เมนู

3-5. สงฺฆาณิอาทิสิกฺขาปทวณฺณนา

สงฺฆาณินฺติ กฏิยํ อนุภวิตพฺพํ อาภรณํฯ เตนาห ‘‘ยํ กิญฺจิ กฏูปค’’นฺติฯ

จตุตฺถปญฺจมานิ อุตฺตานตฺถาเนวฯ

สงฺฆาณิอาทิสิกฺขาปทวณฺณนา นิฏฺฐิตาฯ

6. วาสิตกสิกฺขาปทวณฺณนา

คนฺธวาสิตเกนาติ คนฺธปริภาวิเตนฯ

วาสิตกสิกฺขาปทวณฺณนา นิฏฺฐิตาฯ

7-10. ภิกฺขุนิอุมฺมทฺทาปนาทิสิกฺขาปทวณฺณนา

คิลานายาติ (ปาจิ. อฏฺฐ. 1208) อนฺตมโส มคฺคคมนปริสฺสเมนาปิ อาพาธิกายฯ อาปทาสูติ โจรภยาทินา สรีรกมฺปนาทีสุฯ

อฏฺฐมนวมทสเมสุ กิญฺจิ วตฺตพฺพํ นตฺถิฯ

ภิกฺขุนิอุมฺมทฺทาปนาทิสิกฺขาปทวณฺณนา นิฏฺฐิตาฯ

11. อนาปุจฺฉาสิกฺขาปทวณฺณนา

อุปจารํ สนฺธายาติ สมนฺตา ทฺวาทสหตฺถูปจารํ สนฺธายฯ

อนาปุจฺฉาสิกฺขาปทวณฺณนา นิฏฺฐิตาฯ

12. ปญฺหาปุจฺฉนสิกฺขาปทวณฺณนา

อโนทิสฺสาติ ‘‘อมุกสฺมิํ นาม ฐาเน ปุจฺฉามี’’ติ เอวํ อนิยเมตฺวา เกวลํ ‘‘ปุจฺฉิตพฺพํ อตฺถิ, ปุจฺฉามิ, อยฺยา’’ติ เอวํ วตฺวาฯ

ปญฺหาปุจฺฉนสิกฺขาปทวณฺณนา นิฏฺฐิตาฯ

13. อสํกจฺจิกสิกฺขาปทวณฺณนา

ปริกฺขิตฺตสฺส คามสฺส ปริกฺเขปํ, อปริกฺขิตฺตสฺส อุปจารํ อติกฺกมนฺติยา วา โอกฺกมนฺติยา วาติ เอตฺถ ปริกฺขิตฺตสฺส คามสฺส ปริกฺเขปํ อติกฺกมนฺติยา วา อปริกฺขิตฺตสฺส คามสฺส อุปจารํ โอกฺกมนฺติยา วาติ ยถากฺกมํ สมฺพนฺโธ เวทิตพฺโพฯ อาปทาสูติ มหคฺฆํ สํกจฺจิกํ ปารุปิตฺวา คจฺฉนฺติยา อุปทฺทโว อุปฺปชฺชติ, เอวรูปาสุ อาปทาสุฯ

อสํกจฺจิกสิกฺขาปทวณฺณนา นิฏฺฐิตาฯ

ฉตฺตุปาหนวคฺโค นวโมฯ

อิติ กงฺขาวิตรณิยา ปาติโมกฺขวณฺณนาย

วินยตฺถมญฺชูสายํ ลีนตฺถปฺปกาสนิยํ

ภิกฺขุนิปาติโมกฺเข ปาจิตฺติยวณฺณนา นิฏฺฐิตาฯ

อสาธารณสมุฏฺฐานวณฺณนา

อจิตฺตกานีติ (สารตฺถ. ฏี. ปาจิตฺติย 3.1214) ‘‘นจฺจ’’นฺติอาทินา อชานิตฺวา ทสฺสนาทิํ กโรนฺติยา อาปตฺติสมฺภวโต วตฺถุอชานนจิตฺเตน อจิตฺตกานิฯ โลกวชฺชานีติ ‘‘นจฺจ’’นฺติอาทินา ชานิตฺวา ทสฺสนาทิํ กโรนฺติยา อกุสเลเนว อาปชฺชนโต โลกวชฺชานิฯ เตนาห ‘‘อยํ ปเนตฺถ อธิปฺปาโย’’ติอาทิ สจิตฺตกานีติ ‘‘โจรี’’ติอาทินา วตฺถุํ ชานิตฺวา กรเณเยว อาปตฺติสมฺภวโต สจิตฺตกานิฯ อุปสมฺปทาทีนํ เอกนฺตากุสลจิตฺเตเนว อกตฺตพฺพตฺตา ปณฺณตฺติวชฺชานิฯ ‘‘อิธ สจิตฺตกาจิตฺตกตา ปณฺณตฺติชานนาชานนตาย อคฺคเหฏฺฐา วตฺถุชานนาชานนตาย คเหตพฺพ’’นฺติ วทนฺติฯ

อสาธารณสมุฏฺฐานวณฺณนา นิฏฺฐิตาฯ