สงฺฆภตฺตาทิอนุชานนกถาวณฺณนา

[325] อุทฺเทสภตฺตํ นิมนฺตนนฺติ อิมํ โวหารํ ปตฺตานีติ เอตฺถ อิติ-สทฺโท อาทิอตฺโถ, อุทฺเทสภตฺตํ นิมนฺตนนฺติอาทิโวหารํ ปตฺตานีติ อตฺโถฯ ตมฺปีติ สงฺฆภตฺตมฺปิฯ

สงฺฆภตฺตาทิอนุชานนกถาวณฺณนา นิฏฺฐิตาฯ

อุทฺเทสภตฺตกถาวณฺณนา

โภชนสาลายาติ ภตฺตุทฺเทสฏฺฐานํ สนฺธาย วุตฺตํฯ เอกวฬญฺชนฺติ เอกทฺวาเรน วฬญฺชิตพฺพํฯ นานานิเวสเนสูติ นานากุลสฺส นานูปจาเรสุ นิเวสเนสุฯ

นิสินฺนสฺสปิ นิทฺทายนฺตสฺสปีติ อนาทเร สามิวจนํ, วุฑฺฒตเร นิทฺทายนฺเต นวกสฺส คาหิตํ สุคฺคหิตนฺติ อตฺโถฯ

วิสฺสฏฺฐทูโตติ ยถารุจิ วตฺตุํ ลภนโต นิราสงฺกทูโตฯ ปุจฺฉาสภาเคนาติ ปุจฺฉาวจนปฏิภาเคนฯ ‘‘เอกา กูฏฏฺฐิติกา นามา’’ติ วุตฺตเมวตฺถํ วิภาเวตุํ ‘‘รญฺโญ วา หี’’ติอาทิ วุตฺตํฯ

สพฺพํ ปตฺตสฺสามิกสฺส โหตีติ จีวราทิกมฺปิ สพฺพํ ปตฺตสฺสามิกสฺเสว โหติ, มยา ภตฺตเมว สนฺธาย วุตฺตํ, น จีวราทินฺติ วตฺวา คเหตุํ น วฏฺฏตีติ อตฺโถฯ

อกตภาโคนามาติ อาคนฺตุกภาโค นาม, อทินฺนปุพฺพภาโคติ อตฺโถฯ

กิํ อาหรียตีติ อวตฺวาติ ‘‘กตรภตฺตํ วา ตยา อาหรียตี’’ติ ทายกํ อปุจฺฉิตฺวาฯ ปกติฏฺฐิติกายาติ อุทฺเทสภตฺตฏฺฐิติกายฯ

อุทฺเทสภตฺตกถาวณฺณนา นิฏฺฐิตาฯ

นิมนฺตนภตฺตกถาวณฺณนา

วิจฺฉินฺทิตฺวาติ ‘‘ภตฺตํ คณฺหถา’’ติ ปทํ อวตฺวาฯ เตเนวาห ‘‘ภตฺตนฺติ อวทนฺเตนา’’ติฯ

อาโลปสงฺเขเปนาติ เอเกกปิณฺฑวเสน, เอวญฺจ ภาชนํ อุทฺเทสภตฺเต น วฏฺฏติฯ ตตฺถ หิ เอกสฺส ปโหนกปฺปมาเณเนว ภาเชตพฺพํฯ

อารุฬฺหาเยว มาติกํ, สงฺฆโต อฏฺฐ ภิกฺขูติ เอตฺถ เย มาติกํ อารุฬฺหา, เต อฏฺฐ ภิกฺขูติ โยเชตพฺพํฯ อุทฺเทสภตฺตนิมนฺตนภตฺตาทิสงฺฆิกภตฺตมาติกาสุ นิมนฺตนภตฺตมาติกาย ฐิติวเสน อารุฬฺเห ภตฺตุทฺเทสเกน วา สยํ วา สงฺฆโต อุทฺทิสาเปตฺวา คเหตฺวา คนฺตพฺพํ, น อตฺตโน รุจิเต คเหตฺวาติ อธิปฺปาโยฯ มาติกํ อาโรเปตฺวาติ ‘‘สงฺฆโต คณฺหามี’’ติอาทินา วุตฺตมาติกาเภทํ ทายกสฺส วิญฺญาเปตฺวาติ อตฺโถฯ

ปฏิพทฺธกาลโต ปน ปฏฺฐายาติ ตตฺเถว วาสสฺส นิพทฺธกาลโต ปฏฺฐายฯ

นิมนฺตนภตฺตกถาวณฺณนา นิฏฺฐิตาฯ

สลากภตฺตกถาวณฺณนา

อุปนิพนฺธิตฺวาติ ลิขิตฺวาฯ คามวเสนปีติ เยภุยฺเยน สมลาภคามวเสนปิฯ พหูนิ สลากภตฺตานีติ ติํสํ วา จตฺตารีสํ วา ภตฺตานิฯ ‘‘สเจ โหนฺตี’’ติ อชฺฌาหริตฺวา โยเชตพฺพํฯ

สลฺลกฺเขตฺวาติ ตานิ ภตฺตานิ ปมาณวเสน สลฺลกฺเขตฺวาฯ นิคฺคเหน ทตฺวาติ ทูรํ คนฺตุํ อนิจฺฉนฺตสฺส นิคฺคเหน สมฺปฏิจฺฉาเปตฺวา ทตฺวาฯ ปุน วิหารํ อาคนฺตฺวาติ เอตฺถ วิหารํ อนาคนฺตฺวา ภตฺตํ คเหตฺวา ปจฺฉา วิหาเร อตฺตโน ปาเปตฺวา ภุญฺชิตุมฺปิ วฏฺฏติฯ

เอกเคหวเสนาติ วีถิยมฺปิ เอกปสฺเส ฆรปาฬิยา วเสนฯ อุทฺทิสิตฺวาปีติ อสุกกุเล สลากภตฺตานิ ตุยฺหํ ปาปุณนฺตีติ วตฺวาฯ