[836-7] ทสเม เตสํเยวาติ เยสํ นิจฺจํ ปสฺสติฯ อาราเม ฐตฺวาติ ฐิตนิสนฺนฏฺฐาเน เอว ฐตฺวา สมนฺตโต คีวํ ปริวตฺเตตฺวาปิ ปสฺสติ, อนาปตฺติฯ ฐิตฏฺฐานโต คนฺตฺวา ปสฺสิตุํ น วฏฺฏติฯ เกจิ ปน ‘‘วฏฺฏตี’’ติ วทนฺติฯ ตํ ปน ‘‘ทสฺสนาย คจฺเฉยฺย, ปาจิตฺติย’’นฺติ สามญฺญโต คมนสฺส ปฏิกฺขิตฺตตฺตา, อนาปตฺติยมฺปิ คมนาย อวุตฺตตฺตา จ น คเหตพฺพํฯ นจฺจาทิตา, อนนุญฺญาตการณา คมนํ, ทสฺสนาทิ จาติ ตีณิ องฺคานิฯ
นิฏฺฐิโต ลสุณวคฺโค ปฐโมฯ
2. อนฺธการวคฺโค
1. ปฐมาทิสิกฺขาปทวณฺณนา
[841] ทุติยวคฺคสฺส ปฐเม ทาเน วาติ ทานนิมิตฺตํฯ รตฺตนฺธกาเร ปุริสสฺส หตฺถปาเส ฐานาทิ, รโหเปกฺขา, สหายาภาโวติ ตีณิ องฺคานิฯ
[842-850] ทุติยาทีนิ อุตฺตานานิฯ
[854] ปญฺจเม ปลฺลงฺกสฺส อโนกาเสติ อูรุพทฺธาสนสฺส อปฺปโหนเกฯ ปุเรภตฺตํ อนฺตรฆเร ปลฺลงฺกปฺปโหนกาสเน นิสชฺชา, อนนุญฺญาตการณา อนาปุจฺฉา วุตฺตปริจฺเฉทาติกฺกโมติ ทฺเว องฺคานิฯ
[860-879] ฉฏฺฐาทีนิ อุตฺตานานิฯ
นิฏฺฐิโต อนฺธการวคฺโค ทุติโยฯ
3. นคฺควคฺโค
1. ปฐมาทิสิกฺขาปทวณฺณนา
[883-887] ตติยวคฺคสฺส ปฐมทุติยานิ อุตฺตานานิฯ
[893] ตติเย วิสิพฺเพตฺวาติ วิชเฏตฺวาฯ ธุรํ นิกฺขิตฺตมตฺเตติ วิสิพฺพนทิวสโต ปญฺจ ทิวเส อติกฺกาเมตฺวา ธุรํ นิกฺขิตฺตมตฺเตฯ
อนฺโตปญฺจาเห ปน ธุรนิกฺเขเปปิ อนาปตฺติ เอว ‘‘อญฺญตฺร จตูหปญฺจาหา’’ติ วุตฺตตฺตา ฯ อุปสมฺปนฺนาย จีวรํ สิพฺพนตฺถาย วิสิพฺเพตฺวา ปญฺจหาติกฺกโม, อนนุญฺญาตการณา ธุรนิกฺเขโปติ ทฺเว องฺคานิฯ
[900] จตุตฺเถ ปญฺจนฺนํ จีวรานํ อปริวตฺตนํ, อนนุญฺญาตการณา ปญฺจาหาติกฺกโมติ ทฺเว องฺคานิฯ
[903] ปญฺจมํ อุตฺตานเมวฯ
[909] ฉฏฺเฐ วิกปฺปนุปคสฺส สงฺเฆ ปริณตตา, วินา อานิสํสทสฺสเนน อนฺตรายกรณนฺติ ทฺเว องฺคานิฯ
[911] สตฺตมํ อุตฺตานเมวฯ
[916] อฏฺฐเม กุมฺภถูณํ นาม กุมฺภสทฺโท, เตน กีฬนฺตีติ กุมฺภถูณิกาฯ เตนาห ‘‘ฆฏเกน กีฬนกา’’ติฯ ทีฆนิกายฏฺฐกถายํ ปน ‘‘จตุรสฺสอมฺพณกตาฬ’’นฺติ วุตฺตํฯ ตญฺหิ รุกฺขสาราทิมยํ อนฺโตฉิทฺทํ จตูสุ ปสฺเสสุ จมฺโมนทฺธํ วาทิตภณฺฑํ, ยํ ‘‘พิมฺพิสก’’นฺติปิ วุจฺจติ, ตํ วาเทนฺตาปิ กุมฺภถูณิกาฯ เตนาห ‘‘พิมฺพิสกวาทิตกาติปิ วทนฺตี’’ติฯ
[918] ปาฬิยํ กปฺปกตนฺติ กปฺปกตํ นิวาสนปารุปนูปคํฯ สมณจีวรตา, อนนุญฺญาตานํ ทานนฺติ ทฺเว องฺคานิฯ
[921-931] นวมทสมานิ อุตฺตานาเนวฯ
นิฏฺฐิโต นคฺควคฺโค ตติโยฯ
4. ตุวฏฺฏวคฺโค
10. ทสมสิกฺขาปทวณฺณนา
[976] ตุวฏฺฏวคฺคสฺส ทสเม จาริกาย อปกฺกมนํ ปณฺณตฺติวชฺชเมวฯ ปณฺณตฺติวิชานนจิตฺเตน สจิตฺตกตํ สนฺธาย ปเนตฺถ ‘‘โลกวชฺช’’นฺติ ทฏฺฐพฺพํฯ เสสํ สพฺพตฺถ อุตฺตานเมวฯ
นิฏฺฐิโต ตุวฏฺฏวคฺโค จตุตฺโถฯ
5. จิตฺตาคารวคฺโค
