรปีติ อปริกฺขิตฺตสฺส คามสฺส ปริกฺเขปารหฏฺฐานสงฺขาเต อุปจาเรปิฯ
[1227] ‘‘อจฺฉินฺนจีวริกายา’’ติ สามญฺญโต วุตฺเตปิ วิเสโสเยวาธิปฺเปโตติ อาห ‘‘สงฺกจฺจิกจีวรเมวา’’ติฯ สมนฺตโต ปุริสานํ ทสฺสนํ กนฺตียติ ฉินฺทียติ เอตฺถาติ สงฺกจฺจิ, อธกฺขกอุพฺภนาภิฏฺฐานํ, สงฺกจฺเจ นิวสิตพฺพนฺติ สํกจฺจิกํ, ตเมว จีวรนฺติ สงฺกจฺจิกจีวรนฺติฯ เตรสมํฯ
ฉตฺตุปาหนวคฺโค นวโมฯ
สพฺพาเนว สิกฺขาปทานีติ สมฺพนฺโธฯ ตโตติ เตหิ อฏฺฐาสีติสตสิกฺขาปเทหิ, อปเนตฺวาติ สมฺพนฺโธฯ
ตตฺราติ เตสุ ขุทฺทเกสุฯ เอตฺถาติ ทสสุ สิกฺขาปเทสูติฯ
ภิกฺขุนิวิภงฺเค ขุทฺทกวณฺณนาย
โยชนา สมตฺตาฯ
5. ปาฏิเทสนียสิกฺขาปท-อตฺถโยชนา
ขุทฺทกานํ อนนฺตรา ปาฏิเทสนียา นาม อฏฺฐ เย ธมฺมา สงฺเขเปเนว สงฺคหํ อารูฬฺหา สงฺคีติกาเรหิ, เตสํ อฏฺฐนฺนํ ปาฏิเทสนียนามกานํ ธมฺมานํ สงฺเขเปเนว เอสา วณฺณนา ปวตฺตเตติ โยชนาฯ
[1228] ยานิ สพฺพิเตลาทีนีติ สมฺพนฺโธฯ หีติ วิตฺถาโรฯ เอตฺถาติ อฏฺฐสุ ปาฏิเทสนีเยสุฯ ปาฬิวินิมุตฺตเกสูติ ปาฬิโต วินิมุตฺตเกสุฯ สพฺเพสูติ อขิเลสุ สพฺพิเตลาทีสูติฯ
ภิกฺขุนิวิภงฺเค ปาฏิเทสนียวณฺณนาย โยชนา สมตฺตาฯ
ปนาติ ปกฺขนฺตรโชตโกฯ เย ธมฺมา อุทฺทิฏฺฐาติ สมฺพนฺโธฯ เตสนฺติ ปาฏิเทสนียานํฯ ปุน เตสนฺติ เสขิยอธิกรณสมถธมฺมานํฯ
