เมนู

[162] ยา ปน ภิกฺขุนี อฏฺฐิมยํ วา ทนฺตมยํ วา วิสาณมยํ วา สูจิฆรํ การาเปยฺย, เภทนกํ ปาจิตฺติยํฯ

มญฺจปีฐสิกฺขาปทํ

[163] นวํ ปน ภิกฺขุนิยา มญฺจํ วา ปีฐํ วา การยมานาย อฏฺฐงฺคุลปาทกํ กาเรตพฺพํ สุคตงฺคุเลน อญฺญตฺร เหฏฺฐิมาย อฏนิยาฯ ตํ อติกฺกาเมนฺติยา เฉทนกํ ปาจิตฺติยํฯ

ตูโลนทฺธสิกฺขาปทํ

[164] ยา ปน ภิกฺขุนี มญฺจํ วา ปีฐํ วา ตูโลนทฺธํ การาเปยฺย, อุทฺทาลนกํ ปาจิตฺติยํฯ

กณฺฑุปฺปฏิจฺฉาทิสิกฺขาปทํ

[165] กณฺฑุปฺปฏิจฺฉาทิํ ปน ภิกฺขุนิยา การยมานาย ปมาณิกา กาเรตพฺพา, ตตฺริทํ ปมาณํ, ทีฆโส จตสฺโส วิทตฺถิโย สุคตวิทตฺถิยา, ติริยํ ทฺเว วิทตฺถิโยฯ ตํ อติกฺกาเมนฺติยา เฉทนกํ ปาจิตฺติยํฯ

นนฺทสิกฺขาปทํ

[166] ยา ปน ภิกฺขุนี สุคตจีวรปฺปมาณํ จีวรํ การาเปยฺย, อติเรกํ วา, เฉทนกํ ปาจิตฺติยํฯ ตตฺริทํ สุคตสฺส สุคตจีวรปฺปมาณํ, ทีฆโส นว วิทตฺถิโย สุคตวิทตฺถิยา, ติริยํ ฉ วิทตฺถิโย, อิทํ สุคตสฺส สุคตจีวรปฺปมาณนฺติฯ

ธมฺมิกวคฺโค โสฬสโมฯ

อุทฺทิฏฺฐา โข, อยฺยาโย, ฉสฏฺฐิสตา ปาจิตฺติยา ธมฺมาฯ ตตฺถายฺยาโย, ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุทฺเธตฺถายฺยาโย, ตสฺมา ตุณฺหี, เอวเมตํ ธารยามีติฯ

ปาจิตฺติยา นิฏฺฐิตาฯ

ปาฏิเทสนียา

อิเม โข ปนายฺยาโย อฏฺฐ ปาฏิเทสนียา

ธมฺมา อุทฺเทสํ อาคจฺฉนฺติฯ

สปฺปิวิญฺญาปนสิกฺขาปทํ

[1] ยา ปน ภิกฺขุนี อคิลานา สปฺปิํ วิญฺญาเปตฺวา ภุญฺเชยฺย, ปฏิเทเสตพฺพํ ตาย ภิกฺขุนิยา ‘‘คารยฺหํ, อยฺเย, ธมฺมํ อาปชฺชิํ อสปฺปายํ ปาฏิเทสนียํ, ตํ ปฏิเทเสมี’’ติฯ

เตลวิญฺญาปนสิกฺขาปทํ

[2] ยา ปน ภิกฺขุนี อคิลานา เตลํ วิญฺญาเปตฺวา ภุญฺเชยฺย…เป.… ตํ ปฏิเทเสมีติฯ

มธุวิญฺญาปนสิกฺขาปทํ

[3] ยา ปน ภิกฺขุนี อคิลานา มธุํ วิญฺญาเปตฺวา ภุญฺเชยฺย…เป.… ตํ ปฏิเทเสมีติฯ

ผาณิตวิญฺญาปนสิกฺขาปทํ

[4] ยา ปน ภิกฺขุนี อคิลานา ผาณิตํ วิญฺญาเปตฺวา ภุญฺเชยฺย…เป.… ตํ ปฏิเทเสมีติฯ

มจฺฉวิญฺญาปนสิกฺขาปทํ

[5] ยา ปน ภิกฺขุนี อคิลานา มจฺฉํ วิญฺญาเปตฺวา ภุญฺเชยฺย…เป.… ตํ ปฏิเทเสมีติฯ

มํสวิญฺญาปนสิกฺขาปทํ

[6] ยา ปน ภิกฺขุนี อคิลานา มํสํ วิญฺญาเปตฺวา ภุญฺเชยฺย…เป.… ตํ ปฏิเทเสมีติฯ

ขีรวิญฺญาปนสิกฺขาปทํ

[7] ยา ปน ภิกฺขุนี อคิลานา ขีรํ วิญฺญาเปตฺวา ภุญฺเชยฺย…เป.… ตํ ปฏิเทเสมีติฯ

ทธิวิญฺญาปนสิกฺขาปทํ

[8] ยา ปน ภิกฺขุนี อคิลานา ทธิํ วิญฺญาเปตฺวา ภุญฺเชยฺย, ปฏิเทเสตพฺพํ ตาย ภิกฺขุนิยา ‘‘คารยฺหํ, อยฺเย, ธมฺมํ อาปชฺชิํ อสปฺปายํ ปาฏิเทสนียํ, ตํ ปฏิเทเสมี’’ติฯ

อุทฺทิฏฺฐา โข, อยฺยาโย, อฏฺฐ ปาฏิเทสนียา ธมฺมาฯ ตตฺถายฺยาโย, ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุทฺเธตฺถายฺยาโย, ตสฺมา ตุณฺหี, เอวเมตํ ธารยามีติฯ

ปาฏิเทสนียา นิฏฺฐิตาฯ

เสขิยา

อิเม โข ปนายฺยาโย, เสขิยา ธมฺมา อุทฺเทสํ อาคจฺฉนฺติฯ

ปริมณฺฑลสิกฺขาปทํ

[1] ปริมณฺฑลํ นิวาเสสฺสามีติ สิกฺขา กรณียาฯ

[2] ปริมณฺฑลํ ปารุปิสฺสามีติ สิกฺขา กรณียาฯ

สุปฺปฏิจฺฉนฺนสิกฺขาปทํ

[3] สุปฺปฏิจฺฉนฺนา อนฺตรฆเร คมิสฺสามีติ สิกฺขา กรณียาฯ

[4] สุปฺปฏิจฺฉนฺนา อนฺตรฆเร นิสีทิสฺสามีติ สิกฺขา กรณียาฯ

สุสํวุตสิกฺขาปทํ

[5] สุสํวุตา อนฺตรฆเร คมิสฺสามีติ สิกฺขา กรณียาฯ

[6] สุสํวุตา อนฺตรฆเร นิสีทิสฺสามีติ สิกฺขา กรณียาฯ

โอกฺขิตฺตจกฺขุสิกฺขาปทํ

[7] โอกฺขิตฺตจกฺขุนี อนฺตรฆเร คมิสฺสามีติ สิกฺขา กรณียาฯ

[8] โอกฺขิตฺตจกฺขุนี อนฺตรฆเร นิสีทิสฺสามีติ สิกฺขา กรณียาฯ

อุกฺขิตฺตกสิกฺขาปทํ

[9] น อุกฺขิตฺตกาย อนฺตรฆเร คมิสฺสามีติ สิกฺขา กรณียาฯ

[10] น อุกฺขิตฺตกาย อนฺตรฆเร นิสีทิสฺสามีติ สิกฺขา กรณียาฯ

ปริมณฺฑลวคฺโค ปฐโมฯ

อุชฺชคฺฆิกสิกฺขาปทํ