10. จีวรอปนิธานสิกฺขาปทวณฺณนา
[378] ทสเม ปาฬิยํ อนฺตมโส หสาเปกฺโขปีติ อปิ-สทฺเทน อเถยฺยจิตฺตํ โกเธน ทุกฺขาเปตุกามํ, อวณฺณํ ปกาเสตุกามญฺจ สงฺคยฺหติฯ เตเนว ‘‘ติเวทน’’นฺติ วุตฺตํฯ อุปสมฺปนฺนสฺส ปตฺตาทีนํ อปนิธานํ, วิเหเสตุกามตาทีติ ทฺเว องฺคานิฯ
จีวรอปนิธานสิกฺขาปทวณฺณนา นิฏฺฐิตาฯ
นิฏฺฐิโต สุราปานวคฺโค ฉฏฺโฐฯ
7. สปฺปาณกวคฺโค
1. สญฺจิจฺจปาณสิกฺขาปทวณฺณนา
[382] สตฺตมสฺส ปฐเม อุสุํ สรํ อสติ ขิปตีติ อิสฺสาโสฯ น เหตฺถ กิญฺจิ ชีวิตํ นาม วิสุํ ติฏฺฐตีติ สมฺพนฺโธฯ ตตฺถ ปาเณติ สตฺเตฯ อปฺปมตฺเตน วตฺตํ กาตพฺพนฺติ ยถา ปาณกานํ วิเหสาปิ น โหติ, เอวํ สลฺลกฺเขตฺวา โอตาปนสมฺมชฺชนาทิวตฺตํ กาตพฺพํฯ เสสํ วุตฺตนยเมวฯ
สญฺจิจฺจปาณสิกฺขาปทวณฺณนา นิฏฺฐิตาฯ
2. สปฺปาณกสิกฺขาปทวณฺณนา
[387] ทุติเย อุทกสณฺฐานกปฺปเทเสติ กทฺทมปาสาณาทิภูมิยํฯ ตตฺถาติ อาสิตฺเต กปฺปิยอุทเกฯ เสสํ วุตฺตนยเมวฯ
สปฺปาณกสิกฺขาปทวณฺณนา นิฏฺฐิตาฯ
3. อุกฺโกฏนสิกฺขาปทวณฺณนา
[392] ตติเย ‘‘ตสฺส ภิกฺขุโน สนฺติกํ คนฺตฺวา’’ติ วุตฺตตฺตา ยสฺส อธิกรณํ สงฺฆกมฺเมน นิหตํ, ตสฺส สมฺมุเข เอว อุกฺโกเฏนฺตสฺส ปาจิตฺติยํฯ ปรมฺมุเข ปน ทุกฺกฏเมวฯ