อธิกรณสมถา

อิเม โข ปนายฺยาโย, สตฺต อธิกรณสมถา

ธมฺมา อุทฺเทสํ อาคจฺฉนฺติฯ

อุปฺปนฺนุปฺปนฺนานํ อธิกรณานํ สมถาย วูปสมาย สมฺมุขาวินโย ทาตพฺโพฯ

สติวินโย ทาตพฺโพฯ

อมูฬฺหวินโย ทาตพฺโพฯ

ปฏิญฺญาย กาเรตพฺพํฯ

เยภุยฺยสิกาฯ

ตสฺสปาปิยสิกาฯ

ติณวตฺถารโกติฯ

อุทฺทิฏฺฐา โข อยฺยาโย สตฺต อธิกรณสมถา ธมฺมาฯ ตตฺถายฺยาโย ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา , ตติยมฺปิ ปุจฺฉามิ, กจฺจิตฺถ ปริสุทฺธา, ปริสุทฺเธตฺถายฺยาโย, ตสฺมา ตุณฺหี, เอวเมตํ ธารยามีติฯ

อธิกรณสมถา นิฏฺฐิตาฯ

อุทฺทิฏฺฐํ โข อยฺยาโย นิทานํ,

อุทฺทิฏฺฐา อฏฺฐ ปาราชิกา ธมฺมา,

อุทฺทิฏฺฐา สตฺตรส สงฺฆาทิเสสา ธมฺมา,

อุทฺทิฏฺฐา ติํส นิสฺสคฺคิยา ปาจิตฺติยา ธมฺมา,

อุทฺทิฏฺฐา ฉสฏฺฐิ สตา ปาจิตฺติยา ธมฺมา,

อุทฺทิฏฺฐา อฏฺฐ ปาฏิเทสนียา ธมฺมา,

อุทฺทิฏฺฐา เสขิยา ธมฺมา,

อุทฺทิฏฺฐา สตฺต อธิกรณสมถา ธมฺมา, เอตฺตกํ ตสฺส ภควโต สุตฺตาคตํ สุตฺตปริยาปนฺนํ อนฺวทฺธมาสํ อุทฺเทสํ อาคจฺฉติ, ตตฺถ สพฺพาเหว สมคฺคาหิ สมฺโมทมานาหิ อวิวทมานาหิ สิกฺขิตพฺพนฺติฯ

วิตฺถารุทฺเทโส จตุตฺโถฯ

ภิกฺขุนิปาติโมกฺขํ นิฏฺฐิตํฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

กงฺขาวิตรณี-อฏฺฐกถา

คนฺถารมฺภกถา

พุทฺธํ ธมฺมญฺจ สงฺฆญฺจ, วิปฺปสนฺเนน เจตสา;

วนฺทิตฺวา วนฺทนามาน, ปูชาสกฺการภาชนํฯ

เถรวํสปฺปทีปานํ, ถิรานํ วินยกฺกเม;

ปุพฺพาจริยสีหานํ, นโม กตฺวา กตญฺชลีฯ

ปาโมกฺขํ อนวชฺชานํ, ธมฺมานํ ยํ มเหสินา;

มุขํ โมกฺขปฺปเวสาย, ปาติโมกฺขํ ปกาสิตํฯ

สูรเตน นิวาเตน, สุจิสลฺเลขวุตฺตินา;

วินยาจารยุตฺเตน, โสณตฺเถเรน ยาจิโตฯ

ตตฺถ สญฺชาตกงฺขานํ, ภิกฺขูนํ ตสฺส วณฺณนํ;

กงฺขาวิตรณตฺถาย, ปริปุณฺณวินิจฺฉยํฯ

มหาวิหารวาสีนํ, วาจนามคฺคนิสฺสิตํ;

วตฺตยิสฺสามิ นาเมน, กงฺขาวิตรณิํ สุภนฺติฯ