เมนู

อุปชฺฌายวตฺตกถาวณฺณนา

[64] วชฺชาวชฺชนฺติ ขุทฺทกํ, มหนฺตญฺจ วชฺชํฯ อุตฺติฏฺฐปตฺตนฺติ เอตฺถ อุตฺติฏฺฐํ นาม ปิณฺฑาย จรณํ วุจฺจติ ‘‘อุตฺติฏฺเฐ นปฺปมชฺเชยฺยา’’ติอาทีสุ (ธ. ป. 168) วิยฯ อุตฺติฏฺฐตฺถาย คหิตํ ปตฺตํ อุตฺติฏฺฐปตฺตํ, เตนาห ‘‘ปิณฺฑาย จรณกปตฺต’’นฺติฯ ตสฺส อุปนาเม โก โทโสติ อาห ‘‘ตสฺมิํ หี’’ติอาทิฯ ตสฺมาติ ยสฺมา มนุสฺสา เอตสฺมิํเยว เอเต ภุญฺชนฺตีติ อุตฺติฏฺฐปตฺเต อุจฺฉิฏฺฐสญฺญิโน, ตสฺมา อุตฺติฏฺฐปตฺตนฺติ วุตฺตํ อุตฺติฏฺฐ-สทฺเทเนว มนุสฺสานํ สญฺญาย อุจฺฉิฏฺฐตาปิ คมฺมตีติฯ เกจิ ปน ‘‘อุจฺฉิฏฺฐสทฺเทน สมานตฺโถ อุตฺติฏฺฐสทฺโท’’ติ วทนฺติฯ ‘‘อุตฺติฏฺฐา’’ติ ตฺวาปจฺจยนฺโตปิ โหตีติ อาห ‘‘อุฏฺฐหิตฺวา’’ติฯ อุปชฺฌายํ คเหตุนฺติ อุปชฺฌายตฺตํ มนสา คเหตุํ, ยาจนวจเนน ตสฺส อนุมติํ คเหตุนฺติ วา อตฺโถฯ

[65] ปติสฺสยนํ ปติสฺโส, ครุํ นิสฺสาย วตฺตนภาโว, ยํกิญฺจิ คารวนฺติ อตฺโถฯ สห ปติสฺเสน สปฺปติสฺโส, ปรํ เชฏฺฐํ กตฺวา ตสฺโสวาเท วตฺตนตาติ อตฺโถฯ เตนาห ‘‘เชฏฺฐกภาวญฺจ อุปฏฺฐเปตฺวา’’ติฯ สาหูติ สาธุ สุนฺทรํฯ ลหูติ อครุ, สุภรตาติ อตฺโถฯ โอปายิกนฺติ อุปายปฏิสํยุตฺตํ, เอวํ ปฏิปชฺชนํ นิตฺถรณูปาโยติ อตฺโถฯ ปติรูปนฺติ สามีจิกมฺมมิทนฺติ อตฺโถฯ ปาสาทิเกนาติ ปสาทาวเหน กายวจีปโยเคน สมฺปาเทหีติ อตฺโถฯ กาเยนาติ เอตทตฺถวิญฺญาปกํ หตฺถมุทฺทาทิํ ทสฺเสนฺโต กาเยน วิญฺญาเปติฯ สาธูติ สมฺปฏิจฺฉนํ สนฺธายาติ อุปชฺฌาเยน ‘‘สาหู’’ติอาทีสุ วุตฺเตสุ สทฺธิวิหาริกสฺส ‘‘สาธู’’ติ สมฺปฏิจฺฉนํ วจนํ สนฺธาย ‘‘กาเยน วิญฺญาเปตี’’ติอาทิ วุตฺตนฺติ อธิปฺปาโยฯ อายาจนทานมตฺเตนาติ สทฺธิวิหาริกสฺส ปฐมํ อายาจนมตฺเตน, ตโต อุปชฺฌายสฺส จ ‘‘สาหู’’ติอาทินา วจนมตฺเตนาติ อตฺโถฯ

[66] อสฺสาติ สทฺธิวิหาริกสฺสฯ ทฺเว จีวรานีติ อุตฺตราสงฺคํ, สงฺฆาฏิญฺจ สนฺธาย วทติฯ อิโต ปฏฺฐายาติ ‘‘น อุปชฺฌายสฺส ภณมานสฺสา’’ติ เอตฺถ น-การโต ปฏฺฐาย, เตน ‘‘นาติทูเร’’ติอาทีสุ น-การปฏิสิทฺเธสุ อาปตฺติ นตฺถีติ ทสฺเสติฯ สพฺพตฺถ ทุกฺกฏาปตฺตีติ อาปทาอุมฺมตฺตขิตฺตจิตฺตเวทนฏฺฏตาทีหิ วินา ปณฺณตฺติํ อชานิตฺวาปิ วทนฺตสฺส คิลานสฺสปิ ทุกฺกฏเมวฯ อาปทาสุ หิ อนฺตรนฺตรา กถา วตฺตุํ วฏฺฏติฯ เอวมญฺเญสุปิ น-การปฏิสิทฺเธสุ อีทิเสสุ, อิตเรสุ ปน คิลาโนปิ น มุจฺจติฯ ปาฬิยํ ‘‘เหฏฺฐาปีฐํ วา ปรามสิตฺวา’’ติ อิทํ ปุพฺเพ ตตฺถ ฐปิตปตฺตาทินา อสงฺฆฏฺฏนตฺถาย วุตฺตํ, จกฺขุนา โอโลเกตฺวาปิ อญฺเญสํ อภาวํ ญตฺวาปิ ฐเปตุํ วฏฺฏติ เอวฯ อาปตฺติยา อาสนฺนนฺติ อาปตฺติกรณเมวฯ

คาเมติ อนฺโตคาเม ตาทิเส มณฺฑปาทิมฺหิฯ อนฺตรฆเรติ อนฺโตเคเหฯ ปฏิกฺกมเนติ อาสนสาลายํฯ โธตวาลิกายาติ อุทเกน คตฏฺฐาเน นิรชาย ปริสุทฺธวาลิกายฯ นิทฺธูเมติ ชนฺตาฆเร ชลิยมานอคฺคิธูมรหิเตฯ

ชนฺตาฆรญฺหิ นาม หิมปาตพหุเลสุ เทเสสุ ตปฺปจฺจยโรคปีฬาทินิวารณตฺถํ สรีรเสทาปนฏฺฐานํฯ ตตฺถ กิร อนฺธการปฏิจฺฉนฺนตาย พหูปิ เอกโต ปวิสิตฺวา จีวรํ นิกฺขิปิตฺวา อคฺคิตาปปริหาราย มตฺติกาย มุขํ ลิมฺปิตฺวา สรีรํ ยาวทตฺถํ เสเทตฺวา จุณฺณาทีหิ อุพฺพฏฺเฏตฺวา นหายนฺติฯ เตเนว ปาฬิยํ ‘‘จุณฺณํ สนฺเนตพฺพ’’นฺติอาทิ วุตฺตํฯ อุลฺโลกนฺติ อุทฺธํ โอโลกนฏฺฐานํฯ อุปริภาคนฺติ อตฺโถฯ

อญฺญตฺถ เนตพฺโพติ ยตฺถ วิหรโต สาสเน อนภิรติ อุปฺปนฺนา, ตโต อญฺญตฺถ กลฺยาณมิตฺตาทิสมฺปตฺติยุตฺตฏฺฐาเน เนตพฺโพฯ วิสภาคปุคฺคลานนฺติ ลชฺชิโน วา อลชฺชิโน วา อุปชฺฌายสฺส อวฑฺฒิกาเม สนฺธาย วุตฺตํฯ สเจ ปน อุปชฺฌาโย อลชฺชี โอวาทมฺปิ น คณฺหาติ, ลชฺชิโน จ เอตสฺส วิสภาคา โหนฺติ, ตตฺถ อุปชฺฌายํ วิหาย ลชฺชีเหว สทฺธิํ อามิสาทิปริโภโค กาตพฺโพฯ อุปชฺฌายาทิภาโว เหตฺถ น ปมาณนฺติ ทฏฺฐพฺพํฯ ปริเวณํ คนฺตฺวาติ อุปชฺฌายสฺส ปริเวณํ คนฺตฺวาฯ ‘‘น สุสาน’’นฺติ อิทํ อุปลกฺขณํ, อุปจารสีมโต พหิ คนฺตุกาเมน อนาปุจฺฉา คนฺตุํ น วฏฺฏติฯ

อุปชฺฌายวตฺตกถาวณฺณนา นิฏฺฐิตาฯ

สทฺธิวิหาริกวตฺตกถาวณฺณนา

[67] สทฺธิวิหาริกวตฺตกถายํ สงฺคเหตพฺโพ อนุคฺคเหตพฺโพติอาทีสุ อนาทริยํ ปฏิจฺจ ธมฺมามิเสหิ อสงฺคณฺหนฺตานํ อาจริยุปชฺฌายานํ ทุกฺกฏํ วตฺตเภทตฺตาฯ เตเนว ปริวาเรปิ ‘‘นเทนฺโต อาปชฺชตี’’ติ (ปริ. 322) วุตฺตํฯ เสสํ สุวิญฺเญยฺยเมวฯ

สทฺธิวิหาริกวตฺตกถาวณฺณนา นิฏฺฐิตาฯ