เมนู

1. สุราปานสิกฺขาปทวณฺณนา

[328] ฉฏฺฐวคฺคสฺส ปฐเม ปาฬิยํ กิณฺณปกฺขิตฺตาติ ปิฏฺฐปูวาทิํ อปกฺขิปิตฺวา กิณฺณสงฺขาตํ ธญฺญงฺกุราทิสุราพีชํ ปกฺขิปิตฺวา กตาฯ สมฺภารสํยุตฺตาติ สาสปาทิอเนกสมฺภาเรหิ สญฺญุตฺตาฯ

มธุกตาลนาฬิเกราทิปุปฺผาทิรโส จิรปริวาสิโต ปุปฺผาสโว นามฯ ตถา ปนสาทิ ผลาสโวฯ มุทฺทิกรโส มธฺวาสโวฯ อุจฺฉุรโส คุฬาสโวฯ ติผลติกฏุกาทินานาสมฺภารานํ รโส จิรปริวาสิโต สมฺภารสํยุตฺโตพีชโต ปฏฺฐายาติ ยถาวุตฺตานํ ปิฏฺฐาทีนํ มชฺชตฺถาย ภาชเน ปกฺขิตฺตกาลโต ปฏฺฐายฯ

[329] โลณโสวีรกํ สุตฺตญฺจ อเนเกหิ ทพฺพสมฺภาเรหิ อภิสงฺขโต เภสชฺชวิเสโสฯ อุยฺยุตฺตสิกฺขาปทานํ อจิตฺตกโลกวชฺเชสุ โลกวชฺชตา ปุพฺเพ วุตฺตนยาวาติ ตตฺถ กิญฺจิปิ อวตฺวา อิธ เตหิ อสาธารณวตฺถุวิเสสสิทฺธาย อจิตฺตกปกฺเขปิ อกุสลจิตฺตตาย ตํ โลกวชฺชตาทิวิเสสํ ทสฺเสตุเมว ‘‘วตฺถุอชานนตาย เจตฺถา’’ติอาทินา วุตฺตนฺติ เวทิตพฺพํฯ ยํ ปเนตฺถ วตฺตพฺพํ, ตํ ปฐมปาราชิกวณฺณนายํ วิตฺถารโต สารตฺถทีปนิยํ วิรทฺธฏฺฐานวิโสธนวเสน วุตฺตนฺติ ตตฺเถว คเหตพฺพํฯ มชฺชภาโว, ตสฺส ปานญฺจาติ อิมาเนตฺถ ทฺเว องฺคานิฯ

สุราปานสิกฺขาปทวณฺณนา นิฏฺฐิตาฯ

2. องฺคุลิปโตทกสิกฺขาปทวณฺณนา

[330] ทุติเย หสาธิปฺปายตา, อุปสมฺปนฺนสฺส กาเยน กายามสนนฺติ อิมาเนตฺถ ทฺเว องฺคานิฯ

องฺคุลิปโตทกสิกฺขาปทวณฺณนา นิฏฺฐิตาฯ

3. หสธมฺมสิกฺขาปทวณฺณนา

[338] ตติเย ปาฬิยํ หสธมฺเม หสธมฺมสญฺญีติอาทีสุ อุปฺลวาทิมตฺตํ กิํ หสธมฺโม โหตีติ คหณวเสน สติ กรณีเย กริยมานํ หสธมฺมํ หสธมฺโมติ คหณวเสน อตฺโถ เวทิตพฺโพฯ อุสฺสาเรนฺโตติ อุทเก ฐิตํ นาวํ ตีเร อาโรเปนฺโตฯ

ปตนุปฺปตนวาเรสูติ อุทกสฺส อุปริตเล มณฺฑูกคติยา ปตนุปฺปตนวเสน คมนตฺถํ ขิตฺตาย เอกิสฺสา กถลาย วเสน วุตฺตํฯ อุทกสฺส อุปริโคปฺผกตา, หสาธิปฺปาเยน กีฬนนฺติ ทฺเว องฺคานิฯ

หสธมฺมสิกฺขาปทวณฺณนา นิฏฺฐิตาฯ

4. อนาทริยสิกฺขาปทวณฺณนา

[344] จตุตฺเถ สุตฺตานุโลมนฺติ มหาปเทสาฯ อฏฺฐกถาติปิ วทนฺติฯ อุปสมฺปนฺนสฺส ปญฺญตฺเตน วจนํ, อนาทริยกรณนฺติ ทฺเว องฺคานิฯ

อนาทริยสิกฺขาปทวณฺณนา นิฏฺฐิตาฯ

5. ภิํสาปนสิกฺขาปทวณฺณนา

[345] ปญฺจเม อุปสมฺปนฺนตา, ตสฺส ทสฺสนสวนวิสเย ภิํสาเปตุกามตาย วายมนนฺติ ทฺเว องฺคานิฯ

ภิํสาปนสิกฺขาปทวณฺณนา นิฏฺฐิตาฯ

6. โชติสิกฺขาปทวณฺณนา

[354] ฉฏฺเฐ อลาตํ ปติตนฺติ อคฺคิกปาลโต พหิ ปติตํฯ วิชฺฌาตนฺติ วิชฺฌาตํ อลาตํ กปาลคฺคิมฺหิ ปกฺขิปิตฺวา ชาเลนฺตสฺส ปาจิตฺติยํ, ตถา เกวลํ อินฺธนํ ปาเตนฺตสฺสปิ วิชฺฌาตํ กปาลคฺคิํ มุขวาตาทินา อุชฺชาเลนฺตสฺสปิฯ คิลานตาทิการณาภาโว, วิสิพฺเพตุกามตา, สมาทหนนฺติ ตีณิ องฺคานิฯ

โชติสิกฺขาปทวณฺณนา นิฏฺฐิตาฯ