อนฺโตปญฺจาเห ปน ธุรนิกฺเขเปปิ อนาปตฺติ เอว ‘‘อญฺญตฺร จตูหปญฺจาหา’’ติ วุตฺตตฺตา ฯ อุปสมฺปนฺนาย จีวรํ สิพฺพนตฺถาย วิสิพฺเพตฺวา ปญฺจหาติกฺกโม, อนนุญฺญาตการณา ธุรนิกฺเขโปติ ทฺเว องฺคานิฯ
[900] จตุตฺเถ ปญฺจนฺนํ จีวรานํ อปริวตฺตนํ, อนนุญฺญาตการณา ปญฺจาหาติกฺกโมติ ทฺเว องฺคานิฯ
[903] ปญฺจมํ อุตฺตานเมวฯ
[909] ฉฏฺเฐ วิกปฺปนุปคสฺส สงฺเฆ ปริณตตา, วินา อานิสํสทสฺสเนน อนฺตรายกรณนฺติ ทฺเว องฺคานิฯ
[911] สตฺตมํ อุตฺตานเมวฯ
[916] อฏฺฐเม กุมฺภถูณํ นาม กุมฺภสทฺโท, เตน กีฬนฺตีติ กุมฺภถูณิกาฯ เตนาห ‘‘ฆฏเกน กีฬนกา’’ติฯ ทีฆนิกายฏฺฐกถายํ ปน ‘‘จตุรสฺสอมฺพณกตาฬ’’นฺติ วุตฺตํฯ ตญฺหิ รุกฺขสาราทิมยํ อนฺโตฉิทฺทํ จตูสุ ปสฺเสสุ จมฺโมนทฺธํ วาทิตภณฺฑํ, ยํ ‘‘พิมฺพิสก’’นฺติปิ วุจฺจติ, ตํ วาเทนฺตาปิ กุมฺภถูณิกาฯ เตนาห ‘‘พิมฺพิสกวาทิตกาติปิ วทนฺตี’’ติฯ
[918] ปาฬิยํ กปฺปกตนฺติ กปฺปกตํ นิวาสนปารุปนูปคํฯ สมณจีวรตา, อนนุญฺญาตานํ ทานนฺติ ทฺเว องฺคานิฯ
[921-931] นวมทสมานิ อุตฺตานาเนวฯ
นิฏฺฐิโต นคฺควคฺโค ตติโยฯ
4. ตุวฏฺฏวคฺโค
10. ทสมสิกฺขาปทวณฺณนา
[976] ตุวฏฺฏวคฺคสฺส ทสเม จาริกาย อปกฺกมนํ ปณฺณตฺติวชฺชเมวฯ ปณฺณตฺติวิชานนจิตฺเตน สจิตฺตกตํ สนฺธาย ปเนตฺถ ‘‘โลกวชฺช’’นฺติ ทฏฺฐพฺพํฯ เสสํ สพฺพตฺถ อุตฺตานเมวฯ
นิฏฺฐิโต ตุวฏฺฏวคฺโค จตุตฺโถฯ
5. จิตฺตาคารวคฺโค
1. ปฐมาทิสิกฺขาปทวณฺณนา
[978] จิตฺตาคารวคฺคสฺส ปฐเม ปาเฏกฺกา อาปตฺติโยติ คีวาย ปริวตฺตนปฺปโยคคณนายฯ
[1015] นวเม หตฺถิอาทีสุ สิปฺป-สทฺโท ปจฺเจกํ โยเชตพฺโพ, ตถา อาถพฺพณาทีสุ มนฺต-สทฺโทฯ ตตฺถ อาถพฺพณมนฺโต นาม อาถพฺพณเวทวิหิโต ปรูปฆาตกโร มนฺโตฯ ขีลนมนฺโต นาม เวริมารณตฺถาย สารทารุมยํ ขีลํ มนฺเตตฺวา ปถวิยํ อาโกฏนมนฺโตฯ อคทปฺปโยโค วิสปฺปโยชนํฯ นาคมณฺฑลนฺติ สปฺปานํ ปเวสนิวารณตฺถํ มณฺฑลพนฺธมนฺโตฯ เสสํ สพฺพตฺถ อุตฺตานเมวฯ
นิฏฺฐิโต จิตฺตาคารวคฺโค ปญฺจโมฯ
[1025-1116] อารามวคฺเค , คพฺภินิวคฺเค จ สพฺพํ อุตฺตานเมวฯ
8. กุมาริภูตวคฺโค
1. ปฐมาทิสิกฺขาปทวณฺณนา
[1119] อฏฺฐมวคฺคสฺส ปฐเม สพฺพปฐมา ทฺเว มหาสิกฺขมานาติ คพฺภินิวคฺเค (ปาจิ. 1067 อาทโย) สพฺพปฐมํ วุตฺตา ทฺเวฯ สิกฺขมานา อิจฺเจว วตฺตพฺพาติ สมฺมุติกมฺมาทีสุ อญฺญถา วุตฺเต กมฺมํ กุปฺปตีติ อธิปฺปาโยฯ
[1167] เอกาทสเม ปาริวาสิเยน ฉนฺททาเนนาติ ปริวุตฺเถน นวิกปฺปวุตฺเถน วิคเตน ฉนฺททาเนนาติ อตฺโถ, ฉนฺทวิสฺสชฺชนมตฺเตน วาฯ
[1168] ‘‘วุฏฺฐิตายา’’ติ เอเตน ‘‘อิทานิ กมฺมํ น กริสฺสามา’’ติ ธุรํ นิกฺขิปิตฺวา กาเยน อวุฏฺฐหิตฺวา นิสินฺนายปิ ปริสาย กมฺมํ กาตุํ น วฏฺฏตีติ ทสฺเสติฯ เตนาห ‘‘ฉนฺทํ อวิสฺสชฺเชตฺวา อวุฏฺฐิตายา’’ติฯ